'The Blood Flag' Chanchin ngaihnawm

World War II mystery: Khawiah nge Nazi ho flag  roh lutuk kha a bo tak !!?

Indopui pahnihna laia thilmak leh chanchin dangdai deuh hlek te ka rawn post zeuh zeuh ang ka tih tawh kha. Tun tum chu Nazi ho flag roh lutuk mai an flag thianghlim, anmahni tawnga ‘Die Blutfahne’ (The Blood Flag) an tih mai chanchin hi han sawi chho ve thung ila a tha awm e.

A hmasain Nazi ho flag a chhinchhiahna awm kuau mai a mi nazawng ina German sign ti a kan sawi mai ‘Swastika’ hi enge a nih han sawifiah hmasa phawt ila a tha awm e. Swastika hi ‘Gammadion cross’ emaw ‘Cross Cramponnee’ tiiin emaw an sawi bawk thin a. Swastika hi Cross pahnih a laia inkawkalh a ban ve ve 90 degree a in elh kawm a ni a. He chhinchhiahna hian Hindu sakhua leh Buddhism leh Jainism ah te hmun pawimawh tak lahin chhinchhiahna thianghlim anga nghaih a ni nghe nghe a. Neolithic hun lai atang tawh khan khawvel hnam hrang hrang te zingah he chhinchhiahna hi a lar hle a, a bikin India rama sakhaw hrang hrangte zingah hun tha leh vanneihna lam entirna chhinchhiah nan an hmang nasa hle a ni. Swastika tih hi Sanskrit tawng atanga lak ni in a awmzia takah chuan vanneihna emaw hun tha tihna lam sawina a ni a, indopui pahnihna lai khan German Nazi ho khan chhinchhiahna atan rawn hmang chovin tun thleng hian khawthlang lam ram leh khawvel hmun dang amite phei chuan Nazisim chhinchhiahna ang hialah an la ngai nghet tlat zui ta reng a ni. Hitlera’n swastika chhinchhiahna an Nazi party chhinchhiahna atana a rawn thlan nachhan pakhat pawh hi amah kha pa puithu tak mai leh puithuna leh hetiang sakhaw thilmak lam ring a buaipui tlur mai chi a nih vang a ni nghe nghe bawk.

Kum 1923 khan Hitler-a khan German sawrkar rorel lai chu paihthlak a ama Nazi party kha a aiah sawrkara dah a lo tum daih tawh mai a. Ama party  member 35,000 vel awmna chuan Indopui pakhatna lai a German chakloh nachhanah khan an sawrkar dinglai chu an puh tlat mai a. hetiang anih avang hian Germany chu dinhmun sang zawk a dah tumin anmahni ho pawh hian an tum an bei sang in beiseina pawh an nei sang hle mai a. Tichuan Hitler-a leh a party mi leh sa 600 te chuan November ni 9, 1923 khan  Beer Hall a Bavarian Prime Minister thusawi lai chu hneh lak an tum ta a. He hall a mipui awm te pawh hian anmahni chu an lo support hle mai a mahse an hlawhchham ta tlat...

Hemi tum hian Nazi ho mi 3,000 vel chuan an sawrkar hmun pawimawh te chu lak tumin an bei bawk a mahse hei pawh an hlawhchham leh ta. Hemi tum hian Hitler-a hi man a ni in sawrkar laka hel anga puh a ni in a chungthu ngaihtuah a ni a thla kaw chhung zet mai Landsberg prison ah tan tir a ni nghe nghe a. He an inkahna ah hian Nazi party mi leh sa 16 in an thih phah a, anni hi Nazi party tana nunna chan hmasa ber te an ni nghe nghe a. Hitler-a hi tanin atanga chhuah a nih leh hnuah an party flag an thiante hemi tuma thita te thisen kai chu an pe a, tichuan he flag hi Nazi party ho flag serh, an flag thianghlim a lo ni chho ta a, a hmingah ‘Die Blutfahne’ an ti a chu chu ‘The Blood Flag tihna a ni.

He flag hi Nazi party ho hian a roh hle mai a, an thiltih pawimawh ah chuan an hmang zel a, an mi leh sa thi an awm pawhin an kuang khuh nan an hmanga, tin, an party a an officer te pawhin he flag hnuaiah hian rinawmna thutim an tiam kher thin a, an hun pawimawh apiangah an hmang a, an ngaihdan chuan thiltihtheihna power te pawh nei in flag dang te pawh a ti thianghlim thei ni in an ngai bawk a ni. He an flag roh tak mai hi a kengtu bik atan SS member Jakob Grimminger chu an ruat a, tihbo emaw tih chhiat emaw thianglo a ni tawp mai a. He flag hi hun pawimawh a an hman a an lak chuah loh lai chuan Nazi party ho headquarter Munich ami ‘The Brown House’ an tih maiah chuan an dah a, SS sipai in uluk takin an veng thin a ni.

Hetiang khawpa Nazy hovina an flag roh leh an ngaih hlut, bo thiang lova an ngaih hi chin hriat lohvin a bo ta hmak mai le. Khawiah ge a awm a engtinge a awm zui tak zel hi tuman an hre ta tlat lo mai a ni. He flag hi mipui hmaa an phawrh chhuah hnuhnun ber tum chu kum 1944 October ni 18 khan a ni a, hemi tum a an inhmuhkhawmna hi Nazi party mi pawimawh Heinrich Himmler-a huaihawt a ni a, Nazy party a mi pawimah dang Keitel, Guderian, Lammers, Bormann, Fiehler, Schepmann leh Kraus te pawh an tel nghe nghe a, hei bak hi chu mipui hma ah phawrh chhuah leh a awm ta lo a. Indopui pahnihna tawp lampanga  khawpui vel an bomb na ah khan engtin emaw a chhe tel ve ta nge ni anga, an Nazi member tu in emaw lachhuakin hmun him zawkah a lo thukru anga, a thukrutu chu indonaah khan a thi ve leh ta si nge ni ang, lehlampang tangrual pawl sipai zing ami tu in emaw a lo hmu anga, Nazi hovina an thil ngaih hlut leh ngaih ropui em em a ni tih pawh hre chuang lem lovin hriatrengna thil atan ngawi rengin a lo hawn ta mai em ni ang tih hriat a ni ta lo a. Hetiang khawp a Nazi party rohlu leh thil pawimawh hi a bo pil hlen ta hmak mai a, khawvel hian khawiah nge he Blood flag hi a awm tak a, tunah hian khawilaiah emaw tu in emaw a la kawl tha reng angem tih pawh a hre ta lo a ni.

Mak deuh mai chu he ‘Blood Flag’ an lakchhuah apianga mipui hma a kengtu  ber atana an hman Jakob Grimminger-a ber hian khawiah nge he  flag hi a awm tak a, engtik lai atanga bo ta nge a nih tih hi sawi tur mumal reng reng zu han hre hauh lo a mawle. Amah ber lah hi indona ah hian a damkhawchhuak luau lehnghal a, a hnuah phei chuan Munich khawpui a an ‘minor city official’ (Local council member kan tih ang vel hi a ni maithei) a rawn ni chho ve leh a, mahse a thil neih zawng zawng hi thuneituten an man sak vek a, a thih pawhin rethei tak leh engmah neih nei lovin he khawvel hi a chhuahsan nghe nghe a ni....

 

*Source: Listverse