Pasalthate Rammutna

Ziaktu: Mawia LeneX

Phai vaiho vangkhua chu zanthum riak zeta hlain an hlat leh tawh a,nimahsela chung lusei mikawl valte hmelah chuan chau hmel reng reng hmuh tur a awm chuang hauhlo a ni,tumah nunna chan awmlova a vannei zawka antang zawk thei chu anlawm hle a,phur takin an vangkhua chu an pan sauh sauh a.Mingo naupang tuiumhnih khirh rual tur lek tih chauhlo An sal mante chu an tingmit vek a,tlangval pahnih karchehin an in zui kawi ve thliai thliai bawk a,hmeichhia leh naupangte an kawi tel tak nuai si ah chuan an haw lam chu an fan ta raih mai a.

Ni chu thlang kawlah aliam dawn suar suar a,suk chen pawh a ni meuh tawhlo ang tihah chuan Pasaltha Chawma chuan,"Ole,hei  kan khua chuan thim zai a rel mai tawh dawn si a,helai hmunah hian riahbuk kan sual leh mai   ta lawng" tiin ngaw kar atanga zotuithiang tak rawn luan thlak hak hakna bul maiah chuan a han ding a,chutih pah chuan a vaibel chu ahan dawt kai a.

"Le mikawl valte inche leh sang sang ang aw,amaherawhchu,tu ramvalh chhungah nge kan awm tih  kan hre hauh silova,thawm kan dim deuh dawn nia..." tiin Pasaltha Liankima chuan alo tuihnih ve bawk a,Chuveleh, tlangvalte chu mawngvawmba ang maiin an che nghal zung zung a,an pasalthate leh aia û te mitkham zawng a awm chu an thil hlauh ber pakhat a ni. Chutah,Pasaltha Chawma chuan,"Tarpilu thar lam deuh kha han dap khawm ula,hmite rual kan chenpui ngei dawn e"tiin a ban a vaihmite bet ve ve chu a han beng thak a,chutah,"Zanriah kha thlak ren deuh ula,kan chin tur lah hriatloh,kan mihruaite pawh kha thlah zal tawh r'u,kan laka chet thawh ngam an awm tawh ka ringlo e" ahan tih zawm leh nghal a.

Tlangval thaza rual an han phut sang sang takah chuan karlohah zankhat riahna buk tur chu annpeih thuai a,an sal hruaite pawh chuan thingnawite anlo fawm pui ve bawkin buk tualah chuan an chhep hnuk mai a.

Zanriah puàr taka an bar hnu chuan thenkhat chuan mei an han nun a,Ral ram te anih avangin mei pawh eng chhuahlo thei tur ang berin annun a,Meilum kil chuan an thubial laih a,meilum hnung puak a thu an hruaitupa Pasaltha Chemchawma,han en reng reng pawh a pa namai anilo ang tih hriat ngawih ngawih tur,pasaltha diar khim vah mai chuan,"Tlang leh mual pawh kan palliam tam tawh narawh e,kan chau tlang viau in ka ring a,hma taka chhuak thei turin kan inbuatsaih anga chhinzai kan rel thuai dawn nia.Hringchar phaimi te chuan kan hnu anrawn bih zuilo tih hre mah ila kan ram chin anih miauloh avangin fimkhurna kha hlamchhiah reng reng loh tur a ni ngai,ral hnailo mahse ram lam pasalthate lakah hian kan fimkhur a,mit leh beng kan len ngun hle angai dawn a ni,amaherawhchu, chengrang chawilo zawngin hel hram hram erawh kan tum dawn nia.Naktuk vartiana chhuak thei tura hma taka mu turin ralvenglo turte chuan mutna kan buatsaih nghal mai dawn nia" tiin a vaibel chu biang khuar kak khawp chuan a han hip a.

Hringchar thingpui huan a hnathawk anman meitei ho chu buk killam sirah chuan an muttir a,chu chu tlangval pahnih Liantawna leh Zahlira te chuan an veng a,fimkhur takin anmit leh beng chu an len ngun dun hle a a,pasalthate hnung zui a vawi tam ral rama mutmu lo tuah ve tawh anni bawk a,ralmuang angin lang mahse "hetih hun lai tak hi fimkhur ngaih lai tak a ni" ti a an pasalthate thusawi chu anvawng reng a, an fimkhur em em mai a ni.

