Sih Huai nei (Re-Post)

Kum 1919 ah khan Mizoram ah 'Hripui' alêng chiam mai a.He hrî hi influenza ni a sawi a ni.Indopui I-naa Mizo tlangval france rama kalte rawn kai haw niin ansawi!He 'Hrîpui' hi influenza anga sawi nimahse arâpthlâk hle a niang!He hrîin aman tawhte chu awm hmunah antlu tawpa,anthi tawp zel a ni.

He Hrîchhia hian Serchhip khua pawh nasa takin atuamve a,Chhungkuaa thi mangta thakte pawh an awm niin ansawi a,thlân pawh an inlâi sênglo hial a,khur khatah mi 2/3 te anzalh mai a ni.Thlân vûngte chu râlkhat atanga thlîr pawhin a sên vul thei hial a,an thlânmual veng chu 'Senvêng' tih alo nita a ni.

Kum 1933 ah Serchhip khua chhungkaw tam zâwk chu ankhaw hmun hlui(Mary Winchester anlaklêt lai(1871) vela an awmna),tlâk lam 'Kawlri' hmunah anpêm leh hlawm a,Serchhip khua chu mi tlêmte chauhin an luahta a.

Kum 1935 ah phei chuan pêm bâng tlemte pawh chu Kâwlriah chuan an insuan zota vek a ni.He mi kum hian 'Mizo Zirlai Pawl' hi din ani nghe nghe a,a hnu lawk 1938 kumah Zâwlbûk tihtawp anive leh bawk a ni.

Kum 1935 hian Mizoram pumah 'Thlarau thianghlim harhna' athlenga,Serchhip khua pawh nasa takin harhna chuan anuai ve a,Bialtu Pastor hmasa ber Pastor Chhâwna hunlai a ni.

He 'Sih huai nei' chanchin hi kum 1936 a thilthleng a ni a,ka piin apa thiltawn min hrilh a ni.

Ka pi pa hi Dêngnûara ani a,he thil atawn lai hian ka pi chu tui umli khirh rual(12yr) vel a ni a.Dêngnûara chuan Dârtuahthanga leh Dârdêngite fanu Dârneihthangi chu nupuiah neiin fa 2, Lawmthangi(ka pi) leh Thandanga annei hman chauh tihin kum naupangtê niin a boral a ni.Thenkhat chuan he a thiltawn avanga boral niin ansawi a.Mahse,ka pi chuan a thih chhan chu thildang niin a sawi thung a ni.

Serchhip IOC hmuna 'Hmâwng' lian tak hi ' Dârdêngi hmâwng' tih a ni.

SIH HUAI NEI

Post by Nun Mawia January 19, 2017

. Pi leh pute eizawnna pui ber chu Thlawhhma neih kha a ni thin a.Thlawhhma zau pui pui annei a,kumkhat hawpkhawp tal thar tumin rimtakin hna an thawk thin a ni;chutoang tur chuan Ramngaw chhah pui pui an tukdarh a,chung Chapte chu Ni an hem char/an hem ro tir leh vek a,Tichuan, an halfai leh ta thin a ni....."Chapchar lai hian Mizote Kût ropui tak Chapchar kût pawh an hmang thin.

Lo hal hun a ni tawh a,Hmeithai leh thawkmawh deuh chhungkua tihloh thlawhhma nei chin chu Lo hal turin an thawk chhuak hlawm a. "Pu Dêngnuara-te unau hnih pawh thawk chhuak ve in,Pu Denga thiannu Pi DARI'n a zui bawk a. 

Thlawhhma hi a bing a nei annih avangin midang han ngaihchan tur an awm chuanglo a; "Chawhnu herah zawng thli kan ko lutuk ange." tiin,Mei lam te tha taka an sial vek tawh avangin an thlen veleh an hal nghal a.

Chap a roin a chhah tha bawk a,a kâng duh ngei mai;karloah kang zovin Chawfak hunah meuh chuan vutdûr pawh a dai thawih thawih ngam tawh a.

Chaw fâk phawt a,thlai chi thlak leh thil tul dangte thawh chu antum a ni.Ei rêlna tur vel chawi tumin Pu Denga pawh an vau luikawr lamah chuan a liam nghal a;Pi Dari erawh a thlai chi thlak tur vel buai puiin an inchap hnawk nuaih thung a.A nau Pawithang erawh an chhun chawhmeh tur dap tumin nikum an chul lamah a liam ve thung a.

Chumi ni chuan Ni chu asâ bîk emaw tih tur hian asat hian asâ vawl vawl mai a,Boruak a mei rim nam vung vungte chuan Nisat chu a belhchhah ngiang mai,,,kângvâr,la lum vung vungte avang chuan khua chu alum zual em em mai bawk a,Thing kâng bâng la mût khu vung vung maite chuan thaw anti pik zual hle in a hriat a.

