Hostel Hrâng (Hmeichhe Thlahrang)

☠️ Kum 2020 kum bul kan tan chho chauh kha a ni,hunpui boruakah rilru ala chen deuh reuh avangin khawhran daih a awm chu lung a leng rum rum thei mai ! Hetih lai hian Aizawl veng pakhat Hostel ah ka awm a,kan hostelah hian mi pathum chauh kan awm naa khawhar erawh a ziaawm hle a ni.

Kan Hostel hi mimal ta a ni a,tunhma chuan boys hostel tih pawh a ni chuang lova, kum tam aliam leh tawh,he Hostel ah hian Vanduaina rapthlak tak a thleng hlauh mai a,chu thilthlen hnu atang chuan hostel a awm an kiam ta deuh duak mai a,hun a kal zel a,pun lam aiin kiam lam an pan zel a,hmeichhia phei chu awm tur an awm ngai tawh lova,chumi hnu atang chuan Boys Hostel anti zui ta a,Hostel Senso ngai zawng zawng antih tlem fe pawhin awm tur an in hmu zo meuhlo a,a hrechiang chuan an tih ru deuh tlat a ni.Mahse,a chanchin hrechiang ve lemlo leh Sum lam harsat zawkna avangte in Thingtlang lam atang chuan awm tawk an awmve reng thin a ni. Tun tumah pawh hian Thingtlang atanga kal vek kan ni hlawm a,kan tlem bawk nen kan in closed hlawm hle a,hostel dangte angin ri dur dur lemlo mahila nuam kan tiin kan hlim ve viau a ni.

💀 Kan Hostel building hi a lian lem lova,first floor ah kan awm vek a,kawngkhar awmlohna bang kil lam room pathum chu kan luah hlawm a,a piah ber room chu ka luah a,alaiah Sangzuala awmin kawngkhar lam hnaih a piah berah chuan U Richarda a awm ve thung a, a ni hi chu kan û rual daih anih bakah a rui ve deuh reng mai thin a,SiJiA(Kan koh dan a ni a.) nen kan inkawm ang em chuan kan kawm tamlo a,Mahse,kan nelin a fel em em tho a ni. _(Anni ka thiante pahnih kha la dam ve tak ang maw....!!?)_

Cook pakhat keimahni ang rual tur vel,fel deuh mai kan nei ve a,Sawmtea a ni a,a mawng a zangin tihtur a hre em em a.Mahse,tihloh tur a hre ta lo hi a pawi chu deuh a ni,Ani pawh hi U Richarda ang deuh bawkin Zu a duhve keuh keuh hle a,a hunawl ah chuan a nam ve chak chak thei reng a ni. Choka ep chiah kawngkhar bulah chuan Cook  room a awm a,chutah chuan a riak ve thin a,engemaw chang chuan In chungah leh hmun danga riah bo zauh zauh a ching a,a hna  erawh a tibuai ngai lem lo a,tal hiar ve deuh thin mahse a hnaah chuan a tha ve riau a ni.In rual khat tlang kanni bawk a,kan innelin kan infiam bawrh bawrh thin a,kan inkawm ngeih tlang hle a ni.

Zan khat chu thilmak deuh ka tawng ta tlat mai a.(Zan ka ti taknaa zing lam a ni zawk awm e.) Hemi atang chiah hian kan Hostel chanchin ngaihnawm lo tak tak leh thilmak tak tak lo tawng an awm ve fo tawh tih ka hriat chhuah takna a ni.

Zanah hian engtik hunah pawh mu ila zing 3:00am bawr velah hi chuan ka ekchhuak hian min kaitho ngei ngei thin a,a ninawmin tunthleng pawh hian ngaia neiha phur taka han thawhchhuah hi ka la neilo hrim hrim a ni. 

