Khawvel a thilthleng danglam zualte

KHAWVELA THIL THLENG MAK ZUAL DEUH TE:

Thuhma hi han nei thla ve zen ila, tuna ka lakkhawm aia mak leh pui pawh hi a awm thei a....hei hi chu mak ka tih ve deuh ho mai mai an ni a, a ber an ni tih a nilo anih chu. -R.F

1. THE TOXIC LADY : February Ni 19, 1994 khan nu pakhat, Gloria Ramirez chu Riverside General Hospital Emergency Room ah, Advanced Cervical Cancer (Eng natna ber chu niang maw ) avangin hmanhmawh taka dah luh a ni a. Hetih lai hian Ramirez-i hi a na a deuh ruai tawh a. Thawktu lo awm te chuan an thiam ang tawk chuan an han buaipui zung zung a.  Diazepam, midazolam, leh lorazepam te chuan an han chiu phawt a, mahse an thil pek ten awmzia a nei thui loh bakah, a dinhmun chu a hniam chak em avangin....a lung chu Defribrilate (Electric hmanga an shock thin hi, film ah pawh kan hmu ngun ang chu ) an tum ta ngawt a. Chutih hunlai vel chuan thawktu thenkhat chuan Pi Ramirez-i taksa ah chuan thil hnang engemaw ni hi an hmu a, a lu lama awm te pawh chuan, thei (fruit) rim leh purun var rim inpawlh ang deuh hi, a ka atanga rawn nam chhuak in an lo hre ve mek bawk a.  Nurse te zinga pakhat, Suzanne Kane-i chuan Pi Ramirez-i thisen chu test tur atan tiin, syringe hmangin a hip chhuak a...mahse a hip chhuah rual rual chuan Ammonia                     ( https://en.wikipedia.org/wiki/Ammonia ) rim rawn nem chiai chiai chu a hre leh tlat mai bawk a, a syringe chu Medical Resident Julie Gorchynski chu pein...Julie Gorchynski-in syringe a thisen a'n enchian nak chuan...thisen zingah chuan thil sakhat, a eng uk deuh hi an lo awm deuh nuaih nuaih mai tih a zu hmuh chuan mak a ti kher mai. Hetih lai vel tak hian chhan awmang hriat hauhloin Nurse Suzanne Kane chu nikhaw hreloin a let ta tawp mai a, midang Pi Ramirez-i buaipuitu te pawh chu an buai ta noh noh hlawm a. Pi Ramirez-i bul hnai feet 2 vela awm te leh a thisen khawih tute chu nikhaw hreloin an tlufai ta phiarh mai a ni. Tin amah Pi Ramirez-i pawh hi, a hnu darkar tlinglo hretah chuan Kydney Failure (Kal in hna a thawk tawh lo ) avang chuan a boral zui ve nghe nghe.

Hei chauh hi a la ni mai lova, a hnuah pawh heng mite (A lo buaipuitute)  hian natna mak tak tak leh khirh tak tak an vei chhunzawm zat a...ICU a thla hnih dawn dawn awm phah ta te an awm nawk a ni awm e. Vanneih thlak takin tumahin an thihpui ta lem lo a, MAHSE.... Pi Ramirez-i taksa leh thisenah khan eng tak chu awm ni maw?????

2. JAPAN AIRLINE FLIGHT 1628 THILTAWN :

November ni 17, 1986 chawhnu her lamah chuan Japan thlawhna...FLIGHT 1628 an tih chuan Paris atangin Beaujolais Wine (Zu changkang ni hmiang) phurin...Tokya lam panin a thlawk chhuak a. Tlai dar 5:11 a rik meuh chuan Alaska khawchhak (Eastern Alaska) lam van boruakah chuan a leng delh delh tawh a. Mahse thawkleh khatah chu thlawhna khalhtute (Crew) chuan an thlawhna kianga thil lian deuh, thleng (Disk shaped) anga pianhmang nei.... lo thlawk ve reng chu an hmu thut mai a.He thlawhna/Thlengthlawkthei hi, a aia te deuh hlek pahnihin an zui nghe nghe a. Thil ti mak zual tu chu, lei lama controller te pawn, an radar atang chuan he thil lo awm/thlawk ve hi an lo hmu thei tlat mai chu a ni. Minute 50 dawn an sira eng dang ti lem loa a thlawh ve vut vut hnu chuan a kian san ta a, Flight 1628 pawh chu him dam takin a tumna tura ruahman lawkah chuan a tum thei hlauh a. Hetia an trum fel hnu hian he thlawhna khalhtu Captain K. Terauchi chu thu an zawt fiah nghal var a..... a hlau lutuk nge..tu'n va hre tawh bik suh..engdang sawi hlei thei lo chuan a awm ren rawn a. Mahse a hnu deuhah," Kha thil kha thlawh bosan/tlansan kha kan tum ber kha a nia, mahse min zui reng ani" tih te chu a rawn sawi chhuak a ni awm e.

