Thangkawki Thlahrang (A thiannu Sawiveli-te nupa thuruk mak!)

*THANGKAWKI THLAHRANG*

_(A thiannu Sawiveli te nupa thuruk mak!)_

*_Ziaktu: Rinfela pa_*

🕸️ Pi Thangkawkite hi kan khaw hlun anni a,annu leh pate boral san tawhin a u Chalzinga nen chauh an khawsa a ni.Pianphung a mipangngai leh him dam pial siin nupui pasal lam an ngaihtuahlo hle a,Tu mawng beng rual zet annih thleng pawhin kawppui anneilo a ni.Chutianga an khawsak ve naw naw hnuah chuan Pu Chalzinga chuan an khaw thenawm lawk ami,nuthlawi Lianlawti,fa pathum lai pawm tawh chu nupuiah a nei ve ta mauh mai a ni.

Pi Thangkawki hi nu zaidam leh fel tak mai a ni a,a u Chalzinga nen pawh hian an inbakkaih ngailo! Hetiang a kawppui pawh neilo a an upat deuh takah phei chuan mi duhsakna te pawh an dawng fo thin a ni.Unau inngei tak mai annih avangin khawtlang pawhin an ngaina in an nel rawn em em a.Tlem a an kum te alo upat tak deuhah chuan a nauin nupui neitur a atih fo thin na chu zawmin; atawpah chuan an khawthenawm a nuthlawi fa pathum lai mai pawm tawh chu anei ve ta nge nge a ni.

A u in chutia kawppui a nei ve ta chu Pi Thangkawki mai bakah khawtlang pawhin an lawmpui thiam em em a.Nikhua alo rei a,Pi Thangkawkite chhung chu hlim taka an awm mek laiin an monu te nufa nen chuan an inkar chu a chhe chho tan a,a u lah chuan a hriat pui lem lo a ni.

Thangkawki'n a thiannu Sawiveli a hrilh dan chuan,"An nufa hian Min zahlo tawh hle a,a hma kha an ang tawhlo, Lawti chu sawiloh a fa te tak ngial pawh hian min zahlo em em a;hetia ka u nen a fa an chawi dun takah phei chuan a indah lal thiam hle a,hnawk minti ta hle niin ka hria,nawm samloh nikhuate hian a hrehawm thin asin,hetiang reng reng chuan dam reng pawh hi ka thlahlel love.." ati a ni awm e.

Furpui hunlai a ni bawk a,khua a nuamlo thei hle a;chuti a nihlaiin ram lam hna kau teh hun,hna tul hunlai tak a ni ve bawk a.

Thangkawki leh an monu pawh an Lo lamah liamin an nileng chu a ni mai a,hemi ni hian Chalzinga chu a mau hnang lakna ah a kawng a tina a, a feh ve lova,In a nghak thung a ni.Tlai lamah chuan zualko hmel an hmu ta thut mai a.

Thangkawki chu Tuivang lui ah chesualin a boral a,a ruang pawh ahmun a awm ang angin,theih ang angin an zawn nghal thu a rawn sawi a ni.

