Pa Kaibuai Thlahrang!!!

Kum 1997 kum kha a ni a,ka pa hian min boral san hma avangin ka nu hovin ka u leh naute nen kan khawsa a,kan unau hi mipa hlir pathum kanni a,ka nu hian nu leh pa nih a fawm thung a, a hah theih hle awm e.

Kan In ah hian mi hrang hrang inleng/incheng hi kan nei ve nual thin a,kan khawharna leh kan harsatna tam tak pawh  anni avang hian chhawkin kan awm tam hle a ni.Tleirawl chhuak hlawt chauh ka la ni a,ka u hi lehkha zirin hmun dangah a awm bawk si , Kan tih leh thawhtheih loh tam takte chu kan inchengte hian minpui fo thin a ni.

Zankhat chu dan pangngai angin kan inchengte pawh an rawn chuangkai leh sap sap tawh a,an zingah chuan Pa Kaia (Kaibuaia) pawh a hun ngaite ah alo thleng ve leh bawk a,Chik tak chuan khami zan khan lo belchiang ila lungngaihna engemaw tak a nei  anih pawhin kan hre ngeiin ka ring a ni.

Kan inlengte chuan engeng emaw sawiin annui leh dar dar thin a,thil chi hrang hrangah an pakai lawr a,anrilru a thu rawn lang ang angte chu an thawhkhawm tlang ni ber hian a hriat a.

Pa Kaia pawh chuan titi siam siam pahin a meizial chu a tan deuh sek a,thu mak pui pui,zan danga a sawi ngai lemlohte chu a sawi chhuak zauh zauh a,ka nu hnenah pawh chuan,"A thi hmasa sa puan a intuam ah aw" te a ti a,ka nu erawh chuan chawtak khukin a khuk pui lemlo,a chhangliam satliah ve mai a ni. Kan ngaihtuah let leh hnu hian khami zan a atawngkam bungruate, a chezia ah te khan a thihna tur alo ziak fel vek tawh awm mange kan ti thin a ni.

Pa kaia chanchin kan hriat leh hmasak ber chu a thi tih a ni ta mai a,amak kanti hle a ni,Khatia,kan In atanga antin darh hnuah khan an inbul a thingkungah chuan a inawkhlum zuita mai niin alang a ni. Kan bul leh a thiante bulah lah engmah thuhnuhnung han hnutchhiah lah a nei silo.

Pa Kaia hi nupui neilovin val senior angreng takin a chhungte bul a khawsa ve naw naw thin,pa zaidam leh chhungte pawisawi hlau ngawih ngawih chi ni hian alang a,chuti tak a Pa Kaia rilru lo ti hrehawm em emtu,a nunna pawh zah zolova lak tir hial tu chu engthil nge tih chu tun thleng hian hriat chhuah a ni ta chuanglo a ni,kan inchengte erawh chuan ngaihdan pakhat chu annei a.Mahse,ansawi chhuak ngai hauh lo thung a ni !!!?

Pa Kaia chuan uitu leh thlahliamtu pawh thahnem fe a nei ve a,ka nu pawh chuan puan a tuam anlo intiam tawh ang chuan atuam ve nghe nghe a. Pa Kaia vuiliam anih hnu ah chuan kan inchengte ho chu anlo lut khawm leh nak nak a. Nizan a an haw hnu lamah  thilmak tak tak leh thawm danglam tak tak an hriat thute chu ansawi hlawm a.

An zing a mi Pa Rama chuan,"Ka muthla fel chiah tih ah hian min rawn kotu awm tlat hian ka hria a,chu pawh U Kaia aw hi ni tlat in ka hria a.Mahse,a reh zui leh mai bakah kannu pawh chuan a hriat ve lemloh avang chuan ka bengchhe ri mai mai ah ka ngai a.

Tichuan,engah vak ngai zui lemlo chuan ka muhil zui ve leh mai bawk a.Min ko thawm avang chuan ka harh leh hlawl mai a,chu aw bawk chuan fiah em em mai hian min rawn ko leh ta a. U Kaia aw ngei ni a ka hriat avang chuan,"Tun ang hunah te enge ni ta ngai,ka rawn tho dawn e" ka ti lung lung a,ka thawmah chuan kannu pawh chu a rawn harh ve nghe nghe a. 

Kawngkhar chu ka va hawnga U kaia hmuh mai tum khan engmah ka hmu ta hauhlo a,amak pawh ka ti hle a,"Khatia uang uanglo khan rawn lut thuai mai teh,ka mut a chhuak a nia" ka la ti lar lar a.Mahse,a reh vung vung mai a,kan piah kawi a street light eng thlarah chuan engemaw phe zeuh hi va hmu ni chuan ka in hria,ka nghah deuh hnu pawh a a rawn lan mai takloh chuan ka luh san leh ta a,ka thil tawn chu mak ka ti tulh² mai a,kannu lah chuan,"i bengchhe ri mai mai aniang,mi tih sak tlat mai a" ati a.

"Amak hle mai !!!,keipawh chutiang deuh chiah chu ka tawng ve lawm" tiin Pa Ruala chuan ti hian athil tawn chu a sawi vee ta a.

