Thilmak tak tak Lawrkhawmte
1. THE TWO- HEADED DOG:
Indopui II na zawh hnuah khan, Russia Scientist pakhat Vladimir Demikhov chuan, taksa bung hrang hrangte thlak dan tur zirin, enchhinna(experiment)a bei nasa hle a. Enchhinna a neih kum hi, 1940- 1970 inkar velah a ni a, Cold War inmung chhoh lai vel a ni awm e.
Demikhov-a chuan mihring taksa bung hrang(organs)te chu, thlak theih a nih a ring a. Chu chu, a hlawhtlin theih leh theih lohna fiah a, enchhinna chu thil dangah a nei hmasa a. Enchhinna chu ran vulh zinga, mihringte hnaih tur pakhat, 'Ui' atangin a zir tan ta a. He enchhinna a beih hma hian, kum 1908 ah daih tawh khan, French Surgeon Dr Alexis Carrel-a leh, a thuihhruai American Physiologist Charles Guthrie te chuan, heti ang hi an lo buaipui tawh a, enchhinna te pawh an lo nei tawh thin a.
Demikhov a chuan, kum 1948 ah khan, thilnung dang(animal) pahnihte taksa bung hrang chu zaiin, an taksa peng chu inhman tawm dunin, pakhatah a chhuah/chantir theih thu a lo ziak tawh a. A thu lo ziah tawh angin, a thuihhruai(team)te nen, mihring ran vulh zinga pakhat, ui atangin enchhinna chu an nei chho ta a.
An enchhinna chu a hlawhtling thawkhat viau a, hmasawnna pawh an nei chho zel a. Chuti chuan, kum 1954 ah chuan an tum ang ngeiin, ui pahnihte chu zaiin, ui pakhatah an chhuah ta a. Heta ui pahnihte hi, an taksa chhung(kawchhung)lama awm, pumpui te, lung te, thisente, thinte,ldt., chu inhman tawma siamin, lu pahnih leh taksa-kawchhung pakhat ring dun siin, nung-damin an lo siam chhuak thei ta a ni.
Enchhinna neih a nih hian, Vladimir Demikhov-a leh a ṭhuihhruai (team)te chuan, khawtual ui(stray dog) pakhat German Shepard, a hming atan Brodyaga(Russian-'Tramp)tia an phuahsak leh, ui te chi a hming, 'Shavka' tihte chu an hmang a. Shavka zawk hi a nghawngah tan chhumin, Brodyaga nghawngah an vuah thung a. Brodyaga taksa leh kawchhung chu, anni pahnihte hian an intrawm ta a.
He tia an zai(operation)hian, darkar thum leh a chanve(3½hrs)lai hun an hmang nghe nghe a ni(an thlak dan leh, a vel erawh sawi chipchiar kher lo vang@Tzo). Chuti chuan, hlawhtling taka an zai zawh hnu hian, Brodyaga leh Shavka te pahnih hian, hriatna an nei a, an hmu thei a, an lem thei a, an in thei bawk a. Amaherawh chu, an nih dan tur dik tak, khuanu siam dan a nih miau loh avangin, an chungah harsatna a lo thleng ta a. Shavka zawk chu, an zawmna laiah chuan, thisen kal ven dan dik tawk loh avangin, an zai atanga ni li(after 4 days)ah a boral ta a ni.
Vladimir Demikhov-a leh a hruihhruaite hian, an thil zir leh enchhinna chu kum 1968 hnu lamah chuan an lo duh tawk chho ve ta a. An thil zir an tawpsan hma hian, enchhinna hi vawi sawmhnih leh pathum(23) lai an nei hman a ni. Hetia, an thil zai(operation) neih zawng zawng zing atanga dam rei ber chu, kum 1968 a an zai a ni a, ni sawmthum leh pariat(38 days) thleng a dam a ni. Heta enchhinna neih a niha dam rei ta berte taksa chu, kum 1988-ah Rita's Museum of History of Science-ah dan a ni nghe nghe a ni.
Vladimir Demikhov-a chuan, a thil beih leh enchhinna a neih thin chu, a hlawhtlinpui thawkhat viau a ni. Chuti chuan, kum 1970 atangin a thil zir leh enchhinna a neih zawng zawngte chu, a lo tawpsan zui ta a ni.
**[Ui pakhat taksa ring a, lu pahnih nunga zai theih chu, a hun lai ngaihtuahin a 'Mak' viau awm e!]
2. THE MUMMIFIED 'VAMPIRE' HEART:
He chanchin hi i hre tawh ngai em? Kum 1912 hma lama United States of America ram a, mi sawmli(40) chuang tualthihna leh, Vampirism(mihring thisen-dawt) a rawn lar tak chiam tum kha! Kha tih hun lai ami, Vampire Auguste Delagrange-a 'Lung' kha trawih thei lo va dah that a ni.
