Tulûm Khâm Bûng Hûai!

(Pasaltha Vana Pa te thiltawn Mak!)

💠 Vanhnuailiana khua Tualte In sang Lal In a dung hlam za sawmnga a sei, a vang hlam sawmhniha lian leh Tualte khaw Zawlbuk pathum lai mai chu Tualte khua-ah chuan a langsar lurh mai a. Lal In leh Zawlbuk kûl run mai chuan Tualte khua chu arpui-in a no a awp ang mai hian a uap khup hian a lang a.

Thing leh raw innawh lai tih takah chu’ng hun lai chuan ral a ti-in tuichawi leh thingphurh ilo fahranah pawh ralmuang lo reng rengin hmeichhiate’n an hun an hmang a, Vanhnuailiana’n khawchhak pawih ral lakah do a lak lai a ni a, rawlrala che te an hlauhawm em em mai a, nunau pawh zuah loa an lu lak an chin avangin pasaltha ngah khua an bawh ruih ruih a, Vanhnuailiana khua-ah chuan pasaltha hmingthang tak tak, Zampuimanga te, Vanapa te, Chawngduma Tlau te, Zabiaka te leh pasaltha dang ral sam kuai pha chin ngat pawh an tam avangin khua pawh a ngah chak hle a, Awnnu atanga Tualte a kai meuh chuan In sang chuang an kai der tawh a ni.

Tualte atangin Lungdup kai an tum a, an ram zuan tur en thlithlai turin Vanapa hovin pasaltha sawmhnih zet leh Lal Upa pahnih nen Lungdup ram pan turin an inpuahchah ta a.

Lungdup hi Kelkang khua atanga hmar lam a ni a, Kelkang Biak In atangin chiang takin a lang thei a, Dilkawn ram chhunga awm a ni a; ramngaw dur dup mai a la ni.

Khuangchawi thla a de tan tihah chuan zan sarih fai nen an chhuak ta a, tlangdung zawhin an kal ngar ngar a, sa hnu a tamin sapui kut hrûkna hnuhma a tam mai a, ral nen intawk thut thei reng an nih avangin beng an chhi ngun em em mai a, an Awlan ngul sei reng ruang nen chuan inring rengin an kal miah miah a.

Tuipui an pel a, tuipui atanga rei fe an kal leh hnu chuan khua a tlai lam ta bawk a, riahbuk an sual ta a, an riahbuk sualna atanga chhak lamah chuan bung lian em em mai hi a ding khung mai a, bung hnuai maiah chuan puk bel hul mai hi a kaw bawk a, a landan chuan a nelawm hranpa loh hle mai a. Eng huai huai emaw awm duhna chi tak niin a lang a, chu lai vel chu chhun pachangah pawh ni a hmu ngai lo tih hriat taka hmun chukchurudun hi a ni a.

Chu’ng ho zingah chuan tlangval pahnih an kal ve a, ral pawh la that lo, pasaltha hnung zuia ramchhuak ve thin an ni a, Lalkhuma leh Lianhnuna te an ni a, mawngzang leh taima tak an nih avangin an hruai tel ve fo thin a.

Zanriah an ei kham a, an riahbûk kawtah chuan meipui an chhep a, an titi luam a.

Chutihlai chuan an chhaka Bung zar atang chuan thawm mak tak hi a rawn ri su su mai a, a reh leh mai a, an phawklêk tlang hle mai a, Lianhnuna chu a thlabar viau mai a, mahse a dawihzep bika tan a duh loh avangin a intipachang hram hram a.

Chawngduma chuan, “Enge ni na vei, ka han finfiah ngat teh ang, Lianhnun min rawn zui rawh,” a ti a, Lianhnuna chuan hreh tak chungin a zui ve mai bawk a, a rilru chuan chulai hmun chu chhuahsan vat a chak a, Chawngduma zui chu a chak mawlh lo a ni.

Bung hnuai chu an han thleng a, thil engemaw rim thang nghur mai hi a lo nam vung vung mai a, Lianhnuna awm chu a nuam lo takzet a, Chawngduma chuan a meichher chuan a han en vel a, mahse engmah hmuh tur a awm si lohah chuan chhukthlak leh mai chu an tum ta a.

