Pu Chalzika Thlahrang

Ziaktu: Mawia LeneX

Hetiang khua ve reng ruangah chuan hetiang thil hi thil thleng pangngai ve tur nge ni ang,thil thleng awmlo tak zawk? tih pawh ka hre thiamlo!

Kan khua hi khaw lian ve pangngai tak mai a ni a,veng hrang hrang awmin kan veng hi a lian pawl tak a ni a,motor kawngpui bul maiah kan awm a,mak deuh maiin kan awmna hmun lai velah hian thawm danglam tak tak hi hriat tur a awm zauh zauh fo mai a; kan awmna hmun hian a zirlo nge han ti dawn ila veng hulum lai tak tih turah kan awm bawk si a,tunhma daih tawh,kan hriat ve theih hma pawhin thla leh ramhuai thawm niawm tak takte pawh anlo hre ve fo tawh a ni. Keipawhin,mak tih tak tak chu ka neiin ka tawng ve zauh zauh fo a,fiah tak tak erawh ka nei lem lo a ni.

Kar hnih vel liam ta atang tawh khan zanlai pelh tawh lam a ka than harh chang hian kan In sir mai a kawngpui ah chuan patling rum dat dat thawm hi ka hre zauh zauh mai a,zantin erawh ka hre chuanglo a; engtin minti pawh a nilo a;tiin fiah ka tum buai ngai lemlo a,amak erawh ka ti thin fu mai a,thla leh hlauhawm lam a nih ka ring ngai lem lo a ni ber ang chu,ka theihnghilh zui ve leh mai thin a !!

Zankhat chu chhun lamah ka chhin sek avangin ka muhil thei lawklo a,mu chungin phone ka khal mai mai a,a khat tawkin zung turin bathroom ka pan deuh sek mai bawk a,chutiang chuan zinglam dar 1:00 chu ka thleng ta der mai a ni.

Ka zun chhuak chuan min tur leh ut ut tawh a,rei insum chi a nilo,ka thawhchhuah pui leh ta nge nge a,ka chhungte pawh chu an muhil vek tawh tih anthawm atang chuan a hriattheih tan tawh a,zan chu a reh raih raih tawh hle a, bang a sana intar chek ri tlek tleklo chu thawm hriattur a vang tawh hle a ni.Sitting room light chu On in bathroom lamah chuan ka lut zui ta nghal a.

Ka ding fel chiah tihah chuan ka hmalam la hla fe kawngpui ah chuan patling rum nghat nghat ri,ka hriat zauh zauh thin ngei mai kha ka hre leh ta phut mai a;Ka hma zawn chiah ventilation atang chuan kawngpui chu thui tak a lang ruih thei a,tunang hun zan zan a patling han hui leh pap pap thin chu tu tak ni ang maw? ka ti rilru neuh neuh a.

Ka rin rilruk dan chuan tute emaw hnathawk tur emaw sa talhtur emaw nei,tho hma fal deuh annih ka ring a;mahse,hah hmel taka a han rum nghat nghat kher chu mak ka ti ru deuh a,hlauhawm lamah erawh ka ngai hran lo a ni.Tunge a nih reng reng tiin hriattum chuan ventilation chu tlem nawr kauin kawngpui lam chu ka thlir ta ran mai a.Thawm chu a rawn hnai chho zel a,patling aw ni ngei tur thum bel bul tak mai hi a rawn rum chho dat dat mai a,tu pa tak ni maw,tiin thaw dep dep chuan kalo thlir kiau mai a.

A thawm chuan kawng sir a solar eng zawn ni ngei tur a ka hriat a rawn thlen pawh chuan amah hmuh tur a awm ta miahlo mai a,alo la thlenglo zawk aniang tiin ka'n nghak deuh det a;mahse,chu thawm chu arawn hnai chho zel tho niin ka hre ta tlat mai a,chutih rual chuan hlauhna chuan min man thut mai niin ka hria!

Ka mawng a za chuai chuai a,ka tiril a khur der der mai bawk a,awm nuamlo tak si,thil lo thleng tur hriat chak angreng taksi bawk chuan ka lo ngaichang ta ran mai a ni.