UFO Sightings an tih te chu report sang sing chuang a lut tawh in, sawi leh youtube ah ringawt pawh post tam tham fe chu a awm naa, hetianga RADAR in a lo detect a, lei lama Controller te thleng thlengin anlo hmu hi a mak ve mai mai ka ti a....UFO hi an lo awm tak tak emawni le???? Tun hnaiah lah, "van thengrengah khian nunna dang a awm a ni tih an hmuchhuak" tih thuthang vel a ri chiam reng mai bawk nen.

3. THE HUM :

Hmanni deuh lawk mai kha ani awm e a...khawvel hmun hrang hranga mi tam takin ri mak deuh an hriat thu an sawi vel Youtube ah pawh a rawn lar hluai kha hria inlo awm ve ngei anga. Mahse khatiang an hriat zinga chiang deuh ber leh belhfakawm (?) deuh ber ni a ngaih theih chu kum 2011 nipui lai vela Kiev, Ukraine a an hriat kha a ni awm e. An sawi dan chuan he RI (Sound) hi ri hniam te/zawite in a ri a, mahse tawp tih reng awm lovin a ri char char a, zai mi ten "humming" an tih ang deuh hi a ang ber awm e. He thil hi a hre thei an awm a, hre theilo an awm bawk a...a hre thei te chuan luvilh nguih khawpa ninawm leh hriat hrehawm ani an ti ve mauh bawk a....rei tak beng kiu ngar ngar ang deuh a ni ber ang chu..ninawm ve viau ang...,he ri hi khawia atanga lo chhuak nge tih an hre thei hauhloa, van lama atang lo ri nge, lei chhungril atanga lo ri chhuak tih an hre thei miahlo anih chu. Scientist te emaw hetiang lam thiam bik te pawh hian an chhui zui nasa ve awm sia...a rawn rik chhuahna han hriat theih miahloh chu....mak ve mai mai.

4. DYATLOV PASS INCIDENT :

Kum 1959 a USSR a thil thleng kha a ni a. Hetih lai hi chuan, tuna Russia khi USSR anla nih thin kha. Hemi kum January thla hian, mi 11 - Ski Instructor, engineer pathum leh zirlai (?) pasarih te chu, Northern Urals  (tlang dung sei fahran mai) a Ottorten Mountain Range an tihah chuan vura tleng leh chetzia vel han zir tumin an fehchhuak a. Mahse an chhuah hnu lawk atang hian an chinchang hriat zui theih miahlohin an reh ta hmiah mai a, anmahni zawnzui hna pawh ngawrh taka thawh nghal a ni. Mahse an hmu mai biklo a, an chhuah atanga thla khat liam hnu February ni 26 ah chuan an inbenbelna/riahbuk an sualna ni ngei mai chu an han hmu ta hram a

Helai an ruang vel an hmuhna ruam hi an zinga hruaitu ber Igor Dyatlov a hming chawiin, DYATLOV PASS an ti ta a, he thil thleng rapthlak tak pawh hi DYATLOV PASS INCIDENT an ti ta a ni.

A chhui chiangtutena an thil hmuchhuah theih langsar deuh te chu : 

1. An puanin awmdan enin, enge maw tak hlauh an neih avang ni hmiang...a chhunglam atangin hmanhmawh bakleng in, an puanin chu tawn pawpin an rawn tlanchhuak.

2. An riahbuk hi tlanchhiatsan an tum nasa hle a, a then te chu vur vawt lutuk pawh pawisa theiloin, ke lawngin an tlanchhuak a ni tih an hre thei bawk.. 

3. An taksa ah te chuan kut thlakna hnuhma ang chi engmah hmuh tur awm lo mahse, an zinga pahnih te luruh chu a keh a, an nakruk a tliak phengphung bawk. 

