Pu Suakliana Bo dan mak

 Ziaktu: Rinfela pa_

Kum 1998,April ni 21(..?) daih tawh kha a ni a,Ni chu pangngai takin khawchhak atangin a rawn her chhuak leh mek tawh a.Chutih lai chuan Pi Thanthuami chuan eirawng bawl pahin sekrek khawihin a che vel mek a.A pasal lo tho chhuak pawhin pindan kawngkhar a rawn kan ve mek bawk a,engmah sawilo chuan bathroom lamah a kal nghal a.

Pi Thanthuami pawh chuan an pa thingpui tur chu lo siam sak in,dawhkanah chuan a hung khu vat vat mai a.Reife hnuah pawh chuan an pa chu alo lut ta mai silova,Pi Thanthuami chuan,"Engemaw itih chen chen le? hei i thingpui a dai zo dawn alawm!" a hanti lung lung a,bathroom hi In kil sir,varanda pawnlam a awm a ni a,ring deuh hlek chuan inbiak phakna lek tur hi a ni a.

Chutia Pi thanthuami'n a tih hnuah pawh chuan Pu Suakliana chu a reh vang vang mai si a,a ngaihthalo deuh chuan bathroom chu ava en ta a,kawngkhar chu tlemin alo kau deuh a,tlem a pawh kau belhin a bih duk duk a;mahse,a pasal chu alo awm tawhlo reng reng a.Chutah phun nuah nuah chung chuan Pi Thuami chuan,"Rochhinga pa mai mai chu tukin chu engemaw a hriat a ngawi renga a relh bo daih chule,min thingpui kanlo thlit sak nanana a." ati nuah nuah a,varanda atang chuan khawlai dung chu a thlir kual dun dun a,aluh san leh ta a.

Chawei a peih hnuah pawh chuan an pa chu alo la kirlo cheu mai a,chawei tur chuan an han nghak khei khawi a;alo lan theih tak mai sulohah chuan a fate school kal tur chu a eitir ta ngawt a.A pasal lenna tur awm chin a hre der bawk silo a,hnathawk tura insiam sa at chuan a nghak zui leh ta a.A tawpah chuan a ning ve ta deuh a niang,Hnathawh thahnem ngai,rilru hmanhmawh bawk nen chaw chu a bar san ve ta mawlh mawlh a.

Tichuan hmanhmawh takin an thlawhhma lamah chuan aliam zui ta a;a thenawmte hnenah chuan,"Hei Dami..kan pa zing chhuak alo la haw hleklo mai a,Lo lamah ka liam dawn a nia,minlo um mai rawh se." a ti a.

Lo a thlen chuan amahin a bung zui ta mawlh mawlh a,chhun chawfak dawn ruai tawh ah chuan anpa chu Lo mawng lam atang chuan a rawn chhuak chho ta chhut chhut mai a.Pi Thuami chuan anpa rawn hui chho dap dap thawm chu hriain a han ding chhuak a,anpa chu a hmu thuai a,ala hlat deuh avangin a au zui duh rihlo a,a rilru tete chuan,'Engemaw atih a,lo mawng lam atangte arawn chhuah tak daih a,silai a pu bawk silo a.' a ti ru neuh neuh a.

Chaw fak hma law law a,a hma chu chhuah a duh avangin thlam lamah pawh chuan  phei lawk loin a bun san ve leh mai a.A hma a chhuah thleng pawha anpa alo lan phei taklohah chuan chawfak turin a nghak law law anih chu a ring ta a,a bang phei ta a.

Thlam ava thlen chuan alo reh thiap mai si a,a pasal hmel reng reng hmuh tur alo awmnlo a,a bun chhuah dawn a a kal san ang thlip thlep chuan thil chu anla awm vek si a;Mak atiin a ngaih chu a thalo ta viau mai a.

Tichuan,bai pawh chhuang khawtlailo chuan chaw chu a bar mawlh mawlh a,hmanhmawh takin a haw ta nghal a.In a thlen chuan alo reh thiap mai bawk si a,a phur chu nghatin anpa thawmhnaw chu a han enthuai a.

