AIZAWL A STAR TV LO THLEN

By- Tedika Chawngthu

Kum 1990, July thla ah Mizoram khawpui Aizawl ah Star T.v a lo thleng a. A tichhuak hmasa ber tu chu Skylinks niin Mizoram mai nilo N.E ah pawh a tichhuak tu hmasa ber an ni bawk.

Skylinks hi Anthony Chhuanvawra of Misson Vengthlang in 1990 ah a ri ruang leh engemaw mai mai in bul tan bek bek a ni a. Mahse official taka hawn tan chu kum 1991.Sept.5 a ni thung.

Achhan chu Teachers day a ni a Cable TV atang hian miten finna chhar chhuak se tih rilru pu in an tichhuak a ni. Skylinks hian Tuikhuahtlang ah office erawh an nei daih a nih kha.

Hun a rei tawh em a studio run tan chat hi hriat a har tawh hle. Skylinks hi atan tirhte ah chuan a thar tih takah an pachhe ve viau mai. BBC news pawh an pe chhuak tan mai lo.

Skylinks bun tan fe hnu ah BBC pawh an telecast thei chauh a ni. North East ka han tihna chhan pawh commercial cable Tv network kha Manipur ah khian sipai Jawan ho en tur VCR a an play mai mai an chhuah thin.

Satellite atanga signal la a commercial a live tu ah chuan a hmasa ber an ni chiang khawp mai.Skylinks in Aizawl atang hian Shillong a Star TV khawl zu bun hmasa ber pawh an Engineer an zu tirh thlak a ni.

A hmasa ber atana Skylinks in N.E a star Tv an pek chhuah theihna chhan hi hmunpui lamah an unaute an awm a chinchang an hriat hmasak vang a ni mai thei.

Skylinks in channel tihchhuah a an chak lohna pakhat chu khang hunlai kha Gulf war( Iraq leh Kuwait indo) buai lai vel a ni a satellite ah khan BBC etc news kha an rawn kap kai khawtlai thin kan ti thei ang.

Mizorama cable Tv bul tan hmasa ber mah nise chanchinthar lam puan hi chu an puang hma lutuk bik lova. Kum 1998 chho bawr vel atangin chanchinthar an puang tan chauh ni a hriat a ni.

Chanchinthar puan hna an thawh atang chuan news puan an regular hle thung a nitin tlai lamah an puang thin. Chanchinthar chhiar hna hi an bul tan hnu ah chuan unau zaithiam DAVIDA TE UNAU kan tih a hmeichhe zinga mi Missionary ni ta Ms- i kha chanchinthar puang hmasa pawl a ni awm e.

Chanchinbu ah tlem lai deuh khan LPS vision hi Mizorama cable Tv hmasa ber anga ziak a awm a, a dikhlel deuh niin a lang.

Skylinks thuneitute'n a hi LPS neitu Pu Sawma hi an thla laksak thintu a ni a. Pu Sawma hnenah Skylinks hian Cable Tv leh Local Tv enkawl kawp kha an hman loh avangin copyright hi an pe vek a tichuan Pu Sawma hnen atang hian Skylinks hian an subscribe ve leh zawk a ni.Aizawl a cable tv hmasa ber ni a hriat chu Aitex cable tv a ni a Republic vengah din niin Venghlui nen connection pek a ni.

Tin, Mizoram ah chuan Base vision an tih Mizoram a Radio nei hmasa ber dawttu( 1950) mi hausa hmasa Pu Buangthanga khan Star Tv connection a pe chhuak advance khawp mai. Serchhip a cable hmasa ber( an ti tawp tawh) ZUALTEA VISION neitu Pu Thianga pawn kum 1992 kum atangin Base vision atangin Star Tv hi a kharchhawng thin.

Skylinks cable Tv hi kum 2010 vel khan a til tiak ta ni.Tin, Tv leh video chhiarpui kum 1991 June thla khan Aizawl khawpui huamchhungah Tv 4114 leh video 2348 a awm tawh.

Ka pian seilenna Serchhip khua a Tv nei hmasa ber chu A.C.Zohmangaiha( L) niin kum 1984 kumah Tv a nei a Bangladesh channel an tih mai kha a man pha a an en laih laih thin a, a la colour lo zui!

A dawt leh ah chuan Serchhip pa hlun kum 1970 kuma Serchhip Kawnpui kohhran Upa atana nemngheh hmasak ber Upa. Hualrothanga( L) of Serchhip Bazar hnuai in kum 1987 ah Tv a nei tawh bawk a ni. He thu ziaktu te hian kum 2000 ah Tv Daewoo thar hlak an nei ve chhe chhe chauh.