Ghost Hunter te thil tawn mak!

Ziaktu: Mawia LeneX

☠️ Tlangval tho thang tha leh hrisel tak,thisen lum vanglai a ni a;Mahni tawkah ka in ring tawkin hlauh pawh ka nei biklo! Kan vanglai tak tur a ni bawk a,ka thiante pahnih nen chuan kan khua a veng pakhat a In hrang ansawi fo thin chu fiah kan tum ta a ni.

He In hrang ansawi tanna hi thla hnih liam ta mai atang khan a ni a,kan veng atang a hla ang reng tak khaw hmar lama veng pakhat a awm a ni a.An veng thlanmual kawng a awm niin Assam type a sak a ni a, ansakna pawh ala reilo hle a,a neitute chuan thawm mak tak tak leh mithla an hriat a an hmuh fo avang chuan mahni a awm ngam an awmlo a,an khawsak a tihbuai tak em avang chuan an nin tawpah chuan an chhuahsan ta nge nge a,anneih ang ang a an sakte a ni ve si a,an khawngaihthlak awm hle a ni.

Fiah tum pawhin mi hrang hrangin an chang fo thin a,mithla hmu leh an thawm hria ni a insawite pawh an awm a,thenkhatte phei chu alo tihthaih chiam zel niin ansawi bawk a ni.

Hetiang a thu leng vak tam tak a awm nuai nuai lai hian keini thianho chuan thih tawh hnuah thlaraute hi he khawvela anla chamban fo kan rinloh thute leh ramhuai sual thiltih mai mai a niang tiin Pathian ringtute tan ramhuai hlauh thu a awmlo tiin kan inti huai hlawm pang pang hle a,kan fiah a,thlarau sual hote kan hau reh hmak theite a nih phei chuan nasa takin In neitute chhungkua kan tanpui a nih bakah khawtlang tan hna tha tak kan thawk a ni dawn a tiin kan infuih phur hle mai a,fiah ngei chu kan tum ruh hle a ni.

Tichuan,kan hun tiam Inrinni zan dar 10:00 velah chuan bike pahnihin kan kal ta a,engtiang chiah a,va fiah tur nge tih pawh kan hre chuanglo a,hetiang lamah chuan kan bangbo tlang hle lawi si a,,kan phur satliah ve em em a,kan ar kawh chhuah ve ngawt a ni ber mai...

He mi zan hian khua chu a dur deuh hlek a,ruah erawh a sur a rinawm rih chuanglo a,chutichung pawh chuan thla chu a lian tawh bawk a,a eng deuh kulh thova..Kawtthler vel chu a reh tan ruih tawh a,thil che zeuh awm chhun pawh an langsar tan viau a ni,leng haw tur mihring leh motor chu kan la hmu zeuh zeuh a,khawiah mah ding khawmuanglo in kan tum ram chu kan pan ding nghal nal nal a,thianpa Muana nen chuan inphurin Rama chu amahin a chuang thung a.

Thlanmual  peng chu ka  thleng ta a,In lo hmasa ber kawtah chuan kan han ding deuh ren rawn a,engtin nge kan tih dawn? tih vel chu kan han rel tha leh bawk tak naa,bul tan mai dan tur kan bangbo hle mai si,"Engpawhnise,Inhrang berah chuan va phei phawt mai teh ang u,kan ti ta a.He In hrang ansawi hi a hmun leh awmna kan hriatsa vek a ni a,a In awm dan chiah erawh kan hmuhna arei deuh tawh hlawm avangin kan chiang hlawmlo thung a.

Mahni phur phur a phur,mahni  chhuah chhuah a chhuak ve tawp kha kanni a,eng hmanrua leh Camera tha mah kan keng lova,kan hmuh tak leh kan phone ten kan la anga ani mai kan ti kha a ni a,engmah hmuh kan inringlo a ni ber mai!Kan landan ah chuan tumah chuan kan hlaulo in kan thil tih tur chu kan zuam hle niin alang a,a nawm pawh a nuam khawp mai.Chhun engah kan chian hmasa lemlo a,a veng mite lah tumah kan hrilh chuang bawklo a,ngawi reng chuan kan châng ve tawp dawn a ni.Kan thiltih turah chuan kan phur viau naa kan la serious lo viau mai bawk si !!

