THINGTLANG MAS

- Lal PhoeniX . .

Kum 2013 December 21,Inrinni a ni a,tuk dang ang bawkin thlasik boruak thiang tak mai chuan min tuam vawt deuh vur reng a.Krismas anih mai dawn avangin
mi tin mi tang,a pui alian a tè in Masi atana inbuatsaih in mahni duhzawng leh chak zawng ngaihtuah in mahni buai buaiin kan buai nuai nuai mai tawh a,Bazaar nise Khuai bu tawn darh ang maiin chhim leh hmar,chhak leh thlang zawngin an zi mur mur nitin zantin tawh mai a ni,Krismas kan hmuah dan chu engpawhnise hmuah tham, buaipui tham chu a ni na rawh e tiraw maw...!?

Hemi kum zet chu Nu berin Thingtlangah pu te khaw lama hman a rawt mauh mai si,Nia,a ni tak a,hetia pumkhat kan lo nih takah chuan kan la zin miah hlei nem mawle tiin peihlo rilru deuh si hnial hreh bawk si chuan mawi hnai tak chuan ka aw ve kha a ni a,pa tam tak pawhin intih ve tho chu ka ring...kha mi tuma kannu hlim zia kha chu aw!! kan inneih ni ai mah khan a hlim emaw tih mai tur kha a ni a,ka thîk deuh thei tak tak mawle...!!

Mahse,tunhnu a ka ngaihtuah lèt hian kan lo zinlo ang tih ka hlau,makpa thar ta chu min lo duat ngang mai a,tun thleng hian makpa chèt hun te hi ka hai phah fo!!! . 

Thil pakhat in hriat ve atana ka duh em em ka hrilh ang che u,a bikin mipa....Makpa ah hian makpa kawrchung ha chi leh makpa fatu/tufa chi hi awm a ni a,kei pawh khatih lai tak kha chuan makpa suit ha chi kha niin ka in hria,tunah ka nilo tihna ni lovin..! Chuvangin,thlan tur zawk chu hrilh kher che a ngai paw'n ka hrelo!!

Nupui te ngamloh vang pawh nilo chuan pu te khaw lam pan chuan a hmasa berah Sumo in kan in âwi thla tan ta a,an khua hi en ang ngawt a hnai a ni hauh lova,an khua thleng kal tur chuan Motor pathum velah tal insawn kual a ngai ngei ngei a.Khaw lian lo tak tak pahnih paltlang tur kan nei a,a pakhatna chu kan thleng ta.Chuta tang chuan Taxi in khaw pahnihna kan kal leh a,chu khua atang chuan kan ram fan tur chu ka direct parh tawh dawn a ni...

Kan thleng hla tual tual a a reh tual tual mai bawk a,kan tum ram ah hian motor chu a lut ve thei ngei mai! Thlawhna pawn a paltlang chiang !! Mahse,fur lai leh ruah sur deuh chuan thlan bikte chauhlo chu an kal ngai meuh lo a ni.A that lai ve thung chuan scooty leh Auto rickshaw te pawh an kal leh thei lawi si a;Mahse,hemi kan kal tum ah hi chuan chutiang chu thil awm dan tur a nih hmel loh...!!!

Kan motor chuanna tur ka en chuan ka lung a awi chiahlo hle mai,he motor a chuan loh chuan paidal a ni leh ringawt...kan CM pakhat kha chuan tlawmngai tak khan a zawh kawng tluan ngei mai a,mahse,ka peih ve tawp si lo...a bakah kannu lah chuan pumkhat kan nihna par kuhmûm chu a keng kawh lung mai bawk si a. .

Le kan chuanna motor ah chuan thil remchang a piang nen a body khat tun chuan kan han in beng muk ta pût mai a,khawpui lam atang a lokal min tih vang pawh a ni lo vang,ka hmel nûr nung kha an hmuh chian vang a niang a seat lam chu kan nupa chuan min kian a,kan lawm hle a,in ngaihtuah miahlo a chuan mai ka tum hman a ka duh leh lo!!...kannu erawh a bawr teh luah em a,thu ve mai mai rawh se,aia upa ka kian leh ta zawk a,tunthleng a ka hlimna ala ni ve fan nia!!!

Ka ring dik e! Kawng chu duhthusam in alo chhia a,kan insawh chiau leh thet thet thin,Mahse,a drivertupa han thiam dan em em kha aw!! Tokyo vel a a zir a ni ngei ang..bike lah chu khelloin an vei tawn ve reng mai a,an va han khalh thiam hlawm zeih zeih tak...!!! ka pu te khaw ho chu anlo ropui hle mai a,kawng mam tak a tlan ang par par hi anni tlat,rah tur lai leh lai lo te engkim kha an hre hneh tak zet a ni. . 