Khatia,heta tanga kan tin hnuah khan In eng eng emaw siamin ka la meng erh mai a, ka mut dawn chuan inthiar turin kawmthlang lamah ka chhuk thla a,thla a en deuh ruai avangin eng hranpa la keng lem lova,ka lighter chu ka hmet trek chhek chhek ringawt a.

Zan chu a reh vung vung tawh a,ral lehlam a sava hram lauh lauh pawh chu a fiah viau tawh a,chutia ngawi reng a ka inthiar lai chuan pawn lam,kawngkhar kar atanga ka va hmuh theih maiah chuan engemaw phe vuai niawm tak hi kava hmu a,thawm erawh engmah a awmlo a,engah lem ka ngailo a.Mahse,U Kaia aw chiah mai hian min rawn ko ta thut mai a,ka phu zawk hial a ni.Mahse,kan ngaichang zui deuh a,areh leh tak mai si ah chuan ngaihthat lohna em em pawh nei lovin In lamah chuan ka chho leh ta a.

Kawngkhar ka kan tur chiah hi fiah thawp deuh sat bawk si hian vawihnih ngawt mi rawn ko leh a,ka hawi let vat engmah ka hmu bawk silova,amak ka ti hle mai a,hlauhna erawh ka nei hran lem lo.Mahse,mut hmunah ka ngaihtuah mai mai a,zan lama kan inkawm hova a titi danglam tak takte kha ka hrechhuak a,ani hi tawhsual te hi atawk ta mai emni ang?! tihte chu ka ngaihtuah nauh nauh a,ka lo mihil zui ve ta mai a ni awm e.

Amak kan ti hlawm hle mai a,mahse,tu lemmah kan hrilh hranlo,Khawhar In banah chuan kan inleng ngaite ho chu anlo chiang lut leh tak tak a.An thil hriat mak tak tak chu ansawi leh hlawm a,a thiante pahnihin a awri an hriat zanah chiah chuan amah ni awm tak hmu te pawh anlo awm a ni.Pa kaia thihna chungchangah chuan sawi a awm sep sep a,engemaw zawng tak chuan a thihdan in a zir vak bawk silova mi tih ruk a ni ta a ni.

Kan inlengte an haw hnuah chuan keini pawh chu kan mu zui ve ta mai bawk a.Dik taka sawi chuan ka nu pawh chuan a hlau ru ve deuh hian ka hria a,ka ngaihbel mai mai nge phei chu ka hre lo. 

Zanah chuan ka muhil thei ta reng renglo mai a,ka let ka let a,kan inlengte thusawite chu ka ngaihtuah rauh rauh a,chutih lai tak chuan kan In kawngkhar kalhna chu a tlarirak hian ka hria a,ka kalh nghetlo a niang,tiin va kalh that mai chu ka tum hman a;Mahse,hlauhna chu alo thleng thut niin ka hria,ka hlau ta tlat mai a,ka tim ru er er a,mut hmunah chuan ka thaw dep dep ngam chauh a ni ta.

Chutah le! Tuemaw chu an rawn lut ngei niin a hriat chhuat lai chu a rap chik tiar tiar a,Choka chhingah chuan a veikual vel ni berin a hriat a. Ka hlau lutuk chu ka khuasik ta hian ka hria,au chhuak vakte chu duh mahila ka ngam thlawt tawhlo a ni.

Ka nu chuan min rawn ko lau lauh a,chutia thawm a awm takah chuan choka lam thawm pawh chu a reh ta  hmak mai a,ka nu ka va chhan chuan,"Nangmah a nilo emni,choka lam a awm kha" arawn ti a.

Chuveleh,choka lamah chuan thawm chu a intan leh ta a,chhuatlai ah chuan a tlan hian a tlan kual ta tul tul mai niin kan hria,ka nu nen chuan kan tawngzui ngam tawhlo.

Kan bungbelte chu antla ri rum mai a,chumai a nilo,kan dawhkan leh thuthlengte chu a siksawi kual vel nge a ri rum rum reng mai a,a thawm chu na tak a ni.

Reife mai chutiang thawm kan hriat hnuah chuan a reh ve leh mai a,khua pawh a var zui nghal a ni,ka nu nen chuan chhinkhat pawh ka chhing leh tawh miahlo a ni.

Zingah chuan kan choka vel chu eng ang takin sawisa kual vel ang maw?! Kan tih ruk  neuh neuh laiin engmah han diklo hmuh tur a awm miahlo a,kawngkhar pawh chhunglamah alo in kalh tha thlap a ni.Mak leh em em mai bawk chu khati khawp thawm bengchheng leh ri rum rum mai,zan reh ah lehnghal si kha,kan thenawmte pawhin an hre miahlo a,ka nau muttui lai pawh kha a harh ve miah chuanglo a ni.Amak kan tiin Zan a kan nufa thum chauha mut chu kan hlau ru deuh tlat tawh mai a,ka putea chuan min riah pui zuita a.Mahse,hei bak hi chu thawm kan hre zui leh lem tawh chuanglo a ni.

Ziaktu : Rinfela pa Ralte

#Thlahrang #Hlauhawm

#Thawnthungaihnawm

***"""