Rulin min chuk tum a ka thil tawn rapthlak!!

Tumloh leh beisei loh dan deuh a kan chung a thil alo thlen tawh lak lawh hi chuan duhdan danin a awm theih tawh lo a,kan dam chhung pawh a kan hmuh leh hriat duh miahloh tawhloh tur tawn leh hriat changte pawh a awmve chawk thin reng a ni.

Engtik ni bawr vel nge ka chiang ngam tawhlo, a kum erawh ka la chiang hle thung,a thla pawh Sept. emaw Nov. emaw a ni ngei ang,buhseng a hun tan chho tawh a ni.

Buh hmawr a êng tan a,Lo bing a neite tan chuan buh ven a hun tan chho viau tawh reng a,keini pawh hemi kum hian a bing a kan neih kum a ni si a,buh lu chuh a liam ve thuai  chu a hun hle tawh a ni.

Thingtlang lamah chuan hna dang em em a leng vak tawhlo,buhseng tur chuan kan inbuatsaih mek tawh hlawm a.Keini chhung pawh a hma lama riahluh thuai chu kan tum a,a bing a neih hi chuan a zuva zawh mai a hlauthawn awm deuh thin a ni.

 Tichuan,riak tur chuan kan inbuatsaih ta a, buhlak em lian a,a leng theihtawk phurin Lo lamah chuan kan inawi lut ta hluau hluau a.

Riak tur kannih avang chuan feh hun ngaiah pawh chhuak hman lovin mi hnu khawiah kan chhuak thei ve chauh a,chawhma her ah kan lo chu kan thleng ve chauh a ni.

Kan buhte chu duhthusama ala hmin loh avang leh bunna hun rei a awm loh avang chuan a hmin deuh deuh chu kan lawr rih a. 

Tlai lamah chuan,keichu zanriah rel turin ka bang hmasa  a,muang chang lovin,zanriah hmeh tur chu ka dap khawm tan ta nghal a. 

Vau lam a kan bal tlar te chu chawh tum chuan tuthulh leh iptepui nen ka chhuak phei ta a ni. 

Chutia,buhvui keu awng sat sat paha ka phei lai chuan ka ke chu thip zawk hian ka hria a,buh kar atang chuan thei leh theilo chuan ka zu bih hram a. Ka rinloh tak maiin Rul hring zerzuar,kut zungpui tiat vel tur hi ka lo rap vial ngawl ngawl mai pek a,chuchuan min chuk ngei ni pawhin ka hria!!

Tumloh deuh mai a,Rul ka hmu phut mai chu ka rap hle a,ka te thawt nghe nghe a ni. Rul hi chu ka ngaina lo ve hrim hrim...!!

"Rulin min chuk ania" tiin ka chhungte chu ka au thuai a,anlo tlankhawm vat a,tih ngaihna vak erawh an hre chuang lem hlei lo a,"A chukna lai zai kak belh a tha anti" tiin, an han zai ngial a,zai na ngam an awm bawk silo,ka ke chu an zai kak zo nganglo a ni.

Mahse,ka beisei loh tak maiin ana ka ti miahlo mai a,In lama haw pawh ka tum hranlo,ngaihtha takin midang pawh chuan an hna ngai an chhunzawm leh ta a,keipawh chuan ka eirawng bawl lai chu chhun zawmin,chumi pah chuan kan vau Sih ah te chuan ka zu inbual leh lawp lawp bawk a.

Chutiang chu nimahse,ka pu ngaih chu a tha zanlova,ani hi a hma kum lamah rultuha bawk hian alo chuk ve tawh a,ani chuan na ati em em mai a ni awm a, chuvanga min ngaihtuah ru deuh chu a ni.

Zan lamahte a na a chhuah takin tiin haw leh zawk mai tur chuan min rawn ta a,ka ke pawh chu ana lemlo a mahse a vung ve hret hret ni chuan ka hria a.

Tichuan,zan thimhlim thet thet ah chuan,maubati siamin thlam atang chuan ka chhuak ta a ni.

Ka kalna tur chu ka ngaihtuah chuan ka huphurh rilru hle mai a.

 Ramhnuai ngaw chhah tak hnuai ah ke na chung a mahni chauh a zan kal chu a chakawm loh em a ni. 13km vel zet thui a ni a,khaw thlen dawn tawite tihloh chu kawngchho hlir ala ni lehnghal  a ni.

Tichuan, ka kal ta sauh sauh a,ka kal hah,thisen lum deuh vang nge,ka ke chu a rawn vung chak sawt ve riau mai a,changel hrui a tawnkhalh atha antih chu hriaiin Changel ka hik a, avunna lai chinah ka tawn khalh zel a,a vun zual nasat tak tak hma a kawngchho chu chhuah hman hram tumin tianghawlin ka kal tauh tauh a.

Zan lah chu a reh vung vung mai a,ka thaw ri huam huam bak chu thawm dang atamlo hle a,hla taka zan sava hram  kuk kuk te chu thawm awm chhunte chu anni mai a. Pathian zarah zan thim hlauhna em em hi ka nei ngailo a,thlarau leh ramhuai tih ang chi phei chu hlauh tur chi ni pawhin ka hrelo... Chu ai mah chuan chu ngaw hnuai thim chhah takah chuan Savawm hmuh thut mai chu ka hlau ber a ni. Savawm tih vel hi chu Tv hian hmu ila atawk  chiah !!

Vanneih thlak takin Savawm hmulo chuan kawngchho chu ka chhuak ta hlawl mai a,ka thaw deuh huai bawk! Ngaw thim chhah lai ka pel tawh bawk a tiin tha pawh ka thlah dul deuh ta a,zawi muangin ka kal ta bauh bauh a,ka ke pawh chu a rit tan tawh hle mai a, chu chuan ke pen pawh ati sak tan tawh bawk a ni.