Zing a rawn thawh tirha a thawmhnaw hak kha bathroom ah chuan alo in bang reng mai a,a hnathawh thawmhnaw erawh alo awmlo thung a,a rawn feh ve ngei a nih chu a ring leh ta deuh a,a rilru chu tlemin a nuam leh ta deuh a.

Khatia hmanhmawh taka a haw ta mai kha,inthiamlo rilru takin a awm dan kha a ngaih tuah kir neuh neuh a,a nui tat tat a,a pasal alo hmangaih zia chu a hriatchian leh zual phah hle in a in hria a,a lawm rilru phian mai bawk a.Khatia thlam ava thlen khan anpa alo awm turah angai a,alo awm ta silo leh thlam a kalsan ang ang a lo awm si te,an pa thawm hre zui mai bawk silo nen khan ngaihthat lohna khan aman zui mai kha a ni a,rilru fim pawh pu hman leklo in a haw ta kha a ni a.

Losul haw hmasa te chu anlo thleng tan ve mek tawh a,chutih lai chuan an thenawm pa chu lo lutin,"Khawnge inpa hi vawiin chu ava reh vung vung ve,in rawnin chhawm haw silo a,a riak dawn a mi?" a ti a."Dawn ngawtlo ang,engtizia nge mawni vawiin chu kan insul pel reng ringawt mai" tiin Pi thuami chuan alo chhang thuai a,a rilru erawh a nuamlo ru leh tan viau tawh a.Chutah,"In ah i awm nge,alo chhuak i hmu silo ami? Thlawhlaiah khan alo chho kha ka hmu a,thlam ka thlenin alo awm leh bawk silo a,a haw a nih ringin ka rawn haw ve ngawt a" tiin a haw chhan tak chu a sawi duh rihlo a.

An thenawmpa chuan,"Hei vawiin chu Aiawt tur puahin ka nileng chu anih ber hi,tualah hian ka awm reng a,thianpa awm reng ka hmulo..." a lo ti let ve thuai a.

Rilru nuamlo tak chung chuan Pi Thuami chuan," Alo haw dawn tawh ang,lo leng thu la mawle!" a han ti leh hram a,a rilru tak tak erawh ala hrilh mai duhlo a,ho deuha mualpho a hlau ve a ni.

Khua chu a thim dawn ruai tawh a ni a.Pu Suaka hmel reng reng alo la lang thei silo a.Pi Thuami chu a mangang tak zet tawh a ni,an thenawmte In chuan kalin thilawmzia chu a hrilh ta vek a,thil kal dan an ngaihtuah chuan mak anti tlang hle mai a,thil diklo deuh chu awmin an hre ta a ni.

Tichuan,midangte pun belhin Pi thuami te lo lam en tur chuan anliam ta hlawm a.Thlamah chuan tumah anlo awmlo a,lo chhung leh a vel chu an theih ang tawk a zau chuan an han dap ngial a,Pu Suaka reng reng hmuh tur a awmlo,zan thil anih bawk avangin an beidawng chuan atuk lama zawn that leh mai tum chuan an hawn san ta a.

A tuk khua alo var chuan khawtlang pawh la pun buai duhloin chhungkhat hnaite leh a thiante ho chuan an zawng leh ta a,Pi thuami  "alo chho" a tihna lai velte chu uluk takin an han bih tak naa hnuhma thar awm an hmu hauh silova,An thlawhhma hualveltu ramngaw chhahpui maiah te chuan theih ang tawkin an zawng nasa a.mahse,hnuhma thar han hmuh tur awm reng reng a awm silo a.An mi zawn chu hmuh mai mai chi ni dawnin an hrelo deuh a,Khawmu chawi emaw thlarau lam thiltih anih chu ring an awm fur mai a.Khawtlang huap a zawn mai chu tha zawkin an hre ta a.Thlamah chuan mi tlemte riaka nghak turin an indah hnuah midang zawng chuan an hawn san ta a.

Zanah chuan thlam lama riakte chuan Pu Suaka thawm ni awm tak chu an lo mawng lamah chuan an hre ta a,zawi te te an in hrilhru sap sapin an inkai tho zel a,thla leh khawmu chawi vel anih an rin deuh tlat tawh avangin thawm han chhuah pawh chu an harsat deuh tlat mai a.

