St.Catherine House, London

London khawpui Kingsway an tih lai hmunah khuan St.Catherine's House an tih mai In lian zet mai chu nausen lo piang reng rengte, innei reng rengte leh mitthi apiangte an chhinchhiah a,
lehkhabu a an ziah luh vek na hmun a ni a, Pisa lian tak a ni.

British rama an hriattheih chin tawh phawt mai nau piangte, inneite, mitthi te an chhinchhiah fel thlap vek a ni.

Chung lehkhabu chi hrang hrang entu chu nitin mai hian mi engemaw zat hi an awm reng mai bawk a.

Zawnawlna fel tak an siam thlap bawk a, Naupiang chhinchhiahna chu a sen a ni a, innei chu a hring a ni a, Mitthi chu a dum a ni.

Heng lehkhabu chi hrang hrang hi kumtin mi 5,0,000 velin an en ziah a ni an tih chu. Nitin mi 1425 bawr velin chung lehkhabu chu uluk takin an en thin a ni.

Engvanga chung lehkhabu chu en thin nge an nih? A chhan chu Chhûng leh khat in zawn chhuah tumna avang te, an chhungte chin hriat loh zawn chhuah tumna te, an bul leh bal zawn chhuah tumna leh tu emaw mi hausa takte kha an chhungkhat hnai tak an lo ni hlauh ang a, an ro an khawm sak mial thei mahna tih beiseina avangte a ni ber thin.

Chutiang tak chuan lo zawng chhuak fuh palh hlauhte tan chuan awlsam taka hausak theihna a ni tlat a ni.

Chu Pisa rawn dawrtute chu mi mak tak tak, mize hrang hrang lu ti hai tak tak hi an tam mai a, a thawktute tan chuan a luhai thlak hle awm e.

Mi mak tak tak nihna mak tak tak tana rawn inchhalte hi an awm reng mai a.

Vawikhat chu nula pakhat pawh hian "England Lalnu dik tak ka ni e, ka pian leh murna ka rawn zawng chhuak dawn a ni'' a rawn ti hem mai nia.

Nu pakhat ve thung pawh hi thi tawh angin a inngai tlat mai a, "Tuna ka taksa hi chu keimah tak tak ka ni lo.

Kei chu ka thihna a rei tawh a, taksa lem engemaw hmang mai mai ka ni e" tiin a thih hun lai a a rawn zawng pek a, chubakah a thi ngei a ni tih fiahna lehkha (Death Certificate) a rawn dil hem mai nia.

Chuta thawk pakhat chuan "Kan hmu ngai miah lova, a lo thi tak tak pawh a ni mai thei" zu la ti deuh deuh va.

A tir tak chuan he in hi Somerset House ah a awm a, St.Catherine's House an sawn hian lehkhabu 220,000,000 (Vaibelchhe tak hnih leh vaibelchhe hnih) aia tam an sawn phei a ni.

Heng lehkhabute hian mi tute emaw thurochhiahte, thuhretu lehkha ziak leh hming te a vawng fel thlap vek a, chung angte chu kum 120 zet ral ta ami te an ni.

A mipui sakechek na zawng tan chung lehkhabu leh thil chhinchhiahna chu khawih a thiang ve lova, kum tinin thu thar 200,000 (Maktaduai hnih) vel an ziak lut belh reng a.

Chung ang zawng zawng chu rem fel thlap a,dahin mel 9 zet a awh a ni. Chu Pisa dawrtu te chuan an zawn duh lehkhabu kha an sawi a, hna thawktute chuan an lo zawn chhuah sak thin a ni.

Englai mai pawh hian an awl meuh lo a ni. Lehkhabu hlui ho phei chu kut ziak ngat mai, hmanlai lehkhate an la ni hlawm a, chung lo thler palh siam tha tur chuan mi 4 an ruai a, mawng an hung hman mang lo a ni.

Mi tam takte chuan an tum loh leh rin phak loh, beisei phak hauh lohte an rawn hai chhuak hlawl hlawl mai bawk a.