Mi hua  kawng lamte a nih bawk avangin kawng pawh a fai hle a,tin,thlanmual thleng chu Rcc chhuah vek a ni a,blacktop ang em chuan mam thalo mahse tlan chu a nuam viau tho a,hmun dang ang bawkin kawngchhe lai hel neuh neuh tur chu atam ve khawp mai a,chu chuan tlan pawh a tisawtlo hle a ni.

In chu pali nga vel chu a intlar phei a,fal deuh hlekah chuan kan Inhrang fiah tum chu atawp ber ah chuan a ding thim muk mai a,a dawttu In nen an inkar ah chuan ruam thuk deuh tak a awm avangin in hmuh theih a nilova,hlat erawh an in hlat lemlo a ni.

In kan va thlen chuan alo ding ram rap tawh mai a,darthlalang thenkhatte chu alo keh nel nual tawh a,bang erawh cement concrete vek a nih avangin a bal tihloh chu hmel hemna tehchiam a awmlo,kan phone light bakah thianpa Rama chuan torchlight alo pai tel hlauh mai a,kan han vel thuak thuak a,kawtlai kawngdung vel chu fai viau mahse,In sir leh kawmthlangte chu hnimin a  bawm lek luk tawh mai a,dawihzep deuh tan chuan chu In lianpui, ruak huai mai chu a nelawmloh hle ang. Kawngkhar chu pawnlamah anlo kalh tlat mai si a,kan buai hman khawp mai! Mahse,tuk verh chhe tawh pakhat ah chuan kan lawn lut a,kan ri khut khut reng mai,thawm dim vak tulin kan hre lemlo a ni.

Inchhung kil khatah chuan an thuthleng hnutchhiah,rawp deuh tawh pakhat chu hungin kan thu tlar ta thap mai a.Kan tawng lung lung a,phone chu kan ti eng vu vu reng bawk a,Thla emaw ramhuai pawh nise thawmdim leh ngawi renga lo chan kher chuan awmzia a neih vak kan ringlo a,engang pawhin awm ila,kan awm leh awmloh chu an hriat vek tho kan ring a ni.

Phone khawih pah chuan kan titi pah reng a,kan fiamthu bawrh bawrh mai bawk a,Thianpa Muana chuan,"Sawi ve reng rengah In hrang ah hian thlahrang kan chhiar ange" ati a,a nui kak kak a.

Eng eng emaw sawi chuan kan phul luai hlawm a,zan pawh chu a reiin a reh tawh hle a,leihrik hram chiah chiahte leh Zân sava hram kuk kukte chu thawm langsar ber berte anni tawh a.Keini thianho pawh kan tawngtha peih meuh tawhlo,mutchhuak chuan min zem tan tawh a.Phone erawh kan la sik neuh neuh hlawm a,kan in ham chhawk deuh sek tawh mai bawk nen..Zan chu a reh vawng vawng mai a,eng thawm danglam leh hlauhawm mah hriattur a awm bawk silo,kan chhuah dawn a ka  phur tehlul nen kan ning tan ta viau ni tur a ni.

Rama chuan,"Ava ninawm duh ve mawle,a rawn lang har em mai!min hlau zawk a niang,hei dar 1:00 a pel der tawh si a." nui chung chuan a rawn ti chhuak ta hlawl mai a.Muana chuan,"Kan tlaivar dawn nge,engmah eitur lah kan keng silo,ka ril atam ruihin ka hria,kuhva kha inla ak em?" tiin kuhva chu min han dil zui zat a.Kan nawizel dawn a ang tan tawh  hle a,Kei chuan,"Kuhva te han ei ila,zial zuk khat vel chu nghak leh hram hram ila,kan nghak chhuak maithei asin,kan ti ta sa sa bawk a." ka han ti ve a.

