SNIPER CARLOS NORMAN HATHCOCK

Carlos Norman Hathcock II a.k.a "White Feather" hi kum 1942, May ni 20 khan Little Rock khua, Arkansas state-ah a lo piang a. Naupangte anih laiin a nu leh pate an inthen a, chumi hnuah a pi bulah awmin, chhungkaw khawsak harsa takin Arkansas thingtlang khuaah a lo sei lian ve a ni.

Tumkhat chu Mississippi-ah an chhungte tlawhin a zin a, hemi tum hian Mississippi dai ramhnuai velah silai nen sapelin a chhuak a, hemi tuma a zin atang hian silai kah leh ramvah a, sapelhte a tui chho tan ta a ni.

An khua Little Rock, Arkansas a a pi hnena a haw leh hnu pawhin silai kah leh ramvah vel a hrat em em a, sa pawh a kap theiin, an chhungkaw ei bel ber pakhat a lo ni ta a ni. Hathcock a pa hi sipai bang niin, World War I hunlai khan sipaiah tangin, ram leh hmam tan a lo rammu ve zak zak tawh a ni, hei vangte pawh hi aniang, Heathcock hian a tette atangin sipai nih a, United States Marine a inziah luh ve a chak thei em em a. An khaw dai ramhnuaiahte a ui nen, a pain World War II hun laia a silai hman thin .22 caliber J.C. Higgins single shot rifle kengin an chhuak a, a ngaihtuahnain Japanese ral do angah inchanin, sipai nunchan a zir nasa thei hle thin a ni. Sipai, U.S Marine Corps nih a, silai kapthiam chungchuang " Sniper" nih hi a thil chak ber leh a hnathawh chak ber a ni.

Thing delh loh lung delh loh nafam chu, Hathcock-a pawh sipai tan chak taka lo seilianin, a nih duh leh a thil tumah a chiang bawk a, a tan hun tha a lo inhawng ve ta. A kum 17 tlinna champha phak chiah, May ni 20, 1959 ah chuan naupang tein United Marine Corps-ah chuan a inziak lut fel ve thei ta a ni. Hetia U.S. Marines-a a inziah luh hnu reiloteah, kum 1962 November ni 10 khan, kum 20 mi lek niin Jo Winstead nen an innei a, fapa duhawm tak neiin a hmingah Carlos Norman Hathcock III an phuah a ni.

Tichuan tette atanga a nih chak em em, sipaiah pawh khawvel a sipai tha ber pawla ngaih, U.S Marines chu a lo ni ta, mahse a duh ber leh nih chak ber, sniper ni turin chance tha a la nei thei lo. A sipai tan hnu pawh hian Silai inkah siakna hrang hrangah vawiduailo a tel thin a. A hun laia U.S a silai inkahsiakna ropui ber pawla sawi, The Camp Perry leh Wimbledon Cup (tennis Wimbledon Cup hi a ni lo ania, hihihihi) ah te a champion nghe nghe a ni.

Kum 1966 a lo inherchhuah chuan, Hathcock-a pawh chuan Vietnam War a raldo turin Vietnam a pan ve ta a. U.S Marine Corps Captain Eward James Land chuan Marine Platoon tinin sniper pakhat theuh an kawl zel tawh tur a ni tih dan a rawn hman takah chuan, Hathcock tan hun tha a inherchhuak ta a ni. Tichuan Captain Land a chuan Marine silai kahthiam zawng nghalin, Hathcock-a silai kah thiam ziate, kum 1965 a Camp Perry leh Wimbledon Cup-ah pawh a lo champion tawh tihte, silai inkahsiakna hmun hrang hrangah vawi tam lawmman a lo la tawh a ni tih te a han hriat chuan, an platoon a sniper ni tur chuan a ruat ta nghal a ni.

Tichuan, Hathcock-a chuan sniper hna chu thawk tanin indona mualah a thawh hlawk hle mai a. Vietnam War lai khan Hathcock-a hian North Vietnam Army (NVA) leh Viet Cong mi leh sa 93 zet chu confirm kills in a kaphlum a ni. A kahlum zat hi a tlemin, a record hi a ropui viau lo nia a lanna chhan chu, Vietnam War lai hian Sniper te'n hmelma lam an kahin, an thih chian leh chian loh confirm turin spotter te an awm a ngai thin a, mahse sniper zawng zawngin spotter an neih theih si loh avangin an kahhlumte hi an thih leh thih loh an chian zel hman si lo a, hei vang hian Carlos Norman Hathcock pawh hian confirm kills a neih tlem phah a ni an ti.

