Ramri-ah Zirtirtu

- Sangtea khiangte

18th Sepember 1991 - Mi khua a zirtirtu hnathawk a awm, hmelhriat tha leh thlenin pawh nei lo ta chu ka thlen ni ni chuan inluah tur zawng in ka vir buai a. 

Ramri bul mai chakma leh tuikuk ho awmna hmun te a nih avang chuan chhungte pawn min ngaihtuah hle mai a. Hreawm ber mai chu mahni mizo pui hmuh tur an awm miah lo chu a ni.mizo tawng erawh rin ai tak in an lo thiam phian a. Ei duh zawng, hriat duh zawng leh kan nunphung hrim hrim chu a in persan em em vek a chung kar a han tal vel chu thil nuam tak a ni lem lo. Kristian an awm lo a, sakhaw mumal nei lo leh pawisak nei vak lo an nih na te chuan haw leh mai duh na min siam rum rum mai. 

Khawhmawr a in tawp ber ah chuan in ram ve tawh tak, a chung di abang dap leh mau a sak, awn beibui tawh tak chu min kawhhmuh a, neitu awm mumal pawh an awm lo a ni awm e. Tlai lam thim thet thet ah ka in suan lut  a, han en reng reng pawh chuan kum tam luah lum loh a ni tih chu a hriat hle a ni. 

A tuk pum chu ka in leh bul vel te buaipui nan hun ka hmang a, zan ah chuan an khaw hotute in ah ka leng kual a. An thu min chah tam ber chu midang buaina a in rawlh loh tur tih a ni. 

Ka hna ka tan ni tur pawh nithum chiah in a dang ta a, chu mi chhung chuan khua te chu fang in an khawsak zia leh nunphung te chu ka theih ang ang in ka zir ve a. Ka len kual na lam ah chuan thian thar fel deuh mai leh mizo tawng thiam deuh mai hi ka tawng thar bawk a, a hming chu Liannawla a ni. 

Ka hna ka tan atang pawh in thla thum dawn chu a liam ve ta reng mai. Thlentirh ai ngawt chuan ka tlangnel ve ta deuh a, tin thian ka nei ta bawk nen nuam pawh ka ti phian a. Tlangval hmel hawiharh leh sawrkar pui zemzen na na chu an nula te pawn hai bik lo le, ka thawmhnaw suk leh tui chawi thleng chuan min awl ta vek bawk nen, cham hlen mai te pawh ka duh rilru rum rum thin. Mahse, bawr laih laih tu an lo awm tak ah chuan an tlangval te mit a lo kham deuh nge ni, thianpa nawl a pawn min hrilhru ta fo mai. Sawi tak ang in mahni khua a awmlo nih leh hnampui te kar a cheng ta lo chu fimkhur angai thin reng a ni.

September ni 18 zan dar 8 vel nita in ka hria, kawn zawl ah chuan mipui chu an ri luih luih a, tun lai ang in current te la awm ve hek lo le, mei chher nen chuan an zi hut hut a, hman hmawh tak chuan chulam chu ka pan phei ve ta a. Eng an tih a, enge an en hmu tur pawh chuan mipui paltlang mai chu harsa tak a ni. Thei leh theilo chuan ka nawk phei zel a, ka thil va hmuh chuan min va rap tak em, ka dam chhung zawng hian khatiang thilrapthlak ka la hmu leh ngailo. Mipui lah chuan engthilmah tih an tum reng reng si lo, an thlir thup a, hmuhnawm thlir chuan an thlir ni ber in ka hria. A kut leh ke vel chu mei kan a ni tih a la chiang in a kang pilh duaih mai a, a lu atang chuan thisen a luang nguai nguai bawk a, ahmel lah chu hmuhtlak reng reng a awm lo, a mit veilam chu a vung duk chur a, a hnar leh ka atang te chuan thisen chu a luang chhuak bawk a. A dar dinglam chu chempui a sah ang mai in a thler duaih a, a pawrh turh bawk a. A na tuar leh hlau rak tap lawm lawm chuan tu lainat leh khawngaihmah a hlawh lo, ka uak tuarh ruarh  a ni thei ngangin ka hre ta lo, chu nu chhan tum a zuanchhuah ka tum lai chuan thianpa Nawla'n mi lo kuahbet a, talchhuah ka tum leh min kuah nghet sauh a ka chau ta deuh a thusawp nuaih chung leh mittui nen chuan chu nu apasal in uire a a puh avang a a sawisak chu ka thlir ta reng a.

A chempui chuan a rem lai lai ah chuan a sat chawrh chawrh a thisen chu a chik zuaih zuaih bawk a. A te lawm lawm a, ngaihthlak avan hreawm ngai em!!. A ban te chu a sat chawrh chawrh a a ban dinglam phei chu a bung lo chauh ta mai, a vun chuan a awh derh derh a amah pawh chuan mu leh mal pawh a nei ta lo. A nghawng ah chuan sat in a lu chu a sat bung a chila chhak khum a, ti chuan mipui chuan an tin san ta a. Liannawl a chuan puan in a khuh a, ka in lam ah chuan kan phei san ve ta a. 

