Ka Ṭhianpa Rosanga kha!

*KA ṬHIANPA ROSANGA KHA!*

By - C. Pahlira

Rosanga nen hian ka thianpa pakhat atanga inhria kan ni a. Khaw pawn deuh ah mi farm enkawlin a nupui leh a fanu naupangtê  pakhat nen an cheng a. A mah hi zu duh ve tak a ni naa mi taima rumrût  a ni thung.  A zu in avang hian a hna a thrulh ngai hek lo. A farm enkawl lai ah hian vawk 7 leh bawngpui 3 leh broiler ar eng emaw zah an enkawl a. A nupui pawh hi mi duai lo tak chu a ni, a tul chuan zanah pawh luia mahni a chakai khawrha kal mai ngam a ni a, zu pawh in ve mai thei a ni. A in lam duh ve ve na na na chu, annu hi a thikthu a lo chhe deuh bawk nen, nupa han innghirngho zauh zauh chang pawh an nei fo a ni awm e. Amaherawhchu kan awmlai/lênlai chuan Rosanga hian annu hi kamkhat a ahauh emaw a hrâwk emaw hi ka la hre miah lo thung. An awmna hi khua atanga a fal deuh avangin zu pawh hi aman a bilh in a thlawr  mai zel a, a nei tui thei phian lehnghal. Ka thianpa in vawi khat min lenpui a chuta tanga inhria chu kan ni a, ranvulh lam hi ka lo tui vena zawng tak a nih avang leh a hminga vety lama thawk te ka lo nih ve naah kan lên hmasak ber atang chuan kan titi a rual in kan inkawmngeih ta phian a ahnu zel ah pawh ka thianpa min hruaitu ai mahin kan inkawmngeih ta mah mah zawk hial a ni. Kan inbia in kan inkawm reng phei chu a ni hauh lova mahse ka lên nikhua hian office atanga ran damdawi eng eng emaw te ka ken sak thin avang hian alawm der ve viau thin a, a ni pawh hian zu ka duh ve tih a hriat avang hian zu bilh thar aneih hi chuan min rawn phone vat a ka va leng vang vang thin. Engemaw chang phei chuan duh aia lo tih hnem deuh trum te a awm a, in ah hâw lova ka riah nghal mai chang lah a tam khawp mai..

Le, a thui lutuk lohnan sawi nghal zung zung mai ang. Tlai khat ka office bang ka haw lam chu ka phone a rawn ri rang rang a, ka phone ka’n en chu Rosanga a lo ni a. Phone ka pickup hma atangin a sawitur awm ang chu ka hre lâwk mai a, thil thar a nei a ni ngei ang ka ti rilru a. Ka rin ang ngeiin leng tura min sawm pahin zu bilh thar a neih thu min rawn hrilh a. Thlatawp lam pawisa neih  loh lai a ni kher bawk nen ka phur ngang mai. Kan inbiak tawp dawn chuan, “I lo thlen laia ka lo awm lo a nih pawn chahbi chu nidanga kan dahna ngaiah khan ka dah a, thil (zu) pawh  vawk chaw chhumna in kil sirah khan gallon ah ka dah a i duh tawk ilo in mai dawn nia, ka rawn haw har lo ang” a ti a. Ka chhungte ka phone a, “Kan thiante naute birthday lawm tur a awm a ka rawn haw tlai maithei, ka lo haw lo pawh a ni mai thei” tiin dawt ka va hrilh ta ngawt a. Rosanga te in lam pan chuan ramhuai speed in ka tlan ta nghal a. Ka va thlen chuan a sawi ang ngeiin tumah an lo awm lova, chahbi pawh chu a sawina ah chuan a lo awm ngei a, kawngka  chu ka hawng a inchhunga ka lut chu nidang ang lo tak in a lo ruak deuh huai mai. Ka rilru chuan annu nen an inti taurau deuh anga annu in bungrua ala anga chumi buaipui vel chuan a chhuak a nih ka ring deuh ngawt a. Amaherawhchu leng tura mi sawm ve ta lêm arei lutuk ka rin loh avang leh phal viau mahse a rawn thlen hma hmaa lo in thawt thawt chu ka inthlahrun ve deuh avangin ka lo nghak phawt a. Dârkâr khat dawn ka nghah hnu pawh chuan a rawn la lang thei reng reng lo mai. Khua lah chu a thim a ni tawh mai bawk si, ka phone dawna a phone lah chu switch off a in ti tlat mai bawk si. Ka châkna ka insum zo ta ngang lo, a neitu berin aphal tho alawm tiin vawk chaw chhumna in lam chu ka pan ta a. A sawi ang ngei chuan liter 5 gallon bur ah hian zu chu a khat pam hian alo awm a. Inchhungah ka khai lut a amah nghah pah chuan muangchang in ka lo khulh ta a. Hetih lai hian zu in ti nuam tawk vel lekin ruah a tla deuh cherh cherh tan a, thil dang tih tur awm vak chuang hek lo zu chu no 1 te te in ka thli deuh chhen mai a. Dar 8 pelh hnu thleng pawh chuan arawn lang thei reng reng lo mai, a phone lah a off tlat bawk si. Kei lah muangchanga in e ti lo in ka inhnem ta deuh a niang ka lu a kai tawh khawp mai. Rin aia a rei tak phian avang chuan hawsan mai ka duh deuh ut ut a mahse ruah chu atam tawh angreng viau mai si chubakah miin leng turin min sawma, a awm lohlaia athil neih lo in sak te te a amah em nghak chhuak lova duhtawk ngah ta maw tih avanga lo hawsan daih mai chu dik chiah in ka hre si lo.

