August ni 13,2021 Zirtawp zan a thilthleng mak!

(Thitin thlâ ni 13,2021 Zirtawp zân)

☠️ Tun tum a ka thil rawn sawi tur hi ala thar lam hle mai a, hmanni lawk August ni 13,2021 Zirtawpni a thil thleng mak tak mai chanchin kha a ni a,tunlai hunah hetiang thil hi hriattur a awm tawh ngai manglo a ni a,kei pawhin mak ka ti ve khawp mai!! Min hrilhtu hi mi rintlak tak niin a thusawi pawh hi a rintlak hle turah ka ngai a ni.Hetiang lam chanchin hi ka ngaihven thin tih hriain, remchang lain uluk taka min hrilh a ni nghe nghe a.

.......

(Thuhmahruai)

✓  Hun engemaw chen Video thar ka nei theilo kha pawi ka ti hle a,Buaina neuh neuhin min umzui deuh reng avangin ka rawn lang thei lawklo a ni e.Min khawngaiha min subscribe tute,min duhsak a like leh comment min pe thintute zawng zawng inchungah tih tak meuhin hriatthiamna ka dil a,tunah chuan ka lo let leh ta bawk a,theihtawpin kan tang ho leh dawn nia. Ka video te pawh minlo thlir sak leh theuh turin leh theih ang tawk a min share sak zel turin ka sawm bawk che u a ni.

Tin,hetiang thu lam chi tawnhriat nei emaw midangte tawnhriat sawi tur nei kan awm anih chuan whatsapp no.ka tarlan ah hian inthlahrung hauhloin minlo thawn mai ula,tawngkam thiam teh vak pawh angai kherlo a ni ... 😀

..........................

Ni 13 Zirtawp Zân

Ziaktu: Mawia LeneX

Thla liamta August ni 22,Sunday ni kha a ni a,kan tunlai Covid-19 hripui chimawm zet avang hian Chawlhni pawh kan ninga ni hman deuh tawp a ni ber a!! Kan veng pawh restricted area ah kan awm tak thut avangin a reh hian a reh duak mai a ni.Tuk thuan ei kham chuan Tv en in ka tlu zal mai mai a,Chutih lai chuan ruah bawhawk a rawn sur ta thut mai a,chu chuan kan veng pa hi a rawn um lut nawlh mai a,Inchhung a lut tur a ka koh pawhin a duh tlatlo a,inthlahrung takin Varanda ah chuan ading a,thutna pek pahin keipawh chu kawngka biang ngheng chuan ka ding chhuak ve bawk a,eng eng emaw sawiin kan titi luam a,ruah sur chuan ban mai a tum hmel chuanloh avangin kan inkawm zui ta zel a.

Darkar chanve dawn kan inkawm tak hnu ah chuan, "Amak ngawt asin! Tunlai chu ruah hian min dang thei riau mai a,Hmanni a kannu hruai tur a ka kal pawh ruah vangin kan riah phah ringawt tawh bawk a", a han ti bai bai a,a han ngawi deuh dat a,chutah, rawn tawng chhuak leh nghalin,"Thilmak tak mai kan tawn phah thung a,a tha tho mai,mahsela,tawn nawn atan erawh chuan ka duh tawh chuang hauhlo mai !!" thutak zet hian a han ti zui leh a.

Kei chuan,"Eng ang thilmak maw intawn a!? Mitthi kaithawh lam te a ni em lo maw? tiin ka han nui sak a.

"Thilmak leh rapthlak ka tawn a zawng a ka la hlauh ber tum a ni !! Kha thil kha chuan tun thleng pawh hian ka awm ala ti nuam theilo reng reng! ,'Mithi kaihthawh lam' nilovin 'Mithi in min kai tho' zawk mawle!! tiin a thusawi chu a ngaihtuah zui tih hriat tak hian a han ngawi leh deuh vang vang a,Chutah, amah bawk chuan a hma ai maha thutak zawk chuan a thil tawn mak leh rapthlak tak chanchin chu a sawi tan ta nghal a.

Min hrilh tu hian midangte rilru tih nat theihnate alo awm takin tiin hming sawilan kher hi tul a ti lemlo a,Chuvangin,rualkhai zawkin hming lang tur zawng zawng hi ka thup ta vek a,angaihnawmloh phah emlo ang chu!!? Amah hi kohhran leh khawtlang ah pawh mi tangkai tak a ni nghe nghe a,tullo ah chuan dawt a sawi mai mai ka ringlo a ni.