Mahse, Hathcock-a hian Vietnam War lai rigawt pawh khan, a tlem berah hmelma lam sipai 300 aia tlem lo chu a kaphlum ngei a ni tih a sawi.

Hetiang khawp a sniper hlauhawm leh North Vietnam Army (NVA) te mai pawh ni lo, Viet Cong. mi leh sate tan pawha a hnawksak em avang hian North Vietnam Army (NVA) hotute chuan a lu manah U.S $ 30,000 zet an chhiar a. Hetih hun laia U.S sniper hlauhawm ho hi a tlangpuiin NVA te hian an lu manah $800 atanga $2000 bak an chhiar ngai lova, chuvangin $3000 hial a lumana an chhiar ngam anih chuan Hathcock-a hi a hnawksakin a hlauhawm hle tih chu a hriat theih awm e.

Tin, Hathcock-a hi NVA ho hian hminglem vuah sakin,"Long Trang" an ti a, a sappui tawnga an lehlin naah chuan, "White Feather" an ti a ni. He hming lem an vuahsak chhan pawh, Hathcock-a hian a ramvah lukhumah hian ar/sava chang var hi a thiah ngauh thin vang a ni.

Hun a kal zel, indona a nasa tual tual, NVA lamin American ralsai thiam val, Hathcock an chelh zawh loh vangin NVA an hek malh malh hle chu a ni ber e. Vietnamese sniper te lah chu a lo dahtha hmak hmak zel mai si, NVA Officer ho an mangang ta, post hmasa a Simo Hayha, Soviet sniper team in an veh rawn ang bawk khan veh rawna thah dan an ngaihtuah a. 

Tichuan le, NVA a sniper leh sharpshooter tha tha thlang chhuakin, amah, White Feather that tur Sniper Team an din ta luah mai. Mahse, NVA lam vanduai a kal tluang zel, U.S spy te'n an Sniper team an din tih an hriat veleh Hathcock-a te platoon Commander an hrilhhriat nghal. Chutah le, American val rual thluak thatna a lo lang chhuak ta. Hathcock-a chhanhim nan, a rawn vehtu Vietnamese sniper te lo chawkbuai turin tactic an duang chhuak ta a, he an tactic hman thar tur hi a hlauhawmin, nunna thap tak meuh a ngai thung a ni.

An tactic tharah chuan an platoon a sipai thenkhat chu Hathcock-a anga inchei a, ramhnuai leh indona mual velah NVA sniper te lo chhaih buai turin an chetla anga, chutia an buai lai tak chuan Hathcock-a tak tak chu lo inlarin, a mal te tein, NVA sniper te chu a phil hmak hmak mai dawn a ni.

Tichuan le, an che chhuak ta, an plan a thain an inring tawk bawk a, an hlawhchham lo kher mai, ni hnih leh zan khat chhung lekin NVA sniper team member zawng zawng chu Hathcock-a chuan a phil fai phiar hman a ni.

A ropui ve det a ni...

Heti taka Vietnam War laia Carlos Norman Hathcock a lar tak avang hian NVA lam pawh an zam kher mai.

White Feather hi a chet thatna leh a hmingthan zualna operation tlem lo thailang ila:

Kum 1966, Vietnam War lai vek khan tumkhat chu, NVA Sniper tha zet leh lar zet mai, U.S Marines te tan pawha hnawksak em em mai, a hming tak pawha an koh lan ngam loh,"Cobra" ti chauh a an koh (heihi a chhan chu Cobra hming dik tak an hriat chuan U.S lamin an zawnchhuah a, a ruka amah thattu tur an tirh an hlauh vang a ni) thin chuan inveh a, a chesual zawk zawk inkahhlumah a rawn cho ta tlat mai. Cobra hian Hathcock-a hi a that theih chuan $3000 a hlawh dawn a ni, an hun lai, 1966 velah kha chuan $3000 chu a la hlu khawp ang le.