Nghah pahin tlem tlem ka in belh zel bawk a. Dar 10 vel ani tawh hial ang tih chuan Rosanga chu huh zawr hnûp hian a rawn lang ta hlawl mai, Kei chu duhthusamin ka lo rui dêr tawh, rui lungpuam inti polite takin, “I rei em a ka nghak lo mai che, khawnge i kal hrim hrim a?” ka lo ti a, mi chhang lem pawh in ka hre lo. Ka thil hriat kha a vai deuh rûai tawh mai. Ka hriat dan ber chuan sazu tam deuh mai hi a rawn khai lut trûn a, a thawmhnaw huh pawh hlip lem lovin tap bulah thuin sazu chu a hem thuak thuak a, a vun pawh paih lovin a keih ta mual mual ni maiin ka hria. Ka lo khulh hnem hman malh malh bawka ka tlin ta lo a ni chêk ang chubak chu ka hre chhunzawm ta lo ka lo chatthla a ni chêk ang. Ka harh leh chuan nidanga ka haw theih loh zana ka mut thinna khum te reuhte ah chuan awngphah pawh awm mumal lovin ka lo mu reng tawh a. Ka lu chu a rit lûk mai, ka tui lah chu hal namên lovin a hal huam huam mai bawk. Thei leh thei lovin ka inbeng kanga tui in tur chuan ka va tho a, gallon ah chuan zu chu a lo la awm teuh mai a, amah khan a in ve lo a ni maw ka ti rilru mai a. Tui in pah chuan no 1 ka’n in leh chu a rim chu a thûr ûih deuh nghûng mai, ka intirh a mi nen kha chuan in ang tawh lo tak a ni mahse no 1 dang chu ka inbelh leh hram a. Ka lu rit lûk pawh chu ziaawm deuh hawk mai ka normal deuh hawk in ka hria. Mahse atuka hna kal leh tur ka nih avangin ka inbelh lutuk duh ta lo va. Ruah lah chu banzai rel lo, trek nen alo la bei tluk tluk mai si. Dar engzat chiah nge ka hre lo naa ruah ala tam bawk nen ina haw luih tum lo a riah law law mai chu tha zawk a ka hriat avangin ka mu leh ta a.

