Ngaizawl Hmeichhe naupang 17 te chungah thilmak a thleng.

 RAMHUAI HNA THAWH A NI THEI ANG EM?

Author: Vanneihthanga Vanchhong

He thil hi 8 June 2014 a post a ni a. Ka blog pakhat a ka dah a chhiat avangin ka dah tha leh a ni.

.

Ngaizawl hi Rabung road atanga pengin, Khawzawl atanga khawchhak lam KM 15 vel a hlaah a awm a, In 170 vel awm na a ni.

Ngaizawlah hian hmeichhe naupang pakhat tluk chang nei a awm a, chu hmeichhe naupang chuan a changin tlanbo tumin ram lam a pan thin a, an um a, an hruai hawng veleh mai thin. 2014 June ni 6 khan he hmeichhe naupang hi Ngaizawl Middle School thlang lamah ram lam pana a tlan an hmu a, a hmaa a buai thin dan an hriat than avangin School-a mipa naupang thenkhat chuan an um ta a, ramhnuai an va thlen chuan rul chawn tia vel an hmu niin an sawi. An hlau hle a, chu rul pui an tih mai chu hnim karah a tleng bo ta a ni an ti. Mipa naupang ho chuan an mi um chu an va man a, khuaah an hawn pui ta a ni.

Chutia mipa naupang ho an thang hlan chuan Middle School-a hmeichhe naupang pakhat chu a tlu tawp a, a tal chiam chiam bawk a, harhchhuak si lovin a tawng a, rul pui chu mipa dum lian pui pui pahnihin an zui thu a sawi a, an sikul thlanga an tui chenna thin dilah a thiante an awm thu sawiin a thiante hming pawh a sawi hlawm a (Hetih lai hian a thiante chu school-ah an awm vek a) A thiante hming a lam a piang chu an tlu ve ta zel mai a, school chhungah an zawn lut zel a, thenkhat chu dar kar thum hnuah te an harhchhuak a, thenkhat erawh darkar chanve chauh nikhaw hrelova awm te pawh an awm hlawm.

He hmeichhe naupang hian a thian mi 13, (hmeichhia vek) te hming a lam a, chung ho chu hemi hi June ni 6 zirtawpni chhunah hian an tlu vek niin Ngaizawl VCP Pu Kapa chuan min hrilh.

He thil hian khawchhung a fan hneh hle mai a, zan khua a lo thim a thimhlimah mahni inluma an awm laiin hmeichhe naupang pahnih chu an tlu ve leh ta a, zan dar 9 velah VCP Pu Kapa fanu hmeichhe naupang ngei pawh chu a tlu ve leh ta a ni.

Engemaw chen hnuah a ni pawh a rawn harh ve leh mai a, a tuk zingah tapchhaka a thut laiin a lu na a ti a, a tlu leh ta a, a ke a leng chiam chiam bawk a, a rawn harh hnuah a tluk laiin thil hmuh a nei em tih an zawh chuan; mi pakhat lianpuiin a luah a rawn khawih a, a khawihna lai chu a na lutuk a, man tumin a keah a pawt a, a nghawng vela a khawih phei chuan a thawk theih loh thu te a sawi bawk niin Pu Kapa chuan min hrilh bawk.

Heng hmeichhe naupang te hi an tluk dan leh an tluk laia an thil hmuh te a in ang deuh vek hlawm a, an tluk laiin midang tlu ve thin te awmna leh an thil tih mek te an sawi thei vek zel niin an sawi bawk. Heng naupang tlu thin te hi kum 12 atanga kum 14 mi te an ni hlawm a, an vai hian hmeichhe naupang vek an ni. Nimin lam thleng khan heng hmeichhe naupang te hi a khat tawkin an la tlu deuh reng hlawm a, engmaw chen nikhaw hrelova an buai hnuah an harh a, naupang ni ta chu an thiante zingah an infiam chhunzawm leh mai a, an harh hnuah chuan han chauh deuh leh nawm loh zuina em em pawh an nei hran lo. 7 June 2014 khan Khawzawl venglai Pastor bial an nih angin Pastor pawhin a tlawh a, tawngtaina nen an tang nasa hle a, nimahsela he boruak maktak mai hian a la kiansan lo niin VCP chuan min hrilh bawk a ni.

Zirtawp chhuna school tuala an buai chiam lai khan an tluk laia an tawngvai thil sawi vel chu an zirtirtu Pu Thanga (Craft Teacher) chuan a mobile phone in a record-a, an hmui bulah phone kengin uluk takin a record a. A hnua an han play leh chuan a bul vela naupang tawng ri nuai nuai thawm chiah a record-a hmeichhe naupang tawngvai ri pakhatmah a record tel lo chu mak an ti em em bawk niin Pu Kapa chuan a sawi.

