RULLING MLA-TEN PATHIAN THU AN PÂWNGSUAL!

- Revd Chuauthuama.
.
March 24, 2017 (Zirtâwpni)-a Mizoram Legislative Assembly member țhu khâwm chuan MLPC Act aia MLTP Act hman leh zâwk rawtna an sawi honaah Ruling Party MLA-ten Pathian thu an pâwngsual a ni ber. Khami ni khân ka lèn chhuah avàngin a bul aangin an thusawi kha ka ngaithla hman lo a; chawhnu lamah ka ngaithla hman chauh a ni. Mipui ngaihven a hlawh hle a ni ang, ka lènna lamah pawh WhatsApp-ah “Tûnah an sawi țan dâwn e” tih thu ka dawng nghe nghe a ni. Ruling MLA țhenkhat hi chuan an hotupa ber hi ‘pathian biakin an be ta mai em maw ni chu le’ tih palh mai a awl dâwn alâwm!
.
Uain chungchângah Bible-in a sawi dàn hi kan sawi tam ta hle, hre duh tân chuan hriat tham kan sawi tawh; a bû pawhin kan chhuah tawh. Hêng kan sawi tawh zozai hi rilru inhawng takin zir ve sela! March 24-a an sawi honaah kha chuan tûn hma zawng aiin an țawng duhâm a, Bible thu pawh ni lo baksakin an kai kãwi lui tih a chiang hle. Uain hi Bible-in Juda-te chaw rinpui (staple diets) a sawi pathum zînga pakhat a ni tih hi lo hre rawn leh teh se. Juda-ten an chaw rinpui an sawiin ‘chhang leh uain leh hriak’ an ti țhin. Chhang chu hriaka hmetin an kang a, an ei laiin uain an in țhin. Ruling MLA-te sawi dàna ‘zu in’ kan tih ang hi a ni lo.
.
Kana khuaa inneih lâwi chaw einaah Isuan uain a tihpun pawh ni lo baksakin an sawi a; an sawi dàn tak phei kha chu Bible thu an khawih chingpen mai ni loin Pathian sawi chhiatna (blasphemy) a tling hial zâwk a ni. Bible thu kha chhiar chiang sela, ‘zu in’ an ni lo, ‘lawi châw’ an ei a ni zâwk tih an hria ang. An chungah Isuan zah ngai hrâm teh se! Juda-te inneih lawm hi keini anga ni khat thil thûa zawh vek a ni ve lo. Hmànlai chuan zan sarih mo neitu in lamah an lâwm a; Isuan uain a tihpun pawh kha mo lawm hun tâwp lam a ni tawhin a rinawm. Chutih lai chuan mo lawmna ruai chaw ei tûr an lo kal  belh zêl a; an châw zînga tel uain chuan a daih dâwn ták loh avàngin Marin a fapa Isua hnênah a sawi a; Isuan an mualpho phal loin uain a tihpunsak ta a ni. Ruling MLA (Parliamentary Secretary) pakhatin duhthawh taka “Isuan zû a approve” a tih phei kha chu Bible thu chauh ni loin Isua a sawichhia tihna a ni. CM-in mipui 5000 hraiah ei bãng, bâwmrâng 12 an rût khat a, uain tihpunah chuan a bo a bâng awm loa in zo vek anga a sawi pawh kha a duhâm mah mah. Khatiang kha chuan Bible thute hi ching pawr fo tawh suh se.  Tûna Israel rama chêng Aizâwl Dàwrpui-a piang, ka hmêlhriat nula pakhat chu tûnlaia mo an lawm dàn ka zuk zâwt a; ani chuan tûnah pawh inneih chu zan 7 an la lâwm a; amaherawhchu hmânlai angin mo neitu inah vek mo lawmna ruai kîl loin chhûngkhat leh țhian țhate inah an kîl țhin tiin min rawn hrilh a ni.
.
Minister pakhatin, “Pathian thu sawi tui nânte hian a va țha dâwn êm ka ti a ni!” a tih pawh kha Pathian thuhril sawi bawrhbànna nasa tak a tling. A thu sawi bul lamah khân “Chaw ei tui nân, mut tui nân, kan țhian pakhat tih dàn takah” tiin sawi hmasa mah sela, “Pathian thu sawi tui nânte pawh hian a va țha dâwn êm ka ti a ni” a tih kha chu ama irâwm thû liau liau a ni. March 27 (Thawhțanni)-a Excise Minister-in a thawhpuite thusawi a phatsak leh khân mi dang thusawi sawi chhãwng angin sawi mah se, Supply Minister thusawi video kha han en nawn leh țhin mah ila, kha thu kha chu ama duh ang taka a phuh chhuah a ni. Dik tak chuan Pathian thu sawi elsèn nân zû in a sawimawi tih kha a sawi laia a hmêl awm dàn leh a nuih duhdah dàn ațang khân a lang reng a; member zînga lo nui dahlauho pawh khân a thusawi kha an lâwm a, an lâwm tih chu an nuih dànah khân a hriat khawp mai. Ruling MLA zîngah tute emaw chu chaw ei tui nân leh mut tui nân zu in țhin an awm a nih hmêl hle!
