Tawng leh Ramri

 Tûnah hian khawvêlah ṭawng chi hrang 7,117 a awm an ti a; chûng zínga 40% chu ṭawng ral mai thei dinhmuna ding niin an sawi a, Mizo ṭawng pawh hi a tel ve a ni àwm e.  Khawvél mihring zahve vél hian ṭawng chi hrang 23 an hmang niin an sawi. English hmangtu an tam ber a, maktaduai (mtd) 1,268 an ni a; Chinese Mandarin-in a dawt a, mtd 1,120-in an hmang a. Pathumna chu Hindi a ni a, mi mtd 637-in an hmang. Spanish hmangtu mtd 538 leh French hmangtu mtd 277-in an dawt leh a ni.

 Ṭawng hrang hrang hi a rík dàn te, a ran dàn te a inang lo hle. India rama ṭawng ṭhenkhat hmangtute hi chu an ṭawng rang hle mai a; an ṭawng thiam ṭha lo tán chuan hriat hman a ni mang lo. Sâp ṭawng hi thiam vak lo mah ila, kan hre ṭhang a, an ṭawng ran deuh pawhin kan bo lutuk lo deuh. English nula tuái tìr te, duh táwka an han titî erawh chu an hnung lam aṭanga ngaihthlák chuan hriat ka nei tlém hle!

 United Theological College (Bangalore)-a BD kan zir lai khán New Zealand nula pakhat chuan Special Course a rawn zir ve a; a ṭawng chu tû pawhin hriat harsa kan ti vek mai. Kum khat chu Graduate Division Commitee-ah zirlai aiawhin kan awm dùn a. BD zir tùr lákna interview-ah hian zawhna a lo záwt ve ṭhin a; tû mahin a ṭawng kha an hre mûmal lo. Kan hotute chuan an làwm angreng phian a; zawhna pakhat tal lo záwt ziah tùrin an ti ta hial a. Kan zirtîrtu pakhat American mi, Prof. Hunter Mabry-a pawh kha min zirtir hian a ṭawng hi kan hre kim thei ngai lo; American mi ve tho Prof. Theodore Swanson-a leh Prof. W. P. Peery-a te pawhin a ṭawng chu hriat kim harsa an ti ve tho tih an sawi.

 Tute tih dàn takah emaw mahni tawn loh chu sawi tùr hre hek lo i, ‘Cambridge-a ka zir lái kha’ han ti ṭuah hum leh ringawt ṭhin ila. Sam (Hebrew Text) min zirtîrtu Scottist pachal Dr Mackintosh-a chu a ṭawng ring hle a, a sehchilh deuh roh lehnghâl a; a ṭawng hriat kim a harsa angreng hle. Amah pawh a inhre deuh roh a ni ang, min zirtîr zawh hian ka bulah lo kalin, “Ka ṭawng i hre thei em?” min ti ṭhin a; “âw” tiin ka chháng liam ve mai ṭhin.

 Ka supervisor-a term thum ngawt ṭang Prof. Graham Davies chu Irish mi, a ṭawng riãt deuh nak a ni a. Ani chuan ka ṭawng chu mak a lo ti ve deuh a ni ang, ka haw dáwnah chhûn thingpui in tùrin min sáwm a; hun eng emaw chen kan titi hnû chuan kan rama Welsh missionary lo kal chanchin ka sawi kái a; chutah ani chuan, “Uhm, tûnah chuan ka hre thiam ta. I ṭawng ka hriat hian danglam deuhin ka hre ṭhin a; tûnah chuan Welsh-ho English in kái tih ka hre ta,” a ti a. 

 Kei lah Mizoramah pawh hmár khaw thim, zángkhaw bungbut hnan, mahse, Mizo lal fing Khawkûnga khuaa pianga sei lian, Mizo ṭawnga lehkha zir, ram buai hmáa High School kal chhûng zawng pawha English hman mûmal lohna Govt. Mizo High School-a kal ka ni a. Ram buai zár zoa Tezpur Jail-a ka tàn láia English hmang ve ṭan chauh kha ka ni si! Welsh missionary-te kha ralkhatah bák ka hmu ve mang si lo a. Kum 1953 (?) a ni ta àwm e, Hmàrthlang Presbytery Inkhâwmpui chu kan khuaa an nghah ṭumin Pi Puii kha sakawr chunga chuangin a lo kal a; Pi Zaii kha chair-a ṭhuttîrin an rawn zawn thung a; ralkhatah kan lo thlîr ngam ṭáwk kha a ni a.

