Thliarpui ram a thilthleng mak lawrkhawm

Tun a ka rawn sawi tur hi,hun kaltawh a thilthleng daih tawh nimahse,a hunlai a mite mak tih leh tih rawn a hlawh thin viau kha a ni a,thilthleng sek nilo mahse;a khat tawk a thilthleng fo si a nih vang leh atawngtu te lah mi chi hrang hrang a nih avangin phuahchawp mai chu a anglo deuhin ka hria a,mi hrang hrang zing a thenkhatte thiltawn ka rawn sawi dawn a, a ngaihnawm leh viau dawn a ni.

🎧 Audio/Video: Hetah

He ram hi Serchhip ramchhung a awm niin khua atanga 30kms vela awm a ni a, Lunglei Road-in a paltlang nghe nghe a,Helai bul maiah hian Mat lei (Thenzawl kai) chu hmun hnihah, a hlui leh tharin a inkham kai zur mai a ni.

Helai hmun a huan leh lo ram neite leh He hmun pàltlàngtute chuan thawm mak leh rapthlak tak takte,thlahrang ni ngei ngei tur thil rapthlak tak takte antawng fo mai a,Chung zing a mi thenkhatte thil tawn ka rawn sawi dawn a ni.

# Pu Thanga te nupa thiltawn: Anni nupa hi helai ram,motor kawngpui chhak lawk ah hian Fu huan zau tak mai neiin kawl a nichhuak chhiar tak meuhin hna anthawk a,an riah chilh deuh chawt thin a,kum engemaw zat chhung chu helai ram hi annei a,thawm mak tak tak hriat neuh neuh leh thilmak tak tak han tawn chang pawh anngah viau niin Pu Thanga hian a sawi a ni, Amah Pu Thanga sawi dan angin ka rawn sawi tawh mai ang e..

Kum 2005 kum kha a ni a,Kan fu te Savawmin a khawih leh chiam thin avangin Sunday pawh haw lova ram a chamtlang mai kan tum a ni,vawi engemaw zat chu sunday pawh hi kan cham fo nghe nghe a ni.

Chu inrinni zan tak chu thlabial zan tak a ni a,thla a engkulh mai a,a nuamin a lunglen thlak veng veng mai,chu zan kher chu ram lam a ka hmang chu vannei ka intiin ka inchhirlo kher mai.

Zan lai velah chusn rsm kang niawm tak puak ri tuk tuk leh meialh inhlap ri hlup hlup niawm tsk thawmin minti harh hlawl mai a,ka harh phat chu kan thlam chhung chu alo khu mum mum mai a,"Chhei le! kan thlam hi a kang chiang mai" tiin ka nupui chu ka sawi harh a,ka ko nghek nghek bawk a ,thlam kawngka chu rang taka hawngin ka tlanchhuak thuai a.Mahse,ka beiseiloh deuh maiin pawn ka chhuak chu alo reh duk mai a,vanlaizawlah chuan thla a êng kung mai a,khua a thiangin han luh san leh mai pawh chu a uihawm hle zawk,ka thil hriat leh hmuh chu ka mumang mai mai a nih ka ring a,ka nuih a za zawk a,ka nupui mutui em em lai hmanhmawh baklenga ka kaitho te chu ka zak lek lek a,chutiang thil mai mai ngaihtuah a,Thla eng kar a arsi eng deuh deuh ka thlir kual dun dun lai chuan,Thlam chhung a kannu chu mangang em em maiin a rawn sarak ta chiam chiam mai a,engang chiahin nge ka chet ran pawh ka hrelo,mutna sir torchlight chu ka lo hum ran tawh a,thlam chhung chu ka chhun kual pup pup a,engmah phei chu thil dang ka hmulo!Mahse, ka nupui chu kan khumlu ah chuan hlauh nei tih hriattak maiin a lo thu khur zawih zawih mai a,tawngchhuahna chang pawh a hre lawklo hial a ni.Rang takin kava kuah a,chumi hnuah mei ka chhem a,ka nupui chu ka thlamuan mawlh mawlh mai a,engthil chiah nge a hmuh ka zawt reng a,mahse,min chhang miahlo a,ala chiai em mai a,tiin ka zawt zui duh ta rih biklo a.