United States Chhim lam ramah chuan, a chhan chhui fiah theih lohin, mi thenkhatte chu an khuangcherbo hmak thin a. Chumi avang chuan, a ram chhung chu hlauhnain, tuipui fawn ang maiin a sawi hlup hlup a. A chanchin an hre satliah a ni mai lo va, mi sawmli chuangin an nunna an chan phah a. Tualthattu chuan a mithahte reng reng tuma hmuh theih loh turin, ramhnuaiah chuan a thehthang fai leng mai zel a. Mi bo tam takte chanchin chu, hriat zui tur a awm ta lo va. American mipuite chu hlau leh thlabarin an khur a, tri tri phang phangin an nun an hman phah hial a.
Auguste Delagrange a chu, United States khaw pakhat Louisiana khaw daifema hmun pakhat, Farm-house rauhsan tawh, miin an tlawhpawh vak lohah chuan, a ruk thei ang bera khawsain bu a khuar a. He Farm chhunga Delagrange-a bihrukna thlam hi, kawngpui atang pawhin mel- 26 chuang dawn laia hla a ni a, a fal tha nelh nawlh hle a ni.
In leh khua atanga mihring tei chhuak thin, ram kal te, luia kal te, sapela chhuak te, farm-a kal thin te, khualzin te, kawnga kalte,ldt., chu chin hriat lohin an bo hmin der zel a. Mi bote chu an chanchin leh chinchang, thawm riva hriat tur leh hmuh tur awm ngai lovin an bo hmak zel a. Tuia tla hlum turin, luiah an ruang hmuh a ni ngai lo va, ramsa seh hlum turin, an taksa them emaw hmuh tur lah a awm ngai hek lo va. Chumi a nih avang chuan, thuneitu lamte pawhin a ngaihna an hre lo vin, hmalak zui dan tur ber pawh an hre thei lo va. A nihna takah chuan, chung mibote reng reng chu, boruakah an thamral a ni ber mai.
Tum khat chu, he farm awmnaah hian pa pakhat a kal a, a kal hnu atangin a awmna chin hriat lohin a bo pil leh ta hmak a. A hnu feah, a taksa chu hmuh chhuah niin, hrei hriam tak hmanga a taksa cheh bun nuaih maiin hmuh a ni a. Chumi hnuah vek chuan, pa pakhat bo ve lehin, a ngai tein a hmaa ruang an chhar tawh ang bawkin hmuh a ni ve leh a. Mihring thihna leh tualthana chi hrang, vawi-sawmli(40) chuanga inhnamhnawih leh, mawhphurtua ngaih a ni.
Hepa pawh hi, hrei hriam tak hmanga cheh bun a ni tih hriat takin, a taksa bung thenkhat chu chhar a ni ve leh a. Chuti chuan, mihring taksa bung chu hmuh a ni ta nual a, chung taksa bung rem rum mai te chu, hrei hriam taka cheh bun an ni hlawm vek a. Tualthattu hian a mithahte reng reng chu, tunge an nih tih hriat theih loh turin, satalhna hmuna sa sah sawm ang maiin an taksa chu a sat/chan fai vek zel a. Chu vang chuan, taksa bung an hmuhte chu tu taksa ber nge a nih tih pawh, hriat chhuah hleih theih an ni tawh lo a ni.
Chuta trang chuan, tualthattu chu, chu hmunah ngei chuan a chengin, a biru a ni tih hriat a ni ta a ni. Chuti chuan, he hmuna lo cheng reng Auguste Delagrange-a chuan, a mi thahte thisen chu lo dawtin, chawah a lo ring thin a ni mahna. A suahsual rawngbawlna hmun hi, tarlan tawh angin Louisiana khawpera awm, khaw lian lo tak a ni a. Chu laia chengte leh mi thenkhat, teithawleng leh inti thawveng tura ram chhuakte chu, engkhaw sawi set set lo vin, ramsa pel ang maiin a lo seh ta chat chat mai thin a ni.
Chuti chuan, tualthattu nikhualo tak mai chu, a lu laksak ngei tumin an veh let ve ta thung a. Roman Catholic Puithiam(priest) leh, aikaihthiam/dawithiam te chuan beiha thah chu an tum ta a. A awmna Farm-House chu an pan ve ta tham tham a, hlawhchham an tum lo kher mai. Puithiam leh aikaihthiam chuan, mi thisendawt thintu Auguste Delagrange chu thah ngei tumin, a vih hlumna tur thing hmawr zum sa an keng tel bawk a.
Aikaihthiam chuan a thiam thil hmangin, Delagrange-a chu awmze nei takin a han bei ta a. Chuti chuan, harsa lutuk lo, awlsam viau bawk si lovin, Auguste Delagrange a chu an that ta a. An thing hmawr zum sa ken chuan, Delagrange-a lung(heart) vei lamah chuan engkhaw sawi lovin, an chiu lut ta thawih a. A lunga an vih zawt takah chuan, rei dam lovin a phu tawk leh a chan tawk chu, pekin a lo awm ve ta a ni. Delagrange-a chuan chak viau lo mah se, khawvel chu a lo chhuahsan ve ta a.
Chuti chuan, loh theih lohin a thlarau chu a thlah liam ve ta a. Pialral khaw kawngkhar kik dawt dawt turin, Puithiam leh Aikaihthiam chuan an tir liam ve ta a ni. Pialral kawtchhuaha pu Pawla hnenah, a thiamthu sawi ve a ngai ngei dawn a, engtin tak han insawifel ve ang maw le!