Ngawpui chhah tak hnuai chu a thim hle a,thinglian pui pui kar ah chuan van a arsi-te chu an lang pe un mai a,a khat tawk chuan thli chuan an bul vel a thinghnah chu a rawn chhem ri leh sung sung thin a,zan sava leh leihrikte chuan an hun a thlengve tawh a ni tih hria niawm takin thawm an chhuah ve chuah chuah mai bawk a.

Mual tam pal liam a,Zan tam mutmu tuah tha hmanlo anni a,rallak thilte nen annih bawk avangin an chau tlang tawh hle a ni ang,thenkhat chu an hnar zui nghal suk suk a,ralvengte pahnih erawh nghate rep ang karin anla khap fak fak mai thung a,buk tual a an mei chheh chu Liantawna chuan a han vur belh hlek a.Chutah,thutna a han rem fel leh chiah tihah chuan an piah ngaw karah chuan thing tangro tliak ri rap hi an hre ta tlat mai a,anmit leh beng chu an chhi dun nghal hra mai a,chutàh rinhlelh ruallohin sapui a hnai a ni tih hriat takin amah bawmtu thote chu mei engah chuan an rawn lang ta sup sup mai a.Chu chu hrethiam takin ralveng pahnihte chuan an fei leh chem chu an hum nghet sauh sauh a,inring takin sapui lo lan hun chu anlo nghak tawp mai a ni.

Mihrat khawkheng,sa leh ral ramah vawi tam lo khawsa tawh an pasalthate chuan chu zan hrik leh hramthiam tin hràm rik chuah chuah karah chuan chu sapui thawm chu anlo hre ve reng mai le! Thawm dim tak a thochhuakin an lulak chem chu an hum dun ran mai a.

Pasaltha bengtawia chu tek khamphei han dawn tir ngawt dawn se;Tu rambawh chinah nge an awm tih lah an hre der silova,theih nise buaina pumpelh hram hram an duh a,chengrang pawh rawl chhuah tir an tumlo a ni.Amaherawhchu,loh theihloh thilte anih chuan hnungtawlh leh tlawm zawk a tan chu an tum hauhlo a ni,chutihlai chuan Sapui pawh chuan thawm a rawn chhuah zing sawt tawh hle mai a.

Chutah le! Liantawna leh Zahnuna dinna bul mei engin a chhun chinah chuan Pasaltha bengtawia chu a rawn dak tial ta ruai mai le..

Chuti taka hnai a Sapui nunglai an han hmu ta phut mai chu tlangval tuaitir chauh leh kawlhsen viau si, Liantawnate thian dun pawh an phu zawk thei hial a,chutah rilru fim pu leh thuaiin an hmaa Keipui lian leh hrawl em em mai chu an din chilh ta ran mai a,an inkar chu mau tluk khat vel lek tur hi a ni a.

Ngun taka lo thlir tu Pasaltha Chemchawmate pahnih chuan Sakei chezia atang chuàn buaina a chhuak ngei dawn tih an hrethiam hle mai,chutah le,Pasaltha Chawma chuan Liankima hnenah chuan,"Pasaltha ka chet thuai angai e" tiin A naute leh Sakei inkarah chuan atla zep ta a,Keipui lian em em mai thinrim tak a rum ngal ngal mai chu a mitah taka en chungin ti hian ati ta a."Pasaltha zahngai hram teh,buaina kan duhlo e,zahngai la,min kiansan hram teh..." tiin a awka chhuak leh mitmeng a hlauhna leh zamna tel miahlo chuan Sakei chu a han be mawlh mawlh a.In hma tawn chuan an in en dun ta ran mai a,nakinah chuan Sakei chu rum ngul ngul chung a inher vutin ngaw chhung thim lamah chuan a pilbo zui leh ta a.Chutia,Ram lam pasaltha huaisar ber pawhin, a ngamloh an khaw pasaltha ngei mai a han ni a,a hnung an zui chu an thla a muangthar leh hle mai a,Liantawna te thian dun chuan ngaisang tih hriat tak hian Pasaltha Chawma chu an thlir zui vang vang a,amah anga huaisen nih chu an tum leh an chak ber pawh chu a ni.

.

.