COVID IN TAKSA A NGHAWNG ZUI DAN LEH DAMLOTE NGAIAWH LEH TURA ENKAWL DAN

Lalthasiami(MPT,Neurology) 

Khawvelin Corona Virus kan hmelhriat atang khan mithiamte chuan a chi (variant) hi chi hrang tam tak an hmuhchhuah belh reng a, virus te chu ze bik nei lo, insiam danglam reng an nih angin he virus ngei pawh hi a intidanglam zing tawh hle. Heti a nih rual erawh hian, mihringte taksaa hna an thawh dan leh nghawng an neihte chu ram hrang hranga zirbing mite leh mithiamte sawi dan atanga thlir chuan a danglam tam lo hle thung a ni. 

Corona virus in taksa a beih dan tlangpui chu kan hre bel tawh hlein a rinawm. Mihring chuap leh lung a beih thlen tawh chuan tha taka damchhuah leh hi kawng awlsam tak a ni lo tawh thin a ni. He hri  hian kan taksaa kan pholan nasat, heng, kan mit, kan ka leh kan hnar ah te bu an khuar a, hun reilote chhungin tam takah an insiampung thin a, ngaihsak a nih loh chuan kan taksa chhungril lamah insuan zelin heng kan chuap leh lungte hi chenna atan an hmang ta thin a ni. Kan hriat theuh angin kan chuap leh kan lungte hi kan taksa peng hrang hrang zinga hna pawimawh thawktute an ni a, kan taksaa timurten hna tha taka an thawhna tura oxygen semtu leh kan taksa in a mamawh tawh loh carbon dioxide te thiar kualtu peng pawimawh te an ni. 

Mihringten boruak kan lakluh leh kan pekchhuah hi awlsam thei ang bera kan sawi dawn chuan thingkung angin kan peng pawimawhte hi kan khaikhin thei awm e. Kan hnar atanga thawkna dawt kal dan leh hemi atanga peng lian pahnih kan chuapa lutte leh chung peng lianten kan chuap veilam leh dinglama peng te zawk thahnem tak an insiam dan hi thing kung lian tak, a zar kak atanga zar dang lo peng tuaite nen hian tehkhin a sam thei ber awm e. Tichuan, a peng theuhte tawpnaah chuan bawk tereuhte, bag ang deuh tak, alveoli kan tihte chu an awm ta fur a, he alveoli hi boruaka oxygen kan hip luhte tlinkhawmna leh kan taksain hna a thawh chhunga boruak tangkai lo carbon dioxide te intawhna leh inthlakthlengna hmunpuite an ni. 

Corona virus hian heng kan thawkna peng hrang hrang te hi beiin bu an khuar a, boruak inlumlet tur leh thisen insemdarh turte tibuaiin a tivung thin a, chu chuan chuap lam chu  a hnathawhah harsatna pe in pneumonia kan tih kha a thleng ta thin a ni. 

Mithiamte zirna atanga a landan chuan corona virus in a tihbuai damlo za zela sawmriatte chu chuap lam thleng lo emaw, chuap tichhe lutuk loa damchhuak leh te an nih laiin za zela sawm leh pali velte erawh hi chuan chuap lamah harsatna an tawk nasa hle a, boruak an hipna ber tihbuaia a awm avangin hnai te, vung te a siam a, khak leh thli tha lo te insiamkhawlin chungte chu chuap leh a bul velah te an tling a, thawk a tibuai thin ta a ni. 

Hetiang a nih avang hian corona virus in a tihbuai te chuan doctor te enthlakna hnuaiah damdawi leh enkawlna hrang hrang uluk takin an dawng a, an taksa in natna chhel taka a tawrh theihna atan leh a hriin an taksa a kalsan hnu pawha harsatna an tawh zui lohna turin doctor te bakah physiotherapist te pawhin enkawl hna an kalpui thin. 

Covid kai tawh dam leh nia inhriate zingah long covid condition nei an awm thin. Long covid tih awmzia chu a hriin a kiansan nia a lan hnu pawha covid ang taka damlohna leh an taksaa an covid laia harsatna an tawh ang tawn nawnna tiin a chiang awm e. Hetianga taksa a awm hi virus an taksaa an kawl atanga  thla khat emaw hemi aia rei deuh pawh hi a ni thin.Heng ang harsatna tawkte hi physiotherapist ten enkawl dan chi hnih kan nei a, chungte chu 

1. Postural drainage and positioning :  Postural drainage tih awmzia chu lei hipna (gravity) leh percussion (hetah hian kutphah tikumin emaw dahngilin ( a tul dan azirin ) damlo kha awmze neia malis / chhut keuh keuh an ni thin) hmangin tha taka thawk a lak theihna tura puih a ni. Heihian chuapa hnai leh khal lo tlingte chu khuh chhuak thei turin a pui a, boruak luhdan siamremin chuapin boruak a lumlehna kawngah harsatna nasa zawk a tawh zui tawh lohna tura tih a ni thin. 