A nupui nen hian kum hnih emaw thum vel chu an innei ve tawh awm e,annu hi Health Worker niin kan khua atanga hla lo te, Thingtlang khaw pakhatah hian an post a,kar khatah vawihnih khatte annu hruai chuan a kal ziah thin a,he thil danglam tak a tawn tum pawh hian annu hruai tur a kal a ni nghe nghe a ni.

Tunah chuan ngaihthlak a nawm zawk deuh nan a tawngtu tawngkam angin ka rawn sawi tawh zawk mai dawn a ni.

"Kar liamta mai kha a nih chu, *Ni 13,Zirtawpni* kha a ni a,kannu hruai turin a hna thawhna khua ah ka kal leh a,kan nu hi kan inneih hma atang tawh khan he khua ah hian an la post char char a,kan khua ang maiin kan tlangnel ve tawh hle a ni.Kar tawp lama kan haw tur phei hi chu min duhsaktute zarah chawhmeh vel hâwn hian kan bawr haw thei viau zel a ni.

Chawhhnu lam a haw tum kanni a,kan haw dawn hnaihah chuan ruah chu nasa mangkhengin a rawn sur ta tak tak mai a,han haw chi zia zang a ni ta lo;Zanriah ei hun thleng mai chuan a bun tlawrh tlawrh reng mai a,a bang thei dawn talo emaw tih mai tur hian a bei ngawrh a ni. Tichuan, lung-thlulo zetin thiante Inah zanriah chu kan bar ve ta ngawt a,kannu Ofis lamah riah kan tum thung a ni.Kan thiante chuan an In lama riak ve mai tur chuan min sawm na a,ka hnial  lui ve tlat a,'Quarters riahna tur a awm ve bawk a,luah lum tura min dah nanana,kan awm tirh atang pawhin vawikhatmah kan la riaklo reng reng a, riahna chance a ni ve mai alawm' ka ti a.Mahse,Quarters lamah pawh riak ta chuanglo chuan Ofis lam zawkah chuan kan riak ta zawk a;In leh Ofis chu inhawitawn chiaha ding dun a ni a,alaiah feh kawng a kaltlang thung a ni.

Health Centre awmna lai hi khawhmawr  hmar lam hmun rem lai tak a ni a,khuà nen an inkarah hian kawngkawi khatin a dang a,chulai kar chu thlanmual hlui a ni nghe nghe a ni.Feh kawng lam atana an hmanloh tum phei chuan chhun lawnah pawh a reh thei vawng vawng hle mai a.Sava hram neuh neuhte leh khaw chhung lama Ar khuang leh al al thinte bak, thawm hriat tur atamlo hle thin a ni.

Ruahsur chu tlema, a han deuh hnu chuan mutbu tur nen Ofis lamah bawk chuan kan inphur phei leh ta a.Thla chu de tan chauh a ni bawk a,khuain a zirlo nen a ênglo hle mai a, motor han off phei chuan a thim chhah em em mai a ni,dumde leng sep sep te chu an eng kulh mai hian a hriat a,mit anti vai mum mum thei  hial a ni.

Zan thimtham hnuai a Ofis han kal chu nuamlo tihna riau ka nei a,a hmunin a zir vaklo bawk nen,ka che vel reng rengte chu ka khawr tut hian ka inhria,nuam chu ka ti chiahlo hle mai a,mahse,kan nu hriatah chuan ka ti lang duh chuanglo a ni.

Office chhung a,nau neihna leh in checkup na room an pindan lamah chuan chhuatah puan phahin kan mu ta a.

Zan chu a reh hian a reh vawng vawng mai a,thinghnah leh inchung vela ruah mal tangkhang far ri fep fep te tih chauhlo chu rannung leh leihrik hram tak ngial pawh hriattur a awm lo mai chu mak kan ti hle a ni,a khat tawkin thli a thaw deuh vuk vuk reng a,In bul vel a thinghnahte chu a chhem ri leh sung sung thin a,tuidawn khaina thirzai chu a chhem ri leh rut rut thin bawk nen,a ninawm duh viau mai a,Mahse,chutiang thawm awmchhunte chuan kannu chu a awi mu a niang chu karloh a thaw ri ta sak sak a; Kei chu ka muhil vé thei tlatlo thung a,ka phone chu battery low thak thleng chuan ka khawih zui ta mai mai a ni.

