Lawng Hrang 'Young Teazer'

           Lawngpui lian tak tak;kum tam liam taa chetsual leh chhiattawh avanga bilbo ta;mahse, tun tlaikhawhnua rawn inlar leh tlat te chanchin hi sawitur a awm nawk awm e. Ghost ship chanchin ah chuan The Caleuche lawng te, Baychimo lawng te, Eliza Battle lawng te leh Flying Dutchman te hi hriat lar pawl an ni a, chutih rualin he, Young Teazer lawng pawh hi hmaih phal chi a ni lovang.

Kum 1813 khan Young Teazer lawng hi hman theih tura tukzawh a ni a. Puanzar lawng kan tih ang chi kha a ni. Ton 124-a rit niin, a dung ft 60 laia sei a ni nghe nghe a. Mimal sumdawnna lawng a ni a, a neitu chu, America mi hausa Samuel Adams-a a ni.

British vaukam hnaih velah sumdawng in a veivak thin a, a chawlhna hmunpui ber chu New York-ah a awm a. He Young Teazer lawng hi, lawng chak tak mai ani a, phalna neilo a sumdawng thin anih avangin an um fo mai a; mahse, umphak a harin a relhru thiam hle a, a umtute an lo hlawhchham fo tawh bawk a ni.

Kum 1813, June khan, he 'Young Teazer' lawng bawk hi, Nova Scotian lawngin, Brig. Sir. John Sherbrooke-a ho te chuan an um leh chiam mai a, mahse an umpha ngang lova, chhum zing chhahmup karah Young Teazer lawng chu a relhru leh ta daih mai a. Mahse HMS Orpheus leh HMS Hogue an tih mai; indona lawng laipui pawh 74 zet nei te chuan an um ve leh ta thung a, Mahone Bay-ah umlutin chulai hmunah chuan tlanchhuahna kawng dang awmmaplo khawpin an hualbet ta tlat a ni.

Young Teazer lawng chu an hualbeh tak avangin a ding ta ruau ri gawt mai a, chutih lai chuan amah hualbettu te chuan Young Teazer lawng chu luhchhuah a, a chhunga chuangte chu man fai phiar an tum a. Mahse chutih laitak chuan Young Teazer lawng ropui leh țha zet mai chu, thawklehkhatah a puak darh ta vek mai a ni.

Lawnga chuam mi 37 zingah mi 7 chiah an damkhawchhuak a, damchhuak zingah lawng Captain. Frederick Johnson pawh vanneihthlak takin a tel ve hlauh mai a, mahse manzui nghal a ni a, intiamkamna neihtira chhuah a ni leh ta a ni. Young Teazer lawng chu a puakdarh hneh ngang mai a, Lawng mi(crew) thi ta te pawh tutenge an nih tih hriathran a har hle mai a, chuvangin Mahone Bay a Anglican kohhran thlanmual ah an phum khawm ta vek mai a ni. Young Teazer puahnachhan hi damchhuak tate sawi danin, HMS Orpheus leh HMS Hogue lawng atanga rawn luhchilh tumtu ten lawng chu an rawn thlen hma deuhin, Young Teazer lawngmi pakhat chu meichher nen an silai zen dahna pindan ah a tlan lut lai an hmuh a, chu lawngmi chuan Young Teazer lawng chu, a hal puak ta niah an ring hlawm a ni.

Young Teazer pilbo hnu, a kum leh June ni 27 atang chuan Mahone Bay a mi cheng te chuan Young Teazer lawng thla inlar chu an hmu tan a, abik takin a puah darh champha alo thlen apiangin a rawn lang ta ziah mai thin a ni. An hmuh dan thin chu vaukam lam a rawn pan a, tichuan vawilehkhat ah a alh eng hluah a, tichuan a bo leh daih mai thin a ni, an ti. Tin, zanah a inlar deuh bik thin a, khualzin veivak lawng atang te pawhin hmuh a ni fo thin a. Ahmutute sawi danin an chuanna lawng hi su mai tur angin a rawn pan hnai ruau ruau a,a rawn su dawn tep tih ah, a ral leh mai thin ani. A tlangpui in thla bial zan chhum zin deuh zan hian an hmu tlangpui thin a ni.

Hetiang chanchin hi sawitur a tam viau mai, film-ahte pawh Ghost Ship filmte hian thlirtu a ngah thin fu a ni. Keini thlirna tlang atang chuan 'ramhuai hnathawh a ni,'tih loh atan chuan thil uiawm tak a ni. Mahse hetiang lam ngaihvena zirchiang tute hmuhna tarmit a tang chuan 'thilmak chhuichhuah theihloh,'zingah pawh an senglut ngeiin a rinawm. Sapho pawh hian hetiang chanchin hi an ngaihven ve thin hle a ni. Mitta hmutu tamtak an awm miau avangin,'Ka awih love,' lo tih tumhran vak pawh hi a ni ber dawn em ni? Tuipui chunga lawng, a khawl pawh la nung vat vat reng, lawngchhung dining room-a ei leh intur peihsa diama inhung teuh, mahse lawnga chuang tumah hmuhtur awm bawk silo te kha, thilmak tak zawng a ni ngei mai.

⏩ Youtube lamah view duh tan...

By 

Andy k Zarzoliana.