Meizial chu kan tankai fel hman chiah tihah chuan le! Khawchhung lam atang chuan thawm danglam tak mai kan hre ta phut mai a,kan ngawi nghal thap a,thawm chu kan ngaichang zuita ran mai a.

Kan rinloh leh beiseiloh lutuk mai a,chutiang ang zan rei a thawm mak tak kan lam pan a rawn hnai zel mai chu mak kan tiin kan hamhaih a,kan chiai zo vek a ni ber!Tumahin phone kan ti eng ngam tawhlo a,tawng zai chhah lah kan tum tawh heklo!Thaw dep depin enge lo thleng zel dawn tih chu kan ngaichang ta ran mai a.

Ka thiante tih phur pah nan tiin,"Ghost hunter ah chuan kan la patuai deuh a ni" ka han ti sa sa a."Ka hlau emaw iti ami,lo man chat ka rilruk asin" tiin a tho ta nulh a,kan lawn luhna tukverh tualzawl lama mi chu a pan ta nul nul a,keini pawh chuan kan zui nghal vat a.

Thawm rikna chu la hlat hmel viau mahsela,chutiang zanreh ah chuan a chiang hle thung a,chutiang lai a In awm ve te chuan hre ve tak hlawm ang maw? Chu ri chu Thingkung hnuh rik hruih hruih hi a ang berin ka hria,kan awmna chhak kawng chu a rawn zawh zel niin alang a,inring taksi hlauthawng rilru taksi chuan tukverh darthlalang keh atang chuan kan bih ru ta kar mai a,hla tak chu lang theilo mahsela thla eng reu ruau ah chuan kan awmna In kawt zawn erawh a hnai bawk a,alang chiang thei fu mai!!!

Muana chuan,"Kan zawn alo thlen veleh kan ên rual thut dawn nia" a ti sa sa a,Rama nen chuan kanlo bu nghat nghat a,kan phone chu inring takin kan hum ruh sauh sauh a.

Thawm chuan kawng kual chu rawn chuang chhuak chiahin ruam lamah chuan a kawi lut leh mek niin alang a, kan awmna chu a rawn hnaih ta hle mai a.Chutih lai tak chuan mak tak maiin chu thawm lo rikna lam atang chuan chhum lei vak a rawn zing ta chuai chuai mai a,kawng dung chu a bawh khat ta chuai mai a,engmah pawh chu a hmuhtheih ta miahlo mai a,kan awmna zawn arawn kal pelh laite chu chiang takin a thawm hre mahila engmah kan hmu theilo a,light chuan chhun mahila camera a lak a chang reng reng kan lo hrelo,thilmak kan vawikhat tawnna a ni bawk a,kan hamhaihin kan chiai viau a ni.Thawm ri chu a liam rual chuan chhum leivak pawh chu a tawlh liam zui ve ta mai bawk a,ngawi reng chuan a thawm reh thleng chuan kan ngaithla zui ta a.

Boruak thlen dan chu nuamlo ti viau mahila hlauhna tak tak chuan minla man chiahlo tlang a niang,zankhatna ah chuan tawngkam neiin vau lemlo mahila hlawhtling kan inti hle a,a leh pekah chuan kan pawm chilh hmiah dawn nia,mumal taka chet lak dan pawh rel felin kan tum nawn leh dawn nia,zanin atan chuan  hawn san phawt mai teh ang u kan ti ta a.

Kan haw pah chuan thlanmual kawngsir vela In tlemte intlar thliaite chu thawm kha an hriat ve reng em tiin kan thlek pah a;Mahse,thawm han hriat hmel pawh an awmlo,an reh thuap hlawm a.

Tichuan,tluang tak chuan kan haw ta a,mut hmunah chuan kan thil tawn mak tak mai chu ngaihtuah zui neuh neuh chungin ka muhil zui ve ta a.