Pu Suaka awrawl ngei mai hi Thlam thlang lam atang chuan a rawn hui chho hap hap mai a,mak antiin an in kheuh ru zeuh zeuh a.Chutah,a thenawmpa chu thlam namthlak lamah chuan chuang chhuakin,"Thianpa,chhawkte i ngai emni,kan lo nghak reng che a nia" a han ti ta lung lung a,chutih lai chuan midang chuan mei pawh chu anlo tuah eng tan ve mek bawk a.

Chutia thawm anneih tak phutah chuan Pu Suakliana chu rak turah tuarh chungin lo mawng lamah chuan a liam thlanleh ta vawn vawn mai a,hla tak a thlen thleng chuan ala te tuar tuar mai a,hrehawm ti tak chuan an ngaithla thap hlawm a.Mak ti taka sawi zui nauh nauh pahin an tlaivar zui ta der mai a.

Pu Suakliana zawng turte chu anlo thleng kim thawkhat tawh hle a,thlam a riak ho chuan an thil hriat chu tlang than nghal ngawt chu thain an hrelo a,a ruk deuh chuan upa deuh ho chu an hrilh ta a.An rin rilruk ang ngeiin Pu Suaka chu an hmu zo ta chuanglo a.Tichuan,khawtlangin ni sarih zet an zawn hnuah pawh Pu Suakliana chu hmuh tur a awm tak siloh ah chuan Mizo dan pangngaiin invuina hunserh chu an hmang ta ngawt mai a ni.

Hemi hnu atang hian mak deuh maiin Pu Suaka ni awm tak hmu leh a thawm hria an awm ta fo mai a,Tin,A nupui pawh chuan an In leh lo lamah chuan hmuh a neiin a thawm chu a hreve fo mai bawk a,atirah chuan a hlau thei hle a,mahse,a hnuah chuan ngaiah a neih zui ve ta a ni.

Hun leh ni chu aliam zel a,an thlawhhma lakte pawh Pi Thuami tan chauh chuan a zau si a,thenrual thate puihna a zarah buhseng hun pangngai takin an chuang chuak ve leh ta a.

Ni khat chu Pi thuami chu amah chauhin lungleng takin thlamah chuan a zai rat rat a,an buh hmin tan mek,an pa nena an tuh dun laia an hlim thin zia te ngaih tuahin a thlir vawng vawng a,a lung chu a leng hle a ni.

Chutihlai chuan lo mawng lam atang chuan an pa Aw ngei a hre leh ta a,hlauh enah pawh a en tawh biklo,a pasal thawm awmna lam chu alo thlir reng a,Buh eng sut karah chuan anpa hnathawh thawmhnaw rawng chiah mai chu alo lang chho zauh zauh a,chutih pah chuan a hma a alo tih thin dan ang bawk khan a rawn hui chho leh dap dap mai a.

"Rochhinga pa law haw tawh teh,itello chuan ka  fate hi enkawl ka inzuamlo asin,khawnge min awm bo san reng chu le.." tiin thlam atang chuan tap chungin Pi thuami chuan anpa chu a au ta lawm lawm mai a.Chutah,an pa pawh chuan pi thuami tap ri chu hria niawm takin a han chawl dat a,a rawn kal zui ve leh ta a.  

Pi Thuami chuan chutia anpa in a thawm a hriat pawha a insaseng ta mailo chu mak ati rilru hle mai a,trum dangah chuan a thawm a hriat rualin a bo nghal daih zel kha a ni si a.Pi Thuami hia  anpa hi a thih ala ring theilo reng reng a,alo haw leh mai chu a ring tlat a ni.Hemi trum pawh hian beisei nei takin an pa chu alo thlir reng a ni.

Tichuan le,thlawhlai buhkar a lo chho chu chiang takin alo hmu thei ta a;A pasal duhtak Suakliana ngei a ni tih hriain hlim rilru takin alo thlir kiau a,dik tak chuan sawi mai tur pawh a hrelo,mi nung ngei niin a hre tlat mai a.

Chutah Pu Suaka chu thlamah chuan a rawn lang ta hlawl mai a,A hmangaih leh a ngaih em em mai chutia an thlam chhungah ngei mai alo lut leh ta chu Pi Thuami chuan alo kuah nghal thlawp mai a."Min kal bo san tawh suh" tiin a tap nghla zawih zawih a.

