WILBUR WRIGHT LEH ORVILLE WRIGHT

Wilbur Wright :
Tûnlai khawvêla thlawhtheihna ṭangkaizia hi kan hre ṭheuh àwm e. Hmun hla tak tak pawh kár lovah kan thleng zung zung thei ta mai!


Thlawhtheihna ṭangkaizia kan ngaihtuah rual ruala kan theihnghilh theih hauh loh tur chu America rama Wright-a te unau thawhrimna leh inpêkna hi a ni.

Wilbur Wright-a leh Orville Wright-a te hi Milton Wright-a fapa pangate zinga mi an ni a. A ú zâwk Wilbur-a hi kum 1867 April ni 16 khán Millville khaw bul lawkah a piang a, a nau zâwk Orville-a hi kum 1871 August ni 9 khán Dayton khuaah a piang thung a. An pa Milton-a hi puithiam a ni a.

Kum 1878 khán naupang tê an la ni a. Ni khat chu an pa Milton-a chuan thlawhtheihna lem a hawnsak a, chu thlawhtheihna lem chu pawhfân hmanga virin in chung chen a thlâwk chho ve thei reuh a.

Wilbur-a te unau chuan an pa thil hawnsak chu an lâwm êm êm mai a. Chumi entawn chuan a aia lian an siam a, thlawhtir ve an tum ta a. Amaherawhchu, an thlawhtheihna lem chu a len poh leh a thlâwk hniam ta tlat mai, an beisei ang chuan an hlawhtling ta lêm lo va. An duh angin hlawhtling lo mah se, hetiang siam lamah hian an lo tui chho ta zêl a. Kum thum hnuah Retchmund khuaah an pém a. Chuta an awm hnu chuan Orville-a chuan lehkhachaih ṭha tak mai a siam a, a lâr hlê mai a.

Orville Wright
An lo upa ve zêl a, chanchinbu chhuahna turin printing press an din ta a. Orville-a hi kum 17 a tlin phei chuan press changtlung tak an nei tawh a, an chanchinbu chhuah pawh a lârin, sum eng emaw zât a hmuh theih phah a.

Nimahsela, chanchinbu chhuahtu dang an lo tam ta telh tleh a, an ei hmunna ber chu midangin an rawn lân ṭan ta a. Tichuan, an hna chu titàwpin, thirsakawr siam lam an thawk ta zâwk a.

Dayton khuaa thirsakawr siama an buai char char lai hian German mi Otto Lilienthal-a leh Gustav Lilienthal-a te chuan sava thlawh dàn ang deuhva thlawh theih dàn tur ngaihtuahin, enchhinna hlauhawm tak tak an bei ṭhin a.

Wright-a te unau chuan he thû hi an lo hriatin, an beng verh záwng tak mai a ni a. Kum 1896 khan Otto Lilienthal-a chu thlawh a tumnaah a thih phah ta lehnghâl a. He thihna rapthlâk tak hian Wright-a te unau chu a khawihin, anmahni ngeiin thlawhtheihna siam tumin an rilru an pe ta tak tak a.

A tira an thlawhtheihna siam chu sava thlà ang deuh neia, inzâp thei turin an duang a. Carolina-ah kalin, an thil siam chu kengin thlawhtir an han tum sa teh ṭhin a, mahse an hlawhchham a.

Beidawng miah lovin siam dàn chi hrang hrangin an han siam a, ṭha zâwka an rin dàn angin an tidanglam zêl a. Kum 1903 December ni 17 a lo nih meuh chuan Orville-a chu tláng pakhat, King Devil Hill aṭang chuan an thlawhtheihna siam hmang chuan a thlâwk thei ta mai a. Amaherawhchu, a vawikhatna a la ni bawk a, feet 10-a sáng, metre 37-a thui chauh a la thlâwk thei a. Orville-a thlawh hnu hian Wilbur-a pawh a thlâwk ve a, feet 850 laia thui a thlâwk thei ta a.

Hetia an thlawhtheihna siam hmanga an thlâwk hi mi panga-in an lo hmuhpui a, hlim takin chibai an bûk nghe nghe a. Wright-a te unau pawh an lâwm hlê a.

Hlawhtling taka an thlawh theih tâk hnu chuan Wilbur-a chu kum 1903 khan France ramah a kal a, vawi tam tak a thlawhtheihna siam hmangin a thlâwk a, metre 91 laia sáng te pawh a han thleng thei ta hial a.

Amaherawhchu, vânduaithlâk takin kum 1912 khán khawsikpui (typhoid) natna avângin Dayton khuaah a boral ta a. Wilbur-a a boral hnu chuan a nau Orville-a chuan a ú nêna an hna chu amahin a chhunzawm ta a. Ama siam thlawhtheihna hmangin metre 27 laia sángah te a thlâwk thei ta a. Kum 1916 khán thlawhtheihna siamna hmun Wright Aeronautical Laboratory a din ta a. A dam lai ngeiin thlawhtheihna ṭha tak tak leh thlâwk chak tak tak, ri aia chaka thlâwk theite pawh a hmu hman a.

Tichuan, kum 1948 January ni 30 khán Dayton khuaah bawk a boral ve ta a ni.
Wright-a te unau hnathawh hi khawvêlin a ngaisáng êm êm a, an thlawh hmasak ber ṭuma an hman thlawhtheihna chu tûn thlengin Washington D.C. -a National Air and Space Museum-ah an la kawl tha nghe nghe a ni.


https://tlaizawngpar.blogspot.in