Nilum purh ah chuan ka thiante pahnih chuan min rawn kaitho a,an hmel chu a uanglo dun hle a,thil enge maw danglam thleng a awm a nih ka ring a.Rama chuan,"Amak lutuk Muana nen hian nizan khan mumang inang chiah kan nei a nih chu.." a han ti tan ta a,Muana chuan,"Rama lo leng hnenah ka mumang ka hrilh a,mak deuh maiin ka hmuh ang chiah chu alo mang ve chiah mai a,kan sawi dun ta a,a in ang chiah chiah vek a ni,ngaihzam mai mai chi niin kan hre lo a,sawi ho ila atha ang" a han ti a.

Chutihlai chuan Ka nu chuan,"Nangni ho thlahrang chang hi engemaw tawnte innei ve em,in report lah kan la ngaithla mang silo a" tih pah chuan ka thiante chu thingpui a pe pah a.

Muana chuan,"Hei kanlo sawi dawn mek a,thilmak tak kan va tawng ve alawm.." nui deuh sang chung chuan a han ti a.Ka nu chuan fiamthu in,"Chu inlo kai haw law law lo nia" nui chung chuan a han ti a.Chutah,Rama zawk chuan,"Ka nu Sang,a ni tak tak a nia,hei nizan kan haw hnu khan mumang thuhmun chiah Muana nen hian kan nei zui leh bawk a,Nuna hi rawn hrilh kan lo tum mek a ni,kan thil tawn kha a mai mai dawnlo in ka hria a ni" thutak zet hian alo ti a.

Ka nu pawh a thutak ve ta deuh a,"Engthil nge intawn han sawi thuai teh u" ati ve ta a,Muana chuan,"Nizan kan haw hnu khan ka mu nghal deuh mai a,phone pawh khawih zui lemlo in ka muhil zui deuh nghal mai niin ka hria.Zan lama kan chetna vel chu ka mangphan nge ka ti hman deuh a.Mahse,hei Rama hian ka mang ang chiah alo nei ve bawk si a,amak kan ti ta em em mai a ni.

Ka mumang ah chuan,'Ni zana kan kalna Inhrang ah khan kan pathum bawk hian kan lo kal leh a,a hma ang tho khan ka  thutna ngaiah khan phone sik nuap nuap chungin kan thu leh thap mai a,reife ka awm hnu chuan vawi lehkhatah kawngkhar, pawnlam atanga inkalh tlat mai chu a rawn inphih hawng thuai mai a,kan rak rual thawt nghe nghe a ni.Chutah le,Putar,tar ah pawh tar em em mai,ruhrel hlang ni mai tur a mawi khawp a cher chhia hi tiang hawl boh boh chung hian alo lut ta dun dun mai a,Chiang fahran a min rawn melh kuau pah chuan kan lam chu a rawn pan nghal a.

Kan hmaah tak chuan a rawn ding ta a,chiang em em mai hian min melh kual dun dun a,chutah a nui then ta thu mai a,hlauh neilo ni a inngai te khan kan lo neih zia kan hre chhuak ta uai uai mai.

Chu putar chu a hmelchhe em em mai a,minung a nilo tih hriat takin a dang var pup mai a,a mit khur chu a khuar kuk a,aval kual ruih mai bawk a,a taksa ah chuan tisa leh thisen a awmlo a ni tih hriat takin a ruhrel chu a vun chuar zet chuan a tuam ve a ni ber a,a rimchhe em em mai bawk nen,phone a record tih lam kha chu alanglo chiang khawp mai,tumah kan tawng ngam tawhlo,chet pawh kan che theilo,kan ruhte chu a khawng zo vekin ka hria.

Putar chu a rawn tawng chhuak ta a,a aw chu a ri thawp sut mai a.Mahse,a fiah em em lawi si a."Kei putar rethei tak tibuai tur hian engvangin nge inlo kal fo thin a,tanpui ka ngaih lai khan inlo kal ngai silo a.Ka inchhung ngeiah tihduhdahna nasa tak ka tuar a,atawpah chuan min that ta nge nge a ni.Thudik tak hi inhriat chhuah hma chuan helai hmun hi ka chhuahsan ngailo ang," tiin a tiang rawn hawl chu bangkilah chuan atung a,nui hui chung chuan kan hmuh lai rengin a ral ta riai riai mai a ni.