.
CM-in zu chungchâng sawi tawha khêl loa a sawi țhin, “Zu buaipui hnam awm chhun kan ni” a tih hi a dik lo. Khawvêl ram dangah zu an khap kher lo a nih pawhin an hnam nun tibuaitu lian ber pakhat chu a ni tih hi hai rual a ni lo. Khawvêl ram hrang hrangah zu an buaipui vek; khap erawh chu an khap lo a ni mai. Mizoram tluka zu khap awlsamna tûr hi a awm lo; tih tak taka a khaptuten an tih loh avànga khap hneh lo mai kan ni. He ram zîm tak, mihring chêng pawh Kolkata kawtthlêr pakhata mi zât lekah hian dân hi kenkawh harsatna lutuk tûr a awm lo; tihhlawhtlin tum tak tak loa khap satliah an nih avàngin an hlawhtling ta lo mai a ni.
.
MLA pakhat (Parliamentary Secretary)-in, “He lama kan Pastor-te pawh tlêm tê zu in chu ka hre țeuh, tam tak in ni loin” a tih pawh kha tute nge a hriat chu? “He lama” a tih kha a bial lama mi nge an kohhrana mi a tihna? “Kan Pastor-te pawh” a tih avàngin an kohhran a sawina a ni em? An kohhran tân chuan a ngaihmawhawm thei mai lo’ng maw? An hming a sawi duh lo a nih pawh “ka hre țeuh” a tih avàngin eng zât nge an nih tih tal a sawi thei em? “Tam tak in ni loin” a tihzui khân an in tam lo a tihna a ni a. Chûng Pastor zu in a hriatte chu a inpui țhin em ni zâwk?
.
Ruling Party hian zû hi an sawimawi duh a nih pawhin Bible thu hi chu kai lek kher lo sela. “A tui kan ti êm a ni” an tih loh leh “Zu zawrh hi kan châk êm a ni” ti țha lâw lâw mai rawh se. An insawi lâwk ang takin MLPC Act & Rules hi an kengkawh khauh leh thei si lo. A duh duhin, sikul naupang thlengin zû an lei thei a ni ta ber a; hmeichhe zu in an tam phah hle bawk a. MLPC Act & Rules-ah ‘biak in leh sikul hnaiha zu dâwr awm loh tûr’ (“No retail sale shop shall be within close vicinity of place of religious worship or school.” Rule No. 64) an tih ve lah a hnaih/hlat zâwng tûr an bituk duh si lo. Hetianga a hlat zâwng tûr bituk duh loh hi dàn siam dàn kalhmang a ni rêng em ka nau KL Lian? Excise Minister/Excise Commissioner sawi dàn apiang chu a hlat zâwng tûr a ni ta mai hi a pawi tak zet! COTPA dànah chuan biak in leh sikul ațanga metre 100 chhûngah meizial zawrh khap a ni. MLPC Act & Rules-ah erawh chuan metre an bituk duh ve tlat loh avàngin keini vêngah phei chuan kan biak in ațanga metre 100 pawh tling loah zu dâwr a awm ta reng mai a nih hi. Khawtlâng hruaitute hnênah Excise Minister-in, “A zuartute ka lo sawipui ang” a tih pawh hi a sawipui rei ta lua!
.
Mitthi vuitu tam ber Pastor-ten mitthi an vuite hi eng vànga thi nge tih an hre chiang khawp mai. Thih chhan tàr chhuahah natna eng ber emaw ziak țhin mah se a nihna tak erawh chu a ni lo tih chu vuinaa mipui lo kalten an hai lêm lo! An thih chhanah ‘zu vàng’ tih a nih loh chhan chu damlo enkawlna bill tùr lamah harsatna an tawh theih vàngte pawh a ni mah ná! “Mipa fel tak phènah nu fel tak a awm” an tih ang deuhin mitthi thih chhan tàr chhuah phènah hian a chhan dik tak ‘zû’ hi a lo inphûm leh khiau țhin tih hi mi pângngai chin chuan an hai lêm lo. Ruling MLA leh zu sawimawi duh rêng rêng hian Pathian rawngbâwltute hi an sawichhe duh a nih pawhin Bible thu hi chu hmang khawlo fo tawh suh se. Bible thu țan chhana zu an zuar a nih ngat chuan an lu chungah meiling an chhêk khâwm a ni palh ang e. (Revd CHȚ—1.4.2017)RINGeduauth