A pasal chu minung ngei a ni,a thlan rim chu nam vang vangin a pangti pawh alum tha ham ham hle mai a,Pu Suaka pawh chuan Aw dam thlapin,"Hei kalo kir leh tawh alawm,ka kal bo san leh tawhlo ang che u" a rawn ti chhuak ve ta,rei tak inhmulo anni tawh bawka an in ngaiin an hlim dun hle a,phurte siamin khawlam panin an kal zui ta nghal a.

Khua an thlen chuan a hmu a piang chuan mak ti leh an chanchin hriat chakin an zui haw hlawm a,chutia,mitthi tawh a an ngaih a,an thlah liam vek tawh si! Pang dam pial mai leh danglam awm miah silo a alo haw leh ta phut mai chu mak anti hlawm em em mai a.

Pi Thuami te nupa chu an lawmpui thiam em em hlawm a,Mi pawh an rawn lut khawm tak tak zel a,Pi Thuami chuan an intawn dan chanchin vel chu phur takin a sawi sarh sarh reng a,Pu Suaka pawh a thiante nen chuan hlim taka inkawmin an nui bak bak hlawm a.

Mipui vantlang leh a thiante,a chhungte pawhin a an hriat chak em em mai,a bo ringawt dan chu hriat a lawi a nei tlatlo mai a,a tirah kha chuan abo tih pawh a in hrelo a,nikhat thilthu lek a thil thlengah a ngai mai a ni,mahse,buh awm dan leh annu tah hla atang chuan thil chu a man thiam mai a.Chiai miahloin thil awmdan tur chu a chhui dawn thiam rek ruak chauh kha a ni a.

"Khatia ka bo dawn zan a ka mumang emaw ka tih kha atakin alo thleng aniang,Thuami khan minlo hmu vek kha a ni a;mahse min kaitu te kha chu a hmu ve lo ni tur a ni.

Ka mumangah chuan kan mut mekna khumah chuan kalo muhil a,a hma hian ka harh zauh tawh avang hian kannu hi a tho tawh tih ka hria a,mi pahnih doctor ni tur a ka ngaih  hmeichhe pahnih hian ka ban tawn tawnah min kai tho a,chutia ka han harh hlawl chu mak ka ti em em mai a,thil zawh tum a tawngchhuah ka han tum chu ka kha a chih tlat a,ka aw a chhuak thei ta reng renglo mai a,antih ang ang chuan ka awm tawp mai a ni.

Chutah min thawh chhuah pui a,choka lamah min kai pheiin  kawngkharah chuan min chhuah pui leh ta niin ka hria...engmah ka hre zui tawhlo a ni...tiin a han ngawi leh deuh dat a.Chutah,ka hriat leh zawng chu kan lo chhung ka lut leh chiah kha a ni,kha ta tang khan mumal ka hreleh chiah niin ka in hria,buh lo hmin tan dan te,kan chhuah dawn a ka mumangte chu ka hrechhusk leh a,engemaw thil diklo chu ka chungah a thleng tih ka hre thiam mai a,chutah kannu tap thawm ka hriat a,a tah hla chham chuan ka rin dan chu a rawn nemnghet ve leh ta chiah a ni.Keipawhin ka bo dan hi mak ka tiin angaihna ka hrelo hle a ni. tiin a bo dan chungchang a thil hriat chhun chu a han sawi a,a ngaithlatute chuan an duhkhawp an hmuhloh hlawm hmel hle mai a,mak erawh anti tih chu an hmelah a chiang hle thung! Amah Pu Suaka berin abak ka hrelo a tih tlat si avangin tihngaihna vak erawh an hre lemlo!! 

Tichuan nikhuate lo reiin Pu Suakliana te chhung pawh pangngai takin hun an hmang chho leh ta a,kum 2001 a kum 83 mi ni a a thih ni thlengin hetiang lam buaina hi a tawk leh tawh lo a,a bo dan erawh tun thlengin hriat chhuah a ni ta lo a ni.

 _@zo tube 18.10.21_ 

.