Chutia a bo tak hnu pawh chuan tawngchhuah mai na chang hre lawkloin kan ngawi thap mai a,Chutah Nuna hian,"A mak hle mai...engemaw thil diklo chu a awm ngei a ni!!?" a rawn ti chhuak ta a.Rama nen chuan,"Nia" kan lo ti rual thawt a.Chuthu chuan kan beng aluh bawk a ni ang,titi dang kan vawrh thei tawhlo chhang khat tak tak chuan kan ngaih dan kan insawi chhawk zauh zauh tawh mai a,ti chuan ,nuamlo ti tak chungin kan hawsan leh ta a ni." tiin a mumang mak tak mai chu a sawi ta a.

Muana thusawi chu amak ka ti ta tulh tulh mai,keipawh chuan chutiang chiah chu ka mang ve tho a ni,tihpalh thil a mangphan mai mai chu kan anglo tawp mai,kan pathum a mumang inang vek neih pawh chu thilthleng palh thei niin alang tlatlo a ni.Ka nu hlei hlei chuan mak ati em em mai a,a rapin a hlau ta hle mai a ni.

Sunday tlai lamah chuan lenkhawthawn pahin zan lama kan thiltawn vel chu va chian turin kan kal leh ta a.Kan thil hmuh leh hriatte chu kan la puangzarlo a,thil pawi leh mi pawi sawi theihna tak tur niin kan hria a,zawhna pawh fimkhur tak a chheh chhuah a ngai dawn niin kan hre bawk a ni.

Kan thlen chuan kawngpui atanga thlanmual peng In lo hnai berah chuan ka lut tawng mai a,thil tam tak kan inzawh hnu chuan engemaw thil sawi that duh vakloh annei tlat niin kan hria a.Mahse ka n zawt zui duh ta lemlo a,kan chhuah san leh ta a,In hrang thenawm hnai ber a awm Pu Zamate Inah chuan kan lut leh ta zawk a.

Nu pakhat hian rawng alo bawl mek a,an fate ni awm tak pahnih chu chhuatlaiah chuan anlo in fiam mek bawk a.sitting room lamah chuan pu tar han tih mai tawh tur pa upa lam chu lunglen hmel tak hian alo zai hlarh hlarh a.

In chhung a len luh te dil a,thilawmzia kan hrilh hriat hnu chuan a pa chu zawt zawk turin min ti ta a.Putar awmna lam pan chuan kan lut phei ta tham tham a,ani chuan chutia hmel hriatloh tlangval min han hmu ta thut chu mak minlo tih hmel hle a,reilote ah amak tih hmel chu pangngai leh thuaiin,"Valate u enge induh chu le,khawi a awm nge innih?" alo ti dam duai mai a,a aw chu a fawn lek lek tawh a,zahawm rukna riau neiin a hriat a ni.

Zan lama kan thiltawnte leh kan mumangte chu kan hrilh ta vek a,chutah min han en vang vang a,a aw chu a han thian leh khak khak bawk a.

"A nimaw...an chanchin pawh ka sawi tam tawh narawh e,vawi tam thianpa thla fiah tum hian anlo kal fo tawh thin a.Mahse,nangni aia chiang hi anla awm miahlo a ni,kum tam tak chhung kan inthenawm tawh a,nupa chauh a khawsa niin fanau an chawilo a ni.Nupa inngai tak anni a,thenawm nuam tak anni thin a ni.Theihtawpin In leh lo tuakin an din ve a,an luah lut chauh tihah vanduai thlak takin a thiannu chuan khawsikpui avangin a boral san hlauh mai a;Chuta tang phei chuan a taptawm deuh chawt a,a bawksawp chho ta tial tial mai a ni.

Chutiang anih taksi ah chuan a fanu te nupa chu amah awmpui a,a ro te khawm turin a chah ta a; Fanu a neih thu hi a hmain kan hre ngailo a,a tlangval lai fa a ni awm e.

