Pasaltha Huaisen Lianlunga

PASALTHA HUAISEN LIANLUNGA

Ziaktu: Rinfela pa

 🐯 Ruahpui chu uar fe a rei ngial a sur hnu chuan hân zai a rel ve ta nge nge a,chumi hun nghakhlel taka lo thlir rengtu Turnipui pawh chuàn,chu hun tha tawite chu bawhpelh tum hauh lovin khawthlang lam atangin a ropuina  chu a rawn chhuah eng ve ta sût mai a,chuveleh, tlang leh mualte hmaih nei hauhlo a tlengfaitu ruahtuite chuan remchang lo la vatin an hmun ngai luah leh tumin van lamah bawk chuan an zâm chho leh chem chem tan tawh a.

Ram tukloh Ngawpui chamduai mai hnuai a nungcha chi hrang hrangte leh hramthiam sirvate pawh chuan chhun roreltu chu hlim tak a chibai lo bukin an aw rawl mawi chu theihtawpin anlo chhuah ve bawk a, Chu Ngawpuiin a chawi vel Sei-fate tuallenna Sertlang khua nghaktu hnathawk ve theilo,mi tlemte leh an ran vulhte pawh chuan chu ni lum lo lang zawk chu chhim hman ngei tumin an tawmna hmun chhuah sanin an rawn inlar sap sap hlawm a,nu thenkhatte chuan an mut bu leh thuam thenkhatte chu hmanhmawh takin an rawn zar chhuak ve mek bawk a,khawlai dung erawh Mothar puanbih khuhbo lai ansawi ang mai a ni a,ran leh mihring hniak chu a chiar hian a chiar nuk mai a ni. Mahsela,khuanu hun ruat anih miau avangin hun bawkin ala herliam pui mai dawn a ni tih hriain lungawi takin chu fur khaw nuamlo tak pawh chu an hmang mek a ni.

Turnipui lah chu inthlahrung hmel takin khawthlang lam her tawh takah chuan a êng dul ruih mai si a,tar leh upa lam deuhte phei chuan an kham khawp loh hmel hle mai a,chutih nakalai chuan tlak leh mai tum niawm takin ruah tui pai, chhum upa tak takte chu an chung zawnah chuan Lersia sepui tia tiain an inhawr khawm leh tuau tuau tawh a,zawr hnap khawp a, a chhilh hnuah pawh duhtawk mai ala tumlo a ang hle a ni.

Chutih mek lai chuan kawtchhuah ah chuan Pi Zachhungi leh a fate pahnih chu an rawn chuang chhuak ve chiah a.Kawtchhuah ah chuan an han ding chawl a,thawk lak ham ham pahin an pal liam hnu ngawpui dur khup leh cham duai mai lam chu an han thlir leh vang vang a,chutah Pi Zachhungi chuan,"Taite,tikhan hma kha hruai zella,lal In lam i pan phawt mai teh ang u" tiin a fapa rawlthar chhuak hlawt chauh Lianlunga chu a han hrilh a.Lianlunga chuan,"Ka nu,lal hian minlo pawm duh i ring em?" tiin a nu chu alo zawt let ve leh he haw a.

"Heti hi kanni zo tawh si a,i pa pawh hi khang misual ho lakah khan a tlu ni ngeiin alang a,minlo pawm theilo anih pawhin zankhàt lek tal chu min mikhual thei em em ang" alo ti a.A fanu hmeltha leh amah chhun em emtu Kawlveli chuan,"Ka nu ka pa chu a tluk i ring tak tak emni? ." tiin beidawng mitmeng taka a nu han melh ralh pah chuan ati a,a ngawi zui leh ta daih a.

Tumah pawh chuan tawng chhah zai rel lovin an ngawi deuh vang vang a,Chutah Pi Zachhungi chuan,"Engpawhnisela,hun a liam zel si a,lal In lam chu i han pan thuai thuai teh ang u,hei khawi khua nge tih lah kan hre silo..." atih mek lai chuan,Lianlunga chuan,"An khua hi an muan hmel hle mai a,minlo thleng duh em em ang" tiin a nu leh farnu chu han hnem ve bawk mahse amah ber pawh chu a hlauthawng ve tho a ni,chutih pah chuan hmalam chu a pan tan leh ta a.