Tichuan,Thangkawki ruang zawng tur chuan a thei apiangte chu Tuivang lui lam pan chuan an liam nghal ta zel a.An beisei leh rin angin Kawki ruang chu an hmu mai thei ta hauhlo mai a.Fur tui len lai a ni bawk nen;tui chu a nûin a kuang a khat put mai bawk si a.Ni li zet an zawn hnuah chuan an hmu ta hlauh mai a ni. A ruang an hmuh dan chungchangah hian thilmak deuh mai a awm a; Thangkawki thiannu Sawiveli chuan mumang mak tak mai a nei a.A mumang chu ti hian asawi a, "Thiannu Thangtei ruang zawnna ah hian kalo kal ve a; khawthim dawn ruaiah pawh kan la hmuh mai siloh avang chuan kan beidawngin kan chau tlang tawh hle mai a,luikam tiaupho ah chuan kan thu nghuk mai a,zawn leh zel dante relin kan phusa mur mur a,chutih lai chuan kan piah deuh phairuang pik kar atang chuan Thangtei hian minlo hui zauh zauh mai a;Ngawi reng chuan ka pan phei ve mai bawk a. Amak ngawt mai,ama ruang kan zawng a nisi a,ka hlau miahlo kha,ruang zawnna a kal ve turah ka ngai a ni chek ang..".  a han ti leh te te a.Chutah a mumang chu a han sawi zawm leh ta a, "Thangtei hmel chu a hlimlo hle mai a,thil tam tak min hrilh a,chumi pah chuan lui mawng lam chu min pan thlak pui zel a.Chumi hnuah chuan lungpui lian em em mai chungah hian min din pui ta a,chulai hmunah chuan engtin nge kan kai pawh ka hrelo;kan velah chuan tui lian chu a kal mar pung pung mai a,hmalam leh hnunglam chu thui tak alang thei a ni.Kan awmna lai chu kan chawlh khawmna atang khan kawi hnih emaw kawi thum emaw vel chauh a ni ang... hmalam erawh chu thui tak a hmuh theih a,tui chu a mar thla put a,a reh duk mai bawk a.

Thangtei chuan," Thiani,he kan dinna lungpui hnuai lung keh karah hian inzawn mek ka ruang chu a tang a ni." ati a,athusawi laia tuilian thlir a ka hawi vung vung avang chuan mak ti taka Thangtei lam ka va hawi chu alo awm ta reng reng lo mai a.Ka au vak vak a,tuilian chuan min hual vel vek avang chuan ka hlau ta hle a,ka mangang em em a,Thangtei chu a hming te a koin ka rawl tawp tawp chuan ka au vak vak a,ka lo au chhuak a ni chek ang ka nu in min lo sawi harh ta hlawl mai a." ati a.

ThangKawki ruang chu an zawng nasain an dap nasa tawh hle a,Sawiveli'n a mumanga a sawi lungpui lian tak atih niawm tak pawh chu an dap tawh hnu ngei kha niin an hre bawk si a,an beidawng tlang viau tawh hlawm a,chet lak zel dan turah pawh an buai tan hle a ni,chutiangte anih avang chuan mitam zawk chuan Sawiveli mumang chu fiah hrim hrim chu an duh a ni.

Sawiveli mumang chu atak tak pawh alo ni reng thei,beidawn nan hrim hrim pawh tiin ring miah silo beisei ru deuh tak chung si chuan tui lut thiam ho chuan Sawiveli sawina lungpui lian tak hnuai vel chu an han dap tha leh ta a.Rei pawh an dap hman lo;Kawki ruang chu an hmu ta mai a ni.

Chutia,Sawiveli mumang a thlen dik tak si ah chuan mite mak tih a hlawhin amah ber pawh chuan mak ati em em a,a ruang zawng a, lungpui hnuai dap nawn leh tute pawh chuan mak antiin awlsam tak khan an hmu leh mai si a, 'Engtin nge a hma khan kanlo hmuhloh theih zawk?' anti hial a ni.

Thangkawki boral chuan uitu angah hle mai a,a u Chalzinga pawhin a tuar hle tih a hmelah alang thei a ni;chutih laiin anupui Lianlawti erawh a thawven hmel zawk mah a,mi te mak tih hialin a awm a ni.

A mumang a thleng dik mai chu mak atiin a thiannu thusawi dangte pawh kha thudik vek anih chu a ring ta hle mai a,a awm a nuamlo in a thiannu chu a khawngaih thar hle mai a,a pasal chu engkim a hrilh ve ta vek a,atirah kha chuan mumang mai mai tiin engahmah an ngailo kha a ni a;Mahse,a mumang a han thlen dik tak meuh si ah chuan annupa pawh chuan a thiannu'n a thu hrilh zawng zawng chu a dik an ring ru hle a,Thangtei chuan enge a hrilh erawh anla sawi chhuaklo a ni.

Thangkawki an vuiliam fel a,khawhar In riak te pawh a nawlpui chu an chhuak tawh a,a riak rei fal 2/3 vel chu anla awm ang.