Phone khawih tur ka neihtakloh chinah chuan ka ban lukham chuan ka mu meng kar mai a,eng eng emaw ngaihtuahin ka inlet sek mai bawk a,a khat tawkin thli pawh a la thaw deuh huau huau reng a,chumi zawng chuan darthlalang keh zawn a parda zar chu a chhem che leh hlup hlup thin bawk a,a rei deuh hnu phei chuan a bengchheng hle tawh a ni,chutiang khawp a zanreh chu ani  thin zantin emaw ni dawn tehreng,awm a tinuamlo in boruak te lah chu a rit deuh churh mai niin ka hria a.

Zanlai ar khuang thliai thliaite chu chiang takin ka hre thei a, zanlai a pel tawh ngei tih ka hrethiam mai,ka mut chhuak chuan min rawn zem ve tan chiai chiai a, ka muhil dawn suar suar tihah chuan khaw chhung lam a Ui û vau vau chuan min tiharh leh ta zawk mai a,Nuam tiloh sa naklai chuan, ngaihthlak a nuamlo in a rapthlak lek lek zawk a ni,minti mur sung sung thei hial a ni.

Ui û ruah ruah mai chu kalo chhiar ve mai mai zel a,vawi 13 chiah niin ka hria,chutah a reh zui ta a,zan boruak pawh angaitê bawkin a reh leh ta tlawk tlawk mai a ni.

Chutia thawm dang hriattur awmlo a reife a reh leh tak vawng vawng hnuah chuan hla tak a tapri ni awm tak thawm ka hre leh ta phut mài a,ka harh leh ta tulh tulh mai!! chu zan khawhar tak ah chuan a ri chu a chiangin a fiah hle mai a,chutih rual deuh thaw chuan kan nu chuan,"Chu engthawm nge? nutling tap ava ang ve,mitthi an awm a nilo maw?" a rawn ti chhuak hlawl mai a."I mutui viau emaw tia,ilo harh ve reng zawk a ni maw?Zawhte tap mai mai a nih dawn chu?" ka han tiliam satliah vé mai a.

Chu zan reh takah chuan thawm dang ri hriattur a awm siloh avangin chu ri chuan beng a luh ngat mai a,kan beng kan hup te a nih ngawt loh chuan ngaihthlak loh theih pawh a nilo. Kannu bawk chuan, "Chu,han ngaithla chiang teh,khawchhung lamah a nih chu,mihring rawl ngei a niin ka hria" a han ti leh a,keipawh chuan hmeichhé tap rawih rawih ri chu ang berin ka hria a, chiang zawk a ngaihthlak tumin beng kan han dawh ngun leh zual a,Hmeichhe  tap ni ngeiin kan hre ta a ni; Mahse,kan rin loh tak maiin tap ri chuan kan lam panna kawng chu a rawn zawh thla tlat niin kan hre bawk a, "Zawhte hur vak vel mai mai anih zawk dawn chu,chu kan lam panin alawm alo kal daih.." tiin ho lam tak a ngai ang a lan ka tum hram hram a ni.

Ngawi reng chuan chu tapri ngaihnawm loh zet mai chu kan ngaithla dun ta kar mai a,awm a nuamlo in hmulthi a ding ru ur ur thei hial a.Tap ri chu a rawn hnai sawt hle a, in auh phak lek tur vel a hnai anih meuh chuan, Zawhte hram han tih chi ziazang a ni tawhlo! Nutling awrawl ngei niin alang tawh a, lungchhe em em mai hian,"Ka naute....ka naute.." tiin atap atap a,a tap ri chu a zawiin  a fiah em em thung si a ni.

Kannu chuan min rawn kuah nghal chawih chawih a,a khur nghal hlawk hlawk mai bawk nen,keipawh chuan lo kuah let vatin kan inkherh dun chial mai a,a patling zawk pawh eng ruai ka ang thei biklo,ka bing mup mup a,ka khaw hmuhte chu a vai zo vekin ka hria,ka thlan chuan min bual dep dep a,ka tim ru er er thung lawi si.