Ka hriat ang ngei mai chuan amah hmuh theih siloh patling awrawl thum chhur mai,rawn hui chho dut dut chuan kawmthlangte nena kan inkar kawngpui chu a rawn zawh chho charh charh a ni tih hai rual a ni ta lo.Mak ti tak leh hlau ru ang reng tak si chuan ka bihru hram hram tawh a.

Chu thawm chu rawn chho zelin kan kawmthlangte peng zawnah chuan a tawp ta hmak mai a.Thil hmuh tum tak chuan ka mit ka len vel ruai ruai a,êng bawm rannung phe leh zeuh zeuh thin tih mailoh chu thil han che zeuh hmuh tur a vang hle mai a.

Nakin deuhah chuan kawmthlangte varanda atang chuan zawhte lian thelh thawlh dum deuh zuar mai niin ka hria hi ngiau ngal ngal chung hian a rawn zuang chhuak zawk mai a,kan huan lamah chuan a rawn per kai zui ta nghal daih mai a,ngaihthalo tak chuan zawhte lo chhuahna lam chu mit khap leklo chuan ka thlir reng a.

Chulam hlir mai thlir a ka rilru pawh ka dah lai chuan an In bathlar sir lama an broiler ar vulh ho chu an ri leh ta khut khut mai a,an tik dial dial a,a thente phei chu an te thawt thawt bawk a,chutih zawng chuan ar In chhung a an bulb chhit chu an su then nawlh nawlh a ni tih hriat takin êng rawn inkap chhuak chu a then hluau hluau mai bawk a.

Ka beisei rilruk,ka rinngam chiah siloh chuan le! Ar pakhat chu a ai ta tuarh tuar mai a. Chuveleh, kawngkhar chu rawn inhawng thuaiin In neitupa chu a rawn chhuak nghal zawk a,hawi vut vut chungin Ar in lam chu a pan thuai a,ngawi reng chuan thenawmpa che vel chu ka thlir reng a,thil thlen dan chu amakin ka rap ru riau mai a,ka thauah min man a,mahni chauha mut leh pawh chu ka hreh rilru ta hle mai a.

Thenawmpa chuan ar dahna lam chu pan vatin a bih deuh duk duk a,engemaw sawi hian a phun deuh bul bul a,a sawi erawh ka hre phak chiahlo thung a,chumi hnu ah tual zawlah chuan rawn chhuakin an In sir  kawm tawn tawn chu a bih kual leh thuak thuak a,kan kawmthlangpa hi pa chimlim ngang hi a ni bawk a,a mit pawh a len ngun hmel vat vat hle a ni,chumi hnu ah la duh tawk mailo chuan gate lam chu panin a i kalh that leh thatloh chu a han chian leh ngat a,chutah lungawi hmel takin Inchhung lamah chuan a luh san leh ta a ni.

A tuk khua alo var chuan ka chhungte bulah ka sawi a,mipa lam chuan mak ti ve viau mahse an ngaithla liam mai niin alang a,hmeichhe ho erawhin an hlau hle thung a.

Tukthuan eikham chuan kawmthlang huan ah chuan sekrek eng eng emaw khawihin hna ka thawk a;chutih mek lai chuan kawngthlang nuthlawite thian dun chu an kawtah chuan an titi ve malh malh bawk a,zak rual anni tawhlo dun bawk a,an luruh a ring dun hle a,reife antiti hnu chuan kawmthlang nu zawk chuan,"Nizan ka mumang chu a mak ka ti lutuk...mumang chiah pawh niin ka hre lo,a hrehawm bawk sia ka hlau lutuk,ka pa khan min sawi harhlo phei sela chuan ka thi thei hialin ania ka rin". a han ti a.Chu thu chuan ka beng a verh hle mai a,a thiannu chuan,"Engnge ni a?" alo ti thuai a,sawi hlan nghak hlel tak kawmthlang nu chuan,"Zanriah eikham khan ka luna damdawi ka ei a ka tlu zal mai mai a,ruah tla cherh cherh reng khan min awi mu ta a niang chu ka mutlang nghal ta ringawt a,ka zun chhuakin min tiharh hlawl mai a,dar 12:30 a pel hretin ka hria,ka va inthiar zawh hnu chuan ka mu leh nghal mai a.