2015 May thla chawhnu lamah khan Ngaizawlah hian pa eisual avangin mi 3 ngawtin nunna an lo chan tawh a, naupang tlu thinte hian an tluk laiia an tawngvaih laiin “pa eisuala thi ho kha rawn kal ru” tih te pawh an chham chhuak nual hlawm niin an sawi.

May ni 22 Nilaithawhtan khan Pu Nianglammawia kum 30 leh a nupui Pi Awingaihchini kum 28 (An ni nupa hian fa 5 an nei a, an fa u ber kum 13 mi chauh a la ni) te chu Pu Nianglammawia u nupui Pi Chianglamniangite nen an khaw piah Neihdawnah chawimawina hmangin an kal a, an hawng lam chuan kawng sira pa lo to chu an la a, in an thlen hian an fa te chuan chaw an lo ei fel hman tawh a ni. An pa hawn chu an chhum a, Pu Nianglammawia te inah chuan zan dar 7 velah chawhmehah hmangin an ei ho ta a, a tuk zing dar 7 velah an pum a na a, an luak hlawm bawk a, an ziaawm mai theih loh avangin Khawzawl damdawiin panpui an ni a, zan dar 10 velah damdawiinah dahluh an ni. An tha chho viau a an lan laiin may ni 27 Thawhleh zing dar 9:30 velah Pu Nianglammawia chu a boral a, a nupui Pi Awingaihchini pawh chu chawhnu dar 3 ah a thi ve leh ta a, Pi Chianglamniangipawh chu zan dar 10-ah a boral zui ve leh ta a ni.

Mi pathum thihna thlentu nia sawi Pa hi Papar niin thenkhat chuan an ring a, thenkhat chuan may thla-ah Papar a awm a hun lo niin an sawi bawk a. Pu Nianglammawia fa u ber kum 13 mi hian a nulehpa te Pa hawn chu an chhum hmain a lo hmuh chian avangin chutiang pa chu an lakna lai ram ni a an sawiah chuan an va zawng leh a, pa chi nga vel an collect-a chung zingah chuan thihna thlentu nia sawi Pa ang chi hi tel lo niin an sawi bawk.

NGAIZAWL DAWITHIAM THIL TIH A NI THEI ANGEM.

Ngaizawlah hian dawithiam nia sawi Langliana a awm a, hetiang thil a thlen takah hian Pu Langliana thiltih a nih ring an awm ve bawk a, Langliana hi tunhma deuh chuan a chanchin pawh an sawi tha ngam ngai lova, an thil sawi te pawh hre vek thei ang hialah an ngai thin a ni.

Hemi chungchangah hian VCP chu a ngaihdan ka zawt a. A ni chuan Pu Langliana thil tih a nih a rin loh thu min lo hrilh a, chutih rual erawh chuan Pu Langliana dawi thil avanga an chhungkua an lo buai tawh dan erawh min hrilh thung.

Kum 3 vel liam taah khan Pu Kapa chhang hnihna mipa chu a hrawk na a ti a, hna thawk thei lovin dam si lo thi si lovin a awm reng mai a. Aizawl te panpuiin ultra sound leh endoscopy te tih a ni a, doctor ten a natna an hre thei lo. Dawi thil nia rin a nih avangin an khuaa dawi thiam nia sawi Langliana chu an ringhlel hle mai a, a dawi chu sut turin an ngen a, reilote a han tha a, a tha rei tak tak thei si lo. Kawl phai lama dawi sut thiam te an pan ta hial a. Kawlphai dawithiam chuan Langliana dawi ngei a nih dan te leh amah ngeiin a sut loh chuan tih theih a neih loh thu te a lo hrilh a. Pu Kapa thinrim insum zo lo chuan a thian pahnih te nen Langliana chu chem nen an luh chilh ta a ni.

A dawi sut turin an ti a, a sut lo a nih chuan a dam bik dawn lo tih an hrilh a. Langliana chuan zu um chanve leh cheng nga rawn la turin a ti a, a sawi ang chuan zu um chanve leh cheng nga chu an pe a. Zu chu no ah a thli a, cheng nga note in a khuh a, a chham pual ta a ni. Cheng nga note chu pawt chhe lovin midang pe turin a ti a, Langliana in chu an chhuah san ta a. Chumi zan atang chuan damlo chu a rawn ziaawm tan ta a, vawiin thleng hian dam tha takin ram hna pawh a thawk ve thei ta zel a ni…tiin min hrilh.

Pu Langliana hi tunah kum 60 mi vel a ni tawh a, nupui pahnih a nei thin a, a nupui te hian an tlanbo san a, fa pawh a nei na chungin a fa te nen an awm ho chuang lova, amahin a parawl a, cheng tlemte hlawh pawh a thil tiduh mai thin chi a nih thu leh, mi chunga dawi hmanga thil pawi a khawih leh chuan a nunna in a tawrh tur thu an hrilh fo tawh avangin hetiang thilah chuan a inhnamhnawih ngam a rin tawh loh thu VCP chuan min hrilh bawk a ni.

.

.