Tuk dang ang bawkin chumi tukah pawh chuan ka harh leh ta nge nge a,sana ka en thuai a, dar 3:17am chiah alo ni a.Chutia, ka thawhchhuah mek lai chuan hmeichhe nui ri niawm tak ka hre ta phut mai a,ka han ngaithla chiang deuh vung vung a,hmeichhe aw ngei a ni a,Sawmtea room lamah niin ka hre bawk a,Mahse,mak erawh ka ti lemlo tlat,A chhan chu Sawmtea hian zan dangah pawh hmeichhe riahpui a nei zauh zauh tawh thin a,chu thawm pawh chu anmahni pahnih ngei anih chu ka ring thiam mai a,ka kiai sak a, tun tum chu kan Sawmtea chu ava chak dawnlo em! tiin Phone a an thla lak ruk sak ngei ka tum ta a.Tichuan, phur ru takin Bathroom lam chu ka pan phei ta tham tham a,chutihlaite pawh chuan thawm anla nei reng a,ka thiante pahnih erawh an room zawn ka thlen chuan anla mutui hle tih,an hnar suk suk dan atang chuan a chiang reng mai a. "Tui tak khan lo mu teh u,naktukah ruah-thamloh Video ka entir dawn che u nia" tiin,tifuh inti takin mahni chuan ka khi phei deuh vun vun reng a.

Toilet hi Sawmtea room opposite bang leh lam tawp a awm a ni a,kan tui herhna 'Tap' a chhiat rih avangin tui khai chawp a ngai thin a,Sawmtea Room zawn pawn lam a barrel ami chu kan khai mai thin a ni.Chumi bul tukverh atang chuan Sawmtea te pahnih pawh chu chiang taka an lan theih ka ring a,ani hian Parda a zar thlip thlep thin ka ringlo a ni.

Tichuan,bathroom a bucket chu lain thawm dim em in pawn lam chu ka pan phei leh ta a,Mahse,ka beisei loh deuhin an thawm chu a reh ta hmak mai a,ka ding deuh chawt nghe nghe a ni.

Thawm ka dim ve hle khan ka hre si a,ka thawm an hriat vang pawh anih ka ring chuanglo! bang âwng khawi emaw lai atangin minlo bih ru reng a nih ka ring a,thawm pawh ka dim duh bik em em tawh lova.Sawmtea room zawn ka thlen chuan a kawngkhar chu pawn lamah a lo in lock tlat mai a,mahse,chutah pawh chuan thil danglam ah ka la ngai chuanglo,pawnlam ah an inlock hnan anga,tukverhah an lut anih ka ring a,tichuan pawnah chuan ka chhuak zuita a,tukverh puanzar anlo zâr tlat si avang leh tihbuai an hlauh hmel ém avang chuan enthlák tal chu ka tum lui duh ta bik lova.Bathroom lam chu la pan san ta a,ka room a ka let leh hnu thleng pawh chuan thawm annei zui ta miahlo mai chu mak ka ti deuh naa ngaihthatlohna erawh ka nei lem lo thung a ni.

Atuk khua alo var a, Sawmtea chu a dan pangngai tete in Choka ah chuan rawngbawlin alo buai leh sauh sauh tawh a, nizana a khawsak dan vel kha kan hriat a hlauh hmel si a,engemaw a hriat a,tum dangah pawh a rawn hruai haw fova,amah berin a uanpui zawk mah zel kha a nia,tun tuma a rawn hruai zawng a sawngnawi deuh aniang,hriatpui a duh hmelloh em mai; 'Ka hre ru khiau a ni,tih hi hre ve reng reng teh se', tiin ka fiam lui talh pek a,Mahse,ka beisei loh dan deuhin, nizan a alo haw loh thu leh a kâi deuh hlek avang a,a Ni te In lama a riah tak ngawt thu in min chhang a,tukin ah phei chuan a room pawh ala hawnglo niin a sawi bawk a ni. Atirah chuan ka awilo viau dawn nàa a insawi fiah vel dan leh a hmel atang chuan dawt a sawi chu ka ring leh ta bik lo a ni. 