Khaw dai fem a putar nilum lo ai mek hnenah chuan,"Ka pu,hei tu vangkhua nge ni chule?" tiin Lianlunga chuan a han zawt a.Putar chuan mak tih hmel taka lo en pah chuan,"Lal Saibanga khua Sertlang a ni e,kha engtizia a Furpui lai lai a pem tur ang zia zang a inrawn bawr tak luai luai mai le?" tiin alo zawt let ve bawk a.Lianlunga chuan,"a.. ni e,kan hun tawn hian a zirlo lulai em a ni" ti a chhangin lal in lam chu an pan zui leh ta zel a.Putar pawh chuan tu khua atanga lo kai nge tih chu hriat chak viau mahse a zawt hman ta biklo a ni.

Chutia lal in lam pana an inzui diah diah chu alo hmu apiangte chuan mak ti takin an thlir zui vung vung hlawm a.Lal tual an thlen chuan lal chu luh an han dil a,lalnu ni ngei tur chuan lo chhawn vatin inchhung lamah chuan an in zui lut ta nghal a.

Lal leh a upate pahnih chu engemaw sawiin anlo titi mek a,chutih lai  chuan anmahni lo chhawntu lalnu pawh chu tapchhak lamah vawkchaw chhumin alo buai ve mek bawk a.Lal Saibanga chuan," Aw!khai..khual hmel lah ni reng chuan...kha,a rem lai laiah khan inmawng kha lo hung ve phawt rawh u" a han ti a.Pi Zachhungi chuan,"lalpa,i khawngaihna dil tur a i vangkhua rawn kai ve rawih kanni e" alo tih ve mek lai chuan lalpa Saibuanga chuan, "Chemtei nu,tui kha han intir tawh khai,an chauin an chhawl pawh a hal viau awm asin.." a han ti leh a, chutah a vaibelah chuan meiling a han chhuang a, muang chang a han fawh kai pah chuan an khualte lam chu a han hawi leh a,"Tikhan,han hahdam deuh ula,hei ka upate beng min dawh pui tur lah an awm,chin chu kan la inhrilh a niang chu" a han ti zui leh a.

Pi Zachhungi chu a thuthmun atanga rawn ding chhuak meuhin,"lalpa,hei muanglei a rawn kai turah kan inngaih laiin kan hnu chhuiin minlo umzui a,kan lakah chemsen anlek leh ta si a,an lakah hian Taia pa pawh hi a tlu ta ngeiah ka ngai tawh a,a chin lah han chian ngaihna a awm silo;kan himna zawngin kan rawn tlanchhia ani ber tawh a ni,itan pawh keini minlo hum chu leido neihna a ni thei a ni tih ka hria a,i khua leh tuiah min pawm theilo a nih pawhin zankhat chauh tal chu min mikhual hram turin ka ngen che a ni,ka fate lah heti mai hi anla nisi..." tiin inthlahrung takin lal chu a han dil a,A mit a mittui tling kiau mai chu amah thlirtu tan chuan hmuh hmaih chi rual a ni awm love,"Eng harsatna lian takin nge tlak buak ta angle?" an lo ti ru ve nauh nauh hlawm a.Chiang zawk a an chin hriat chak tak chuan an beng anlo tun hra hlawm a.

Chutah,lal khawnbawl Vawmkaia chuan,"Thlasik vawi tam chu leido neiloin muang leiin mawng kan hung tawh a ni a,kan harsatna min thlen thei chu inni narawh e,,Engpawhnisela,in chin chu hmaih neilo in min han kam thawt phawt mai ula a tha awm asin" alo ti ve a,lal chuan,"Ni e,thu tlukna pawh in thu leh hla a zir a ni ang chu"tiin a upate pahnih chu a han melh ralh a,anni pawh chuan an lu anlo bu ve nghat nghat bawk a.