Ka thimrim in seh ruh tauh chu hrethiam in liannawla chuan thilawm dan chu a sawi ta a- " khanu khan apasal leh a angaihzawng uire lai aman a, apasal in a sawichhuah leh mualpho a hlauh avang in ti khan uire a apuh a nih kha, khatiang thil, nupa inkar ang ah phei kha chuan tumah kan in rawlh ngailo, mipui khan an chilhlum ve mai che ka hlauh vang in ti khan ka chelhbet ta che a ni.  I la hrelo a nih chuan kan hnam leh sakhua na ah hi chuan hmeichhia hi kan dah hniam em em a, khatiang thil kha a thleng ve fo reng a ni".

Ka ngaihtuah na ah chuan thildang reng a leng lo. Kha nu na tuar tap hawm hawm kha ka beng ah a cham reng a, mumang lam ah ka mangphan a zan pawh ka mu tha theilo hial a ni.

A tuk ah chuan a ruang chu lui ah an peih a, tuman engthilmah an sawichhun zawm reng reng lo. Ka thil hmuh leh hriat chuan kar tam fe chu min thawng in zan tam ka muhil thei lo a, chawei pawh a tui tak tak thei lo mahse hun  a kal liam a zawi zawi in  keipawh ka ziaawm leh ta a ni.

Kumtawp a lo thlen chuan chawlh hmang in aizawl lam ah ka haw a, chhungte pawn minlo ngai der ve viau a, kum tawp chawlh pawh chu hlim tak leh khamlo tak chuan ka hmang liam a. January  thlatawp lam ah ka hna tan tur chuan ka kal leh ta a.

Hun aliam a, hna lam ah ka lo buai ve bawk nen kum kalta thilthleng rapthlak pawh chuan rilru a luah hman meuh lo a ni ber mai. Mahse september thla kan kai chhoh meuh chuan thil a danglam ta.

Thlasik bul kan tan a, khua pawh a vawt in boruak pawh a thiang har mai a. Boruak nawm hun lai ber a ni ti ila kan sawi sual kher lo ang mahse ni dang a ang tlat lo, thlasik kan hmang tan chu an tih dan phung nge ni ka hrebik lo le, mipui chu an tawmim tlat a, khua pawh chu tlailam ni atlak fel chuan a reh tlawk tlawk a, khawlai leng han hmuh tur pawh an khatpharh mai. Liannawla chu thilawmdan ka zawt ta a - liannawla chuan ' kar hmasa (september ni 15) inrinni zan khan vengthlang tlangval khawlai leng chuan thil rapthlak tak an tawng a, mi pawh an pawn chhuak ngamlo a ni, kawn zawl lam a an nula rim haw lam zan dar 9 vel ah sawlai kawnzawl bung bul ah sawn hmeichhe pakhat hi a lo tap a, a in hnit hlawk hlawk a, tlangval ho in thilawmzia zawh tuma an va pan hnai chu hmeichhe satliah a lo ni awzawng lo mai le, thimtham zinga meichher nen a an va pan hnai chu chu nu chuan a ban hi a lo khel nuap nuap a, a hmel te lah chu mihring hmel a ni awzawng lo, a mit te chu a puar pawng ul a,  mengsen rum bawk a. A nghawngte lah chu chempui a sah hrep ang mai hian a pawrh terh turh a, thisen chu a chik zuaih zuaih a, a malpui, chawn leh a taksa hmun tin reng chu a chik nuk a, thisen chuan a bual hnuang a, chutia hlau thlabar a an thlir lai chuan chu thil chuan a ma ban ei lai chuan a vawm ta a. An hlau mangang chu kan in ah rawn tlan lut in kan in ah an riak ta ngawt mai a ni. '

A thil sawi chuan nikum thilthleng min hriatchhuah tir nghal vat a. Thilawm dan chu ka hrethiam nghal mai a. Chu thil thleng chu fiah ka duh ta tlat mai. Thianpa nawl a chu ka sawm ta a mahse alo duhlo nasa mai. Sawmchhuah theih a nih tak lo ah chuan mahni a fiah chu ka tum fan a, kha nu thih zan september ni 18 zan kha ka tinzawn a ka in buatsaih ve ta a.

Khua chu a ralkhel a, chempui leh silai a beih chi a ni si lo. Ka hna lam ah pawh rilru ka pe hleithei lo, ka rilru chuan eng eng emaw ka suangtuah a. Hlau ru viau mah ila tih ngei ka duhna chuan ka hlauhna chu a hneh bo zo a, ka thil tum pawh zan khat chiah in a kardan ta.

