Mi danglam bik Uri Geller !!

Tun tum chu mi danglam bik chanchin sawi kan tum dawn a ni. Mitin hian midangte lak atangin danglamna theuh kan nei vek nachungin tuna kan sawi tur hi chu mi pangngai ni tho si danglamna tak nei bik chanchin a ni.

 Amah hi Israel mi niin a hming chu Uri Geller a ni. Kum 1946 December ni 20 a piang a ni.

   Uri Geller hian mak danglam tak maiin a ngaihtuahna ringawt hmangin thil a ti thei tlat mai a ni.Hetianga ngaihtuahna hmanga thiltithei hi Psychic power anti. Kum 1973 khan Uri hi London-ah kalin hetah hian BBC TV show buatsaihtute chuan show pakhat ' Jim Young Show' an neih tir ve a. Chu Show chu TV a an han tihchhuah meuh chuan thil danglam a thleng ta. TV atanga lo thlirtute Ina an bungrua chi hrang hrang Chabi, Chemte, Thirkut leh Fiante chu an kawi kual ta rum mai a. Miten mak an tih em avangin TV show zawh hnu lawk chuan BBC TV Centre chuan Phone hmangin zawhna chhan senloh an dawng zui nghal mawlh mawlh mai a ni.

   Vawi khat leh pawh Norway khawpui Oslo-ah Uri chuan mihringten an ngaihtuahna hmang ringawta thil danglam an tih theih dan leh chutiang thiltihtheihna (power) chu mitin hian kan neih thu a sawi a. Hemi a sawi zawh hnu hian a ngaihtuahna chu sawrbingin Oslo khawpui chanve zeta electric an chhit en chu a thim tir ta thuap mai a. Miten mak an ti ngei mai.

   Tum khat chu a thiante nen hian tuipuiah lawngin an leng kual vel a. Chutia tuipuia an len kual vel lai chuan a thiante chuan fiamthu thawh nan an chuanna lawng lian tak mai chu a tih din theih leh theihloh an inrinsiak a. Chu chona chhan nan chuan Uri Geller chuan a ngaihtuahna chu a han sawrbing (concentrate) leh ta a. Reiloteah an chuanna lawng chu a kal muang ta ruai ruai a, a hnu lawkah lawng khawlpui chu thiin a ding zui ta mai a. Lawnga hnathawktute chuan mak ti taka an lawng khawl an han enfiah meuh chuan a Oil pipe line pakhat chu Oil kal thei lovin a lo inulh kawi a, chu chuan Oil kaltlang tur chu a lo ti tawp vek mai a lo ni.

  Uri Geller hian Poem pakhat 'Mood' tih a phuah ve a. He Poem hi ngaihtuahna hmanga mihring rilruin thil a tihtheih thu a chhamchhuahna a ni. He a poem hi record niin a record disc chu Switzerland-ah phochhuah a ni a. Miten an leia an han play chhuah meuh chuan an inchhunga bungruate chu chhuatah an tla keh rem rum a, a kual thei thei an kawi kawi kual rum mai bawk a ni. Uri Geller-aw (voice) ringawt pawh chuan thil ala ti thei cheu anih chu..A mak danglam hle a ni.

   Uri Geller chanchin hi sawi tur tamtak a awm a. Tarlan sen vek theih pawh a ni lovang.

- Madinga