Eng thil nge!?

Ka zan mu chu ka thangharh thut a enge achhan ka hre lo, sana ka'n en chuan zinglam dar2 a lo ri reng tawh. Eng emaw ni ka hriatthiam si loh chuan min mawlh hneh hle a, thlasik khawvawh lai ni mahse ka thlan te lah chu a tla bawrh bawrh bawk si, ka awm danah chuan ka ngaih a tha lo ru hle a, ka chhungte lah chu anla zanlai suk suk bawk si nen ka awmdan nuam lo engmah lah chu an hre ve der si lo. Ka chhungte hriat hlau ru tak chung chuan ka'n hui pap pap a, ka hlauh rukna e rawh a reh phah chuang lo, chhing khat pawh chhing leh ta lo chuan khua chu ka var ta thak a..

 Ka chhungte'n min hmuh chuan keimahah ngaih that loh rukna nei ni awm tak hian min en deuh hawl hlawm in ka hre tlat a. Nizan lama ka mut that loh leh ka awm dan ka hmelah a lang chhuak a lo ni ang, ka nu chuan, "Tinge nawm loh na i nei em ni?" Ti in min zawt a, ka neih loh thu leh zana ka mut that loh thuin ka chhang ve mai a, tlangval a pumpa hlauh ruk deuh nei tlata ka'n awm ta mai chu ka zak rilru hle a, ka chhungte hriat a tan ka duh der bawk si lo..

   

  Chumi ni chuan nidang ang bawkin ka hnaah chuan ka kal leh a, awm nawm lohna ka nei hran lo, nizan a ka awmdan vel te ka ngaihtuah neuh neuh a, zan ka mut that loh a vang chuan ka mut a chhuak hle a, thingpui ka'n in zo chu ka lo muthlu ta nge nge a, rei vak lo ah chuan ka naka min chhuntu awm ang meiin ka harh zawk a, ka phone rawn ri ral ral pawh la ta lo chuan ka melh ngai chu ka melh ngur ringawt a, eng thil emawni hian ka ti rilah min manin,thawk leh khata ka hmulthi rawn ding ta sung sung mai chuan min ti hlauthawng ta hle mai, chutia ka bing deuh mup mup lai chuan phone ka dawng leh hlawl mai, ka nau phone a ni. Ka nau chuan tihian a rawn sawi ta a...

   "Ka u, kan kawmthlang pitar kha a buai zual thuta a rapthlak lutuk, a in seh ruh chiam chiam a, a chil phuan a ti tla bawrh bawrh a, a chang leh a nui leh uar uar a rapawm tak tak in a insiam chhe leh vak vak a, thaw lo in rei tak tak a awm vung vung bawk a, a lei te chu sei tak tak in a chhuah zawk zawk a, tihngaihna anhre lo va dam dawi in lamah an phur phei chiah" tih thu hi mi rawn hrilh a. Hlauhthawn ruk sa nak alai in ka tim deuh sawk a, ka bing deuh muai muaia ka khaw hmuh te kha a vai zo ni ber in ka hria,     kan kawmthlang pitar hi Pi Veli a ni a, a that lai chuan mi hi a hriain mi biangbiak a peih em em thin a, hun eng emaw ti lai a tang khan a buai chho tan a, enge anuih chhan pawh htiatlohva nui ver ver te a ching thar a, mahni chauha a awm chang te hian tunge abiak pawh hriat hleih loh a phun ser ser te hi a ching ta hle a, a awm chhoh tak dan hi mi maktih a hlawh thin hle a. Nopangho phei chuan an hlauin in tihtheih nan tak an hmang thin hial reng a ni..

      ( KA DUHLOH THIL KA TAWNG.)