Auguste Delagrange an thah taka 'Lung(heart)' chu, trawih thei lo tura siamin vawn that a ni ta a. Oak thing atanga siam, Thingrem te 5 inches a sang, 8 inches a zau leh, 11 inches a seiah dah that a ni a. Kum 1912 kum daih ami tawh chu, trawih thei lo va siamin, vawn that a la ni reng a. An dah that kum ngaihtuahin, tun thlenga tha taka a lo la awm reng mai chu, 'thil mak tak' a ni tiin, kan sawisak thei ang chu!
3. THE VENETIAN VAMPIRE:
Italy rama Venice khawpui hmarchhak lam a, thliarkar lian lo tak Lazzaretto Nuovo hmun a, a huhova mitthi phumna(mass grave)ah, hmeichhe pakhat leirawhchan hmang a, a ka hnawhsak luruhro chu hmuhchhuah a ni.
Kum zabi 16-na liam taah khan, Europe ramah hripui a leng chiam a, chu hripui leng chiam chu, 'Venetian Plague- Black Death' an ti a. Kum 1575-6 ah leng chiamin, mihring nunna 50,000 chuang teh meuh a la a. Chung mitthite chu a huhoin, hmun/thlan khatah an phum khawm thin a. Italy ram khawpui Venice huamchhungah ringawt pawh mi, 1,500 chuang an thi a, nitin mi za chuang an thi ziah ang a ni. Venetian hripui hian, lenna ram bik emaw hrut bik khua emaw a nei bawk a. He hripui lo darh chiamna leh, he hri lenna bulpui berah hian, Vampire te vang a nih an ring a. A maka maka tam an thi a, a rapthlakthlak em em mai a ni.
Chuti chuan, Venice khawpui atanga mel 2 chauha hla, thliarkar lian lo tak- Lazzaretto Nuovo hmunah chuan, hripui avanga thite chu an phum khawm a. Chumi hmuna mitthite an phum khawmna thlan chu an hai hawng ta a, ruhro zinga luruh pakhatah chuan, leirawhchan hmanga a ka hnawhsak an hmu ta nawlh mai a. Chu luruhro, a ka chhunga leirawhchan an hnawhsak leh, an seh behtir voh mai chu hmeichhia a lo ni a. Engvanga leirawhchana a ka hnawhsak bik nge a nih tih, mithiam ten an zir chiang leh ta a. Venetian hripui avanga mi 50,000 chuang thihna phenah hian, Vampire te an awma ngaih a ni.
Europe ram pumpuia hrileng avanga thi tate thlan, 1300- 1700 teh meuh mai chu, nasa taka rawk leh suasam a ni a. Chutia thlan an haihawna an suasam chiam chu duh tawk mai lovin, mitthite taksa chu nasa taka khawihin, an taksa peng thenkhatte phei chu an thlawn pheng phung hlawm a. Hemi avang hian, nasa takin chu Venetian Plague- Black Death hripui chu a darh zual phah a. Tin, thlan chhunga ruang thenkhatte chu, thi chiang lo leh, a nung chunga phum niin a lang bawk a ni.
Medieval hun lai khan, thih theih lohna(undead) dan pakhat, puithuna thilah rindan mak tak mai chu an nei a. 'Mitthi tawhte taksa khuhna puan(mitthi khuhna puan-shroud)ah chuan, dam reina leh thih harna a awm a. Mitthite ruang titrawihtu ber bacteria chu, mitthite ka atangin a rawn chhuak a. Chu chu, mitthi khuhna puan, an ka zawn ami ngeiah chuan an chambang a, chu lai tak chu ei tur a ni a. Chumi chu an ei a nih chuan, an thih har/theih loh phah ta thin a ni.'
Chu an puithuna atthlak tak chu ringin, mi tam takin a rukin mitthi tawhte thlan chu an hai hawng ta a. Mitthite khuhna puan chu an ka hnawh nan leh, ei takah an nei ta a[chumi avang chuan, shroud-eater tih an ni]. Chumi hnu chuan khawpui chhung kawtthlerah te an vak chhuak leh thin a, chu chuan nasa lehzualin hripui chu an thehdarh ta a. Phung velh an sawi ang maiin, hripui vei chu an tam ta tulh tulh mai a. Zualzapui vailenhlo an tih ang maiin, mitthi chu an pung ta tulh tulh mai a ni.
Chu vang chuan, mitthi ka atanga hrichhe chambang(bacteria)an hip loh nan tiin, mitthite ka chu an kam kausak ta thin a. An ka atanga hrichhe chhuak, puana a chamban loh nan leh, hip tur an neih loh nan, an ka chu an lo kap parh ta khep khep thin a ni.
Chuti ang chuan, Venice khawpui thliarkar Lazzaretto Nuovo hmun a, hmeichhe ruang pakhat ka(mouth) chu, leirawhchanin an lo kam kau/hnawhsak ni ta berin a lang a nih chu!
..
⏩ Youtube lam a view duh tan...😘
- Henry Lalngurauva [@Ngurtea Tzo]
************************
Comments
Post a Comment