Khua a thim tan suar suar a,khua chu a vawt vin tàk tawh mai bawk a,thlen thuai thuai chu kan nghakhlel tlang vek awm e.Mak ka tih deuh pakhat, hmanhmawh tawh nak alai chuan khua kan lut tep tawh tih ah chuan Motor chu a ding bu luih a,enga tinge a zolo a mi? nge a chhe zawk? ngaihtuahna dang kan hman hma chuan pa pakhat hi a rawn lawn lut tui tui à,chutah,"A fare la ang aw!!" a rawn ti ta lauh lauh a,Ava han mak laklawh ve le,engvang kher a chulai chho laklawh zet a ding kher nge maw a nih chu le,amak a ni!! avawt tawh ropui si! 

'Meilum' tih ringawt chu ka rilru ah a awm tawh a,hlauh vang ni silo chuan kan khur ru der der tawh mai!!

Lal piang chibai kan bukna hmun tur leilung chu kan rap ta...!! Mahse,Lal lo piang tur kan chibai hma chuan chibai na kan dawng ta char char mài le,kan In thlen hma chuan chibai kan dawng kawng tluan a ni mai,In ah erawh eng eng emaw nen chibai chu kan sem ve ta thung a.Kan in hmu chu leh!! 'Hlimna ni ropui chu a eng' tih hla han au chhuah pui vak vak pawh chu a chakawm na rawh e...!!

Ka châk ang ngei chuan meilum vàm tha hem hawm tak maiin pi berin a lo chhem a,ka beisei sa kha a ni reng a...duhtawk maiin kan hnung puak ar ar mai chu a dam hian ka dam sawng sawng mai nia.khatih lai kha chuan kha aia nuam kha a awm ka ringlo bur..!!!

Kan intih fel fai zawh hnu chuan meilum chu tlem kan ai leh hram a,tichuan le,zanriah chu min han buatsaih sak zung zung a,ril a tam bawk a,phuihnam tlak leh anthur tuilum chauh pawh ka puar pui viau ang ka tih lai chuan Arpui tui lai ngei mai chu an han thet khu ram ram mai ah,chutiang hunah chuan pum hi a ri rawih rawih tawh a,patling in chil kan lem khalh khalh mai nia.Meilum ka ai laia ka ril ti tam raih raih tu ka sawi duh miah siloh rimtui deuh kha a ni chiang....!!

Tichuan,zanriah chu puar èl èuh a kan ei hnu chuan taksa chau deuh bawk nen chumi ni chu kan vuiliam ta rih a.A zàn khatna chu...!

A tukzingah chuan naute ho tui chawi thawm chuan min ti harh thei hram a,zing thingpui chu alo nú vei phàt mai a,mak erawh ka ti lem lo,an in ve thin a ni mai alawm...thenrual lo chuangkai te kawm pahin Kawlbahra chhum nen meilum hnung puak ar ar chungin thingpui chu ka dawt leh zauh zauh thin a,...Tapchhak ah chuan pi chuan kan vawksa rep ken thlak chu a vil sarh sarh mai bawk a,zobuh hmui chuk nen chuan tui leh dawn mange ka ti,ka rilru in.. 

Tichuan,sunday chu inkhawm nan leh chhungkhat thenrualtha te tlawh kual nan hun kan hmang liam leh ta.A zan hnihna chu...

He khua hi khaw nuam ang reng tak mai a ni a,a awmna hmun paw'n a zir,mahse a kal khàn hian a zir ve mawlh silo....Tlangchhip sang tak a awm a ni a,a khua pawh hi a hrisel hle turah ka ngai ngawt a,Ruihtheih thil reng reng a awmlo mai pawh nilo in thenkhat ruih chi phei hi chu a hming tak ngial pawh an la lamri ve awm love,an ngaihtuah loh lam tak a nih hmel si a!!! A mi chengte pawh an felin kawm an nuam hle a,chuvang chu a nia keipawh Inah awm hman lek lova ka tei chhuah reng fo ni...!!

Ka lenna ah chuan han titi pui tur awm ang han sawi chhuah mai tur chu ka rin aiin kalo hre phian zel a,an titi duh tur ang zawng chu ka ring dik ve zel mai,ka tan chuan zawh kha atawk si a!

Thawhtan tlai ka leng haw chu kan In ah chuan anlo ri laih laih a,"Engemaw antih chu le,TV en ho a mawni lui luih le?" ka ti hman a, Nilove,ka nau te luikal chu anlo haw hlawh tling zèk mai a,Chawhtawlh hrawl pui pui ah hian Sangha,Kaikuang, Chakai anlo bun rui mai a,ka sa duh chi hlir lah zuk ni....tih chi mai mai...!!!

Nghahrah ngun tang chen chen chu an thal var phung mai a,ka va ei chak tawh tak....!! Makpa chet a hun ta em ni...!!? . 