 Hlau ru tak chung chuan ka hawng nghal thuai a, khaw thlen nan minute 10 vel chiah a awm tawh ang.!! Thli thaw si lo in ka hnunglama hnahthel ro ho chu, ka lam panin an rawn leng phei chum chum ta mai a, " Eheu.!! Pi Veli a thi a ni chiang mai" ka ti ringawt a, ka hlau lutuk chu ka khur der dera ka lungphu leh ka marphu te chu a in thum chhawk dup dup ni berin ka hria, mi huaisen ni ta lo  chu ka'n inti pachang lui hram hram a, ka la tawn ngai reng reng loh thil,  khang hnathel hovin min rawn um atang phei chuan tlan hlirin ka tlan ta a, hnunglam hawi chu sawi loh hmalam pawh ka hmu fiah chiang chuang lo, hlauh nak a laiin ka keartui in ka mawng an rawn vaw ri leh thlep thin te chu Pi Velin min rawn pet emaw ka ti zo vek tawh. Intlansiakna a tlan ni ta ila min umpha an awm ka ring bik lo, in ka thlen chuan khua pawh a lo thim thelh tawh a, Mipui chet vel dan leh Pi Veli te in an lo singsak danah chuan kan Pi tari chu a thi ta a ni tih ka hrethiam mai a, tlangvalho in 'YMA' thuthleng an lo pu meka a thenin bungraw tul dang an la khawm bawk a. Ka bula ding pa pahnih te thusawi ka hriat chuan min sawi nghing lawih a ni ber, a thih hun vel dar zat ansawi leh ka hawn kawnga hnahthelho in min um laia dar zat vel nen a lo in ang chiah tih ka htiat chuan ka hmulthi a ding sung sung a, ka ngaihtuah let ringawt paw'n ka tim uai uai thei, ka  chungah hetiang thil a rawn tih bik kher nachhan chu ka hrethiam lo hle a, ka mumang te leh zinga ka thangharh thuta min mawlh tlat tu te kha ka'n ngaihtuah let phei chuan, heng thilte nen hian a lo inzawm reng tawh ni hian ka hre ta tlat a,ka ngaihtuah chian poh leh ka hlau tawlh tawlh mai lehnghal a...

  ( KA MITVAI EM NI?)

    Ruang hmuak tur chuan lirthei nei zawng zawng chu ankal deuh vek a, mi kal reh tawh lamah ka thianpa Ramtea nen motor in kan zui ve nghal thuai a, a hnuhnung ber a tlan kan ni nghe nghe, khua a vawtin chhum lah chu a zing phui chuk leh nghal, muangchangin kan tlan a, ka hnathawk zo ka hawn kawnga ka thil tawn velte  chu hrilha kan ti ti dun mawlh mawlh lai chuan, Hmunpui kawna far thing lian tak kakah chuan puan niawm tak leng phe vuai hi hmuin ka inhre tlat a, hlauhna leh rapna chuan min tuam nghal vek bawk, kan tlan hnai zela headlight a kan chhun chian na chuan leh.!! A ni lo tih theih rual lohva chiangin ka hlauh ruk ang ngei thil chu ka hmu ta tlat, Far kung kak thumnaah chuan lo thu in asam te lah chu a thur bum mai a, amitmu lian leh pawng pur chuan chiang em em mai hian mi la rawn en kuau leh ta nghal, ahmel ti dang teh mahse Pi Veli a ni tih chiang takin ka hria,  ka hlauh lutuk avangin ka motor khalh pawh chu ka control zo lava a ri bura kopang kan su a lo ni, headlight a keh chhiat vek a vangin a thim nghal mupa,  ka lu a hei chhawk bawk a, ka thianpa chu ka'n ko a mahse min chhang lo, ka ngaih tha lo chuan ka va sawi nawk nawka aharh theih mai loh a vang chuan ka hlauthawng ru hle a, luhei tak leh hlauthawng taka ka thut lai chuan ka banah mi rawn vuan thut a, ka phu nasa lutuk chu ka per lawpa thaw tha thei lo ang hian a rum deuh tuah tuah leh nghal, hootlight ka on chiah chu karei leh..!! Pi Veli chuan ka banah lo vuanin min lo melh run a, ka hlau lutuk chu "Thianpa" ti in ka te tuar a, rang taka kawngkhar chu hawngin ka tlan chhuak nghal vat a, ka hmanhmawh lutuk na lamah ka bawkkhup thlawrh leh nghal, hlau chung chung chuan ka va hawi let leh a mahse Ramtea bak tumah ka hmu leh bawk si lo, thil thlen dan vel chu mak kan ti in kan hlau zual sauh a, nula leh tlangval in ngaizawnga inthlahlel tak ang mai hian inhnaih set in kan thu dun ta reng a.