Rei pawh ka mu hman lo tih chuan ka mutna khum chu a rawn insawi lûk lûk hian ka hria, mahse keimah kha ka pangngai loh em avangin ka luhai deuh mai mai a nih ka ring a. Ka’n thu chhuaka areh leh daih lawi si. Ka mu leh a ka muhil tan dawn siar siar tih chuan ahma aia nasa in a rawn insawi ta chiam chiam mai le. Chuzawng ka luhai vang mai mai a ni tawh lo tih ka chiang, rangtakin ka thu chhuak leh a ka hawi chhuak chiah chu ka mutna piah deuh thim chinah chuan Rosanga chu che lo a min en reng tih hriat tak hian a lo ding reng a.  Kei chuan, “Khum hi a insawi chiam chiam mai” ka ti a, min la chhang chuang lo. Ka normal deuh tawh avangin a awmdan chu mak ka ti ve deuh, ka biak pawh chuan ngawi rengin a ding reng  ringawt mai a mahse thiante mak ti anga han awm he haw chu nuam lo ka tih deuh avangin mut that leh pahin “A reh leh tawh a nih hi” ka ti ngawt a. Chutah leh Rosanga chuan aw thum trêng  tak zawi sup si mahse chiang viau si hian “Kha khuma ka mut lai ngei khan alawm kei pawh ka thih” a rawn ti ta mai... “Enga!!??” tih pahin ka thuchhuak nghal zawk a. Chulai taka kawlphe êng a Rosanga hmel rawn lang chu ka mitthla ah hian a la reh thei lo. A hmel chu a dâng mai pawh a ni lo, a var hian avar pup ni ber in ka hria, a mitmeng lah chu a bial pup mai a, achal atang chuan thisen arawn luang chuak nguai nguai bawk a, a hmai vel chu a pawr fup mai bawk. Ka tre thawt a pentrawng luhai a sawi theih tawh loh, ruahsur hnuai ah chuan rang mangkhênin pawn ah ka tlan chhuak nghal a. Vanneihthlak takin ka kekawr ipte a ka bike chahbi ka ah chu ka mutna ah alo tla lo hlauh, ka bike chu ka’n kick a la nung thei lawk lo zui. Ka  hnung lam ka’n en chuan  Rosanga chu ka lam pan hian alo kal chhut chhut mai. Ka va mangang tehreng em!!?? Pentrawng viau e ti lovin rilru tawngtaina nen ka bike chu kan kick leh lauh lauha a nung ta hlauh mai, an in kalkawng tak hi metal road a nih loh avangin a nal khawp mai lehnghal a ka tlanchhuak tur pawh ka tlu tep nghe nghe a ni. Kawngkawi a ka liam tur vawi khat ka va hawi let leh hram a kawlphe zuai ah chuan Rosanga chu hmai thi sung chunga aw thum trêng tak maia za lutuk a nuih huah huah pah hian min lo la kawk vu mai, ka va rap ber mai em..!! Pathian zarah chesual lovin in chu ka thleng hram a, vawt ka ti em em a ka khua asik a ka tlun nasa hle bawk. Ka nu in damdawi min eitir a min tawngtai ta vel  niin ka hria, abak chu mumal in ka hre ta lo.

