Thiarpui ram a thilthleng mak lawrkhawm - 2

☠️☠️☠️ A thawhhnihna atan thliarpui ram a thilthleng mak tak tak chanchin,mi hrang hrang tawnte ka rawn lawrkhawm leh dawn a,uluk takin minlo ngaihthlak sak leh dawn nia.

☠️ Thiandun ramvak thiltawn: Rokima leh Liantluanga chu Mat lui hnar lam,khawkrawk lamah Chawhmeh ilo vel zawngin an vak chhuak dun a,a upa zawk Rokima chuan,"Kan vanneihna hi chu a vantla a nia lawm" tiin silai a keng tel bawk a ni.Chumi ni chu khua atha in ram vah mai mai pawh chu pa taptawmlo tan chuan thil thlakhlelh awm tak tur a ni.

Chawhnu thlang her bawih ah chuan Rokima awmna lamah chuan silai a puak ta dur mai a,Mual hran ve ve a kal anni a,Liantluanga chuan a han ngai chang vang vang a,chutah a thianpa chu a rawn kuk ta raih raih a,rang zetin alo chhawn nghal thuai a,chutah,eng eng emaw ansawi dun hnu chuan silai rikna lam pan chuan Liantluanga chu hmanhmawh takin a tlan zui ve ta nghal a.

Rokima chuan Sakhi chal lian tha zet mai alo thal hut mai a,amah chu alo khi var var mai bawk a,Tichuan, muangchang lo in an han buai pui zung zung a,mat lui lamah zawn thlain a kawchhungte an hai hnuah an chawhmeh laksa hruizik,tumbu leh thil hràng hrang nen chuan an inak bawrin anrit ta viau mai a.Kawngpui an chhuah thlak meuh chuan Ni atla fel der tawh a.Meizuk te siamin reilote an han chawl hahdam det a.

Khua atlai lam tawh nen Motor tlan a awm an ring tawhlo a,tlang kawng lamah haw mai an rel a,chumai bakah kawngpui chu thuife zawh ala ngai dawn tho a,kal pahin motor chu a chan pah theih tho alawm, tiin rei pawh chawlloin kal ansiam zui ve leh ta a,hlawhtling an inti dun bawka an hlim dun sarh sarh hle a,Rokima chuan a silai chu a pa ta a rochun,an thlahtute atang tawh a anin hlan chhawn zel anih thute,an chhungkua chuan an vanneih pui thin zia thute a sawi bawrh bawrh a,chutih lai chuan vaiho hmun hlui thin hmun rem leh zawl in pharh deuh duaih lai chu an lut tan mek a,khua pawh chu a thim sawtin mit avai mum mum thei tawh a,unau hmel hai kan tih hun vel tak tur hi a ni a.

Chutia,antiti mawlh mawlh lai chuan Nghal rual thawm ni awm tak an hre ta phut mai a,an ding chawt a,an mit leh beng chu an len nghal ruai a,chutih pah chuan uluk takin an ngaithla ran mai bawk a,Rokima chuan a torchlight chu a phawrh nghal sawk sawk bawk a,Chung Sanghalte chu an nguk sup sup a,an thawm a na in an tam hmel hle mai a,Sanghal rual ngei anni tih pawh an chiang tawh hle a ni.

Rokima'n a silaite a mu alo phawrh vek tawh avangin kah theih mai tur chuan a buaipui mawlh mawlh a,chutih mek lai chuan an hma lam, hlam 20/30 vel kawngthlang lam atang chuan Sanghal lian zet mai hi a rawn chhuak ta ruau ruau mai a,a dangte chuan an rawn zui chhuak ta sup sup mai a,Rokima'n a kah hman hma chuan a lian ber chu kawngchhak pikah chuan a relhbo hman hlauh mai a.

Chutah,Rokima chuan Uluk leh fimkhur takin Nghal rual kawngkan mek lai chu ahan tin a,chuveleh an te dun thawt mai a,chutia,torchlight a a han chhun chiah chuan sanghal emaw antih chu Mihring hmelchhia leh dum hlerh hlurh,kut leh ke hmang a vak thro thro hlir mai chu anlo ni a,torchlight eng ah chuan an rawn hawi phei thuap mai a,an mit chu a de ru hlawm a,an taksa kang ût sawr tuipur mai te chu hai rual a nilo,la kang mut reng ang maiin an khu chul chul hlawm mai bawk nen,Rokima te thian dun hlau leh hamhaih lutuk chuan tlanchhiat lawkna chang pawh an hrelo hial a ni.