Chutia,meialh en a kan thut ngawih reng lai chuan kan thlam bul vel ni maiin ka ka hria,mihring mangang te vawn vawn ri te,naupang tapri tuarh tuarh leh patling nutling rawl rapthlak zet zet a auri rawng rawng te chuan thlam bul vel chu a khat nuaih nuaih mai a,chumi karah chuan meialh ri hlup hlup leh thil kang niawm tak ri leh tek tek thinte a tel bàwk a,thlam chhungte chu meikhuin a rawn khat chuai chuai niin ka hria,meikang rim a nam vung vung a,alan danah chuan kan thlam bul vel chu nasa takin a kang a,mihring engemaw zat àn kang hlum mek niin alang a,Thlam bangawng atangin alan theih reng avangin eng kangmei mah a chhuaklo tih a chiang si a.Hremhmun inlar te a nih ka ring rum rum a ni.

Kannu chuan thlabar em emin min kuah chul tawh mai a,kha ti em em a,kannu in kha kan thil tawn a hlau kha amak ka ti a,a hma a athil hmuh vang kha a ni ber ang.Achhan chu tum dangah pawh ramhuai thawm niawm tak takte chu kan hrefova;Mahse,a hlau ngailo mai pawh nilo in ngaiah kan neih chhoh mek a ni.Chutiang a nih lai a,a hlau lutuk khan minti mangang em em a,minti hlau ve ta vek niin ka hria,kan thil tawn chu ka rap thar thut a,ka hmulthi te chu a ding sung sung hial mai.

Hlau em emin kanin kuah chial a,ngawi rengin thawm chu kan ngaithla dun ran mai a,darkar chanve dawn lai chu a ni awm e,mei chu ka chhawm eng pah reng a,kannu erawh ka tangah a bei hle hle a,hlau viau mahse,chhun lama kartluan a hnathawk chau nen,zan rei tawh bawk nen a muhil zui mai niin ka ngai a.

Thawm a reh fel meuh chuan mawng a kham urh hman a ni,kannu chu han kaihharh mai ka tum a,a harh thei ta reng renglo mai a,ka sawi nawk nawk a,ka ko vak  vak mai bawk a,rei ngial chu tih harh tumin ka bei a ni,nakinah chuan chianglo ruai in a rawn meng a,engemaw hi a sawi niin ka hria,ka beng kan dawh hnai a,a ngawi zui leh ta daih bawk si à.

A pang chu namenloin a sa vur mai a,a khua chu sik zuiin a khawsik chu a sang hle niin ka hria a,tuivawt chuan ka dep hauh hauh mai a,Thawm chu hre zui lemlo mahila Ka mangang ru hle mai a,tihngaihna ka hre vak bawk silo,mei chu chhawm belh sauh sauhin ka nupui nikhawhrelo a let bam mai chu ka thutpui ta ngar ngar mai a,khua a var har duh ngei mai...

A harh chhuah hma zawng chuan kannu chu a tawngvai bual bual reng mai a,Nichhuàh rual vel chuan a rawn harh ve ta a,ka lawm ngei mai,enge thilawmzia tih chu kalo zawt nghal var a,ani chuan,"Haw ang,haw phawt ang" tiin hlauhthawn hmel tak chuan min chhang a,keipawh chuan hrethiam takin haw vat chu thaberin ka hria a,dik tak chuan ka thauah khan aman ve deuh tlat a ni.

Kan nupa chuan haw tur chuan motor kawngpui chu kan zawh dun hnak hnak a,ka inbe tlem ngei mai,kawngpui chu thuife zawh a tlang kawnga kal peng tur kanni a,kannu khawsik nen ka huphurh rilru hle a,tunah chuan a hlauhna in a hneh em avangin ala kal thei mai mai a ni tih ka hria a,a khawsik chu ziaawm deuh mahse rei a kal theih ka ring chuanglo a,sunday nimahse motor chan chu ka rilruk sa tho a ni a,mahse,ka sawi rih lemlo thung...

Kawngpui chu thuife kan zawh hnuah Gypsy pakhat alo kalta hlauh mai a,tah chuan kan chuang haw ve ta a ni.In kan thlen hnuah chuan kannu chuan thlam a athil hmuh chanchin chu a sawi ta chauh a ni.

