KAPTHAK

_Hiah a nuam ti rawh u? Mahse, a hrehawm ru riau bawk si a._

_Mi zingah a thak a rawn chhuah tawh chuan hiah sut sut a mawi si lo, hiah lohvin a reh duh mai bawk si lo. Kan hiah nasat poh leh a zual zel si._

_Hmeichhia hian kapthak an nei ngai em ka hre miah lo va, ka la zawt lo bawk a.

Mipa hi chuan kapthak kan nei ṭhin a, a bikin naupangin._

_A thak a’n chhuak tak tak chu, a chang leh kan han chûm det det a, a châng leh kekawr nen kan han nuai pawlh nawk nawk a; a vun te kan han sik leh rih ṭhin a. A nuam em em mai si!_

_A lo rei tawh a, hiah nasat chuan a pilh ve ṭhin a, a pilh khan a thak a reh phah mang si lo va. Dim zetin a pilh bul vel kan han hiat set set bawk a, a thak a zau deuh deuh va, hiah a nuam telh telh a, a pilh pawh kan vaihma leh ta law law a. A lo remchang em bawk a ni._

_A bikin *ringworm-ah* hian hiah tam lo a ṭha khawp mai. Kan hiah tam poh leh a huam chin a zau telh telh a, enkawl loh phei chuan hringnun kal ṭha hle hle lai a tibuai pha hle._

_A thak tak tak phei chuan a thak lai vun kha hlehthlak a, duhtawka ṭhial vak vak a châkawm ṭhin._

_Ka naupan zual deuh lai chuan ka nei nasa ṭhin khawp mai, kekawrte hâk ro te kan lo chîng ang reng si a._

_Thingtlanga khawsa te kan ni bawk a, kan khawsa awlsam angreng si a, nitin kan lo inbual ziah bawk si lo va, kapthak chu hluar duh vet vet tak a ni._

_Kapthak awm chhan ni-a ka hriat chu, kap chhungah hmul eng eng emaw lo awm a, kekawrte kan hâ a, a chungah kekawr nen. Chu mai ni lovin, taksaa a kilkhawr leh hmun lum lai ber a ni bawk a, a lum hnâwng khan thak a siam thei niin ka hria._

_Chuvang chuan fimkhur a ṭha khawp mai, a bikin nipui khawlum laiin._

_*Kekawrte hi nisa-a phoro ṭhat tur a ni.* Kekawrte hnâwng chep chup hian kapthak a thlen thei._

_Tin, inbual hian kap bawr vel hi fai taka sahbawn nena silfai ṭhin tur a ni. Chuan, fai taka hrûk hul leh ngei ngei tur._

_Khawlai chhuah vela i kapa thlan a lo awm a nih pawhin i rawmawlin hru hul ṭhin ang che._

_Damdawi pangngaiah chuan *zimig* hnawih a ṭha hle, a bikin *ringworm-ah. :* A lai hnawih nghal ngawt lovin a huam chin sir zela hnawih tur a ni. Inbual zawha fai taka hrûk hul hnua hnawih tur a ni._