Amak ka tih em em chu hetah hian lawm muthilh lehna hman pawh awmin ka hrelo,mahse,ka mumang niin ka hre lawi bawk si a,blanket chuan ka inthawlh leh nghal a,phone chu ka han en leh thuak thuak a,ka dah leh nghal mai a,thli rawn thaw deuh sung sungin ka hria a,room light pawh ka on vek nghe nghe a,tukverh lam chu ka hawi vat a,tukverh kawngkhar lehlam chu alo inhawng reng alo ni a,khar tum pawhin ka che hmanlo!! Tukverh biangah chuan Kut arawn inham tang thut mai a,tre chhuah nghal thawt mai ka tum a,mahse ka aw chu a ri chhuak thei ta reng reng lo mai a;Chutah le,Pa Chala alo dak ta duk duk mai a,min en kiau mai lehnghal a,ka room chhungah chuan a rawn kar lut ta dun dun mai a,ka hlau lutuk chu ka thidang a niang,ka che theilo a,ka au chhuak thei bawk silo.Ka rum nasa lutuk a,ka pa in min rawn sawi harh a ni awm e. Pa Chala thla hi alo kal leh a nih ka ring,ka pa pawh hian a sawi ka hre zauh zauh a ni."  tiin a mumang mak tak mai a harhchhuah san dan chu a sawi ta a.

A thiannu pawh chuan  mak a tih hmel ve hle  mai a," Nia,Pa Zika hian sawi neuh neuh a hlawh lutuk anti alawm,i chhungte i hrilh ve em?" a han ti let ve a." Hrilh e,ka pa phei chuan mite'n an hre reu reu ange,khawiah mah sawi chhuak reng reng suh,mumang chhia mai mai a nih kha,ati a" tiin kawmthlang nu chuan a thiannu chu a chhang thuai a.

Chumite thiandun thilsawi leh ka thiltawn chuan inzawm a anneih ngei ka ring a,remchang a hriatchian leh zual ngei chu ka tum ta ran a.

Tlai lamah chuan kawmthlang pa chu thilhriat belh turte a awm tak mialin tiin ka thil tawn mak ka tih em em mai chanchin chu ka hrilh ve ta a,ka rinaiin alo ngai thutak ang reng hle mai a.A fanu mumang te chu min hrilh ve ta a,chumai bakah a thianpa chuan a rawn tlawh fo thin thute leh ka nupui fanauten an hlau ang tih ka hlau si a,rawn kal tawhlo turin ka ti ta a,chumi atang chuan a thinrim a ni chek ang chu!min tibuai zawng hian a khawsa ta fo mai a,mi erawh a tina ngailo thung a ni,hethu hi tu hnenah mah ka sawi duh ngai lemlo na a,hei rin aiin thianpa Zika hi a chimawm ta tlat mai si a,engtia han tih chi nge pawh ka hre tawhlo a ni". tiin mi han rawn deuh titih chuan a han ti ta a.

Kei chuan kawmthlang pa chu mak ka ti rilru hle mai a,chutia midangte mualpho a hlauh avanga alo sepui ruah tawrh ngawt mai chu a ngaihsan awm ka ti hle a ni."Pastor leh upa te hrilh tawp mai chi a ni mailo maw? hetiang ngawtte chu a dik hlei nem!" ka han ti ve thla rawk a."Ni e tiraw,tihdan tha zawk kan hre bawk silo a,Pastor te chu hrilh ve rawih mai ang,mahse,a patlin loh thlak chu ka ti deuh a ni.." a han ti leh hram a.

Kohhran rawngbawltu hrang hrangte chuan chutia theihtawp chhuah a tawngtaina nen an beih hnuah chuan kawmthlangte Inah chuan thil danglam thleng leh hmuh annei ngai tawhlo a; Mahse,he Chalzika thla antih mai hi,an veng chhung a an chenin pakhat Pi Tawiite In lamah a insawn leh ta a,nufa chauh a awm anni bawk si a,anmahni chauh chuan riah pawh an riak ngam ta meuhlo a ni.Chalzika thla chu vengchhung buaipui tling a ni ta der mai a,khaw khahin a khat hneh hle tawh a ni.