Ka harh leh chuan damdawiin ah ka lo awm reng mai a, ka taksa chu a sil deuh thrûm in ka hria ka lu te chu ala ni deuh lûk mai. Ka khum bulah chuan ka u hian chanchinbu a lo chhiar malh malh a, ka harh tih min hmuh chuan ka lu a lo dawm vat a, thil awmzia ka zawh pawn min hrilh tha duh vak lo, “Nakin ah” a ti tlat a. Ka la nuam lo deuh lêklûk nen keipawn ka zawt lui ta bik lo. A tuk ah chuan ka tho harh ta vâk mai, nikhaw hre lo khan ni 2 leh zan 2 lai ka lo awm a lo ni a. Mahse doctor  ten ka dinhmun kha hlauhthawnawm a ni lemlo tih erawh ka chhungte an lo hrilh a. Ka nu sawi dan in, “Kha mi zan a ilo haw khan dar 2:30am vel a ni a, min auh pahin kawngka i rawn sawi chiam chiam a, i pa in a rawn hawn che a, i pa biakna che pawh chhang lovin hmanhmawh deuh in i room lam i pan nghal a. I mitmeng leh i awmdan ah khan i pa ngaih athat loh avangin va enzui teh min ti a, i room ah ka rawn kal a kawngka pawh ilo kalh lova, khum ah i thawmhnaw huh pawh phel lovin ilo mu tawp a, i khur nasa em em a, i  tawngvai deuh bual bual bawk a, kan mangang in damdawiin ah a zan zanin kan tlanpui ta ngawt che a ni” a ti a. Ka thil tawn leh awmdan zawng chu ahmaa dawt ka lo sawi tawh avang khan ka chhungte chu tumah ka hrilh lem lova. Ruah ka do avanga khawsik ang in ka in sawi mai a.

Damdawin ah chuan ka thianpa, Rosanga te in a min lenpui hmasa bertu ka tih khan  min rawn kan a. Ka thil tawn engmah pawh ka sawi hmain amah zawk chuan Rosanga thih thu leh a thihdan pawh a rapthlak khawp mai, zana a mu lai annu in a chalah tuboh in perek inchi 5 lai mai a kilh tlum thu min hrilh mai chuh…!!! Ka khua a sik tha leh dawn emaw ka ti hial a ni ka taksa hi a trim ur ur thei nia. Ka’n zawtchiang deuh a, an nupa zurui chu thikthu avang bawka inti thiam lovin an inhnial a, nidang aiin an thu a rum deuh nge Rosanga chuan annu chu kut te pawh an lo thlak hial a ni awm e. Chumi zan chuan annu te nen khum khat ah pawh mu lovin an ina ka kal zana ka mutna khumtê ah ngei khan annu te chu a mut san a. Chuta a muhil lai chu annu chuan tuboh leh perek hmang chuan chutiang thil chu a ti ta a ni. Chutiang thil thleng chu ka kal hma ni 3 liamta mai khan a ni a. Annu pawh chu Police hmaah chuan inzêp lem lovin alo inpuang nghal vek a, Central jail lamah an lo thawn liam tawh nghe nghe a ni awm e. Ka kal hma ni chiah khan ka thianpa pawh hi keimah ang chiah khan Rosanga phone call alo dawnga, an inah pawh ava kal ve ngei a, mahse a ni chu a fing deuha amah a nghah chhuah mai loh avangin rei lutuk pawh awm lovin zu pawh chu insak lovin a haw leh mai a ni awm a. Kei kha chu ka châkna kha a na deuh bik a niange. Ka thil tawn te chu ka hrilh ve ta vek a. An in ka thlen tirah an inchhung ruak huai ka tih te kha an bungrua an lo la tawh lek niin. Tin, farm neitute pawh khan farm enkawl turin vai pakhat an lo dah leh a mahse chupawh a lo awm ngam lova, zan riak lovin ran pawh pawn lam atangin a lo enkawl tih te ka hre leh zel a. Ka hlauh hi reh a hnekin ala zual dawn chauh ni maiin ka hria…

Thil mak ta ber chu Rosanga anga Rosanga number atang ngeia min lo be tu kha tunge ni ta ang? khami zan a Rosanga anga lo haw te kha tu nge ni ta ang? Ka rui in ka hmusual ami niang ti dawn ila ka ruih hma ngeiin min rawn phone a, an chahbi dahna a sawi te, a zu dahna a sawite kha adik vek si. A zu pawh ka in a, ka rui a, ka chahthlak pui ngei a ni si. Engkim mai kha ka tan pawh zawhna leh hrilhfiahna awm tawh lo tur vek a ni mai………….. Mahse ka tan a thil tha tak pakhat awm chu……. Khami hnu atanga tun thleng hian zu hi far khat pawh ka in leh tawh ngai lo a ni.

A tawp ta.