Zan khat chu Sawiveli muhil lai chu engin emaw hian a ti harh hlawl mai a,zan chu a rei tawhin a reh vawng vawng mai si a,a pasal fanaute lah an muhil reh thiap mai bawk si,mak atiin ani lah a harh chiang em em mai bawk si a.Chutia,han harh ta chu tiin pawnlam bathroom a zun ram thiar tur chuan a tho chhuak zui ta a.

Bathroom atanga a rawn chhuah leh hnu chuan Varanda ah chuan dingin zawn nei niawm takin a hawi vel ruai ruai a,Ruahsur banna ala reilo tih hriat takin khawlai vel chu ala huh hluam hlawm a.street light eng sen phut mai ah chuan tuihu zam ngiai ngiai te chu an langsar viau mai,luh leh mai tum a a in her dawn lai tak chuan a thiannu Kawkite kawtah chuan engemaw ava hmu ta tlat mai a,ding meuh chuan a han thlek a.

Mihring ngei a ni tih chu ava hre thei mai a,tu emaw zunram thiar ve anih a ring a,inbiak phak lek nimahse chutiang zan reiah chuan ava be duh bik kherlo a.Chu chuan In chhung lama luh tum ni awm takin Kawngkapui lam chu a pan thla dun dun a;varanda light engah chuan tunge a nih a hriat theih ta a.Sawiveli chu a phu nghal dawrh mai,a te chhuak thawt nghallo chauh a ni.

A thiannu Thangtei ngei mai chu,a hnathawh thawmhnaw, hlui tawh tak leh uk deuh khang tawh inbelin Kawngkhar ah chuan a kun lut dun dun mai a,a hmel erawh chiang takin a hmu theilo a,rang takin Inchhungah a luh san ve ta a,a pasal chu kaitho in a thil hmuh chu a hrilh ve ta a.

A thiannu Thangkawki chanchin sawi chuan mut hmunah an titi zui dun sep sep a.Chutih mek lai chuan Lianlawti au te ruai ruai leh naupang tap nghal chuah chuah thawm an hre ta phut mai a,rang taka thovin Pu Chalzinga te In lam chu an pan ta nghal a,thenawm hnaia a hria apiangte chu anlo tlan khawm ve mek bawk a.

Lianlawti chu sam hreu bem bum hian chhuat laiah chuan alo thusawp nulh mai a,a khur hluk hluk mai a;Hlauhnei tih hriat takin a meng â ruai mai bawk a,a phun nuah nuah a,"U Thangi..U Thangi..." tiin a pasal nau Thangkawki hming chu alam mawlh mawlh a,a fate ho lah chuan annu chu hnaih tha ngam mailo in asir atang chuan anlo tah ve vak vak mai bawk a. Chalzinga chuan angaihna hriatloh hmel takin annu chu sawi dawt dawt pahin alo ko ve mawlh mawlh bawk a,an chhungkua chu anlo buai nuai nuai mai a,an inriak pa hnihte erawh angaihna hrelo takin kil khatah anlo thu ngawi ve ran mai thung a.

Lianlawti chu tlem a,a pangngai leh deuh hnu chuan a thiltawn chu a sawi ta a," Kan muthilh tui lai tak a ni ang, chiang em em mai hian ka harh hlawl mai a,chutih rual chiah chuan ka mutna zawn khumlu a ding chung hian U Thangi thla chuan minlo chhuk bih run mai a,ka te nghal tuar a,chumi rual chuan ka samah hian min phih  dawrh a,choka lamah hian min hnuk phei a,pawn a min hnuhchhuah atum a ni ang,,thawm dangte alo awm takah chuan Tukverh awngah sawn a put chhuak ta a ni.Ka hlau em mai he Inah pawh hian awm ka duh tawhlo..." ati a,atap deuh pur mai bawk a."U Thangkawki ngei kha a ni,a hnathawh thawmhnaw,a boralni a kan feh dun a ahak ngei mai kawr par sendang hlui deuh tawh leh kekawr hring duk,a hak ngun ber thin khan a inthuam a ni,ka hmai zawn chiahah minlo en kur alawm.." ahan ti leh a,ala khur dur dur mai bawk a.

