RULNGAN HI ENGE?

KING COBRA HI ENGATI NGE RULNGAN KAN TIH?

Mizo upate hian rulngan an sawi dan hi a inanglo nasa khawp mai a, an sawi dan tlangpui inang lai atang hian rulngan hi eng rul chiah nge a lo nih tih bihchiang teh ang.

1. Rulngan chu rul dum lian tak a ni a, a che rangin a tleng chak hle.

2. Rulngan chuan tur hlauhawm tak a nei a, a chuk a na hle.

3. Rulngan pui chuan bu a chhep a, a tui a awp thin (Thenkhat chuan a pa in a bu hi a venpui thin niin an sawi)

4. Rulngan chu a hram / kak / kar thin.

5. Rulngan chuan fep a nei. Hemi atanga chhutin, Mizorama hetiang rul ni thei awm leh an nih theihna leh nih theihlohna point thlir ang aw:

a) Ratsnake chi hnih (Ptyas mucosa leh Ptyas korros): - Rul dum lian tak, tleng chak tak anga sawi theih an ni ve ve. Amaherawhchu, tur hlauhawm an nei lo ve ve a, an tui an awp ve ngai lo a.

b) Monocled Cobra (Naja Kouthia): - Rul dum lian tak anga sawi theih an ni a, tur hlauhawm tak an nei bawk. Amaherawhchu, bu chhepin an tui an awp ve ngai lo va, an che rang hranpa lo bawk.

c) Black Krait (Bungarus Niger): - Rul dum tle zak mai, tur hlauhawm tak nei an ni. Amaherawhchu, rul lian tak anga sawi theih an ni lo a, an che rang em em lo. Bu chhepin an tui an awp ngai ve lo.

d) King Cobra (Ophiophagus hannah): - Rul dum lian tak leh tur hlauhawm tak nei an ni a, an che rang hle. Bu chhepin chutah chuan an tui a, chu an tui chu thla 3 chhung teh meuh an awp / veng thin (A pain a ven pui thin erawh hriat a ni lo). Hetia an tui an awp / ven chhung hian chaw an ei loh avangin rul dang ang lo takin an cher nasa thei hle a, an pang sirah vun chuang (fep anga sawi theih) a awm thin.

Rul ho hi ring taka hram turin vocal cord/ vocal box an neih loh avangin Mizo upa ten rulngan kak/ kar an sawi thin hi thu belhchian dawl vak lo niin a lang. King Cobra hi rulho zinga vocal cord nei tha (well developed) ber an ni a, rul dang aiin an su ring bik hle. Kan Mizo thu ziakmi hmasa te khan Rulngan hi Viper chikhat angin an letling (translate) thin. Amaherawhchu, Viper ho hi rul che muang leh tawi turh mai an nih thin avangin rulngan ni theiin a lang lo. Tin, Viper dum hi Mizoram leh a chhehvelah a awm lo hrim hrim bawk. Chuvangin, he thu hi belhchian dawl lo niin a lang. A tawp berah chuan rulngan hming put chhan hi sawi dan chi hnih a awm:

1) Rulngan-ah chuan a vang tan zawngin a rang thluah a, chu chu a ngan (ngun) an tih chu a ni.

2) Rulngan luah chuan Ngan (Zu bel chi khat), thuka a in chhuang lai ang tak hi a awm. Hemi point pahnih hi King Cobra-ah hian a awm ve ve. Heng point hrang hrang en hian Rulngan hi King Cobra bak ni theiin a lang lo.