Zolûti leh Pûk huai

ZOLUTI LEH PUK HUAI

Post by Nun Mawia January 15, 2017

Dêngsûrinu pûk hi Serchhip khawhlui "Kawlri",Sailo lal Bengkhuaia'n a awp lai a an awmna, tlâk lam a awm a ni a,a thlang lawkah chuan 'Paihte tuikhur' antih chu a awm bawk a,Chutihlai chuan khaw dâi mai a ni.Engtik hun atang chiahin nge he  pûk leh tuikhur hian an hming hi anlo put tan tih chiang takin sawi theilo mahila,tunthlengin an hming ngai anla pu ta reng a ni.

Arts : Loicy

He pûk hi lian lo tak a ni a,lungpui lian leh khawkrawk deuhte'n ansiam a ni a,rualremlo zet leh pûk han tih tham tak tak pawh a ni awm love,Han han en thuak pawhin pûk ani tih pawh rin a har zawk ang!!; Mahse,he pûk tereuhtê hian 'Huai' nei niin ansawi ve thin tlat mai a,a hnu zelah phei chuan an khaw nu pakhat thlâ chuan a chenchilh zuita bawk niin ansawi a,nunaute leh dawihzep deuhte chuan an hlau thei hle a,helai pûk a Ramhuai cheng hian lungthil a mi a vawm thin avangin 'Dêngsûrinu pûk' ti a  a hming hi sawi zui tak mai niin angaih theih a ni.

Kan pi leh pu te khan Lungthil a mi vawm a,tih thaih thin Ramhuaite kha 'Dengsur/Dengsuri nu' anti a ni.

Chanchintha meichher det hma anih chu Kum 1871 hmalam daih tawh atangin he pûk hian Huai neitawh niin ansawi thin a ni.

He pûk huai hi an khaw daingul pasaltha Kâpvéla nupui Siklali chuan a zâwlta tlat mai a.An chhungkua ah buaina namenlo a thlen phah ta a ni.Kâpvela chuan a nupui chu a zâwl lak atanga chhanchhuah tumin theihtawp chhuah thin mahse awmzia a neilova,amah mai a a chinfel theih tak lohah chuan lal hnenah te pawh athlen a,lal ho a theihtawp a anbeih pawhin chu huai chu alo huaisar hle mai a,eng ruai an ang thei chuang tlat lo!! Tih lawm tumin vawi tam tak an inthawi a,Siklali thlarau chu an dil tlut tlut a;Mahse,chu puk huai chu chutiang mai a tihlawm chi alo nilo a niang chu! an thiam thil chitin leh khaw thenawm vel amite pawh aniang puk belh pawh a an beih fe pawhin an beidawng a chha chu a ni ta,khawtlang chuan an mangan pui tawh takzet a ni.

Kapvela chu Pasaltha meuh nimahse a nupui awmdan chuan a zial buaive hle mai a,nu tellova fa enkawl hautak tur zia lah a hrechiang a,a pasalthat lohna lam tak a ni si,chungte aimah chuan Khawvel a aneih chhun a nupui,a hmangaih em em in chutia a awmsan mai chu a na ngawt ang le..!!

Siklali chu a che bawraw chho ta telh telh a,chhan chhuah tuma theih tawp a chhuah chung pawh a awmzia a neih theih tak silohah chuan athak thakna a thak a,thil engpawh lo thlengse lo hmachhawn tawp chu a tum ta a,anupui chu a zalên tir ta tawp mai a ni.

Chutia dipdaltu an awm tak lohah chuan Siklali chu púkah chuan chhún zànin a kal ta tlut tlut a,a hnuah phei chuan riah chilhin a awm zui ta nge nge a,an koh ngial pawhin haw zai chhah reng a tum silo a,pûkah chuan chaw anpek chilh ta ringawt mai a ni.

Tûk khat chu pasaltha Kâpvêla chu inngaihtuah harh thut ni awm takin dawhthleng atang chuan atho thut a,banglai a kawlhnâm leh chengrang chu ala lawk a,a nupui awmna pûk lam pan chuan a ke a chhep ta ngut ngut mai a.

Pasaltha Kâpvêla chuan pûk chu a thleng thla thuai a, lung bang ngheng a anupui tui tak mai a lo muhil bawrh bawrh mai chu a hmu ta a.A hmel chu a dawl dangin a chêr tawh hle mai a,an chaw pêk thinte chu a ei mumal ngailo ang tih a hriat theih mai a.Siklali mit chu a val kual ruih a,a mitkhurte chu athuk kuk tawh a,a samte lah chu a bawrchhawrin a balh hmel em em mai tawh bawk a.A landan ah chuan mi pangngai a pha tawhlo a ni tih a hriat hle tawh a ni.

Pasaltha Kapvela chuan anupui pawh chu kài harh hmasa duh chuanglo chuan chu Pûk hûai chu a vau nghal khar khar a,inhrosak khumin a ankhum vak vak reng a.A chengrangte chu alawn leh ul ul thin a,a kawlhnâm vilik vut vut chung chuan ring tak takin puk huai chu a tawng vak vak reng a.

Huai lak a thinrim tak a a au bengchheng viau chung pawh chuan a nupui chu harhlo tih hriat takin chêt pawh ala che chhin eih lova.Pasaltha chuan a thinrimna chu a bunruakta deuh nge,a thiltih lai chu bansanin a nupui chu a ngaihven ta zawk a,a nupui awm dan chu a diklo a ni tih a hriat chuan hmanhmawh takin alam pan chuan a tlan zui ta a.