Sawmtea lah chuan mak tih hmel pawh a pu lemlo a,chutih a hnekin ka zawhna te pawh fiamthu in min chhang liam vel mai² a,ka tan pawh chuan ngaih thutak reng theih pawh a nita biklo, ka room a ka kir leh pah chuan a room kawngkhar chu ka bih leh kher a,a sawi ang tak chuan a room ah ala lut chhuaklo tih a door lock atang chuan ka hre thei a ni.

Kha nuiri kha!! Hmeichhe râwl ngei niin ka hria a,ka chiang tawk viauah pawh ka inngai bawk a,ka bengchhe ri mai mai chu anih ka ring theilo a ni.Sawmtea te ber annih tak siloh ah chuan,Tute nge ni ang a?Engnge nita ang!? tiin Ka thawm hriat chu keima tawk chuan ka chhui let nauh nauh a,a nuiri kha ka bengah pawh ala chiang viau a, angaihna âwm leh thildang vak han puh tur ka hre chuang silo a,mak chu ka ti ru viau nàa ka sawi zui duh bik ta lem lova,engemaw mai maiah ka ngai lui ve ta a ni ber e.

Zan hnih chu thawm danglam engmah ka hre zuilo a, tui takin ka muhil ve bawrh bawrh a.Mahse,a zan thumna ah chuan thil danglam tak chu a thleng leh ta a,heta tang chiah hian ka thil tawn pawh kha hriatsual mai mai anilo ang tih chu ka ring thar leh ta a; Kan Hostel hi a *Hrâng* thin a nih ka ring ru ta deuh a,theih ang tawkin kan Hostel chanchin chu ka chhui ru ta a ni.

Ka room kawngkhar chum ri dawt dawt chuan min ti harh hlawl mai a,ka sir chiah a awm Siji_a chuan minlo ko mawlh mawlh mai a,rang tak chuan ka tho chhuak a,kawngkhar chu ka va hawng thuai a,Sijia chu a rawn lut nghal rawk a,"Lock nghal rawh" ati a,ka khumah chuan ava thu hnawk mai a,"Ilo hre ve em?!" a rawn ti a,"Engmaw?" ka ti a, "Hmeichhe tap hlawp hlawp ri kha mawle!" ati a,"Hmeichhe tap a..! Ngati nge iva hlauh hmel si ve!?" ka han ti a.

Sijia chuan,"Ka lo riak ve mai dawn,keimahin ka mu ngam tawhlo,kan hostel hi a hrâng thin anti a,atak tak anih hi!! Dar engzât nge? a han ti zui daih a.

"Dar 1:30 ari tep.." tiin kalo chhang ve mai a.

Sijia chuan,"Dar khat a pel hret vel anih dawn chu,ka zun chhuak avangin ka va thova,a reh khawp mai,U Richarda tawngvai nuah nuah thin leh bang a Sana inkhai chek ri tlek tlek chu thawm hnaivai awm chhun chu a ni a,bathroom a ka awm lai chuan Hmeichhe lungchhe em em a insūt faih faih thawm ka hre ta phut mai a,chutiang zan reh karah chuan ring vaklo mahse a fiah hle a ni."Sawmtea chu che fuh vaklo animaw" tiin ka  nuihzat hle a. Ka chhuak ta lawk lova, bathroom chhung atang chuan an thu leh hla chu hriattumin ka ngaithla deuh vung vung a; Mahse,insût thawm bak Sawmtea tawng awm pawh ka hre miahlo a,chiang deuh zawka ngaihthlak tumin ka chhuak a,thawm awmna lam chu thawm dim takin ka pan phei ta a.