He inenkawl danah hian chuap chhung peng tinte chuan boruak tha an hmuh theihna turin taksa saisir leh tlema kawm deuh hleka muttir an ni a. Lei hipna in a tanpui theih dan tur, a hip nat theih dan tur berin a mut lai chuan  a chuapa khak leh bal inkhawlkhawm chu damlo chuan a khuh paha a khuh chhuah theih ngeina tur in a taksa chu sawizawisak a ni a, awmze nei tak leh mumal takin a pangsirte leh a delh loh lam te chu hmeh leh khawn an ni thin. Hei hian nasa takin thawk a chhawk zangkhai thei a ni. 

Postural drainage hi damlo dinhmun azira siam danglam theih a ni a, damlo in pawnlam mi puihna tel loa mahni pawha rang tak leh awmze nei taka a lo inenkawl ve theih zui zel dan tur ngaihtuahsak a pawimawh. 

2. AWMZE NEIA THAWK LAK

Chuapa khak leh thli balte chu awmze nei taka thawk lak dan chhawng thumin a tihreh ve theih bawk. 

Pakhatnaah chuan thaw lak dan pangngaia thawk mai hi a ni. Heihian boruakte kalkawng chu a tiveng a, thawk chu hnar atanga la lutin ka atangin kan thawchhuak leh zel tur a ni. Hetihlai hian kan awmruh hnuailam, pum lam hnaihte chu an ip lut ang a, kan awmruh chunglam te leh kan darte chu dam takin tang lovin an lo awm thung ang. 

Pahnihnaah chuan kan chuap atanga thli tangkailo kan paihchhuah duhte pui tur atana thawk lak a ni. Hetah hi chuan damlo khan na takin boruak a hip lut ang a, a theih anga tam boruak a chuapah khawlin chutiang ang zat bawka tam chu pechhuak leh thei turin na tak bawkin a thaw chhuak leh tur a ni. Hemi a tih chhung hian mumal takin a kutte chuan a  awm a beng ang a, a awmbawr chu a chum nghawr det det tur a ni. Hetia a tih zawh hnuah hian a hma ang bawkin pangngai takin a thaw lutin a thaw chhuak leh tur a ni. 

Pathumna hi tihluihna(force) hmanga thawlak tihte pawhin an sawi thin. Damlo chuan a theihtawpin thawk a la ang a, a awm a tilian ang a, a chuapah boruak a tam thei ang ber a khawl phawt ang, chumi hnuah chuan a theihna zawng zawngin a boruak khawlsa chu paihchhuah leh a tum ang a, a thaw chhuak ang, chutia a thawk pah chuan a khuh lui kharh kharh tur a ni. Heihi chuapa bal leh thlite paih chhuah dan tha  ber leh awlsam berte zing ami a ni.Tuna inenkawl dan kawng hnih kan han tarlan takte hi a pakhat zawk emaw chauh pawh a tihtheih a, duhthusam erawh a kawp ngeia tih theih hi a ni. 

Heng exercise pahnihte hian covid19 avanga dam muang te, chau ngawih ngawih te, thawhah, thawchham leh chuap hmelhem turte a tiziaawmin taksa a chhiat belh zelna turah an veng thei a ni. 

Covid19 avanga taksa lama harsatna neiten ngai an lo awh leh vat theihna tur atan te chuan heng te hi  kan sawi tam a kan chin tam a tul hle. Nachang kan hriat loh avanga kan tih loh te leh kan inthlahdah avanga kan tih peih loh hian kan taksaah harsatna lian zawk kan thlen thei a ni. Kan taksa chu keimahniin kan inhre chiang ber a, harsatna kan neih chuan kan ngaihven tur a ni. 

Covid avanga taksa lama harsatna te hi mi zawng zawng chunga thleng a ni lem lo tih erawh kan thuziak bul lam kan en chuan kan hre theuh awm e. Chuvang chuan kan chiai tur a ni lo a, tul loah rilru sengin kan ngaihtuahnate kan tihah tur a ni lo. 

He hriin min kiansan hma hi chu mithiamte ngaichang reng chung leh kan taksaa hriin hna a thawhdante chik chungin fimkhur takin i inenkawl tlang zel ang ila, chutia kan tih chuan he hri hi mimal tinten kan hneh thei theuh ngei ang.