Thawhtan tlai chawhlui kan han kil chu a rim tui ram ram teh a sin,a rim ringawt pawh puarkhawp a hmeh tham a ni awm e..Vawksa thing tih vel mai mai...kan ban kan thauh thauh anga a ni mai a lawm...Chakai lah a mak a mak a lian leh tê anni a,an chhep vum hnuk mai bawk si,chawhmeh dang tam bawk nen kut a in daih thlawtlo,hnung lam atang chuan boxing zir emaw min ti tak tak ang...tak tak in...!! Puar theih peng pawng teh e...!!! A zan thumna chu...

A tukzing ni chhuak chuan min lo chhuah chhawng hem ut tawh mai a,chhang deng inthum rawn tlut tlut ri chu Masi inrinni a ka ri hriat hmasak ber a niloh pawhin a dawttu chu a ni bik lawng... 

Thawkthei awm zawng zawng chu an phut suau suau si avang chuan baltin tê zawk chu la in tuikhur lam ka pan thla ve ngawt a.

Tuikawh chu ka rin ang ngawt alo nilo,huh berh phungin ka thlen ve thei hram a,mi zawng zawng aiin ka la hah ber zui...chhang deng ho chu han puih ve ngial ka tum a,ka lo thiam ikhawlo mai,min nuih vak vak a,ka ti hlim tho tho in ka hria a,atha tho ah ka ngai...!!

Chumi tuk atang chuan Zochhang dik tak mai chu siam dan hrang hrang a siam kan ei tan a,pum lam erawh ka ngaihtuah rilru angreng....Zan hun chu Inkhawm leh zaikhawmin hun kan hmang leh a.A zan li na chu...

Lal pian hun pangpàr a vul leh ta,thinlai mu hnu a kai thove,mipui mimir chu kan hlim kan lawm a,kan hawi leh chezia reng hmuh a nuam,naupang atanga tar thleng pawh a kan nghahhlelh em em,kumpui linglet tak meuh a kan lo nghah fàk Krismas kàwl a èng ta sût mai...ava tha in ava nuam èm..!!

Chhûn leh zànin kan inkhawm a kan zaikhawm tluk tluk a,zochhang ruai kan kil ho reng bawk a,khawlai a rui buai tih vel mai mai...inti buai tih angreng vel mai mai hmuh tur an awm ve dèr silo,a pui a pang a lian ate in kan zai tluk tluk reng mai a,a duh an lam a,a duhlo kan thu thung...Lalpa hmangaihna chu a fàwn hian a fàwn hlup hlup a ni ber mai....awm ve ula ropui inti ve ngawt ang...!!!

Zaikhawm lam thahnem kan ngaiin kan chàk tlang vek bawk si,kan ar kan pawh a hmin lawk theilo hial...!! zaikhawm pahin kan vil a,kan la in ei chhawk zui a,Mahse,hlimawm hle in ka hria, hriatreng tlak pawh ka ti..!! 

Tichuan,Lal lo piang-a chu thinlung taka chibai búkin hlim takin kan thlah liam ve leh ta...kan la ngai dawn mange khuarei ah.... A zan nga na chu...

A tukzingah chuan fatu ho chiar nak nak leh Vawk khek ri ruai ruai chuan min ti harh chiang ngei mai,ka tho chhuak thuai a,zing tui kawh ai chuan a nawm zawk ka ring a niang, ran talhna lamah ka chhuak ve ta daih a.Tawng mawilo nilo sela Zing tui kawh leh zing zang kawh hi chu mipa tan chuan ninawm ve pangngai turah ka ngai hmiah nghal..!!**

Tichuan,inkhawm leh zai khawm a nileng a hun kan hman hnu chuan tlaiah Kris MAS eitur in kan kal khawm leh sang sang a,tumah in auh chhuah angai miah lo! . Mite angin ran pui talh le lua lo mah ila,kan phak tawk ah kan hlimlo han tih chi kan nilo chiang khawp mai...!

Sa,Salad,Zo bai dik tak leh Zawngtah thlengin ruai puiah chuan anlo buatsaih a,an va fakawm reuh tehlul em... 

Min va hrai puar lil lel ve le aw,ka rulh let theih ve na tawk ka zài nasa leh mai mai ang chu(h)....

Zan lam ah chuan le!! Keimah anga zai nasat tum kha anlo tam na ngiang a niang chu,kan ri tlut tlut reng mai a,kan tlaivar ta der mai, mahse kan mut a chhuak miahlo!! ava nuam teh lul em...He Krismas hi ka la hman nawm pawl tak a ni awm mange ka ti vawng vawng thin.... A zan rukna chu....

Tichuan,Hlimna niropui chu hlim em em maiin kan thlah liam ta a ni.Kûtpui a tiah meuh chuan kan ngui nghiai hian a hriat a,chumai bak ah khua pawh chuan a vuiliam ve ni ngei tur ani a nguai ruai mai nia...!!