3.  Soviet sorkar chuan, thil hlauhawm tak, enge anih an chhuichhuah mai theih lohin heng mite hi a tibuai thut a, chu thil (?) avang chuan heng ho hian an nunna an chan phah ta a ni tiin thuchhuak an siam a, thuneituten helai hmun hi tlawhpawh theih loh turin kum thum chhung lai an khar hmiah nghe nghe ani.....Dam khawchhuak an awmloh avangin, he thil thlendan bul leh bal hi engmah hriat chian theih a ni ta lo a. Mahse theory tlem a zawng an neih zinga awmang leh lar ta ber chu...avalanche (Tlanga vur tawlh thu)  rawn thawk thutin a la aniang tih leh Extra terrestrial (Aliens) te nen tumloh ramdaiah an intawng phut anga, an that ta aniang tih te chu an ni.

4. THE MYSTERIOUS CASE OF GIL PEREZ :

Gil Perez-a hi kum zabi 16 na lai vela Filipino Guardia Civil (Filipino...Spain sipaia trang te an ni mai awm e) an tih te zinga member pakhat a ni a, Manila Philipines-a a awmlaia thil thleng a ni nghe nghe. Ni khat chu Governor in venga a duty laiin, han hahdam deuh hlek tum chuan bang chu a ngheng dar dar a. Thil mak tak mai, science fiction aia mak zawk i ti teh ang...chu a chungah chuan a thleng ta ani. Khatia Philipine's Governor in venga, bang nghenga a ding veng veng lai chu thawklehkhatah, engtin emawni hian a awm deuh chuai hian a inhria a. A han harhchhuah meuh chuan,Manila-a, Governor in a venlaia a uniform nen a ngai ngai chuan, km 13684 a hlaa awm, Mexico City a an Mayor te in tual (Plaza) ah chuan a lo awm daih mai a nih chu. Hawihai ve nasa ang chu :)  Engtin nge chulai hmun a thlen dan leh a awmdan pakhatmah a hriat loh a vang leh sawi ngaihna ngang a hriat bik miauloh avang chuan thuneitute pawh chuan han tih dan tur vak an hre biklo aniange...an chhuah zalen ve leh ta tawp mai ani.

5. THE BLOOP :

Hei hi chu a lar angreng viau na a, ka han telh ve leh hram ange. kum 1997 nipui lai tak kha a ni a, National Oceanic and Atmospheric Administration (NOAA) te chuan, tuichhung lam zirna hun an hmang a, a tawi zawngin. Mahse hemi trum hian an hmanrua chuan tuihnuaiah chuan thil ri zawi tak, mahse chak tak a ni tih hriat theih si chu a man fu ta tlat mai a. A thawm rik dan atang chuan Whale hram ri te a pawl dawn dawn avangin, thilnung engemaw tak hram ri a nih an ring ber a. Chu chu researcher tam tak te ngaihdan pawh a ni reng a, an zirchian fe hnuah chuan Biological Origin (Thil nung atang ri lo chhuak)  a neih an ring ta bur mai anih ber chu.

Mahse heta thil mak ta em em mai chu, an thil hriatna hi Mel 3000 chuanga hla ami a ni si a, thilnung hram ri a ni tih an ring bur bawk si nen...blue whale hram ri ah han ngai dawn ta se...an zirchian tawhna atangin bluewhale hram te chu mel 400-500 aia hla atang chuan a hriat phak tawh thin silo a, chuvang chuan he thil ri siam tu hi alo berah Bluewhale ai chuan a let sawm thawthanga a len a ngai dawn tihna a nih chu. Bluewhale te hi an sei zawng hi a tlangpuiin feet 100 te an ni thei a, chuti anih chuan he thil hi feet 1000 chuang a sei a nih a ngai anga, ton 1800 vel chuanga rit a nih a ngai bawk dawn tihna a nih chu. Awle, chuti fakau chu an teh khawng alo nih tak si ah chuan, he ri siamtu hi eng thilnung nge ni ta ang le...Tuifinriat hian khawvel hmun 70% a luah a, chutah chuan 5% vel chauh hi mihring ten kan la dai dar ve thei choh a ni a. Eng emaw tak chu a lo awm ruau thei reng ve tho asin. I ngaih dan chu i ngaihdan ni tawh teh se.