Pi Zachhungi chuan an khua Mualbuk lal fapa Sialthanga leh a fapa Lianlunga inkar avanga buaina lo intan chhoh dante,Mualbuk lal Chawngkhaia chuan khua atangin tha takin a chhuah tir ve bawk a,a hnuah a pasalthate chu an hnu rawn chhuitir lehin tihhlum vek an tum dan te,chung anmahni umtu pasalthate chu a pasal Keitawna'n lo tih khawtlai tuma an kalsan tak dante leh a pasal chu pasaltha uaithla lam anih tawh avangin a tluk ngei tawh a rin thu te chu a han sawi tel bawk a.An hnu chu theih tawpa an thup ve dan te leh an khua atanga zan sawm chuang mah anlo in pal tawh thute chu lal leh upa ho chu chiang takin a hrilh fai ta leng a.Ruah sur nasa avangin an hnu pawh an rawn chhui theih a rinloh thute chu a han sawi tel leh hram a.

Lal leh upate pawh chu an mikhualte thusawi chuan an beng a luh hle ni tur a ni,reilote chhung chu an han ngawi thap a,lusei chhungpuinu meuhin a khawngaih a han dil ta chu an khawngaih hle a,lo pawm ngawt ta se leido nei thei anni tih lah an hai hauh silo,muang leia an mawng an hunna a rei tawh a,sa laka pasalthate chu neive bawk mahse ral rama pasaltha annei hauhlo tih an hre chiang si a,leido nei turah an han in chan ringawt pawhin an zuamlo a ni.

"Engpawhnisela,ka upate pawh hi han kokim deuh sela..," tiin lal chu a rawn tawngchhuak ta a,Chutah,"Chemte,i pa Hauva leh i pa Lianuma zu ko tawh khai,hei rorel hmanhmawh tur kan nei tlat mai.." a han tih zawm leh a,Khum ai lam a ngawi reng a lo thu ve reng lal fanu Darbawihi pawh rang takin a chhuak ve ta nghal a.

Lal upate'n lal In an rawn kaikim hnu chuan lal chuan thil awmzia chu han sawi zung zung a,Zachhungi chuan,"lalpa in rorel kan dip hlauh ange,leikapui lamah sawn nilum kan va chhim ve ange" tih leh thawh chhuah a rual nghal a,Lianlungate unau pawh chuan an zui chhuak ve ta nghal a,lal nu pawhin hrethiam takin an hnungah chuan a zui chhuak ve bawk a.

Lal chuan an mikhual hmeithai nufa te chu a han thlir deuh vung vung a,a khawngaihin lo hum ngei pawh a duh em em a ni.Mahse,lal fing leh tha tak a nih avangin a khua leh tuite a ngaihtuah hle a,chuvang chuan a duhdan pawh chu vuaktlak pui ngawt a tum biklo a ni.

Sertlang lal Saibanga hi lal remhria leh fing tak mai a ni a,a khua leh tuite tan a ngilneiin an tan hrawn hrehawmin a awm ngailova,mi neinung leh hmeithaite a en hrang ngailova,dik tak a rorel a,tawngka in a sawifel theih ah chuan thisen luan tir a,chemsen lek kher a tum ngailo a ni,hei vang hian thangkhat lian zet tur chu leido lian tham tak neiloin muangin mawng an hung a,a lalna thlazar hnuaiah chuan nu naute chu an thlamuang em em a ni.Nimahsela,hemi vang hian pasaltha tlang thang ti a sawi tur inchher chhuah an nei lova; kuttang thliah tham pasalthate chu nei ve bawk mahse,an hranghlui pasaltha Kapkhawra chauhlo chu ral lu khai pawh anla awm lova;lal sabelte anni deuh ber mai a ni.

Dàrlung khaw lal fanu Suakchhawni nupuiah neiin fanu leh fapa a nei a,a fapa hi rawlthar hlim chauh anih laiin khawsikpui avangin an chan tawh a,Dari chauh hi an chawi ta a ni.