 Sawivelite nupa chuan mak chu ti rilru viau mahse ngaihdan chu ansiam thiam mai a,engmah erawh ansawi duh lem lo thung a.

Lianlawti thil tawn chuan mak tih leh sawi zui a hlawh hle mai a,hlau fe fe pawh antam hle mai a. Nimahsela, thawm dang engmah hriat tur awmlovin a reh zui ta vang vang a,kum hial avei ta a.Lianlawti pawh a thla amuang ve leh deuh tawh a,mahni a ram chhuah leh Lo lama fehte pawh chu angam ve leh ta a,Tin, Thangkawki thlahrang pawhin sawi zui a hlawh tawh biklo a,a reh hmak tawhah anngai a ni.

Nikhat chu Chalzingate nupa chu Lo lamah hnathawkin anliam leh a.Chaw fak a hun dawn ruai tawh avangin Chalzinga chuan annu Lawti hnenah chuan,"Bai chhuan a hun dawn tawh awm asin,lo han bang chho la,hma hi kan chhuah law law ange.." ati a,LianLawti pawh chu Thlam lamah chuan a chho zui ve ta nghal a.

Chawfak hmaa an hma laklawh chu chhuah hman hram tumin Chalzinga chu a bun  chhunzawm leh a,darkar chanve dawnlai a bun leh hnu chuan a zove ta a,chawfak tur chuan a bang chho zui ve ta a.

Thlam a han thlen chuan alo reh thiap mai a,a nupui hmel reng reng hmuh tur alo awmlo,bai lah chu alo chhuang chuang mang silo a,a anhnah lak sa erawh thlam chhuatah chuan a awm a,mei tak ngial pawh chu alo la nun lo a ni a.

Chalzinga chuan an tuichawina bur chu en thuaiin a awmlo tih chu a hria a,annu chu tuikhur lamah a kal anih chu a ring a; Mahse, angaih a tha thei tawhlo,a tha te chu a khur deuh dur dur tawh mai a.

Tichuan,Chalzinga chuan an tuikhur, an thlam piah vau sira Sih te reuhte awmna lam chu hlauhthawnna engemaw tak nei chung chuan a pan zui ve ta nghal a.

Sih lan theihna lai,mau kar atang chuan a han bih deuh duk duk a,a nupui hmel reng reng a hmu chuanglo,thil awm dan chu mak ati tulh tulh a,chutah,annu tui thawl khai chu a hmu leh ta thuai a,Hmanhmawh tak chuan Sih lamah chuan atlan phei deuh titih a.

Lianlawti chu Sih chhungah chuan bawkkhupin alo mu zuah mai a,a kut chu ati muke thru mai a,a kawr hak chu a awm lamah in hlim chho deuhin a hnung chu tlem alang thei a,tah chuan hmuh hmaih theih miahloh tur a chiang hian kutphah thla alang kalh mai a,Chalzinga pawh chuan chu thil chu a hmu rang kher mai,mak pawh ati hle a ni.

Chalzinga'n ava hmuh meuh chuan annu chu alo thi chiang tawh hle mai a,mak tak maiin a taksa ah chuan kutphah thla mai bakah kut hamna ni awm tak takte a awm nual mai a ni.

Chalzinga chuan annu taksa pem leh hliam awm dante chu sawi chhuak tamlo mahse a ruang singsa tute chuan Lianlawti taksa a hliam awm nual mai chu an hmuhhmaih biklo,mak anti ru hle a,Chalzinga hian a nupui hi a that ta mai emni ang? han tise amah Chalzinga lah an hrechiang si a,hetiang thil rapthlak atih theih an ring bawk silo a,an sawi zui sep sep a,a zuih ral ve leh ta mai a ni.

Sawiveli te nupa chuan mak ti ve viau mahse thil awmdan chu an chhui dawn thiam riak ruak a,mahse,midang bulah engmah chu sawi chhuah an tumlo nge,an nupa chuan mut hmunah an sawi dun sep sep duh chauh a,an thuruk chu zawh chhuah chi rual anni awm love..

.

.ATAWP TA....