" Khatia,boiha pa'n min rawn sawi khan chianglo ruai hian ka harh a,ka han thu chhuak chu thlam kawngka inhawnghuau atanga thla eng rawn inkap lut ruih thlarah chuan mipakhat pa pangngai tiat awm vel hlimthla àng mai a ding dumzûn chu chiang takin ka hmu thei a,kanpa anih chu ka ring thiam ve mai a,ka lamah chuan a rawn phei thum thum a,chutih lai chuan thlam kawngka inhawngah chuan boiha pa chu ka va hmu leh si a,ka hma a min rawn pan mektu chu boiha pa a nilo tih ka hriat veleh chuan ka rak ta chiam chiam mai a,mumal kha ka neilo zui a ni berin ka hria,a hmai kha a hâng em em a,a mit chu a de var dun ru mai a,chiang em em mai hian min rawn en kul mai bawk a,a kut chu phar chhuakin min rawn ban atum niin ka hria;Mahse,kanpa thawmah chuan bang karah chuan a put chhuak ta a ni.

tiin Pu Thanga nupui chuan a sawi a,he thil antawn avang hian hun rei tak chhung chu a damlo ta reng a ni.Hemi hnu atang hi chuan sundày cham hi chuan an riak  ngai tawhlo a,chumai bakah an nupa in an huanah hian tawngtaina an hmang dun tlauh tlauh zel a,nasa taka Pathian an auhnana chu chhanin a awm a ni ngei ang,anni nupa hi chuan anmahni han rikrap a,thawm leh thil rapthlak hriat annei zui tawhlo a ni.

Mahse,hemi kum vek hian helai bawr vel a lo neitu Pu Sàwmate chhung chuan thilmak tak antawng ve bawk a ni.

## Pu Sawmate chhungkaw thiltawn: Sawi tawh angin Pu Sawmate hi Serchhip lammi niin helai thliarpui zau ah hian,motor kawngpui thlanglam Mat lui nen a inkar ah lo tin 2 hmun vengin hnathawh tul lai hi chuan anni pawh hi an riak ve chawt thin a,anni pawh hian midangte ang thovin Ramhuai thawm niawm tak tak chu an hre ve fo a,anmahni tan a hnawksak leh hlauhawm a, a awm ngailoh avangin an hlau duhlova ngaiah anneih tawh a ni.

Zankhat chu an chhungkua a nupui leh a fapa tlangval Hruaitea chu dan pangngai angin an lo ah chuan anriak leh a,a tuklam a haw tur annih avangin hawn tur atan tiin chengkawl chu zan khawrh antum a ni.An thlam atangin mat lui chu a hlat lutuk loh avangin thlam atang chuan meichher chhi kai sa in an pathum chuan an inzui kawi thla dat dat a.

Mat lui chu thleng thlain lui mawng lam chu an pan thla zel a,chutih lai chuan an hma lawk a lui kawi khat zawn eng pup mai chu an hmu a,Pu Sawma chuan,"Min hmakhalh an awm emawni ni dawn ? zanin chu kan tlai deuh ava ang ve..a han ti a,an han ding chawl dat a,an thlang lui kawi lam chu an thlir thap a,dim tak chuan antui vaklo a ni,tui tlem lai a ni a lui kuang khatah mi 2/3 bak alen theih meuhlo a ni.Pu Sawma bawk chuan,"Tiru,i zu pawh thla reng reng teh ang u,kan ri te ho anni anniang,insiamrem dan te pawh a awm zawk ang" ati leh a.Lui mawng lamah chuan an chhuk thla zui leh ta a,Lui kawi an han chuang chhuak a engmah hmuh tur re g renv alo awm silo,angaihna hrelo takin an takam chembo din ta vel mai mai a.Mahse,an eng hmuh chu an thlang kawiah a insawn tih an hre ta thuai a,mak anti ngei mai!! Thil hmuhsual pawh ani thei alawm, anihloh chuan ramhuai a ni ngei ang,fiah hrim hrim teh ang" Pu Sawma chuan ti rilru neuh neuh chungin an thlang kawi lam chu an pan thla leh ta a,an rin dan ang chiahin an hmuhsual a nilova ramhuai hnathawh ngei a nih an ring ta a ni.chutiang chuan kawi 2/3 lai an zawh thlak hnuah pawh chu èng chu a insawn ve zel mai a ni.