Ka va hnaih phei deuh chuan tap ri chu a reh ta hmak mai a,ka thawm an hria anih ka ring a,buaina annei ngei anih ringin min hmu tawh rau rau anih chuan va pawh tho chu ka tum a ni.Ka pan phei zel a,a kawngkhar lockna lai saw hnaite atanglo chuan a hmuh theih loh a,ban hlim sawn a hliah tlat a. Kawngkar bul ka va thlen chuan pawnlamah alo inkalh tlat tih ka hre ta a,mak chu ka ti ang reng hle a,Sawmtea chu zawi tè tèin vawi 2 ka ko a,min chhanglo,tap ri pawh hriattur a awm tawhlo,a reh hian a reh tlawk tlawk mai a ni.

Kir san leh mai tuma ka inher lai tak chuan hmeichhe aw bawk hi za em em mai hian a rawn nui leh ta awr awr mai a,ka phu chiang lutuk chu ka khek chhuaklo chauh a ni,chutah,hlauhna chuan min rawn man nghal a,ka room ah pawh lut ngam tawh lovin ka rawn tlang phei tawp a ni." tiin a thil tawn chanchin chu a sawi nghal zung zung a,a awrawl atang chuan ala hlau a ni.

Theih tawp chuan thlamuan chu tum ve bawk mahila a hmaa kalo tawn ve tho tawh avangin tih vak ngaihna ka hrelo hle a,Tin,kan pahnih a kan awm tak hnuah chuan ani pawh a rawn zia awm ve leh mai bawk a ni. Tichuan, thingpuite kan lum a,reife chu kan titi dun leh ta reng a,kei ai ngawt chuan kan Hostel chanchin pawh alo hre zawk a,a *Hrâng* thin nia ansawi pawh alo hre ve vek a;Mahse, Hetiang thlarau leh Hrâng lam ringlo chi hi a ni ve a, hlauh pawh a hlau ngai lemlo a ni. A tak ngeia a tawn ve takah chuan a hma lawka, awilo leh hlaulo inti si kha a khurchhia chu a ni dèr mai si a,rinhlelhna a nei miahlo chu a mak a ni,a thil hriat kha a hrechiang viau a ni ang.

Keipoh chuan ka thiltawnte chu ka sawi ve bawk a,a hmaa kalo inrinhlelhna te chu adiklo zawk anih chu kan ring a,Sawmtea pawh chuan engemaw hriat aneih ngei chu kan ring a,zawh chhuah ngei pawh kan tum a ni.

Sijia chuan tunhma in kan Hostelah hian inchunglam a awm, hmeichhe pakhat chu

ama room-ah a inawkhlum a,a thih danah chuan felhlel deuh a awm niin an hria a,sawi deuh hat pawh a awm a;Mahse,thuchiang tak hriatna a awm thei lova,evidence awm tur angte chu mak tak maiin khawih chingpen anni vek a,Mahni intihlum(Suicide)ang chuan thuneitu lam chuan ansawi ta tho a ni.

A thih hnu rei vaklo ah chuan ngaihbel theih tur takin Kha hmeichhe tleirawl tap ri kha an hre thin a,thenkhat phei chuan a thla-te pawh an hmu a ni awm e,tun thla hi a boral thla chiah kha a ni nghe nghe a,hei vanga rawn inlar hi a ni ngei ang...!! a han ti a,kan ngawi zui dun ta vang vang a.

Thawm chu a reh thiap a,U Richarda hnar suk suk ri pawh a bengchheng lek lek a ni.Mahni maia awm ai chuan pahnih lek nih pawh chu a thlamuan awm hle a, Chubakah thawm engmah kan hriat zui tak bawk siloh avang chuan pangngai tak pawhin kan titi dun thei a ni.

Zing dar 3:00 rik dawn ruaiah chuan ka khumah chuan kan mu dun ta a, Khua lo var chiang sela kan Hostel a thilthleng tawh chanchin vel chu Sawmtea zawh chhuah ngei tum chuan kan muhil ve ta a ni.

Kan hostel a thilthleng chanchin leh a Hrân zuitak dan ni a Sawmtea leh a tawng tawh mi thenkhat sawite chu hun remchang dangah kan chhiar leh dawn nia.

©²⁰²³ Rinfela pa