A fanu atihte nupa chu anlo thleng a,mi mak tak mai niin ka hria,kan la inthenawm reiloh vangnge chu ka hrelo, nel an har em em mai a.Anni lah chu an tuallimlo hle a,apate ang bawkin fa an chawilo ve bawk a,fanu annei a pasal a nei tawh niin ansawi a ni.Kum khat an awm hnuah pawh Kohhran leh khawtlangah lah anla inkiltawih em em mai a,mikhual awm hian an awm a ni deuh ber ang chu..

Hun engemaw chen chu inngeih leh lungrual takin an awm a.Mahse,nikhua alo rei chuan anin hmu sakhi tan ta a.Thenawmpa in asawi dan chuan,'A In leh lo,huan ramte leh a neih zawng zawng chu tiral a,khawpui lam pem an rawt mauh mai a,ka lai a na tak zet a ni,kei chuan ka nupui luphumna hi ka luphumna hmun tur a nih thu leh rei ka dam tawh loh tur thute,chumi hunah chuan an duh dan dan antih chu ka pawiti lo,mahse,ka la thawk tek tek chhung chuan helai hmun hi chhuahsan ka tum lo bur mai a ni" ati a,a fanu te nupa pawh an thinrim hle niin a sawi a,tuk tha pawh anneih theihloh thute leh khawiah mah sawi chhuaklo tur a min tih tlat avangin ngawih ka chuh ta ngawt mai a ni.

Chumi asawi hnu lawkah chuan lungphu chawlin a boral ta a,engmah thubuai hla buai han lak a awmlo a,pangngai takin kan vuiliam ta a ni.A mitmu pawh ala keh hman em dawn ami tihah chuan an In leh lo vel chu a fanute nupa chuan tiralin an pem chhuah san ta a.

Mahse,he In an hralhna man chanve poh an dawng meuhlo ang,hetiang boruak anih a,luah chi ziazang a nih takloh ah chuan thleng let leh mai an tum a ni.A hma a an indawrna ah thla khat chhung enchhin phawt turin thu anlo delh kilh a ni awm e.Mahse,poisa chu pekkir mai tur anneih taksiloh ah chuan man tlomtein an hralh chu a nita ringawt mai a ni.

Keipawhin a thih danah han rinhlelhna chang kalo hre hauhlo mai a,mahse,sawi chhuah tam vak chi chu anih loh chu,engpawhnise,in thil tawn leh in mumang chu thilmak tak zawng a ni,ka thiana chu ka va han lainat em ve aw..." ati ta vawng vawng mai a.

Thingpuite min intir hnuah chuan kan chhuahsan ve leh ta a,In hrang lamah chuan kan inzui phei leh ta a,zanah ngawt ai chuan khaw engah chuan a nelawm zawk hle a ni.Kan lawn luhna tukverh tlabal ah bawk chuan kan lawn lut leh ta a.

A hma zan a kan sulhnute chu a ngai ngaiin anlo la awm thip thep a,kan thil eina hnawk pawh angai ngaiin anlo la hnawk neih nuaih mai bawk a;Chutah le! thilmak tak kan hmu ta....

Kan mumang lama kan putar hmuhin a tiang rawn hawl luh,bangkila a tun kha alo intung tak tak mai!! Han khawih mai pawh chu kan tihru deuh tlat tawh a,a ngai ang ang chuan kan hawsan leh ta zawk a,vawikhat mah kan kal leh tawhlo a ni.

Mite'n hrâng nia ansawi hmun hrang hrangah,kan remchan dan chuan kan kal ta zauh zauh a,hun leh hmun inkar hlat tak tak te anni hlawm a ni.Hetiang a kan chhuahna lamah hian Putar thla nen chuan kan intawng leh ta nawlh mai a,kan kal chhan ber In hrang neitute chu putarin a fanute nupa ti a asawi kha anlo ni reng mai...... Thlahthlam mai mai chu ala tum hauh lo a ni.

..... _15th.Sept.2021_ ....

..@zo tube 2021