Tichuan,Cbengkawl chu rilru hmin zanlo chuan an khawrh lui ta thova,thawm emaw anmahni hanti buaitu thil engmah an tawk zuilo a,an duh tawk an ngah hnu chuan an thlam lam pan chuan huh hnuang chungin an inzui khur dar dar hlawm a,chutia ngawi reng a an kal lai chuan an hma kawiah chuan a hma a an hmuh ang bawk meialh eng pup mai chu an hmu leh ta thut mai a,a hmasa ber a kal Hruaitea chu a ding chawt  nghe nghe a,Pu Sawma chuan hrethiam tàkin,"Engmah a nilo ang,khawi keimah kalo hmasa ange" ahan ti a,hma chu a hruai zui ta a.

A hma a an thiltawn ang chiah kha a ni,eng chu an hma lamah a insawn leh ta zel a,tichuan an thlam lan theihna zawn an han chhuak a,an thlam chule!! alo kang hluah hluah mai a,chumai ala nilo chu mei kang karah chuan mihring ruangam niawm tak tak an tal sup sup a,an te vak vak a,an au ruai ruai hlawm a,thenkhatte chu lungchhe vankaiin an tap hawm hawm mai bawk a,naute tap ngawk ngawk ri te a hriat theih a ni.

Chutah zet chuan a nupui leh fapa chuan an hlau hle tawh tih Pu Sawma chuan a hailo;Mahse,chutia mahni thlamkang pawh thelh ngamlova patling han awm ngawt mai chu tlawm thlak ati hle a,a nupui leh fapa bulah ala ni leh nghal a."Ti hian kan chengkawl man sa hi lo veng ula,ka va finfiah ange" tiin an thlam lam pan chuan chempui lek vut vut pahin a kal ta a.

An lo ava thlen chuan an thlam chu alo kang reng renglo mai a,mak atiin a lawm rilru hle a,thlam lam chu a pan zel a,chutih lai chuan a fapa chu a rawn kuk raih raih a,a han chhawn vat a,a ko zui ta nghal a,chumi zan chuan thil danglam an tawk zui talo a ni,atuk Inrinni ah chuan Khawlam panin an haw ta a,Pu Sawma nupui chu Khawsikpuiin a na zui ta vak mai a,a natna chu tuar lovin he thil an tawn hnu rei vaklo ah a boral ta a ni.

Tunhma deuh khan helai hmu  Serchhip lam atanga kal a Mat lei thlen hma lawk kawngchhak leh thlanvahte hian  BRTF labour camp a tlar put thin a,a tam pawh antam thei hle a ni.PWD in kawngpui te a chan takah chuan labour awm an awm mang tawhlo a,mimal hnen a i hlawhfa tlem a zawng erawh anla khawsa chhunzawm reng a ni.

Mizoramin zalenna sual a rambuai kannih lai daih tawh khan helai hmun a khawsa labour ho hi misual tu tih hriatloh ten an pawng kah chiam mai a,an In sak di in hlui tawh tak tak chhungah chuan kalh hnanin an hal khum ta a,alo tlan chhuak hmasa apiang anlo kap thal tawp tawp zel a ni.Hetiang thil rapthlak tak a thlen hnu atang hian helai hmun ah hian thilmak leh tihbaiawm tak tak a thleng ta fo mai a,a hun laia titi titamtu leh mite hlauh ruk em em a ni thin a ni.

.

He thilmak tak mai Pu Sawmate chhungkua in antawn hnuàh hian Pasaltha thiandun ramvakin thilmak leh danglam tak mai antawng ve leh a,an thih phah tep nghe nghe a ni. 

### Pasaltha thian dun thiltawn: Thliarpui ram chhak Mat lui hnar lam ngaw a an ram vah tum a an thiltawn Pu Zika'n ka pu a hrilh a ni a,amah Pu Zika sawi dan angin ka rawn sawi leh mai dawn a ni.

"Duhthusam a ramvah nawm hun tak tur khaw nawm em em lai a ni bawk a,Rohminga'n tirawh i chhuak dun teh ang,ka zui ang che a ti fo bawk a.