He an 'duel' hi a fair in, sniper pahnihte hi an han huaisen dun mai mai khawp a. Cobra hian American sniper hi a chozia tih lan nan, U.S Marines te camp awmna Hill 55 an tih hmuna Hathcock-a hnathawk lai chu, a bul seta thingkung ding lai chu a zu kap per chhawk ta mai a.

Hemi tum hian Cobra hian that duh sela chu Hathcock-a hi a inring lo nasa mai si a, a thi chiang viau ang le. Mahse, chutiang chuan NVA sniper huaisen Cobra hian a ti hauh lo.

Hathcock-a hian a chozia a hriat nan Hathcock-a a hnathawk lai chu inveh a, inkahhlumah a cho ngat ngam a ni. Chutah le, American val White Feather a huaisenzia a lang ve leh thung, chutia Cobra in signal nana a hnathawhna bula thingkung a rawn kah per chhawk pawh chuan phili buaiin, bihrukna hmun rem zawnga tlan kual a tum lo, silai ri a hriatna lam chu ngil taka dingin a'n en vang vang a, Cobra a hmuh veleh Cobra rawn chona a pawm tih lantir nan a han bu zauh va, an puan in chhung ah lut nghalin Cobra veh turin a insiam ta chauh a ni, huaisen dun ve rem rem khawp mai, hehehe.....sawi zel ang....

Hathcock-a chuan Cobra cho na changlet turin a thawkchhuak nghal a, a raul hian a thianpa leh a spotter rinawm, John Roland Bruke chuan a zui ve nghal bawk a, intihsiakna, thih leh dam hriltu ni thei bawk chu an tan ta. He an invehna hmun hi U.S Marines ho camp tlang pawng pakhat, tlang lian tak pawh ni lem lo, Hill 55 an tih mai bul ranhnuaiah a ni.

Themthiam leh hrat khawkheng ve ve inveh tawn chu a boruak a sang kher mai, fimkhur pawh an fimkhur dun narawh e.

Theihpatawpin thawm an dim a, an mit,beng,hnar leh an hriatna zawng zawng sawmkhawmin intihsiakna hlauhawm chu bei mekin rampalailengah an inveh kual ta tham tham mai a ni.

Hnim ro, hnah ro leh thing ro an rah tliahte chu an hnuchhuina atana tangkai a ni thei tih hre ve vein, an rahna turah an fimkhur em em a, an bawhvah pawhin inchi 4-5 vel lek lek bak an che sawn ngam lo, khawi lai hmun atang pawhin silai mu an tawng thei a ni tih an hre ve ve tlat. A thawk pawh an thaw tha ngam lo a ni ber e.

Tichuan le, Hathcock-a te thian dun an chesual ta, Hathcock-a spotter leh thianpa ni bawk chuan thawm a chhuah ring ni ngei tur a ni, silai a ri nghal thuai, Hathcock-a khel dinglam a nghing lawih, mahse vanneihthlak lutuk tak maiin Hathcock-a tuipaina um, a khel dinglama a paiah chuan silai mu chuan alo deng fuh hlauh hi a lo ni a, tlema tlemah U.S sniper a fam lo chauh a ni e.

Chutah le, White Feather a thangtlawm ta, a thiamna neih zawng zawng leh tlem belhchhahin (hahahaha) tan a la ta. Hemite pahnih hi chawhma lam dar 10 velah inveh tanin, nileng thakin an inveh tawh a ni.

Second a liam a, minute a liam a, darkar tam a liam zel, turnipui paw'n mual tam a liam ta, tlai ni a lo tlak dawn meuh chuan an tanhmun an inthlakthleng ta tlat mai. Hetah tak hian White Feather a thluak thatzia a lo lang ta, a tir lama tlakdeng lama awm Hatcock chuan a finrawl leh tawnhriat ngahna chhawr tangkaiin, khawthlang (West) lamah awmhmun khuarin an thian dun chuan hnim pik karah an bawk ta ran mai.

Tichuan le, tlakdeng lam, nitla turin a chhun sen phut mai, mual inphah duai lamah chuan Cobra chu hnim pik karah chuan a biru ve thung a. An inkarah hian lui te reuh te a luang a ni. An inchan tawnna pawh a inhlat lo kher mai, pen 300 aia hnaiah chuan an rifle, enlenna (scope) awm ve ve chuan an inzawng dun ta zak zak mai le.