Lianhnuna chu Chawngduma hnungah chuan a kal a, a inpal khut mai a, a tlu nawk a, kut vawt ngiak nguak hian a hmui chu a rawn hup chut a, Chawngduma chuan thawm engmah hre lo chuan a kal miah miah a, Lianhnuna chu au chhuah a han tum a, mahse a thim mup a, nikhua a hre zui ta lo.

Chawngduma chuan a hnunga kal chu Lianhnuna ni ngei turah a ngai a, a thiante hnen a zuk thlen chuan a han lehhawi a, Lianhnuna chu a hmu ta lo. A thiante pawh chuan, “Khawnge Lianhnuna kha?” an lo ti a, Chawngduma chuan, “Ka hnungah khan a kal ve reng emaw ka tia sin, a ke pen ri pawh ka hre reng alawm,” a ti a, an han au vak vak a, mahse thehhmeh ang hmiahin a reh tlawk tlawk a.

Tuibur hmuamda pawh a tling lo ang tihah chuan an chhaka Bung zar chu na taka sâwitu awm ang mai hian a insâwi luai luai mai a, Lianhnuna aw ngei mai chuan, “Ka nu, ka nu, min chhan rawh,” a rawn ti chuai raih raih a, Zabiaka chuan, “Lianhnun, lo zam hlek suh, i thiante kan awm e,” tih pah chuan inhrosak pahin a bul vela hnim chu a han sam buan buan a.

An vai chuan Bung lam chu an pan a, an silai chu an kap thuai thuai a, thlang lama kawrah chuan Lianhnuna thla chu a ai tuar tuar mai a, Vanapa chuan, “Lianhnun, hlau reng reng suh, Vanapa ka ni ngai e,” tih pah chuan a chem chuan hnim chu a sam buan buan a.

Lianhnuna thla chu a rawn hnai zel a, an awmna bul a rawn thlen chuan a ai thawm pawh chu a reh hmiah a, Zabiaka chuan, “Puk chhung lam saw va lut chhin ila,” tih pah chuan a lut a, puk chhung chu a lo bel hul mai a, “Kha keimah Zabiaka ral hmaa zam ngai lo,” tih pah chuan a silai a han hmet puak dur mai a, a meichher ken chuan puk chhung chu a han en vel a, puk kilkhatah chuan Lianhnuna chu a lo mu reng a. Chawngduma leh Vanapa an rawn lut ve nghal a, Lianhnuna chu an zawn chhuak a.

An riahbukah chuan an zawn thla a, Lianhnuna chu a vawt vek a, a thla ai pawh a reh a, an han sawi nawk nawk a, a harh thei lawk lo a.

A taksa chu a rawn lum tan a, a rum tiah tiah a, a rawn harh ta hlawl a.

Lianhnuna chuan, “Kut hit thlur maiin min rawn hup chut a. Hneh taka lak ang lawp ka ni a, vawilehkhatah puk chhungah min theh thal nawk a, ramhuai tam fe mai hi an lo ding a, an mit te chu a tung sul mai a, an Lalpa hma-ah min din tir a, min melh kul mai a, ‘Engatinge ka phalna la miah loa ka ram chhungah in riah? That phiar tur che u kan ni asin,’ a ti khur khur mai a, min ngaidam rawh i ram chhung a ni tih kan hre lo a ni, ka ti a, ani chuan, ‘zanin bak in riak tur a ni lo, naktukah in chhuahsan ngei ngei tur a ni, a ti a, ka mitkhap kar lek chhungin an bo duak mai a ni,” a ti a.

An inen hrek hrek a, Lianhnuna chu mi dik tawng tlem leh dawt sawi mai mai chi a ni lo tih an hre theuh a, dawt a sawi lo ang tih chu an thiltawn atangin an hre theuh hlawm a.

Zingkhua a var veleh chuan an kal nal nal a. Chulai hmun chu an tlawh leh tawh lo. Chu’ng pasaltha rual Zoram pum dengchhuak khawpa huaisen leh hmingthangte thil tawn chu a hria apiang te’n mak an ti theuh mai a ni.