Chuap tihfai

Fakna hla chuan, "Take time to be holy, speak oft with thy Lord" a ti a. Hei hi Mizo Kristian Hla Bua lehlin din deuhin, "Thianghlim turin hun (in) pe la, Lalpa pawl fo rawh" tiin let ve hmak teh ang!

Kan thupui erawh, *"Chuap fai turin hun in pe la, meizial zu suh"* tih daih a ni. *'Thianghlim'* tih em êm chu a tul lo ve!

Chuap hi kan taksa peng pawimawh êm êm mai, kan ngaihthah fo a ni a. Kan hmai kan tifaia kan chei peih ang hian kan chuap hi tifain kan duat tur a ni a. Mei khu, bawlhhlawh leh natna hrik hrang hrang chuapah kan hip lut a. Meizial zik that lohzia hre mah ila kan sim thei si lo.

Meizial kan zuk hian chuap sen dâng tha tak mai kha mei khuin kan tidum vek a. Kawng hrang hranga chuap tifai a, chuap atanga tür leh bawlhhlawh kan paih chhuah fo a tul a.

Sawi tawh angin chuap leh taksa tihfaina tha ber chu meizial zůk loh a ni a; a tha ber dawttute chu :

*Green tea :* Zan mut dawnah *green tea* in ṭhin hian chuap leh ril a tifai thei a. Kan in zawh hnu rei vak lo chhung hian intihah lova hahdam taka awm tur a ni.

*Nimbu tui :* Zingah thil ei hmain, tui no lian takah tui lum leh nimbu tui thirfian 4 vel chawhpawlha in ṭhin tur a ni a. Nimbu tui leh tui lun tam lam hi chu kan duh dán a ni mai a, vawi khata in ṭeuh erawh a tul lo.

Lakhuihthei tui emaw cranberry tui emaw pawh a pawi lo.

*Carrot tui:* Tükthuan ei zawh, chhůnráwl fiäk hma si-ah ccarrot tui ml 300 vel in thin a tha a.

Potassium hian taksa leh chuap a tifai thei a. Potassium tamna thei leh thei tui eia in tam tur a ni a. Serthlum, carrot, balhla, spinach, tomato, theipui etc te hian potassium a pai tam a

*Sawhthing:* Sawhthing hian thâwkna dáwt leh chuap tifaiiin tür leh bawlhhlawh a paih chhuak thei a. A hlanga ei loh pawhin sawhthing atanga siam thingpui in thin tur a ni.

Mut dawna lakhuihthei tui emaw cranberry tui emaw in thin a tha hle a.

Tui luma inbual thin a tha a. Eucalyptus oil tui sáa telh a tui hû hip thin a tha bawk a.

Chaw eia pudina hnah ei tel thin a tha a. Zing tin minute 30 vel boruak thianghlim hip luh vang vang thin a tha a. *Yoga breathing exercise* ang deuh hi a ni mai ang chu, yoga practice kher tur tihna a ni lo a nia.

Bawnghnute leh bawnghnute atanga siam thil kan thlah theih loh pawhin ei tlem tur a ni a.

Bawnghnute atanga siam thi ei nasat hian inflammation (na leh vüng), lu ná leh pumpui chak lohna a thlen thei a, thaw hah a tizual thei bawk a

Miin meizial sim mah se, hun rei tak chhung nicotine hnathawh a la chám bâng thei a, thei leh thlai hnah tharlám ei tam tur a ni a. Tuisik in tam tur a ni.

Source : Gilead Thinghnai,
Dr. Lalkhawngaihsanga.

. . . 🌸(Tlaizawng Pâr)