Mahse an awmhmun an siam rem dun atanga rei pawh ni lovah chuan tlakdeng, tlai ni tla turin a chhunna lam hnimpik kara biru mek, NVA sniper chhuantawlawl, huaisen leh ralsai thiam zet mai Cobra chuan a rifle enlenna (scope) bih chunga White Feather a zawnna lamah chuan a chesual ta. A rifle enlenna (scope) a lens chu ni tla tur chuan a rawn chhun tle ta zawk mai a. Chu veleh, vai vawih an sawi aia rang hretin (hahaha), American Marine Sniper ropui chuan tle zeuh awmna lai chu tin zawnin, a rifle chu a hmet puak ta thawr mai. A hmeh puah rual chiah chuan Cobra, hnimpik kara biru chu vawikhat a che dat a, che chhunzawm tur a awm ta lo.

Tichuan, NVA sniper ropui Cobra chu a ram leh hnam humhim nan a fam ta a ni.

An hmelma pa a thi tih an chian hnu chuan Hathcock te thiandun chuan an zu pawh a. An han enchian nak chuan, Hathcock a silai mu chuan, Cobra rifle enlenna (scope) ah tak chuan fuhin, a chhungah a kal tlang a, tichuan scope lo bih mek Cobra mitah tak chuan lut tlang zelin a tukkhumah silai mu chu a chhuak a ni. Chiang ngang ngang khawp mai. Hetiang shot hi a harin, kah fuh a ngai hle mai a, sniping lama mithiamte chuan "one in a million shot" an ti hial a ni. Ka sawifiah thiam ve dan chuan,"Vawi maktaduai khat kahah, hetianga fuhna chance hi vawikhat chiah a awm" ti ila a teuh ve tep ang chu (huhuhuhu).

Tichuan, Hathcock-a chuan Cobra silai chu laksakin, inah hawn a trophy anga tar mawi turin an camp ah chuan a hawn a, mahse vanduaithlak takin armoury a a dah lai chu an lo ruk bo sak ta daih mai a ni.

Mak ve mai mai chu, Hathcock-a hian White Feather tih hming lem a putna chhan, a lukhuma sava/ar hmul/chang a thiah thin chu Vietnam War chhung zawng hian vawikhat chiah a la thla a ni. (Engti fakaua pawimawh nge maw ni, haha)

Vawikhat leh pawh, NVA Commanding General, ralrel thiam zet mai chu dahthat a ngai leh ta tlat mai.

He Operation zet hi chu a hlauhawm ngang a ni ang, Sipai hotute lam pawhin he operation a kal tur hian an naute (Marines) ho pawh ruat ngam lovin Volunteer an zawng zawk hial a ni. Tichuan le, U.S Marine Sniper huaisen, Carlos Norman Hathcock a.k.a "White Feather" a rawn ding chhuak leh ta. He operation hi Hathcock-a hian a thawk ngamin, a pawm thlap a ni tih a sawi chhuah hma chuan, operation details hi sipai hotute hian an hrilh duh lo hial a ni.

(Confidential hmel khawp mai)

Ruahmanna chu a hlawhtlin theih nan a tih a tih a ngai ta. Operation tan a ni, a nikhatnaah chuan NVA ram luah chhung, uluk mangkhenga an ven, an hotu lu ber berte awmna camp ah chuan pen 1500 zet chu bawkvak vekin, santiri te hriatlohin, thawm dim lutuk tak maiin a tawlh lut ta zal zal mai a ni. Hemi tuma operation hlawhtlin nan hian hian ni li leh zan li zet chu, bawkvak, biru leh chaw nghei thakin zu han rammu a maw le.