Nu pakhat kum 72 mi zet pawh hian a rawn dawr ve a, a pian leh murna lehkhabu chu a hai ta a, sawn a lo ni reng mai tih a han hriat chuan mak a ti lutuk chu chawp leh chilhin a let tawpa, a thi ta nghal der a ni.

Nula pakhat pawh hian chung lehkhabu chu a rawn hai ve a, Sawn a lo ni reng mai tih a in hriat chuan lehkha chu a pawtthler lawk a, Tuman sawn ka ni tih an fiah thei tawh lovang le" a ti a.

Mahse chu Pisa a an dahte chu a 'Copy chauh an ni a, a thuruk zawng a la awm tha kiau tho mai.

A tirah chuan chung lehkhabu en man chu an siam a. Mahse engemaw hnuah man awm lovin an siam ta a. Chuta chin chu a lun leh zual ta a ni.

Sikul naupang te, America ram atanga khualzin lo kal te hian an en nasa èm èm mai a, America ho chuan laina/chhungkhat zawn chhuah mial an beisei a ni.

Nu thenkhat chuan an makpa turte chu nupui lo nei tawh an ni em tihte, enge an chhungkaw dinhmun, an hausa  tihte an en zut mai bawk.

Kum engemawti chhung chu nu pakhat hi ip ruak khaiin thurochhiah an dahna pindanah chuan a kal nitin mai a.

Pound 14,000,000 zet mai rokhawm tur nei angah a in ngai tlat mai a ni. Chung thurochhiah zinga a dik ber a hai chhuah hun chuan a ip ruakah chuan pawisa chu a thun tawh mai dawn a ni.

Mahse he hmunah hian Rophum ruk a awm lo va, amaherawh chu British rama chhungkaw hming inrochun hming sei ber i hmu thei ang.

Chu chu sapin 'surname' an ti a entirnan John F Kennedy-a 'surname' chu Kennedy hi a ni a. Chutiang ang hming sei ber mai chu hei hi a ni.

"Stanislausiedrzjowski" a ni duah mai. Mizo chuan han ko ve dawn ta ila, a tawp ber hmang hian "KI I" kan tih mai hmel e.

Khawvel ti mai ang, kan khawvel hi a zau hlei deuh hlek thin mai pawh a, hming sei ber mai hmuh tur an awm leh bawk a, chu hming neitu chu hmeichhe naupang West Derbyshire khaw lam mi a ni a, a hming pum kan ti dawn nge a hming zawng zawng bul theuh lakkhawm hi ABC-Z thleng thak zuk nia.Khai aw!! Mi pakhat hmingah chuan a pui ren deuh mai a ni a.

Ann Bertha Cecill a Diana Emily Fanny Gertrude Hyp tia Inez Jane Kate Lonisa Maud Nora Ophelia Penelope Quince Rebecca Starkey Teresa UlysisVenus Winifred Xenophen Yetty Zeus Pepper a ni kawi duah mai a, a tawp ber Pepper hi chu an chhungkaw hming "Surname" a ni.

He Pisa hi an sawn hma hian Somerset House ah a awm kan tih tawh kha Somerset House a an awm lai hian thlahrang 'Pi Buangi' ( The Grey Lady) an tih mai chu kawrfual ha a kal duai duaiin an hmu thin a, pindan leh pindan in kar in kal pawhna Corridor velah te hian a inlar thin a.

Chumi hmun vengtu pakhat hlau lutuk chuan a hna chu a bansan tawp mai a, chuta thawk bawk nu pakhat pawh chuan hmun dang a thawh a dil phah hial mai.

Chu thlahrang chanchin chu Civil Service Union lam hotute pawhin an hre ve a, an report ziah naah pawh an telh ve nghe nghe a "A kalh zawng a hnathawhna" tih thupui a hmangin an report chu Whitehall-ah an thehlut ve  a ni.

Tlaizawng Pâr