LEI PIAH RAMAH NUNNA THAR AWM BEISEI

Kristian-ten lei piah lam rama nunna hmuh beiseina kan neih chu `Ni tla ngai lo, kan

chatuan ram hlun tur chu´ a nih laiin scientist-ten nunna awmna lei thar hmuh chhuah an beisei ve erawh chu Ni chhungkua (Solar system) pawn lam hla vak lo, eng kum 39 vela hlaah, Aquarius an tih arsi bawr  huang chhungah a ni a. Tah chuan thilnung awm theihna tur awm khawvel an hmuh chhuah thu 2017 kum tir lam khan an puang chhuak a ni.

Nunna/thil nung awm theihna tur hian tui (water) a awm a ngai a. Tui awm theihna tur tawka ni nena inhnaih planet te chu kan khawvel anpui, nunna awm theihna planet tiin an sawi thin.
.
Aquarius arsi bawr huang chhungah hian planet tam tak hmuh chhuah a lo ni tawh thin na a. Tun tuma an hmuh chhuah hi chu kan Ni chhungkuaah Ni a laiah a awm a, planet 8-in an hel kual ang hian arsi pakhat, kan `Ni (Sun)´ aia a let 12 vela te  chu planet 7-in inhnaih te tein an hel kual ve a ni.(Ni leh arsi hi an inang reng a). He ni/arsi leh a heltu planet 7 te hi TRAPPIST-1 system tiin a hming an vuah a.
.
TRAPPIST-1  planet bawr khawmah nunna a awm an beisena chhan chu-
.
* Planet 7 zinga 3 chu ni an hlat danah nunna awm theihna tawk vel a ni.
.
* Planet pakhat tal chuan boruak tuamtu a nei mial ang. Boruak (thli) an pai chuan thil nung an nei thei tihna a ni mai.
.
* Kan awmna Ni chhungkua ai hian a let laiin a upa a, chuvangin a hmunhmain a zir chuan nunna awm thei tur dinhmunah a ding. Ni chhungkuaa planet bawrho hi kum tluklehdingawn 4 leh a chanve (4.5 billion) vela upa a ni a, TRAPPIST-1 planet bawr chu kum  9 billion ( 5.4 - 9.8 billion) vela upa niin an hria.
.
Kan chenna khawvelah hian thil nungte hi kum 3.8 billion kal ta vel atang khan an lo chawr chhuak tan niin scientist te chuan an ring a. Nunna a awm theih nan a tlem berah kum billion 1 tal chu planet hian boruak/thli a vawn him theih a ngai niin an hria a, hengplanet an hmuh chhuahte zingah hian chutianga vawng thei chu an awm an beisei a ni.
.
Aw le, beiseina chu awm mahse tun hnaia zir chiangtu scientis te chuan TRAPPIST-1 system-a nunna a awm theih leh theih loh thuah hian thu sawi fimkhur hle a ngai, an ti a.
.
A chhan chu he kan khawvelah ngei pawh hian nunna hi kum eng zat kal ta atanga lo chawr chhuak nge a nih hriat chian  a la ni chiah lo. Chubakah,TRAPPIST-1 ah hian en chhinna han nei turin thlen phak a la ni lo.
.
Tin, TRAPPIST-1 planet te an hmuh chhuah dan pawh hi enhlatnaa direct-a hmuh ni lovin planet-te an ni hel kual mi an hliah changa an eng lan dan atanga hmuh chhuah leh zir chian a la ni chauh a. Nunna a awm theih leh theihlo hre chiang tur hian kawng thui tak zawh chu a la ngai phawt mai a ni.

- Sources:

* Wikipedia

*<a href="http://metro.co.uk/2017/12/29/aliens-living-planet-trappist-1-star-system-new-discovery-suggests-7190411/">Metro.co.uk</a>

*<a href="https://www.nasa.gov/feature/jpl/trappist-1-is-older-than-our-solar-system?_e_pi_=7%2CPAGE_ID10%2C2503425659">Metro.co.uk</a>