Thliarpui chhak mai a awm,Mat lui hnar khawkrawk kam vel ngaw ah chuan kan chhuak dun ta a,kan vanneilo hlauh a ni.Tichuan,zan dar 10:00 dawnah chuan Motor kawngpui kan pawh thla a,chutia ka hlawh chham pui mai chu nuamlo pawh a ruk tak chuan ka ti hle a ni.Engemaw satherhlo mai mai pawh kah tur awmse kan ti hle a ni.

Kan theih ang tawk a kalin kan riahna lam chu kan pan ta a.Khawdur chu awmlo se thla chu a eng tawh viau ang,chhum karah chuan alang leh zawk zawk thin a.Kawngpui pawh chu alang deuh ruih thei a,motor tlan a awmlo a,a reh hle vung vung mai a ni.

Mat lei kan prl phei a,tun hma a pioneer camp kan tih mai hmun kan thlen chuan meikhu a zam chuai mai a,mei kang rim a nam vung vung mai bawk a,thil kang zawngin kan hawi kual vel a,engmah phei chu kan hmulo,khawimaw laiah thingmut a awm anih dawn hi kan ti mai a,kal pah in torchlight chuan kan chhun kual thuak thuak a, Rohminga'n kawngchhak rora chhunvum lam a han en chu a te chhuak ta vak mai a,baklengin a tlan ta chiam mai a,enge tih han zawh hman pawh a nilo,chutia pasaltha ramvak ve meuh hlauh hrelo a tlanchhiat chiam mai chu dikin ka hrelo a,Rohminga chhunna lam chu ka han chhun nawn ve leh ngat a!!!

Kawngchhak hmun zawl laia rora an chhun vum thur chungah chuan chhungkua niawm tak midum tak tak mai 20/30 vel tur lai hian ngawi rengin minlo enthup mai a,kang bang ni awm takin an khu vung vung hlawm mai bawk a.Chuveleh,Rohminga chu umin baklengin ka ka tlan ve ta a.

Thuife kawngpuiah ka tlan hnu chuan ka hmaiah torchlight eng hian min rawn chhun siah mai a,ka hnaih zel hnu chuan Rohmingan silaiin min tin reng a ni tih ka hmu ta phut mai a,chuveleh,"Keimah ks ni e,min kap suh" ka ti a,ka pan hnai zel bawk a.

Rohminga bul ka va thlen chuan alo thusawp nuaih msi a,a khur zawih zawih mai bawk a,"Nangmah ini em pa zik...?" alo ti bah niai a.

A awmdan chu dik dawnin ka hrelo a,kawngsir ah chuan ka mut thattir a,Motor chu ka chang ta ngawt mai a ni.Vanneih thlak takin zinglam dar 2:00 velah truck ruak pakhat lo tlan ta hlauh a,a driver kha Hlua a nitain ka hria,a felin a tlawmngai em em mai leh nghal a...

Chu thil kan tawh zan atang chuan Rohminga chu a damlo ta char char a,thla khat dawn a nat hnuah a thachhuak veleh thei ta hlauh a ni.

A dam fel hnuah chuan ti hian an thil tawn chu a sawi ve leh ta a..

Khatia,Pa Zika nen zawn nei melh a kan melh kual velah khan kawngchhak ka han chhun kha le!! Dumka tàm tak mai hian minlo thlir thup mai a,ka tlan zui ta a,min rawn um zel niin ka hria a,ka theih tawpin ka tlan zel a,atawpah ka chau lutuk khà ka thu tawp a,chutih rual chuan Pa Zika  hi a rawn thleng ve chiah a,"Pa Zik..pa zik.." tiin kalo ko thuai a,chuveleh Pa Zika chu Midum hmelchhe em em ah a chang ta mai a,ka te vak vak a ka thusawp hnawk niin ka hria,Pa Zika rawn thlen hma khan vawi 3 ngawt min tihder hman a,alo lan leh chuan ka kap pawp tawh ang ka ti a,chuvanga Pa Zika pawh lo tin vung vung kha ka ni" a ti a ni.

✍️  Mawia LeneX

(A remchan dan angin rawn chhunzawm ka tum leh dawn nia..tp)