Tichuan le,a upa zawk nanana chu a harhchhuak hmasa zawk a niang chu,"Tirawh,tluanga tlan ang..." tih leh tlan let leh chu a rual ta thut mai a,Liantluanga pawh chuan rang mangkhengin a um zui ve nghal a,Mat lei chu kan let lehin lei vengtute nupa chu an kaitho ta ringawt a,riah ve chu an dil tawp mai a ni.

Chu zan chu mut mu pawh tuah tha ngamlo in an tlingtla ta vel mai mai a,a tuk lamah an haw ngam ve ta chauh a ni.

Heta lei vengtute nupa hi burma lam mi anni nghe nghe a,leivengtu tak takte chhawrchhawn leh anni awm e,hemi te nupa pawh hian kum 1½ vel lek an awm chhung pawhin thawm leh thilmak tak tak an hriatve fo thu ansawi nghe nghe a ni.

.

.

☠️☠️ Pu Zakapa thil tawn: Kum 1992 a thilthleng kha a ni a,amah Pu Kapa pawh hi he thubuatsaih lai pawh hian ala dam nghe nghe a ni.Pu Zakapa hi helai thliarpui zau a leilet siam a riak ve deuh reng thin hi a ni a, thilmak leh thawm danglam tak tak hi a tawngin a hre fo mai a,a hriat than em avang leh amah tina zawng chet an thawh ngailoh avangin ngaiah a nei thei hial zawk a ni.

(Amah Pu Zakapa sawi angin ka rawn sawi leh tawh mai ange....)

"Kum tin maiin kan leilet siam hian helai velah hian ka tap ve deuh chawt thin bawk a,helai vel a Midum thenkhat la awmho nen pawh kan in hre hlawm hle a,tin a fur a thal a kal deuh reng nanana chuan thawm danglam leh thilmak tak tak han tawn leh hriat pawh ka nei zauh zauh a,mite sawi pawh ka hre chamchi a ni.

Thilmak tak mai ka tawn hmasak ber phei chuan ka thauah hian a man deuh tlat a,leilet pawh ka tlawh serh phah deuh reng a ni,Mahse,tlawhloh theih ni hek suh chutiang thilmak chu ka tawngta zeuh zeuh a,hlauhna pawh ka nei tawh lemlo,min tibuai zawng leh rikrap zawngin an awm ngailo bawk a,han finfiah tumna pawh ka nei bik lemlo;Helai a,vai thi ta te thlarau inlar annih ka ring ve mai a ni.

Vawikhat chu keimah chauhin ka riak a,zanlai velah chuan mei kang ri tawk tawk thawmin minti harh hlawl mai a."Khawilai nge maw kang chhuak ngawt a,tun ang zanlaiah te" ti rilru neuh neuh chungin Thlam luhka ah chuan ka va ding chhuak thuai a.

Vai ho awmna zawn lam chu alo eng pup mai a,an chiar nak nak mai bawk a,teak huanin min hliah deuh avangin ka hmu chiang chiah thei lo a,alan dan chuan a alh nasat hmel hle mai a,meisi a de trek chuai chuai mai a,vai ho lah chu an bengchhengin an te ri teng tung tawh mai a,a then phei kha chu an tap niin ka hria. An In anti kang anih ngei dawn hi tiin puih tumin ka insiam a ka chhuak ve ta nghal a.

Vaiho awmna hmun ka han thlen chuan eng kangmei mah alo chhuak der silo a,alo reh thiap mai a,mak tiin ka hawihai nasa mai a,thawklehkhatah hlauhna chuan min rawn tuam thut mai a,a rang arangin kan thlam lamah ka kir leh ta a,ka thilhmuh leh hriat ngaihtuah zui nauh nauh chungin chumi zan chu chhin khat pawh ka chhing leh ta miahlo a ni.

A tukah chuan vaiho hnenah chuan ka sawi a,annui mai a,engmah chu ansawi tha duh lemlo a.Mahse,an pi leh pu te thlarau anih thu leh an mahni pawhin an tawn zeuh zeuh thute ansawi a,hlauh loh leh ngai a neih mai chu a hahdam thlak zawk thute min hrilh a ni.

Vawi khat leh chu,buh phun a hun dawn tawh avangin ka buh chi kuite kan pahin ka riak a,nilai ni nita in ka hria,khua chu a damsamlo em mai a,chawhnu lamah phei chuan ruah a tla chep chep reng a,tlai lamah chuan tlemin a zia awm ta a.

Zanriah hmeh tur kan chhak lawk a,nikum chul velah chuan thlairah ningnawi tete te leh chingit tualto mai mai vai pahin ka buh kui te chu tlawh pah tumin ka chhuak a,Satherlo engemaw kah tur hmuh tak mialin tiin ka silai chu ka pu chhuak bawk a.