   ( THIL THLENG MAK EM EM CHU!!)

  Far kunga Pi Veli kan hmuh a vanga accident kan tawh lai vel tho khan ruang hmuak tura kal ve tho kan thian dang te paw'n thilmak tak an lo tawk ve tho a. Kan hmalawka kal Laltaia ten an lam pana motor eng rawn inzui chuah chuah an hmuh chu an tawh reng reng loh thu leh, sawi thiam harsa taka an bo diak thu an sawi bawk a, chu tih lai vel tho chuan bike a kal Maliana chu hnung lam atanga nem sawk tu awm ang mei hian a bike chu a nghing lawih a, kawng mam tha laiah a lo tlu tawp bawk. Thil mak tak leh hriatthiam harsa tak chu heng thil kan tawn hun vel lo inang vek maihi a ni. Tin, Mihring thlarau hi inlar thin pawh ni teh reng se, a rualin hmun hrang hrangah a inlar thei em ni ang.?

  ( KHUALZIN PAHNIH)

   Tunhnu deuh khan Aizawl lam khualzin mipahnih kan thleng a, he far kung vel leh kan kawmthlang pi tar chanchin hi engmah hriat lawk an nei lo. Chumi zan chuan dar10 velah an rawn thleng a. Kan khaw kawnga thilmak tak mai an rawn tawn chhoh dan chu ti hian an sawi ta a.. " kawngpeng pakhat kan rawn pel a, mi rawn lehpel fuai tu awm tlatin kan hria a makti ang reng takin kan hawi deuh hru a, kan hmalam headlight chhun phak chin zelah chuan Mihring ni awmtak hi kan hmu a, tu emaw ram kal haw vel turah kan ngai deuh a, kan umphak theih mai tak loh ah chuan kan ngaih atha lo in mak kan ti ru ta hle mai a, kawng zawl kan rawn chhuak chiah tihah khuan thil rit tak min delhtu awm ang maiin, kan bike chu a rawn su lawiha firstgear pawn min pawt kal zo talo mai chu mak kan ti in kan hlau ru ta hle a, chutih lai chuan kan sir vela hnim leh thing hnah vel chu thlithaw si lo in sawi tu awm ang mai hian an rawn che suau suau a, kan hlau lutuk chu patling meuh pawh kan khur dar dar tawh a, chutihlai tak chuan kan hma lawk pen sawmhnih vel lek turah hian Pitar pakhat hi a rawn lang hlawl mai a, ( a hmel hmang an sawi danin far kunga Pi Veli thlarau ni ngei tur ka hmuh nen khan a lo inang chiah lehnghal ) pa tling pawh kan huai thei meuh lo, kan te rual deuh thawt a chutih laitak chuan, sawithiam harsa tak si tiauchhum ang mai in boruakah a tham ral ta mai a, amak kantiin kan hlau hle a chutia a bo tak hnu chuan kan bike pawh chu a lo pangngai leh vek tawh a, harsatna tawk lo in kan rawn tlan thleng ta a ni." Ti in minhrilh a..

    Vawiin ni thlengin far kung vel leh Pi Veli chanchin hi sawi tur hre tawk chu anla awm cheu a ni. Khanghun khawvel thila nun ka hman thin laikhan,  Pi Veli hian eng vanga min hran khum nge a nih.? Enge a pawi ka sawi?. Enge keimahah duh a neih.? Tih chu ka chhui ka chhui a, ka chhui chhuah tak ber ni a ka hriat chu heihi a ni.. Ramhuai leh thlarau sual te hian Pathian hlattu apiang hi an lo ngaina a, a chang leh tih buai anchak a, an nunah thuk takin an in rawlh thin a. Pathian mihriat te erawh an hlau a, an zah em em thung..

- Mapiana Sailo