 Aizáwla lehkha ka zir hnûah Pu Robert-a kha Govt. Mizo High School-a debate ṭumin endiktu ah a ṭang a; ani bákah chuan Pi Teii leh Pi Pári kha ralkhatah kan hmu ve zeuh zeuh chauh a. Kum 1964 khán Pu Lloyd-a hãwng tùr thlahin Govt. Mizo High School thlang kawngpuiah kan lo ding a, kan lo vai liam ve ngei a. Kum 1966 ram buai lái khán Kolasib thlang Réngtekàwna motor a tàn láiin Pu Robert-a te chhûngkhua kha an táng tel ve a; kêin Kolasib-ah an lo chho a. Pastor Thanfiangan zanriah kan ei láiin kan inah a rawn hruai khân kan inchibai a; chu chu kan missionary-te ka hmuh hnaih ber ṭum a ni. Engtin nge English ka hman dàn chu ‘Welsh rawng kái (influence) a nih theih tih ka hre thiam pha lo.

 Mizoram chhim lama Baptist unaute hi London Baptist missionary-te hrin an nih avàngin English mi dik tak hrinah an inngái deuh a ni àwm e; keini lam erawh chu sâp ram ‘tribal’ Welsh-ho hrinah min ngái a ni ang. High School kan kal lái khán chhim lam English lam dàn kha dik deuh bîkin an sawi ṭhin a;  fiamthûin kan innuihzat tawn a. Keinin ‘ṭ’ an hman uar kha nuihzat takah kan neih a; keinin “‘tomato’ pawh ‘ṭawmáṭâw’ in ti a, ‘maitàmtawk’ pawh ‘maiṭàmṭawk’ in ti” kan ti ṭhin. Tuipui ràl hla taka an ṭawng hman lo zir ve lehchhãwngte chu han innuihzat tùr chuang kan awm hauh lo! Chhechhãwnga te vai dàwr an sawi ang deuh kan ni!

 Mahni pianpui ṭawng thiam nâl deuhte bawk hi ṭawng dang an hman pawhin an ṭawng nãl bîk ṭhin. Mizo ṭawng hi a muangin thlûk deuh dulh dulh a tam a. Mizoram Assembly House-a MLA thu sawi te hi ngaihthlák hrehawm khawpa muang ban a tam khawp mai; an hun tiam chhûnga an duh ang sawi zo hman mang lo an ni fur mai! Fiah sia ṭawng ran zir hi a ṭûl hle mai. Pastor leh Kohhran Upate pawh biak inah an ṭawng muang lutuk a nih chuan ninawmah a kal. ATC-a ka thawh lái khán BD Final Year-te hnénah, “Pro Pastor in nih hunah ṭawng muang nghâl ringawt suh ang che u” tiin ka vaukhàn láwk ṭhin.

 Mizo officer-te hi eng ang taka ṭawng thiam nge an nih ka hre lo. English an thiam hle a nih pawhin vai ṭawng (Hindi) thiam nãl hle tel sela. Ramri buai chungchángah Assam sawrkar aiawh officer leh Central lam aṭanga lo kal officer-te nèn inbiak a lo ngái a; chutiangah chuan kan officer-te hi inhnial an thiam táwk em tih keini chuan kan hre pha lo. Vai officer-te hian sâp ṭawng an thiam viau bík lo; an hmang dik nge dik lo ngaihtuah loin an hmang pawp pawp ngam a. Chûngho khing pha ngei tùr chuan Mizo officer-te hi an inbuatsaih a ngái ang. 

 October 29 (Ningani) zînga ka han tho chu ‘video clip’ tâwi tê (minutes 4.57) pakhat hi ka group pakhatah a lo awm a. Ka han en chuan ramria Cachar Police leh Forest department mi duty leh Mizo IR police duty-te inbiakna a ni. Mizoram IR Police-te kha an ṭawng ve mang lo; Assam Police-te khán an hráwk záwk emaw tih mai tùr a ni. Ka lái a lo na hman a; tlàwmah ka la bawk. Mizoram Police-te hian sâp ṭawng an thiam lo a nih pawhin Hindi tal chu thiam hle sela; an thiam hle lo a nih pawhin an thiam chhun tal kha nãl takin hmang thei sela. Assam Police leh Forest Guards hmáa ṭawng thei mûmal loa awm kha a tlàwmthlák tak meuh záwk a ni.