Chu tap ri chu kan riahna zawnah chuan a ding ta chat a, chutah, kan mutna zawn lam pan chuan a rawn phei zui leh ta zél mai le,hlauhna chuan namenloin kan nupa chuan min suasam dun ta a ni ber ang chu,hetih lai vel taka kan awm dan hi chu mumal pawhin kà hre mang barlo a ni.

 Kan mutna zawn chiah bang pawn lamah chuan a insút ri ta hruih hruih mai a,han te chhuak vak tur pawhin awrawl chhuah tur kan nei tawhlo a ni,hetih lai hian kannu hi nikhawhrelo-in alo awm reng tawh a ni tih ka hre ve chiah a ni. Chutah,a tap chu bangin za em em hian a nui leh ta uar uar  mai a,a awrawl chu rapawm em em mai bawk a ni,ka khua chu a sik nghal ur ur mai a niin ka hria a,karloah ka khawsik chu a sang chak viau ni tur a ni,ka mit deuh sulh hian ka in hre leh a.

Min sawi nawk nawktu awm avang chuan ka harh hlawl mai a, kan nu chuan sarak a rak vak vak pah hian minlo thing nawk nawk mai hi  alo ni a,kan nu rak tuar tuar karah chuan zawite, fiah taksi hian nutling tap ri bawk chu ka hre zui leh ta nghal a,chutih rual chuan kannu melh rengna lam chu ka han thlek ve nghal thuai a.

Chhei le!! Kan mutna mawng zawn sir a,in entirna khumte an dah chungah ngei mai chuan hmeichhia ni ngei tur hi alo thu thim muk mai a,sitting room/office lama êng chuan a chhun pha ruai ruai a.Chutah le! kei a mipa zawk pawh chu awrawl tawp tawpin ka han rak ve ta chiam chiam mai a nih kha.... Chu nu chu kan lam hawi chuan ala rawn nui zui ta chui chui mai leh nghal a,fate hmuh atana itawmloh khawpin kan rak dun ta vak vak mai a,thi-lo a ruangin kan chhuaklo chauh a ni.

Hetia han sawi mai ai hian a nuihzat thlak duh loh khawp mai" tiin a han nui zui suk a.Chutah a han sawi chhunzawm leh a,"Kan thawm chu hriain kan thenawm hnai ber a mite pafa thum chu an rawn lang vat a,engtik laiin nge kha nu kha a bo tak a,engtik laiin nge Pu Khuangate pafa kha anlo luh tih reng reng ka hrelo a ni,kan nupa chuan kan khua a sik zui hlat hlat a,riak zui zel thei pawh kanni tawhlo a,thei pawh niila kan ngam tawhlo a ni.Pu Khuangate In lam a riak tur chuan kan inzui phei ho ta ringawt mai a ni.

tiin annu hnathawhna hmun lama a thiltawn danglam tak chanchin chu a sawi a.

Chutah,amah bawk chu rawn tawng chhuak leh nghalin,chulai hmun a thilthleng mak tak tak,mi thenkhat tawnhriatte leh he hmun a hmeichhe tap thin chanchin ansawi te chu min hrilh zui ve leh ta zel a.

"He hmunah hian zankhat mah kan la riaklo a,awm chilh tur a tih chu nimah ila,kar kawng a hnai a,a vei vah tawn reng theih bawk avangin karkhatah vawi2/3 hi chu kannu hi ka hruai haw ngei ngei thin a.Chhun engah chuan kan nu ofis zimte,riang tak mai a ding fal nalh mai chu kan hun hman tamna ber pawl chu a ni vé awm e,ka kal ve chinah pawh kum hnih vel zet a ni tawh a,thawm riva danglam leh engemaw hlauhawm han sawi tur a awm ngailo hrim hrim a ni.Fiamthu a ansawi leh titi phungleng a "Innu Ofis saw a hrâng thin a nia" antih zeuh zeuhte chu kan hre ve fo a,engteh ualah mah kan ngai ngai lemlo a ni.