Lui ruam chu a dài lût mek a, alo dai ruih mai a,luikawr erawh meikhu zâm vel in ala bawh deuh chûk a,tui luang ri ker ker leh ngirtling kiu rawl rawl bak chu thawm hriat tur avang hle mai a.Kângvâr Nisà tuar hrep tan chuan a hahdam thlak zawk ngei ang le.

Thâwk a han la halh a,Muang changlo in tui luanna lam chu a pan zui nghal a;Chutia kawr a zawh lai chuan lungtat tiat tur awm vel lung pakhat chu a han rap let zauh a,Chutah le!! Uite chum tha tak ang mai,sa tial rikrek pahnih hi anlo dawk chhuak nawlh mai a! Pu Denga chuan makti takin a thlir reng a,a lung rah buk atanga lo chhuak chu niin a hria a; Mahse, chutiang sa pahnih han tawm len theihna tur niin a hre bawk silo,angaihna a hrelo hle mai a ni.

Chutiang Sa chu ala hmu ngai miahlo a,danglam pawh ati hle a ni,patling kuttum tia awm vel anni a,avâng zawngin a dum leh vâr sen lek lekin an tial dun biai mai a, an inang chiah chiah a ni. uite_pangang ang maiin an hmai chu a bial kerh a,an chum tha em em mai bawk a,an mawiin an duhawm reuh hle ni tur a ni,Pu Denga pawh chuan midangte hmuh ve atan a îtin man tum chuan a um zui ta a.

Satial pahnihte chu man mai theih anlo ni bik awmzawnglo mai a,an zuang han tih tur chiah chu annilo,an sawt a ni deuh  ber ang chu,Pu Denga man phakloh deuh tur tawk chuan an sawt therh therh zel mai a.

Man mai theih anih inringin lui hnar lam pan chuan a umzui ta zel a,mau tluk hnih awm vel lek an inum hnu chuan kawr kam leh lamah chuan Satial pahnihte chu an perkâi ta theuh mai a.;Pu Denga pawh chu a lawn kai ve ta zel a.

Chutia,lui atanga an han perkai chu luikam maiah chuan Sih lian pangngai tak mai alo tling kung mai a,Chhâm ékin a bawh hring deuh nghulh a,Mak tak maiin Ngaw hnuai a awm nisiin hnathel an tla hnawk a awm miahlo a,a danglamna tak sawi fiah thiam siloh hian enkawl lai a ang hle mai a.Satial pahnihte chu Sih ah chuan an zuang lut a,an bo zui ta daih mai a,Pu Denga chuan Chhâm ek zam luk maite chu thingtang chuan a han hui kiang deuh thuak thuak a,hmuh tur reng an awm tawhlo,an bo zui hmak mai a ni.

Pu Denga chuan chutia a sa um ber ahloh tak daih si ah chuan beidawng leh hrilhhai takin let san mai a han tum a;Chutah le! Sih lî lung mai atang chuan aw ngaihawmlo zet mai a hre ta phut mai a,chu chuan a hma a mak alo tih rilrukna zawng zawngte pawh chu a rawn nem nghet zual ta sauh a ni.

'Aw' chuan,"Leilung awm tirh atangin helaiah hian kan awm tawh a,tumahin minla hmu ngailo,nang chauh hian min la hmu a ni." ati a.Pu Denga chu hlauhthawnna chuan aman nghal a,patling mahnise a awm a nuam zân tawhlo a ni,a rilru chuan chu aw chu chhangin,"Chuti,engtin nge ka awm dawn?" ati a.Aw chuan," I vanneih leh i dam anga,i vanduai leh i thi dawn a ni."tiin thu  awmze chiang sa ringawt chuan a chhang a.

Ngaihtha vaklo leh awmnuam zanlo chuan tui chu khaiin an innghahna hmun lam chu a pan chhoh san ta a.

Engtin nge an lovah lai zawng zawngte khan he Sih hi anlo hmuh miahloh theih zawk le!!? Nge? A hualtu hian hmuh theihloh turin alo thukru zawk emni ang." ti te chuan a ngaihtuah zui nauh nauh a,a thil hmuh leh hriat chuan a beng aluhin a ngêng a chhun riau mai a,chulai ram anlo tukdarh ta kher kher chu a inchhir rum rum a,hmuhthianglo hmu-ah inngaiin,engemaw thilthalo tawk dawn tlat a inhriatna a nei a,a ngaihngam zân thei tawhlo a ni.

.

.

Pu Denga chuan an in nghah hmun a han thlen chuan a nau chawhmeh zawng pawh alo let tawh a,a tui chawi chu a thangrei deuh tih chu a hrethiam mai a,Pi Dari chuan,"A engemaw chu chen chen i zuk tih khawtlai a?" alo ti reng a,chhang mumal ta lemlo chuan a riat nawi kual vel ta mai mai a.

Pi Dari chuan an mei nun sa,rem leh tawh chu a han chhem kai tha leh in bai bel chu a han chhuangkai zui a."Khawnge i ei rel chhungin kan fang kual thuak thuak chhin teh ang.." tih leh thawh chhuah chu a rual a.Pi Dari chuan," Kha,hei mai chi tlem kala thlak ban hi han thlak zo law law mai ta che." tiin pawnthem ung taka thil inbawk chu a pe a,Pu Denga pawh chuan a Kawlzal ah chuan a khung tha ve nghal a.

