Thilmak mi sawi/titi ka hriatte

Part-1

By - Lalrosanga Sailo

Ramhuai/thlahrang hi a taka hmuh chu sawi loh a thawm niawm ang pawh hi ka la hre ve lo hrim hrim a. Hetiang lampang hi ngaihnawm ka ti viau lawi a, a tawngtute leh an chhungkhat hnai ten titi na vela an sawi ka hriat hi tlem azawng kan thailang ve ange.

1) School lama kan thawhpui Pu Neiha, Kolasib a pem ta (tunah chuan a boral tawh a) in min hrilh chu: "tualchher silai nena ramvah hi ka hrat ve viau țhin a, ram hla kal peih ta lo chuan dai hnai deuha sava zanriak leh sazaw vel vai mai mai hi ka ching thung a. Zankhat chu kawng thlanga thlanvawng kung hi ka zu en a, sazaw hi a lo meng de ra mai a. Kawng ațanga kah dawn chuan hla deuhin ka hria a, kawngthlangah chuan thawm dim takin ka chhuk ta a. Ka'n en leh a, ka kah dawn lai tak chuan a kung pang lehlamah a tlan zeuh a, ka'n nghak deuh a, kah rem takin a rawn lang leh ta a. Kah tuma silai cheng ka hmeh dawn lai tak chuan a hma a ka dinna kawng ațang khan hmeichhe aw hian, "Mate!" min rawn ti ta mai a. Ka hawi chho a, a thim mup mai bawk sia, ka hmulthi a ding nghal sung sung a. Sazaw pawh chu kap ta lo chuan ka țawngțai nghal a, ka haw nghal nal nal e," a tia lawm.

2) Kan veng pa, ramvachal zet mai, Tlangkhang khua ațanga lo pem Pu Lianmawia sawi ve thung: ka țhianpa nen hian ramvah leh luikal nuamti zet mai leh inkawp chawt mai kan ni a. Kan infiam nâ thei bawk a, "Ka thih hmasak chuan i luikal hi ka rawn au ziah ang che mawle," ka'n tifiam chu, "Nang pawh i sa channa ah ka rawn au ang che," min ti ve bawk a. Chumi hnu rei vak lo ah chuan ka thianpa chu tlangval țhalai tak niin a boral ta mai a, ka tuar kher mai. Kan fiamthu te kha chu infiam nasa țhang kan nih avangin ka hre zui tawh lem lo a, ni khat chu kan lo a sanghal chhuak țhin chang turin ka chhuak a, vau chhungah, rawhung chhah zet thlanga thingkungah ka țhu a. Khua a rawn tlai a, unau hmelhai awm velah hian ka chhaka rawhung phen ațang chuan ka țhianpa thi tawh aw ngei mai chuan, "Lianmawi!" min rawn ti ta mai a. Ka phu zawk a, ka hmulthi a ding nghal sung sung bawk a, vawihnih min rawn au leh a, e khai, a dik dawn lo tiin țhangte ațang chuan ka chhuk a, lei ka thlen rualin vawikhat min rawn au leh a, tukhum bing mup mup chungin ka haw nal nal e," a ti.

3) Ka țhianpa in an thawhpuipa sa chan thu min hrilh ve thung: tawitaw, sakhi rahtlan ka chang a. Khua a la eng vek a, ka hnuaiah chuan thawm a rawn awm a, ka'n zu hawi thlak nak chuan rul dum vek, malpui aia lian mah tur, sei em em mai hi a lo tleng zul zul mai chu niin. Ka en reng lai chuan amah ang tho a rul dum vek, a hma ami aia lian mah tur chu a rawn tleng chhuak ve leh ta mai a. Infiam vel niawm takin an inzem a, an inum vel bawk a, chutiang a darkar chanve vel dawn an inchhaih hnu chuan an tleng bo leh ta a. Khami ni tak kha chuan hlauhna em em pawh ka nei lova, mahse a zawna ni thum ngawt mai chung rul dum pahnihte ka'n chang chhuak zet chu kum khat chuang mah ramvah ka sim phah e," a ti bawk.