Helai hmunah hian  kum tam tak chhung thawm danglam leh hlauhawm an hre ngai tawh lo a;Mahse tunhma lam deuhah kha chuan helai hmun bawr velah hian Hmeichhe lungchhe vankai a tap ri rawih rawih leh nui khek leh uar uar thinte anlo hre fo tawh a,a tawngtu pawh anlo kat ve nawk mai a ni.Mahse,hun engemaw ti atang khan a thawm riva chu an hre ngai tawhlo a,khawtual mite pawhin reh hlen tawh tur a an ngaih laia hetia a rawn thar thawh leh pawh hi mak anti in an hlau thar leh ta hle mai a ni.

Tun hma deuh khan, Vawi khat chu Pasaltha thian dun ramvak hi an haw tlai deuh hlek a,thim hlim chhet chhetah chuan helai hmun hi an chuang chhuak chiah a,kawl bul chu ala eng ruai a,chianglo ruai chuan ala in hmuh theih awm e tih tur hi a ni a,kal pah chuan an titi dun mawlh mawlh a,chutih lai tak chuan Ofis lam atang chuan hmeichhe lungchhe em em a tap ri an hre ta thut mai a,an titi lai pawh an tawp dun nghal chawt bawk a,ding chungin chulam chu an han thlek nghal thuai a,an torchlight ken êng pup mai chuan an chhun dun bawk a,laiking takngial pawh awmse hmuh hmaih chi a nilovang tih turin an ên chin chu alang chiang thei hle a ni.

 Inchhung lam light chu a eng ruih a,Varanda light erawh a awmlo thung a,Kawngkhar chu a inkalh tha thlap mai si a,mak ti takin an in en he haw a,chutah, muang changin thawm awmna lam ni a an hriat chu an pan phei ta a,in hnung kil zawn vel chu niin an hria a,chulam pan chuan an phei dun leh ta zel a,thawm pawh an dim hran lem lo a ni.

In kil sirah chuan nu pakhat hi anmahni hnung chhawn zawngin alo ding reng mai a,atap tih hriat taknhian a insut faih faih reng a,torchlight êngah chuan a lang chiang ngang mai a,kawr pawl par hlui tawh tak ha in,puan var uk deuh khung tawh mai a bih thung a,a bawr chhawrin a tawp em em mai a,a rim te chu a thang hum hum hian an hria a.Tunge a nih an hre chiang dun hle a ni ang,an in en hrek hrek a hman hmawh takin khaw lam panin an kirsan ta nal nal mai a ni awm e." tiin a han sawi a.

Chutah, "Tumkhàt leh pawh,Thian dun chakai chhit hian he hmunah tho hian nutling ni ngei tur hi an hmu ve bawk a,anni hi chuan tu tih an hre thei lova,thawm nei zawng pawhin a tihthaih lemlo a ni.

An chakai chhit zo chu luikawr atanga chhuak chhoin kawngpui chu kawng mumallo tak atanga pan chhovin an haw chhova,kawngpui an chhuah chhoh hma lawk ruam rai deuh hmun a Sih lian pui mai bulah chuan eng emaw thim muk mai che hrut hi an chhun fuh zawk mai a,an in enralh a,eng sa nge niang ti a an ngaituah mek lai chuan chu thil chu a rawn ding ta hluai mai a,Sa ram tla mai mai ni tur a ni,an awmlohna ngaw lamah chuan a pil bo zui ta nghal a. 

Kawngpui an chhuak chhova,thawkte la in zial zuk khat awm vel chu an han chawl hah dam vang vang a,chufia,chawlh pah a an titi mek lai chuan an hnung lampang kawng dungah chuan thawm an hre ta a,an light ken chuan an han chhun vat a,an tre dun nghal thawt mai bawk a.

Chuveleh,thian dun pahnihte chu chauh pawh sawi hlei theiloin an tlan duk ta par par mai a,mahse,chutia an tlan zel chung pawh chuan chu nu chuan a rawn zui ve zel niin ansawi a,helai Center an thlen hian a bo ta chauh a ni awm e.

A khaw mi zingah he nu thla hrang hi a hmu leh a thawm hria pawh anlo kat ve nawk mai a,sawi vek sen chi pawh a ni lo ang; Mahse,kan sawi tawh ang khan kum engemaw zat liam tawh atang kha chuan engmah an hre ngai tawhlo a ni. Tun hnaia chanchin duhawmlo deuh kan han neih takah phei chuan he hmun chanchin mak tak tak pawh kan hriat belh phah ta zek mai a,ka tawnhriat ve chinah phei chuan hetiang thil hi awihloh ngawt chi alo nih dawnloh tawp hi ka ti ta ani.