Lal leh a upate rorelna chuan thumum anneih takah chuan Chhingi hnenah lal pa Saibanga chuan,"Chhungpuinu meuhin khawngaih i han dil a ni a,keini tan pawh hnar mi pawh a nilo ang? Khuanu hiàn min hawisan hlauh dah ange,keini teh lul min thlamuan pui a nih chuan le,ka vangkhua ah hian intan hmun a awm a,chutih rualin midangte tan hnawk sakin in awm tur lah a nilo;ka khua leh tui tan rinawm takin hma insawn zel anga,in buaina chu kan buaina a ni tawh a,hmalam chin hriat lah nilo;engpawh lo thleng sela mipa fa chuan huaisen takin kan hmachhawn mai tur lah ni.Thlamuang takin awm tawh ang che u. tiin inngaitlawm hmel zawk takin a han ti a

Zachhingi chu mittui parawl par chung chuan alo ding chhuak a,"lalpa,kan chunga i zahngaihna hi engtikah mah kan rul seng dawnlo che a nih,kan lawm e." a han ti tham deuh tiak a,lalnu pawh chuan an thu leh hla lo ngaichang ru ve rengin chutiang a thu an han keuh thei ta chu a lawm rilru ve hle a ni.

Lal Saibanga chuan,"Hna kau tehlai tak a nisi a,engpawhnise,in chenna tur kan puah hma chuan ka lal in ah hian in awm ve mai tur lah zuk ni." tiin Vaibel chu a han fawp leh kak kak a.Chutah,aw damthluam bawk hian,"khaw daideng lam tih chauhlo ah chuan in awm duhna in thlang dawn nia." a han ti leh a.Chutah zet chuan Zachhingite nufa chu an hlim hle a ni tih an hmelah alang thei hial a ni.Upate thutna hnung kil atang chuan Lianlunga chu lo ding chhuakin,"lal pa thil ka lo sawi ve lawk thei angem?" a rawn ti a.Chu rawlthar hmeltha leh lian tak ,mitmeng fim kak maiin inngaitlawm tak siin lal a han entak kal ah chuan lal pawh a phu deuh zawk mai!a mit ah chuan engemaw awm riau hian a hria a,lal meuh pawhin a melh tha ngamlo a ni.Chutah,lal Saibanga chuan a lu a han bu nghat nghat a.

Lianlunga chuan," lal pa   khawi hmunah pawh awm ila,kan lawm tawk tawh em em a,hmun lai luah bik tur kanni nemaw,ka nu leh ka farnu zawng ka enkawl thei ngei ang le,hmeithai chauh niloin pa tung awm ang tho kanni alawm" a han ti a.

Chutia rawlthar chhuak hlim maiin chapo hauh silo mahni inring tawk tak mai a tawngkau a han chhep ta mai chu mak tiin lal leh upate pawhin mak tiin anlo en he haw a.lal chuan chiang taka han thlek  chung chuan a nui chhuak ta hak hak a,chutah,"Taite,i kamchhuak chu ka lawm zawng tak a ni ka ti,pasaltha fapa awka ngei a ni awm asin,i than lo mawi zel sela,ka khua leh tui muantu lo ni ngei ang che,awle,i duh ang ngeiin i duhna hmunah tak chuan in awm ngei dawn nia" tiin a upate lam chu a han en pahin,"In chenna tur chu khawtlang hnatlangin kan puah mai tur lah ni ,vahsan lak leh hma chu buhzem kan  intawm mai aniang chu,inthlahrunna tur engmah a awmlo e" tiin an thu chai lai chu a hnu a khar ta a.lal upate pawhin lungawi hmel takin an lu anlo bu ve tliar tliar hlawm a.

Lal chuan khaw daideng lama hmeithai awm ngawt mai chu rem tilo mahsela pem hlim chauh leh hmeithai chhungkua mai anni si a;an khaw lawi danin a zir bawk silo nen,mi pawisawi hlau takin khaw hmawr lam tuikhur kawng lamah chuan Lianlunga chuan an In awmna chu thlangin chulai hmunah chuan khawtlang a hnatlangin an chenna tur chu an sa ta mup mup a,karloah an peih ta thuai mai reng a.