Ni tla mai tur chu arawn um pawng par tha leh a,khua erawh a ti nuam viau thung a,Ni zung eng sut mai chuan chulpik vel chu a em khu vung vung a,hnah hmawr a tui far fep fep leh maimawm ril zamte chu an tle sep sep thung a.Chul karah chuan ka lut chho zel a,chawhmeh ka hmuh ang ang chu ka ak nghal zel a,chhak deuh mual pawng ka han chuan chhuah chuan ka buh kuina hmun pawh chiang takin alang thei a.

Sazuk ki zar bung mai hian ka buh kui tiah sa chu alo pet mial mial mai tih ka hmuh thut chuan han au nghal thrawt mai ka tum a,silai ka kengvtih ka hre leh si a,han kah nghal maina atan chuan ka duhaiin ala hla deuh a,chubakah silaimu chu sa te kahna chi mai mai a ni a,pahnih bak ka kenglo lehnghal a.

Fimkhur tak chuan ka veh hnai tham tham mai a,ka rinai takin chu sazuk chu angampa zek mai a,ka sa tur ngei a nih ka ring a ni.Tichuan,hnai set sawt atang chuan ka kap ta dur mai a;Mahse,ka silai puak chu hreawm pawhin a awmlo,buh chawrno chu ala pet mial mial a,mak ka ti ngei mai,ka sa tur ngei anih dawn hi tiin silai mu dang ka thun tha leh a.A lu ah tak pawh tum ila ka thelh hauhlo ang tih tur khawp a hnai awm ka ni bawk a,a lu chu uluk taka tin vang vang chung chuan ka kap leh ta dur mai a.Mahse,a hma ang tho khan ka kap tih pawh hreawmin a awm leh ta chuanglo,mak ka ti em em mai a,kei hi ka mitvai mai mai a ni leklo maw? tiin ka mitte chu ka han nuai ngial thin a,Sazuk lah chu ala awm reng mai si,kap leh tur pawn silai mu pawh ka nei tawhlo a,nei pawh niila ka kap kher tawh awmlove.

Han auhbtlan mai pawh tumlo chuan mak ti em emin ngawi rengin ka thlir kiau ringawt a,nakinah chuan a rawn dak chhuak a,a beng chu a tun thra leh hru hru lawi si a,a inher a hmanhmawhlo tak chuan ka samfaina chin tul pikah chuan a lutbo leh ta a.

Amak ka tihna chu ka hlauhna in a rawn thlak deuh thut niin ka hria,ka mur chiai chiai a,ka tirik chu a khur ta der der mai a,hmanhmawh takin thlam lamah chhukin chul pik chu ka su thla ta buan buan mai a.

Thlam ka thlen thlak chuan ka chawhmeh hawn chu ka han bun chhuak a,mak tak maiin ka silaimu kah chhuah ngei maite kha alo awm ve tlat mai a ni.

Silaimu suan tlangte chu keima siam vek anni bawk a,ka hre chiang hle si a,ka kap chhuak ngei ni khan ka hre si a,chutia ka iptepui a anlo awmkhawm rai mai chu amak ka tiin a ngaihna ka hrelo hle a ni.

Ka thilhmuh leh tawn mak tak mai chu ka ngaihtuah chuan ka hlauthawng rilru hle mai a,achhan pawh upaten hmuhthianglo antih thin kha ka hmu ve ngei niin ka in ngai a,ka awm chu a nuam thei zánlo a ni.

Tichuan,atuk khawvar fel ah chuan awm nuamlo tak chung chuan ka haw chhuak ta nghal a; Mahse,hei Pathian zarah ka vannei a tun thleng pawhin ka la dam chu a ni a,ka tawngtaina rah pawh a ni ngei ang,kha tih hunlai ang em em a nasa khan Pathian ka au ngai awm love.

☠️☠️☠️ Taxi driver thiltawn: Kum 2001 khan a ni a.Haulawng khua naute pakhat chu Aizawl Hospital pakhatah a boral a,Chawhnu her bawih ah a ruang chu an khua Haulawng pan pui hman tawk a ni a. Chumi ruang zui nan chuan Siama Taxi chu an hmang ve a ni.

Hemi ruang an dah haw leh lamah hian Siama hi Hmuifang Road lama kal ta lo chuan Serchhip lama a pu te tlawhkawi tumin remchang ala ve a ni,hemi tum hian thliarpui ramah hian thilmak tak atawnga,"Loh theihloh tawpah lo chuan he kawngah hian ka tlan leh tawh ngailo ang" a ti hial a ni.