4) Kan tet deuh laia high school zirtirtu Pu Zirkima sawi: Thingsai khua a ka thawh laia an sawi a nia, a ti. Vawrsela hi a awm a, amah chauhin lo ah a riak a. Zan khat chu eirawng a bawl laiin a thlam kawngkhar a rawn in pawt hawng hrawk a, kut lian em em mai leh hmul dur mai hi a rawn lawr zul zul a, a sazu chu rawn man a tum ta mai a. Vawrsela hlau chu thlam kilah a tawm ran mai a. Chutah aw thum țeng chhuai mai hian, " Sela, ka kut hi en teh!" a ti a. Chu kut hmul dur mai chu a kut phah lai hi a kaw tlang sen duai mai a. Tichuan, kut pawh chu thlam kawngka pawnlamah a chhuak bo zui ve ta a, Sela pawh chuan eng thil hlauhawm mah a tawng zui ta lo va. Chumi hnu karah chuan Sela chu sakhi rah tlan changin a ramvak a, a tlukna lamah intipalhin a kut phah lai tak chu a inkap palha a kaw tlang sen duai e, a tia lawm.

Part-2

By - Lalrosanga Sailo

1) Ka cousin nu hi hmeithai a ni a, amah chauhin lo ah a riak a. Thimhlim a thlam a eirawng a bawl rek rek lai chuan a thlam kawngka chu an rawn kik a, "Lo lut rawh," tia a'n chhan hnu chuan kawngka chu a rawn inhawng a, palian pui mai, hmel bumro leh hmul dur mai hi thlam kawngka ah chuan a rawn ding khat hmuk mai a, "Ka pi, maitamtawk i lei duh em?" a rawn ti thum ta chhur mai a. Ka pi chu piangthar țha leh nu sehhel ve tak a nih avangin hlau miah lo in, "Lei duh lo mai ang," a lo ti liam țha ve mai bawk a. Chupa chu ngawi rengin a kal leh a, chumi kum chuan vawi tamtak lo ah a riak zui a, engmah a tawng zui lem lo.

Ramhuaite hian maitamtawk zawrh an lo ching viau nge ni, kan naupanlaia an sawi ve ziah chu; Mamit Dinthar amite lo vat in ramah an riak a, ramhuai palianpui in maitamtawk a zawrh, an ti. Khang an sawi hunlai kha chuan kan hlau ve thei viau.

2) Grouping zawh hnu khan ka pate hi Mamit ațangin Phaizau khua ah huan siam leh lo neiin kum rei vak lo an zu awm a, chumi an awm laia thil thleng a sawi pakhat chu : "Tuk khat chu zinga kan thawh hian khawlaiah nuho an țe chel chul mai a, eng nge thil awmzia tia kan han en nak chuam thisen tharlam tak mai hi khawlai charah chuan a lo baw neih nuaih mai a. Bawng kan talh a thi phuan buah ang te hi a tam khawp mai a. Tu ran nge kim lo tiin kan han inzawt vel a, tuman kan ran a kim lo ti an awm bawk si lo a. Thisen lah chu a tam em em mai bawk sia, a thang nghur mai bawk a. A thi far chu kan ham chhui a, thlanmual thlen hma deuh hian a far chu a tawp a, kan ngaih chu a tha vak lo khawp mai a.

Chumi ni chawhnu lam chuan tuikuk nu pakhat hi raicheh in a thi zui a, chu nu thisen chu a niang han ti dawn ila, che thei lova khuma mu reng leh an tlaivar pui hial kha a nia, mak kan ti khawp mai," a ti.

3) Ka pa bawk hian tuna kan kohhran upa min Upa Rotluanga nen hian kan tlangval laiin Phaizau khua ah vek hian nula kan rim a. Kan nula rim pa chu damlo rei tawh, mahni zun leh ek pawh thiar thei lo, mut hmuna thiar sak ngai ang chi hi a ni a. Rei pawh kan țhut hma in chhiara an ar chu an ai tuar tuar a, engin nge khawih tia va en kan tum lai chuan khuma an pa mu chuan, "Keimah ka nih kha!" a rawn ti ta mai a. Chhuak ngam lo in kan thiandun chuan kan țhu leh a. An nu ber chuan, "In va han dawih tak!" tih leh lantern khaia tlanchhuah a rual a, kan um zui ve nghal a, an ar chu pathum vel ngawt an lu a lo bung, a ti. Kan haw tur chu a thim bakah ruah a tla ser ser reng a, an kaițen thleng lantern in an nula chuan min lo en a, thim chin kan thlen chuan kan insi chat a, ngawi rengin kan kal nal nal e, a tia lawm!

.

.