Khua ka hnaih tawh hle a,thawm pawh a hriat tan viai viai tawh a,chutih lai chuan ruam dam cherh churh,thim chhah tak mai ka lut ve dawn mek a,mak tak maiin ruam ka lut tan tih chuan hlauhna engemaw hian min man ta tlat mai pek a,ka aw te chu alawi khawlo zo vek hian ka hria,ka tim uai uai a,ka hmulthi te chu a ding sung sung mai ni hian ka hria a ni.

Mahni ka inthlamuan chawp mawlh mawlh a,kawngsirah chuan thuchawl luiin meizialte ka han tan kai leh te te a,hlau taksi inti luhlul tak chuan ka thu lui ngal mai a,a hmun boruakte chu a ritin a uap deuh churh hian ka hria,nuam ka ti thei   nganglo a,ka kal leh zawk ta nge nge a ni.

Chu hmun nelawmlo zet mai chu a thim chhah bik em em mai a,dumde an de noh noh a,kopang lamah chuan thingthlavar a de chuaih mai bawk a,thehhneh ang maiin thawm erawh a reh hmak thung si,thlarau engemaw hian chulai hmun chu a uap ngei niin alang a ni.

Hlau em em mahila engmah phei chu ka hmulo a,hmuh tum ka nei pawhin ka hre chuanglo. Mahse,helai hmun hi chuan huai a nei aniange anti thin reng a,thawm mak tak takte an hrefo thin a ni,a boruak reng reng hi a ritin hmun dang aiin a danglam bik riau hian a hriat bawk a ni. 

Helai hmunah hian tunhma in Sih a awm thin a,chumi huai chu anih ring an awm a,tam tak  rindan erawh ah chuan, Tunhma deuh khan helai kawng thlangah hian mipakhat a in awkhlum a,ni engemawzat an zawn hnuah an hmu chauh nghe nghe a,a ruang hi a chhe tawhin hetiang hlau chi tan chuan rapawm tak tur hi a ni tawh awm e. A boral tirh pawh a sawi deuh laih kha a ni sa reng a,chumi thla chu a hrang thin aniang anti bawk a ni.A engapawh chu nise,eng huai leh thla mah ka hmulo hlauh a,ka lawm khawp mai. Engmah tawk lova chu ruam ka pal chhuak thei chu ka thaw deuh huai tak tak hian ka hria.

Ka hlauhnate pawh chu a reh nghal duak a,"Eng ber kha nge ka hlauh ang aw,...ka hlau ve viau kha a nisi a!!" tiin ka kiai sak sak hman a,a chhanna ka hmu rang kher mai...!!!

Tu emaw hian min rawn kuah ta thut mai a,sawi aia nasa hian ka phu awm e...ka rak thawt a chutih pah chuan per dawr mai hi ka tum a. Mahse,ka tang ta tlat mai a,ka che zui theilo min kuah bet tlat mai a,ka han leh hawi a,ka bati êng ah chuan a hmel chu fiahlo deuh ruai hian hnai setsawt ah ka hmu ta phut mai a,ka rap lutuk chu ka rak tuarh tuarh awm e.!!! 

Kar hmasa lawka kan vui liam hnu kan veng Pitar-i kha alo ni reng mai a,ka au ruai ruai a,thei leh theilo in ka tal ve bawk a,a sawt lo ngei mai.!!! ka tha neih ve chhun zawng zawngte pawh chu chawpleh chilh hian an bo zo vekin ka hria,ka zawi hnawk mai a. Pitari lah chuan min nuih zui chui chui in ka hria a. Thlân atanga rawn tho chhuak hlawl ang mai hi a ni a,a rimchhia in,amah chu a dai nguak mai bawk si,a mitkhur chu a tla kuk mai a,thisen neilo tih hriat takin  a da var bui mai a,anuih zawng chuan a ha chu a filh thuau mai hian ka hria.Ka mang hriat ruai tawh a ni ber,ka hrawkah hian engin emaw min hnawh tlat a,ka thaw tha zui thei ta lo a ni...!!!?**

Heti zawng hi ka hriat theih chin chu a ni a.Ka harh chhuah leh meuh chuan In ah ka lo mu reng tawh a ni.

 Ka u khan min ngaihtuah leh deuh siin thlam atang khan minlo um zui tlai khawhnu leh a,thlanmual thlen dawnah nikhawhrelo a ka awm chu min hmu hi alo ni a. 

Ka harh hlawl chu, ka ke chu alo na em em tawh mai a,ka ti che hlei thei tawh tlat lo. A vung luk a,a rit bur mai bawk a. A chukna lai chu a duk chur a,ana ngut ngut mai bawk nen,thli chhem zawngte chuan  anâ thei hial tawhin ka hria a ni; Kha ka thil hmuh rapthlak tak pawh khan rilru a luah tak tak thei meuh lo, ka ke nâ chuan thluak hi aluh ngut ngut a ni ber mai tawh a!!!

Khatia Rulchuk sawngbawl kan tum dan kha tunlai thiamna chuan a hnawl vek a, A chukna lai zai kak belh te,avung tur tawn khalhte hi awmzia a awmloh bakah thil pawi lian a thlen phah thei zawk anti a ni.

He thil ka tawn hnu lawk pawh hian helai bawr velah hian eng engemaw ngaihbel tur ting chuan a thleng zui fo a.Mahse,engati nge helai hmunah kher hian hriattur a awm a,helai hmun hi eng vanga hrang nge anih ang !? tih hi rinthu a han sawi mai tur hria pawh an awmlo a ni.

Ziaktu ; Rinfela pa 

#Fiction

*********02.04.2020.Thur.12:00noon************