A hautak turzia chu a hriat theih awm e. Tichuan, zawi muang takzet leh thawm dim thei ang berin a NVA camp area ah chuan a tawlh lut zela, a bula hnai mai feet 10 velah chuan NVA sipai an vei fua fua mai a, inchi khat te te (inch by inch crawling) a bawhvah a ngai a ni. Fimkhur a ngai a ni e. Tumkhat phei chu NVA sipai in a Hathcock-a hi a rap fuh tep nghe nghe a, a camouflaged thawmhnaw hakin a chhanhim hram a ni. Tichuan le, hmelma ramchhung a lut ril tual tual, vawikhat a che sual leh tep mai. Bawkkhup chunga hahchawlh paha hmelma lamte chezia uluk taka a enkual lai chuan, a bul lawkah chuan Bamboo Viper (rul tuha) pakhat chuan chuk tum ni awm fahran hian che lek lo hian a lo en kar mai a. Nimahsela, Hathcocka tan tlatchhiat emaw thah tuma beih zuina hun a awm lo, tichuan, a tih theih awmchhun chu che miah lo leh a position thlak miah lo a rul vah sawn hma chu bawhkhup reng bak tih theih a nei lo a ni. Hlauhawm ve duh reng ang, hihi.....

A hun a thleng ta, duhthusama rema awmhmun a siamfel hnu leh a hna a puitlin hnua a tlanchhuahna tur kawng (escape route) a thlan fel hnu chuan a hna a thawk dawn ta. A bihrukna atanga meter 50 vel lek a hlaa awm, a NVA sipai te a thiam ang anga thahnemngai taka lo fuih mektu, an NVA Commanding Officer chu ni chhuak dang hmu leh ngai tawh lo turin a awmah tak mai chuan White Feather-a silai hmanlai Winchester M70 calibre rifle suan tlang phuhchhuah chuan a deng ta pawp mai. Silai puah rualin NVA Comanding Officer chu a tlu fel der a ni ber e. Tichuan le, NVA sipai hoin an pu ber, an hmuh lai ngei a sniper-in a kaphlum chu an thin a sa ngang mai le. An Camp area leh a chhehvel chu hmelma ralsai thiam, an pu kaphlumtu zawng chuan an tuam ta mup mai. Hathcock tan lah, "Ka hna ka zo ve", tia tlan haw nal nal na chi ni tawh hek lo, a hna thawk tura zawi muang leh fimkhur thei ang bera a bawkvah luh ang bawk chuan a haw lam pawh bawhvak haw a ngai leh ta. A hahthlak a ni e.

He operation hi a hlawhtlin em avang leh NVA Commanding Oficcer meuh an kahhlum sak takah chuan, NVA lam an thinrim hle mai a, an tha tichak thar leh in, a hma aia nasa leh na zawk chuan U.S Marines te chu an bei let ta nghek mai a. An thawh nat em avang hian U.S lam pawhin an tuarin an hek phah hle mai a, thisen a luang nasa em em a ni.

Hemi tuma NVA lam an rawn chet nat em avang hian U.S lam hotu liante, U.S Marines in NVA Commanding Officer thahna operation nei tura thupek an lo chhuah kha an inchhir hle a ni, an ti hial a ni.

Hetianga operation hlawhtling tak Hathcock-a'n a neih zawh hnu hian, Vietnam chhuahsanin U.S lamah kum 1967 khan a haw a, mahse U.S Marines te'n a lung an len ngang ni tur a ni, kum 1969 ah chuan Vietnam ah bawk chuan a thiante zawm turin a kal leh ta a ni. Hemi tumah thung hi chuan U.S Marines Sniper Platoon Commander ah a awm ta thung a ni.

Vietnam War a zo a, Hathcock-a pawh alo dam chho ve zel a, U.S sorkar chuan an sipai te'n sniper an mamawh zia hria in, Marine Corps Sniper School chu U.S Marines base pakhat, Quantico, Virginia, U.S.A ah an din ta a ni.

Hetah pawh hian Hathcock a hi a sulsutu ber pakhat a ni. Tichuan taksa chak lo leh insawiselna neuh neuh nei chung chuan an sniper school dinthar ah chuan a zirtirtu berin a thawk ve ta a. Nimahsela, a hriselna lamin a phak tawh ngang loh avangin, kum 1975 khan Marines atanga a retire alo ngai ta a ni. A retire hian ni 55 in kum 20 chhung U.S Marines ah a awm tling lo a ni. Hemi hnu pawh hian a theih ang tawk tawkin a ram tan ala thawk zel a. 