.

(Chhunzawm tur...)

.

*PASALTHA LIANLUNGA*

*_(Bung - 2 na)_*

_Ziaktu: Rinfela pa_

..🦌 Thlasik vawihnih meuh an hman leh hnu chuan Lianlungate chhungkua pawh an tlangnelin an khawthar kai chu nuam anti hle tawh a,tui tlan a thain an ram bawh chin lah buh leh balin a duh em em a,khuanu'n an chungah zah a ngai a ni chek ang,mite khawngaih an hlawh em em a,Lianlunga lawmpa Pabuanga pa lal khawnbawl Vawmkaia chuan se nufa in a indan a,Vawk lo pui chhuah tawk lah an awm nawk mai, Chhungkaw pangngai tak niin nun tharin bul an tan chho leh tan mek a ni.Chutia tan hmun sawhnghehna tur mumal tak anneih chinah phei chuan a thinlunga riak reng thin a pa phuba lak chakna chu a punlun telh telh a,chutiang tur pawh chuan theih tawp a inbuatsaih ru ve rengin hmalam a pan ve hret hret a ni.

Tuk dang ang bawkin chumi tuk pawh chuan khua a thiangin boruak chu a muanawm ruih mai a;Hlo thlawh awl lai tak niin mi tam zawk chuan ram lam chhuah sanin an vangkhua ah an lawi leh tawh hlawm a,mahni chak zawng zawngah buaiin an hmanhlel hlawm hle a ni.

Lianlunga chuan,"Ka nu,ka faisa ken tur chu i bawk tawh em?"  tiin a chempui chu tah hriam tumin a lek chhuak a Sumhmun lam ah chuan a chhuak zui ta  nghal a.Chhingi chuan,"Chemte,i u faisa tur kha lo bawk sak ta che,kan vawkpui chu a tamchhawllo chauh a ni ruai ruai ang, chaw ka'n chhun sak ange" alo ti a.

 Kawlveli chu a u awmna lamah chhuakin,"Ka u zan engzat riak turin nge,ka bawk dawn?" tiin Lianlunga chu a han zawt a."Zan sarih riak tur khan han siam tawh" tiin a u pawh chuan alo chhang vat a.Kawlveli chuan,"chu chen chen riah tum che eng thawhzai nge rel itum chu le,nge nunchan i zir leh zawk dawn?" alo ti ve a.

Lianlunga chuan a chem tah lai chu chawl datin,"Ka pa thlarau hian pialral atang kan chet tla hi minlo thlir reng dawn asin,a aihnah phah puite lah a doral an chang ta si a,ka pa hi hahdam tak a a chawlhve theih nan theihtawpin ka bei dawn a ni,Pasaltha hnungzui tur kan nei mang bar silo a,mahni a kan intuaihriam mai a ngai a nih hi maw,engpawhnise,han bawk phawt mai teh" tiin a nau chu alo chhang a.

Chem chu tat zovin inchhung lamah chuan a lut a,ngawi reng a a mamawh lo buaipui sak mektu a nau chu panin," Chemi,nangpawh hei nula ini ve tan tawh a,inleng pawh a chhia a tha kan hmu kur ve ta zut mai,tumah hi biaksawm bik leh biak duhloh bik nei reng reng suh ang che,hmeithai mai kanni tih hi theihnghilh lo la,fimkhur takin awm ang che nelawm tak zuamawm silovin awm i tum dawn nia" tiin thu tak deuh zawkin a nau chu a han fuih ve sap sap a.Chutah rawn tawng chhuak lehin,"Hmeithai nih a,mite tanpui ngai a awm bik rengte hi kan duh vang ni hauhlo mahsela thil zahthlak tak a ni ve bawk a ni,mite min hmuhsit rukna hi sawhsawnin midangte tanpuitu leh lal tan pawh a hnemhnan pui tlak a awm hi kan tum tlat tur a ni" tiin a iptepui chu a ak tha sauh sauh a.

.

.