 Cachar, Karimganj leh Tripura nèn hian ramrî-ah kan buaina hi a kal zél rih dáwn a nih hmèl hle. Vai officer-te nèna inbiaknaah hian Mizo officer-te hi dâwih záwkah ṭang suh se. Cachar leh Karimganj nèna kan inrînaah hian fîmkhur a ngái lehzual ang. Vaiho chét dàn hi ngun taka en thlîthlài reng a ngái dáwn a; ramri-a kan police duty-te hian ‘drone’ nei sela; Assam lam chét dàn hi enthlák reng a ṭha ang. Saihapui V-ah khuan Vaiho hi an lo kal fo mai; chûngho lo hmachhawn tùr chuan MPS/MCS/Forest Officer fel leh huaisen tak, vai ṭawng leh sâp ṭawnga inhnial thiam tak dah reng a ṭha ang. Karnataka sawrkar chuan IPS Officer sáng tak hi Forest Department-ah a dah a; chutiang deuh bawk chuan Cachar ramri lamah hian Forest Department mite zîngah MPS/IPS Officer fel tak dah ve ni se a ṭha ang.

 Mizoramah Covid-19 vàngin phék buai avàng hian sawrkarin ramri ngaihthah chuang loin nasa záwkin ṭan la sauh rawh se. Mizoram Police-te duty post-te pawh hi a zahawm lo lutuk. Mâu sah chawp mai mai hman ngái lo tùrin Mizoram sawrkar hian thingzai/thîr/alluminium-in awlsam taka in sak theihna (structure) siam sela; hmanhmawh huna hman tùr puan in ṭha táwk tam tak neih a ngái bawk ang.

 Mizoram Forest Guard-te pawh hi a rang lama silai péka training ṭha táwk neihtír tùr an ni. Assam Forest Guard-in silai an neih chuan keini pawhin Assam Forest Guard neih áia ṭha kan neihtír tùr a ni. Ramri bul hnái khuaa Mizote pawh inring rengin awm sela; silai leh rálthuam dang pawh an neih an ngái ang. Assam Police-te nèn inpawmchilh a ngaih pawha chan ṭha záwk ngei tùrin lo inrálring rawh se.

 Mizoram leh Cachar ramri bul vél hmasâwnna inthlauh dàn hi Israel ram leh Palestinian ram inrina a ang hle. Israel ram chin ramri bul chu kawngpui chu a mâm ṭha ém ém a; Palestinian ram chin  kawng erawh chu chhe tak a ni. Keiniah pawh Assam ram lam kawng a ṭha záwk a; kan lam kawng chu chhe tak a ni. Hetiang ém ém hi chu Mizoram sawrkar hotute tân hian a zahthlák ngawt lo’ng maw? Mizoram sawrkarin ramri bul kawng siam ṭhat hi hna hmasaah nei rawh se.

 Ramri bul tihhmasáwn hi Mizoram sawrkarin hna hmasaah a nei bawk tùr a ni. Saihapui V-a VC House an ti emaw ni chhiatzia an sawi a; bialtu MLA talin MLA Fund aṭangin hna hmasa ah a nei thei dáwn lo’m ni? Mizoram sawrkar pawhin ûmzui vat bawk sela. A bík takin ramri bul hnãi kawngpuite khu Mizoram sawrkarin a rang thei ang berin Assam lam kawngpui áia ṭhain siam vat rawh se. Kár hmasaa kan sawi tawh ang khán Assam-in Mizoram chhûnga kawngpui a rawn siam, a enkawl zui tákte pawh Mizoram sawrkar hian la létin enkawl tawh rawh se. Minister-te hian a khát táwkin ramri bul khuate hi tlawh ṭhin bawk teh se.

 Cachar DC Smti Keerthi Jalli hi Andhra mi, kum 2013-a IAS tling, 14-na a nih avàng hian a chapo deuh a ni ang; chutiang bawkin Karimganj DC Shri Anbamuthan (Tamil) hi Indian Army Officer, Major kái hman, mi firfiak beihnaa a huaisen avànga tangkapui Sena Medal dawng tawh a nih avàng hian invaivung a la chák deuh a ni mahna! Anni pahnih hi Mizo huaisenna temtír hlak an ngái a ni. 

 Saihapui V-ah Cachar DC leh Assam Addl DGP lo kalin Mizoram Police-te dárkár 24 chhûnga an inhnuh dawh loh chuan Assam Police tam táwk nèn lo thawka inkahah an rawn vau tih a ni a; Mizoram Police-te hi eng tikah mah an inhnúk dáwk tawh tùr a ni lo. An inhnûk dáwk a nih chuan Assam Police hian an hmun hi an rawh luah vat ang tih chu ‘ka vaibél’ tih tluka chiang a ni. 

 Vairéngte leh Saihapui V mipui an fakawm hle; Mizo mipui an lamah kan ṭang tlat e.

(Revd CHṬ—31.10.2020)