The Setanic Temple

*Tunlai America rama thawm nei nasa mah zawk chu Church of Satan (CS) aiin The Satanic Temple (TST) an tih, Salem (Massachutsetts)-a inkhuarte hi an ni.*



*Khawvel pumah chapchar (branch) an nei a. Detroit khawpuiah an buk hle.*

*Politics leh economics leh khawtlang nuna mihring intluktlanna (egalitarianism) an tan a. Mimal dikna leh chanvo an dah chungnung a, sakhua leh ram danin fa tihtlak leh anpui kawp thuah te mimal zalenna thunun lo se an duh a.*

*Ram rorelnaah eng sakhua emaw intithu bîk lo se an duh a, chhungkua leh zirna inah naupangte chu an duhthlanna kalha eng sakhua emaw bik zirtir loh ni se an duh bawk.*

*Kristian sakhuana-in kan ram rorelnaa sawi a nei thûk bik chu an helh ber a ni.*

*An ep lètna atan, dan hmanga an do bakah, fiamthu ngeiawm leh campaign hrang hrang an hmang thin. Kristian sakhua an elsen nasa ber bawk.*

*TST hian Setana hi sakhaw biakin an be lem lo va, chhia leh tha hriatna dik, rinthu ni lova a taka thil ngaihtuah ngamna leh nunpui ngamna symbol atan Setana an hmang niin an insawi.*

*Mi mal ngaihdana inkaihhruaina leh khawtlang awmphung laka helna entirna atan Setana chu an hmang mai niin an insawi. An sakhaw thurin (tenets) chu hei hi a ni.*

*1. Chhia leh tha hriatna milin thilsiam zawng zawngte chunga ngilneih tur a ni.*

*2. Dan hmanga dikna hi dan leh a hmanna chungah ngei pawh thil tul a nih avangin hlawhtlintir tuma beih reng tur a ni.*

*3. Taksa chungah, taksa neitu ni lo mi dangin thuneihna an lek tur a ni lo.*

*4. Mi dangte zalénna zahsak tur a ni a, mi ngaihdan kalh tura  zalènna pawh zah tho tur a ni.*

*Ngaihdan ni lo pawm hi a tul lo.*

*5.Rinna (belief) hian science thiamna hmanga mihringin khawvel a hriat thiam theihna sang ber a mil tur a ni.*

*Kan rinna mil tura science thudik her danglam lo turin kan inveng tur a ni.*

*6.Tisual thei kan nih avangin tihsual kan neih chuan siam tha leh turin theihtawp kan chhuah ang a, kan pawi khawih pawh kan ching fel ang.*

*7.Kan thurin mal tinte hi kan ngaihtuahna leh thiltiha min kaihruaitu thuthlung a ni a.*

*Kan thuziak leh thusawiah lainatna, finna leh dikna kan lantir thin tur a ni.*

*An sulhhnu hrang hrangte lo en ila:*

*Senate Bill 98-in school hung chhunga zirlaite tawngtai a phalsak a. Eng sakhua nge a sawi lo va.*

*Chuvangin kan TST naupang zirlaite pawh Setana hnenah kan tawngtai ve thei ta.*

*Sorkar chungah kan lawm e.-tiin January 2013-ah thu an chhuah.*

*Westboro Baptist kohhran hotu Pastor Fred Phelps-a chu neih inang inkawpna na taka dotu leh hetiang mi an thiha 'Pathian hremna' tia puhtu a ni a.*

*A thih hnuah, amah elsenna entirnan TST hian a thlanah baptisma lem changin 'Pink Mass' an hmang a.*

*Phelps-a thlarau chu neih inang inkawpna duhtu a lo nih leh theih nan an 'tawngtaisak' a ni.*

*May 2014-ah Harvard University-ah 'Black Mass' hman an tum a. Mahse Roman Catholic dodalna avangin an thulh leh.*

*Hemi kum vek hian Protect The Children Project tih hming puiin, zirna ina naupangte hrem leh vuak leh an duhthlanna kalha sakhaw mal rintir dona beihpui an thlàk.*

*2014 Krismas dawnah, Michigan State Capitol tuala Isua pian lai lem (Nativity) an dah elsèn nan, a sirah 'Snaketivity' an dah a, rul leh Setana Arsi (Pentagram) lem an dah a, Kristianten Isua chu The Greatest Gift of All tia an tarlan ep let nan, "Hriatna (Knowledge) hi Thilpek Ropui ber a ni" tiin an tar ve thung a ni.*

*2015-ah fa tihtlak duh lova pungkhawmte an elsen a. TST chuan an fate chu, "Ka nu kapkàr chungah thu in nei lo. Hail Satan!" tiin an au khumtir a ni.*

*2016-ah Lancaster (Los Angeles Country) Mayor-in, "Kan khawpui hi Kristian khawpui a ni" tia a sawi ep lèt nan, Lancester-ah Setana Biakna (Pentagram Ritual) an buatsaih a. Do lètna a nasat a vangin an hlawhtling vak lo.*

*2016 ah vek hian Zirna ina "Evangelical Union" kan tih ang deuha Kristian zirlaite inpawlkhawmna tlukpui turin, "After School Satan" an buatsaih a.*


https://tlaizawngpar.blogspot.com