An thlawhhma thar tur chu hmun rem leh tha zet mai a ni a,buhchi pawh tla tha viau turah a ngai a ni,chhengchhe lai han tih tur pawh a awmlo a,a tawk awm lek lekin changel hung a awm fir fer mai bawk a,Pu Denga chuan a han thlir kual thuak thuak a.Chutih pah chuan a rilru chuan,"Tlak lam per hi kala chuang chhuak miahlo mai,enge maw a an ve teh reng le,kâng tha ve tak maw?!!" tiin a han ngaihtuah a.

Pu Denga suangtuahna chu "Aw" bawk chuan a piah thingbul mut khu vung vung kar atang chuan,"Kâng se,kang suh se! I chhawr dawnlo!" a rawn ti leh ta a.Pu Denga chuan chu aw chu Sih huai aw ngei kha tih a chiang teh kèl e,chutah zet chuan pialral kawngka hawng ngei turah a inngai tawh a ni.

Pi Dari'n chawfak tur a a rawn auh tak lang langah chuan chulamah chuan a inpal khu phei chum chum a.Tichuan,Chaw chu an fak zui ta a,Pi Dari leh anau Pawithanga chu  an ringthar turte sawi chuan chuan an titi bawrh bawrh a;Pu Denga erawh nidang anglo takin a zâm a zàl hle a,a thil hmuh leh hriatte khan an mawlh tlat a,a awm a nuam thei tawhlo a ni.Pi Dari chuan,"U Deng,i nuam vak na nge,na i nei em?" alo ti var a."Nei love,ka tum hi a fuhlo deuh mai a ni."tiin Pu Denga lah chuan alo chhang mai si a.

Tichuan,chaw an fak zawhah chuan Pi Dari chuan thlai chi vel chu a thlak a,Pu Dengate unau erawh thlam chak vel dap turin vâu ah an pil bo zui ta a ni.

Ni chu vanlaizawlah dip daltu awm hauhlovin a êng vâm hiam mai a,chhum awm chhunte pawh chuan an tih deuh ni ngei tur a ni,an tawlh sawn san zel a.Chutih lai chuan Pu Denga te unau pawh biang a thlantui luang zawih zawih chungin mau tel lian zet mai hi an rawn pu lut dun vu vu a.Pi Dari thlai chi thlak pawhin a duhtawk angah tawh bawk a,Pu Denga chu a awm a nuam thei nganglo a ni ang,chumi ni atan chuan duhtawkin haw mai chu a rawt ta a,Pi Dari leh a nau pawh chuan hrethiam takin engmah zawt buai duh lemlo chuan an haw ta a ni.

In an thlen hnuah chuan Pi Dari chuan a pasal chuan lui tui a chawinaah khan engemaw tak a tawng anih chu alo ring ru ve bawk a;Mahse,zawt chik duh lemlo khan a Pu Denga sawi chhuah hun kha a nghak a,a beisei ang a,a sawi leh tak silohah chuan a zawt zui bik duh ta lo a ni.Tichuan,Pi Dari chuan,"Engemaw i awm tinuamlotu chu ni ta ber a,i tui chawina ah khan engthil chiah nge i zuk tawn chu le!?" tiin a pasal  chu a zawt leh ta nge nge a.

Pu Denga pawh chuan zep reng tulin a hre tawh biklo a,a thil hmuh leh hriat zawng zawngte chu  a sawi chhuak ta vek a;A hria a piang ngaih chu a thalo hlawm hle a,Pi Dari phei chu a zâmin a mangang ru em em a ni.

Tichuan,zanah chuan an hlauhthawn ruk ang ngeiin Pu Denga chu a damlo zui ta a,damni hmel hmuloin hun rei tak a awm a,a tawngvai chuan an vau a Sih chu alam fo avangin Sih Huai ten a thla chu an man ni ngei a ngaiin, a pa Pu Dengleha chuan a fapa thla chu a ko ta a.

An rin ang ngeiin Pu Denga thla chu Sih ah chuan alo tang a,apa chuan ko haw in, kawng thui fe chu an inchhawm tak na a, kawr ruam pakhat an thlen chuan Pu Denga chuan a pa chu a zui duh ta tlatlo mai a,Sih lamah bawk chuan a kirsan leh ta mai a ni.A pa Pu Dengleha chuan pawiti tak leh beidawng takin a haw san ta ringawt mai a ni.

Tichuan,Pu Dengnuara damlo pawh chu damchhuak zo lovin a hmangaih em em a nupui fanau te leh chhungkhat laina te chu tho leh ngai tawhlo turin alei taksa chu a muhil hlen ta a ni.A boral hian kum 29 niin a nupui leh a fate pahnih a kalsan a ni.

............A TAWP TA............

[SIH HUAI NEI

Post by Nun Mawia January 19, 2017]