A nupui chu a han sawi deuh nawk nawk a; Mahse, A nupui chuan nunna reng alo nei tawhlo a,anupui a thih meuh chuan Kapvela pawh a nâ vawng vawng ngei mai,Pasaltha mahnise a mittui chu luan chhuah chak takin a mitah chuan an tling ve kiau mai a ni. A nupui nunna reng nei tawhlo, pangti dai thlur tawh chu a han pawm kang a,Nasa taka a nghaisak hrep hnuah a nunna alaksak leh zel chu a hrethiamlo a,a thinrimna leh rilru na lutuk chu a puakkeh a ni ber mai,rilru mumal pawh a pu hleitheilo,angaihtuahna te chu a tawi tuk mai niin a hria a.Mahse,karloah rilru fim pu leh thuaiin,midangte pun a zualko turin hmanhmawh takin khaw lamah atlan kir zuita nghal a ni.

Siklali thih hnu atang chuan he pûk hi a hrâng zual em em a,thawm maksak tak takte an hriat fo thin bakah Zing tuifim chuh a paihte tui chawi thinte chu he pûk atang hian avawmtu hmuhtur awm silo hian lungthilin alo vawm thin a,tleirawl deuhte phei chu mahni a he tui chawi ngam hi an awm meuhlo a ni.

He tuikhur hi tlan serh viau mahsela a hna atha in kangchah lai a nei ve ngailo a,thal va ek charah tak tak chuan an tlanlo thei thin silo a ni.

Lal Bengkhuaia pasaltha ten Alexandrapore rûn a,an sal kaihte zing a mi sap naupang Zolûti, ti a a hming an sak pawh kha, amah mantu Pasaltha Chemchawma hnen a a awm lai pawh khan he Paihte tuikhur hi a chawi ve fo thin a.

Tuk khat chu Zolûti leh athiante ho chu zing tuifim tling hmasa chuh tumin Paihte tuikhur kawi lamah an inzui thla dam dam a, tleirawl bengchheng rual chauh anla ni bawk a, an thawm pawh a tha tlang dar dar hle a.

Chutiang chuan enghelh em em neih hmel loh takin zai thla vak vak mahsela khawtlang nunau ten a an tih ruk em em huai nei ni a an ngaih,Dêngsûrinu pûk zawn an thlen chuan an thauah a man a ni chek ang an thawm pawh a zuih ta ruih mai; hnahthel rahrik hlekah pawh a dawih deuhte phei chu an tang nghal hru hru zel a.

Chutia,ngaihthalo leh ti ru tak a an kal ruk dem dem lai chuan an hlauh ang ngeiin  púk atang chuan lung thilin arawn vawm leh ta phut mai a,chuveleh,lo inring ru sa deuh ran leh thil awmzia lo hre tawh Zoluti thiante te chu râk chûl chungin baklengin antlan chhe zo ta diak mai a.

Zolûti chuan chutia lungthil a vawm mai mai a,hlau thlabara a thiante an tlanchhe ta vek chu angaihna a hrelo hle mai a,bakleng a an tlan darh chu mak ati hle a ni. Ani chuan a hriat ve loh vang pawh a ni mahna a hlauve miahlo a,a phur chu nghatin púk lamah chuan a tlan chho ta a,a thiante lo tihthaihtu chu fiah ngei a tum a ni.

 A thlen chhoh chuan a beiseiloh deuhin tumah hmuh tur anlo awm hauhlo mai a,a rawn vawmtu chu chulai velah chuan a awm ngei ringin a bih kual dun dun a,"Tunge rawn vawmtu kha?" "Ka vawm ve dawn che nia,lo chhuak rawh" "Khawiah nge i awm?" "Ka thiante leh midangte pawh lo vawmin lo tibuai tawh suh,ilo vawm leh chuan kalo kal anga ka vawm ve hrep ang che" tiin a hau ve khar khar mai a. Mahse,tumah lo chhawntu an awmlo,thehmeh ang maiin areh hian areh zui vawng vawng mai si a; Tichuan,Zoluti pawh ngaihtha takin tuikhur lamah chuan a liam thla zui leh ta a.

Mak tak maiin he Puk huai hi Zoluti'n a hauh hnu atang hi chuan a reh hlen ta hmak mai a,mi tumah atih thaihin mi a vawm leh ngai tawhlo reng reng a,a thawm pawh hriat zui tur a awm ngai ta miahlo mai a, Kristian naupang anih vang pawh hi a nimahna Puk huai hian a hlau hle niin alang a,Pathian hnathawh alo lang a ni.

Kum 2011 khàn Pu C.Kapthianga Aizawl Bethlehem veng chuan,"He Dêngsûrinu pûk hi Mizorama Ramhuaite hnawhchhuah hmasak berna hmun a ni e."tiin The Bible society of India ah "Life member" a nih tir a.

He Certificate ah hian, 'Mary Winchester-in ramhuaite a hnawhchhuahna,Dêngsûrinu pûk,Serchhip "life" a ni' tiin 9th.Jun.2011 khàn ziah luh a ni.

👉 Thil pakhat kan sawifiah duh lawk chu, kan story chhiar ami "Paihte tuikhur" ka tih hi "Paite tuikhur" ti a lam tur a nilova,he tuikhur bik sawinan hian hman a ni.Hetih hunlai hian Paite hi Paihte tiin anlam thin pawh a ni maithei a ni.

(Mawia LeneX)