A theih chang changin police department sniper te training pe in, khawvel sipai hlauhawm bera an sawi thin, U.S Navy SEAL Team Six member tur te pawh an thlan tir hial thin a ni. U.S Navy SEAL Team Six te hi sipai hlauhawm chungchuang leh thiamna hrang hrang nei ngah tak tak, a tul hunah chuan thlawhtheihna pawh khalh mai thei reng tura thiamna famkim nei an ni a. Khawvel misual fing leh hnawksak, luman pawh nei sang ber, U.S sorkarin a zawn nasat ber ni bawk, Osama Bin Laden pawh kha, a in luhchhuah a, kap hlum tu kha hetian Navy SEAL Team Six te hi an ni.

Chutia hrisel lo tak leh insawiselna neuh neuh nei reng chung chuan a chak lo ve tial tial a, kum 1999 February ni 23 khan Virginia Beach, Virginia, U.S.A ah, U.S Marines history a sniper ropui ber, Carlos Norman Hathcock II a.k.a "White Feather" chu chatuana chawl tawh turina lo boral ve ta a ni.

Hathcock hian a vanglai, sniper anga hna a thawh nasat lai khan a tlangpuiin Winchester Model 70 .30-60 rifle, standard 8-power Unertl scope invuah a hmang tam ber a. A chang chuan ralthuam dang, M2 Browning machine gun lian zet mai, ama design ngei a enlenna (scope) 10X Unertl scope ama vuah chawp chu target hla lehzual kah nan a hmang thin a.

Sidearm atan, Colt M1911A1 pistol a ak tel thin bawk. Kum 1967 khan hathcock hian ama machine gun scope vuah chawp, M2 .50 cal Browning Maching gun hmang hian a hunlaia sniper kahhlum hla ber (longest confirm kill) record a siam ngat a, hemi tum hian pen (yard) 2500 (2,286 meter) zet a hlaa awm, Viet-Cong. guerrilla a kaphlum a ni. Pui rem rem khawp mai. He a record hi a ding rei hle a, kum 2002 khan Canadian Sniper Rob Furlong leh a spotter Arron Perry te chuan Afghanistan indonaah khan an break ve chauh a ni.

Hathcock hi a fapa Carlos Norman Hathcock III hian a chhun hle mai a, U.S Marines sniper ropui tha tak ni ve in, Gunnery Sergeant-a a kaisan hnuin, U.S Marine Coprs atangin a retire ve a, tichuan, U.S Marines sniper ropui ho pawl, Board of Governors of the Marines Corps Distinguish Shooters Association ah member a ni ve bawk a ni.

Hathcock-a hian chawimawina medal rigot pawh kg tham lawih a dawng a, chung zinga chawimawina a dawn thenkhat te chu han tarlang ve ila : 

Silver Star ribbon.svg Silver Star.
Purple Heart BAR.svg Purple Heart
Navy and Marine Corps Commendation ribbon.svg Navy Commendation Medal
Navy and Marine Corps Achievement ribbon.svg Achievement Medal
Marine Corps Good Conduct ribbon.svg Good Conduct Medal
National Defense Service Medal ribbon.svg National Defense Service Medal
Vietnam Service Ribbon.svg Vietnam Service Medal
Vietnam gallantry cross-3d.svg Gallantry Cross
Vietnam Campaign Medal Ribbon.png Vietnam Campaign Medal te leh Shooting Competition hrang hranga a lawmman dawn tam tak te erawh kan sawi seng awm lo e.

Sniping chungchanga Hathcock hnen a zawhna an zawh alo chhanna ah chuan," Silai kah leh sapelh hi a nuam ka ti em em a, amaherawh chu ka mihringpui kahhlum erawh hi chu nuam ka ti ngai lo. Ka hna a ni a, kha'ng ka mithah zawng zawngte kha that ta lo ila chu, kei leh Marines lo la awm zel tur te hi min la that zawk dawn si a, chuvang chuan ani ka thah thin ni" a ti a ni.

Hemi chinah hian duhtawk leh phawt ang aw. Tuntum chu a sei deuh hlek na in, Hathcock a ropuina tak tak erawh ka rawn ziakchhuak pha lo nasa hle a ni. 

A sei em avang hian chhiar alo ninawm a nih chuan, next ah chuan tun aia tawi zawk hian Sniper hlauhawm ber pathumna (3rd) chanchin ziah leh kan tum dawn nia.

Picture ami hi Carlos Norman Hathcock II chu a ni.