Engthil chiah nge atawn ang le? Amah Siama angin ka rawn sawi chhawng ve leh mai ange,a ngaihthlak a nawm deuh zawk takin..

Thenzawl ka tlan pelh khan Zan dar 11:00 a pel tawh hial ang,ka mut a chhuakin ka chau rilru hle mai a,Serchhip thlrn vat vat a,mut siai siai mai chu ka chak et et tawh a ni.

Serchhip ram chin ka thlrng trep a,ral lehlam mai chu Serchhip ram chin a ni tawh a,kan inkarah chuan thir lei a in dawh kai zui mai a,a hnuaiah chuan Mat lui chu a luang hum hum mai bawk a.

Ral leh lam lan theihna lai ka chuang chhuak chu ka tlannnà tur lai vrl niawm tak ka hma ral lehlamah chuan Thlam nge In a kang hluah hluah mai a,mihring rak vak vak thawm te pawh ka hre thei a ni,Engvanga zanlai tawhah han ti kang thei ngemaw annih chule tihte chu motor khalh pah chuan ka ngaihtuah vel mai mai a,va thlen thuai thuai chu ka duh hle a ni,chutih lai chuan Mat lei chu ka zawh dawn tan mek a.

Thir lei a ni bawk a,a bengchheng duh bur bur khawp mai,lei zawh chhung chuan ri dang reng reng a hriat theihloh a ni.Lei chu ka zawh chhuak a,kawngpui ka thlen hnu thleng pawh chuan  mat lei ka zawh laia a bengchhen ang reng chuan ala beng chheng mai a,amak ka tiin ka beng kiu zui mai mai turah ka ngai deuh a,mahse,a reh mai tlatlo! Motor chu ka han tidinga lei zawh thawm pawh chu a reh ve hmak mai a,ka han tlan leh a a reh zui ta hlauh mai a,amak ka tiin ka hlau dawn dawn a,mahse,keima chianloh, ka chauh leh mut chhuak tawngkhawng lutuk tawh zawk vangah kala ngai deuh mah zawk a ni.

Ngaihtuah thui zui hman lemloin ka hma a kangmei chhuahna lam chuan ka rulru ala peng thuai a.Mei eng hluah mai chu ka hma kawi khat lekah chuan a ni tawh a,thawm pawh a hriat theih tawh a ni,an rak chel chul niin ka hria,tlemin motor chu ka han tichak hret a,kawng kawi cgu ka chuang chhuak ta a.

Ka hmuh tum ang ka hmu ta hauhlo mai a,kawng dung chu alo thim riai mai si a,chhum kara thla rawn lang leh zauh zau karah chuan motor light chhun chin bak pawh chu a hmuh theih leh ruau ruau thin a.

Amak ka tiin ka mit vai mai mai a nih chu ka ring leh ta deuh zawk a,mahse,kha leh chen eng kha ka hmu a nisi a,tun ataka bo tak hmak chu mak ka ti hle a ni.Motor chu tlantir zelin Kangmei chhuahna lai niawm a ka rinah chuan ka han ti ding a,'Engemaw kei hi ka chianloh em em reng le,zunram thiar pahin kan in thingharh deuh teh ang' tiin kawngsir chhak lamah chuan dingin kà chhuak nghal a,ka zun chu alo chhuak hle tawh nitur a ni,chhaklam hawi chuan ka khawh ta tur tur mai a,chutia zung paha ka han hawi chho chule! Midum kawnglai rual niawm tak,hmel chhe em em leh hmel mumal pawh annei hlawm pawn ka hrelo,minlo thlir thup mai a nih chu!

Ka rak thawt a,ka thil chu ka khung leh khung loh pawh ka hre tawhlo,ramhuai speed dik tak maiin hma lamah chuan ka tlan zuita nghal a,karloah Serchhip khawchhung chu ka lut ta thuai a,ka thawveng huai mai.Ka pute In chuan riakin atukah ka haw leh ta nghal a ni.

Ka pute hnen a ka thiltawn ka sawi khan mak anti em em vaklo tlat mai a,a chhan pawh helai hmun velah hi chuan tunhma atangin thilmak tak tak hi anlo tawng fo thin a ni awm e.Khaw kar kawng ka tlan tawhah chuan ka la hlauh ber pawl a ni awm e.

Ole heti chinah hian a thawhnhnihna chu kan duhtawk leh rih phawt ang a, remchan dan angin rawn chhunzawm leh thuai a ni dawn a,a ngaihthlak nawm tulh tulh dawn bawk a,minlo view sak leh la,mipakhat tal hnenah minlo share sak ve dawn nia.

.

.

    ✍️Mawia LeneX

.