Tun hma deuh khan he khua ah hian nula hmeltha leh hleitling zeih zawih tak mai hi a awm ve a; Mahse,rilru kim zanlo,huihphawk-a-thamthen antih chi hi a ni a,amah lah a duhawm reuh si a,a khawngaihthlak em em a ni.An khaw nula tam tak pawhin hmel that lamah chuan an tlukloh,an chung en hial a ni.Chutiang ang taka nula tituai duhawm chu a ni bawk a,tufa nge a pai tih pawh hriatloh in a rai ta mai reng a."Tunge naute pa?"ti a zawhna chu lungtum bul a sawi nen thu hmun reng a ni.Tu tlangval mahin ka fa a ni e,anti duh bik der silo a,a chhungte tan chuan an chan chu a zahthlakin a run thlak em em si a ni.

Nikhua alo rei a,chu nula pawh chuan pangngai takin nau chu  hmeichhia a hring ta a,chu naute chu pa neilo in riangvai takin alo piang ta ngei mai a.

Nu in naute a hrin atanga nihnihna ah chiah chuan an khuaah chuan thilmak tak a thleng zui ta a; "Ka naute...ka naute kha..." ti a rawl tawp tawp a nutling au vak vak ri leh tap rawi rawi mai chu chhun reh lai tak a ni bawk a,chu thingtlang khaw reh tak ah chuan a chiangin a fiah tha raih raih hle a,a rapthlak lek lek zawk hial a ni.Chu thawm hria a piangte chuan chu thawm lo chhuahna In lam chu an pan khawm nghal zel a.

Chutia,chhun pachan lai à,mangang tak a tre ta ruai ruai mai chu tudang nilovin Naute khawngaih thlak tak nu kha alo ni a,pawn lam chu phawk hru a melh chung chuan a kut zungchal chuan a kawk vu a, "Ka naute...ka naute..." tiin mangang takin a au vak vak mai a,a naute chu a bulah a mu reng lawi si a;Mahse,naute chu mak tak maiin alo thi khawng reng mai a,thil awm dan han zawh chian lah chuan awmzia a neilo hle mai bawk si a ni.

Chumi hnu atang phei chuan chu nu chu a at a zualin a bawraw ta tulh tulh mai a,zan reh lai pawh a sawilo; a rau thawh hun hun ah hian khawlai dungahte tlan kualin, "ka naute..ka naute" tiin tap chungin a rak vak vak zel ta mai a.

Chutiang chuan zan khat a tlan chhuak leh chu khawvar dawn thleng pawh a,ala rawn haw tak mai lohah chuan a chhungte mangang chuan an zawng ta a;Mahse,an hmu zo talo a,a thawm tawpna niawm hrechiang anlo awm mai bawk silo.Khua chu avar dawn tawh tho bawk a tiin,leilung lan chian deuh theih hun an nghak ta ringawt mai a ni.

Khua a var fel chuan an khaw dai leh thlanmual velte chu an zawn chhunzawm leh ta zel a,chawhnu her hret ah tun a thawm kan hriatna hmun bul chiah a kawrte ruamah chuan thi in an hmu ta a ni.

He mi hnu atang hi chuan thawm hi an hre zui ta fo mai a,thawk khat lai phei chuan zantin deuh thawin thawm a chhuah a ni awm e.A damlai pawh a,zan khaw tai rek rek a nu naute ti thlabar em em tu chuan a thih hnuah pawh duhtawk san mai ala tum hmel loh hle a ni.

Mahse,kum sawm chuang zet chu thawm nei hauhloin a reh zui ta vang vang mai a,khawtual mite pawhin reh hlen hmiah tawhah an ngaih laiin kan zu chil chhuak leh chu a ni ber a.Ka pian a hnu lam a ka hlauh ber tum a ni.

Nakinah hun remchangah mi thenkhat thil tawn chu ka la hrilh leh dawn che nia,khati chin kha lo dah phawt teh,hming lang thei chi ho kha chu i thup mai a niang chu" a han ti zui leh a.

Chutih lai chuan ruah pawh chu a lo han tawh a,a thusawi ka ngaih thlak tui em avang chuan ruah ban lai pawh kalo hrelo a ni.

.

.

.