Ruah sur tir thiam Hatfield

Charles Mallory Hatfiled hi kum 1875 July 15 ah Kansas hmuna Fort Scott ah a lo piang a. Kum 1880 ah an chhungkuain California ah an pem a. A puitlin hnu hian New Home Sewing Machine Company ah a thawk thin  a. 1904 ah Glendale, California ah awmhmun a bengbel ta a ni. Kum 1958 Jan 12 ah a thi.

Hatfield hian ngaihtuahna sêngin Ruah sur tir dan tur hi a chhût vak vak țhin a. Chemical chi hrang hrang chawhpawlhin tam vak lo chu a sur tir thei ta mai a. He a thiam thil hi a lo lâr chho zêl a. Hmun hrang hrangah Ruah surtir turin an chhawr a, pawisa pawh a la lut ta nual reng a ni.

.

A ruah surtir hmang hian Tuikhuah tihkhah te, Khawkhêng tihreh te, Thlai tana tui haw tir te hmangin a hming a chher ta hle a ni.

.

A hlawhtlinna ropui ber mai chu San Diego, California ah a ni.

.

San Diego ah hian tuikhuah lian zet mai, gallon maktaduai 15 zet dawng a awm a. He tuikhuah hi vawikhatmah tui an la dah khat thei lo. Tuikhuahin tui a dawn theih zat hmun thuma țhena hmun khat a tling thei hrâm chauh a ni.

.

San Diego Local Council member te chuan Hatfield chu rawih dan an dap ta a. Member 4 in rawih an duh a, 1 in a duh lo thung.

Hatfield chuan December 1915 khan rorêltute hnênah chuan Morena tuikhuah ah hian tui ka dah khah theih chuan dollar 10,000 min pe ang a, ka tihkhah theih loh chuan engmah ka phût lo vang tiin thutlukna a siam ta a ni.

Roreltute pawhin a thutlukna hi an pawmpui thlap.

.

Kum 1917 January ni 1 ah chuan Hatfield chu a unaupa Joel nen Morena tuikhuah, San Diego ațanga km 60 vela hla ah chuan an awm dun ta ran mai a. A hmasa berah a thiam thil sawngbawlna tur Thing hmangin In, feet 20 a sang an sa a. A chhungah chuan thil hnâwng hip thei, thil chawhpawlhna Thleng lian tak a dah a. Damdawi chawhpawlh hmangin a chham kual vel ta a ni. 

.

January ni 5 a lo thlen chuan tuikhuah chung zawnah Ruah a rawn sur țan ta. January ni 10 a lo thlen meuh chuan chulai ram bial velah chhum a zing a, nitin ruah a sur tluk tluk tawh mai a ni.

San Diego a chengte chuan a sûr bâng thei tawh dawn lo emaw an ti hial. Khawlaiah Tuihawk a luang hum hum a. Rel kawng pawh a chim hial. In tam tak tuiin a len chhe bawk a ni.

.

January ni 26 ah chuan chhum a kiang ta a. Ruah erawh a la sûr reng a. Chumi zan ațang chuan Morena Tuikhuah ah chuan darkar tinin tui chu feet 2 zêlin a sâng ta awk awk mai a ni. Tuikhuah kotlâng inches 5 chauha Tuiin a la chim lo tihin Ruah chu a han ta a ni.

.

He Ruah sur avang hian mi 50 in nunna an chân a. Lei tenau 200 vel chhiain hmun tam takah Kawngpui  a min bawk. Rel service pawh Ni 2 vel a khaihlak a ni. San Diego bul lawka district pakhat tuikhuah Lower Otay Dam chu a tikhat vek a,  sah a ngaih phah hial. Ruah surin a tihchhiat hlut zawng hi US dollar 3.5 million vel a ni.

.

A thutiam a hlen zawh chuan Hatfield chuan Local Council ah hlawh a va dil ta a. Mahse Council chuan kha ruah sûr khan chhiatna nasa tak a thlen bakah Hatfield a sur tir ni lovin Pathian hnathawh a ni an tih tak tlat avangin a hlawh an lo pe duh tlat lo. 

.

Hemi hnu hian Hatfield chuan a thiam thil chu a chhunzawm zel a. A sulhnu lar ber pakhat chu kum 1929 a Haiti rama ram kang nasa lutuk tih reh nana ruah a sur tir kha a ni.

Kum 1938 thleng a thiam thil hi a lantir a. A chhinchhiah dan chuan tenau deuh hlek thlengin vawi 500 vel sulhnu a nei a ni.

.

Kum 1938 ah chuan a hna ngai New Home Sewing Machine Company ah a thawh chhunzawm leh ta a. Vanduaithlak takin an nupa an ințhen zui.

.

Kum 1958 January ni 12 ah a thi a. Glendale, California a Forest Lawn Memorial Thlanmual ah ruah a sur tirna hmanrua zawng zawng nen phûm a ni ta a ni.

⏩ Youtube lam a view duh tan...😘

-Valpuia Leo Chawngthu

...