September ni 18 zan dar 7 a rik chuan kawnzawl lam chu ka pan ta a, a reh hian a reh tlawk tlawk a ni ber mai, thereng leh chiri hram nauh nauh kar ah chuan thlifim vawt har mai hi a tleh heuh heuh a, ka meichher chuan ka hma ft 20 vel thleng chuan a en pha a. Thlaeng reh ruih hnuai ah chuan enge maw thil thlen beisei tak in kawn zawl sir lam ah chuan ka mitmei ta ran a. Mi hring veivak reng hmuh tur an awm hauh lo, thlaeng ruih in a chhun bungzung kar ah chuan dar kar chanve dawn chu ka thu ta a mahse engthil mah thleng a awm lo tlat. Mite thil hmuh leh sawi chu an hmuhsual mai mai a ni ang a tih rilru pu chung chuan hawn zai ka rel ta a chutia ka thuthmun ka thawh san rual chiah chuan ral hla tak ah chuan sihal hi a u ruah ruah a, ka awmna bung kung chu thli natak in a sawi hrep ang mai in a ri ta sung sung mai a, boruak in mung chuan ka hmulthi an kaitho sung sung a, ka khur ta der der mai le. Ka huaisenna zawng zawng sawmkhawm a han hlauh loh ka tum pauh leh ka tiril chu a khur zual zel bawk si.

Ka in lam pan tum chuan thawmdim tak in ka pen a, pen hnih vel ka pen hman chauh ang tih chuan ka lu chu thil huh hian a rawn far kauh kauh a, ka han en chian nak chuan thisen- mihring thisen ngei a ni. Ka ding chawt a, khawi atanga lo kal nge tih ka hrechiang si ka hawi chho dawn nge dawn lo, huaisen na zawng zawng nen a chunglam kan hawichho chu ka chungzawn bung zar ah chuan khanu..... Apasal in a sawisak hlum ngei kha!!!.. A letling zawng in a lo ding a, a sam chu a tla hnuang a, a sam tlahnuang kar a tang chuan min rawn melh ta kur mai le! Ka che lawk thei lo. Ka mit pawh ka khap theilo, ka pum chuan ka khur a. Hlau chung chung chuan tlan vak ka tum a, ka in siam rem a ka tlan ta thut a mahse bung zung ka pal a ka bawkkhup thlawrh a, ka meichher lah ka hnung lam ah ka la thlauh zui. Ka meichher lak tum a ka let leh chiah chu.. Kha nu kha thingzar a  tang chuan a rawn hlawmthla ta nawlh a, ka rak tuarh a, ka dingchawt a ka thlir ta kar a. Ka pensawn ngam tawh lo, ka thlanfim chu ka bek ah chuan a luang ngiai ngiai a, ka khup chu a sai ngar ngar mai. A che tial tial a, thawklehkhat ah an rawn ding thut mai chu, ka te tuarh a tlan mai ka han tum ka ke lah chu bung zung kar ah chuan a lo la tang zui a, a ri thawt thawt a, a tlakna na lam a ring ti tliak niawm tak hian a lu chu a zawi nguai a, ka rei le!!! Ka lam ah a rawn pen phei chharh chharh mai le, ka tal a ka ke lah chu a tang nghet nasa mai si a rawn hnai zel.... Awi ka reiii... Ka. Meichher chu a rawn rap hlum leh. A thim vek a engmah ka hmu thei lo, a thaw hrawih hrawih ri chu a lo hnai zel si... Ka za chuai chuai a, ka tap a ka hlau bawk si, ka beidawng ta ka thi ngei dawn a nih hi tiin ka. Mittui chu a luang zung zung a, ka mangang chu ka au vak vak a, a reh hian a reh tlawk tlawk mai. Min chhan tum reng an awmlo a, ka beidawng in dam chhuah in beiseina reng ka nei ta lo, a tawp a tawp ah chuan ka mangang tawpkhawk chu mittui tla zawih zawih chung chuan ka tawngtai ta ringawt a. Ka tawngtai chhungzawng chuan min kal hual a a thaw ri huam huam a hmu thei lo mah ila min en reng tih erawh ka hria. Minute sawm dawn thinlung tak a ka tawngtai zawh dawn lam ka amen rual chiah chuan thawm chu a reh ta hmak a, meichher nen a lo tlan hlawk hlawk chu ka hmu bawk a, thianpa nawla chuan ka ke chu min lakchhuah pui a inlam kan pan ta a ni.

Thubelh : khawtlangah ka chanchin a than darh hnu chuan ka thiltawn leh hriat hriat tum chuan inleng ka nei awl lova, lo kal a piang te hnen a ka lo sawi ziah chu- 'TAWNGTAINA' ngaithlatu Pathian nung  in min chhanhim a ni.

Tun ah chuan a khawmi tam zawk chu kristian ah an in let tawh a. Missionary nula fel tak in a chenchilh na a zar ah kristian pawh an pung ve zel e.