IMMANUELA THI ZÂM'AN

William Cooper 1731

San Fancisco hmuna sakhaw lama intawhkhawmna hmuna kalte chuan thuhriltu thusawi chu thuhril tluang pangngai a ni lo tih an hria a. Thusawi thiam tak ni mahse a thu sawi chuan Krista thisen thiltihtheihna lam a kalh tlat a ni.

 Thuhril a zawh chuan nu upa lam tawh pakhat hi mipui zing atang chuan a lo ding chhuak a, hla ropui leh thinlung khawihtak a rawn sa a, “Chu thisen lui misualte tan, Sual tlen faina a ni,” tih hla hi ring lem lo taka a sak chu mipui tamtak chuan reh thuap khawpin an ngaithla a. Chang hnihna a sak leh meuh chuan mipui za rual zetin an zawm tawh a, chang thumnaah phei chuan mi sang telin ring takin an zawm tawh a ni. “Kalvari tlang mawi takah chuan, Chhandam lui a luang chhuak; Chu lui fima ka inbual chuan, Ka sual a tleng fai ang.” tiin chu intawhkhawmna hmun khawk rum rum khawp chuan an sa ta a. Lalpa tana rinna tlawm tak din chhuah puitu chu Pathianin mal a sawm a, mi tamtak thinlung ti tuiralru a lo ni ta!



He hla phuahtu William Cooper a hi kum 1731, November ni 15 ah Hertfordshire, England ah a lo piang a, a chang tlawhchhan chu Zakaria 13 : 1 na a ni. A mah hi mi vanduai tak, mi a dahna hmuna vawi 4 lai awm tawh, intihhlum te tum tawh thin mi a ni a, a nun hi beidawnna a khat thin a ni. Rilru buai enkalwna hmuna a awm lai hian a hun tam zawk chu Pathian thu chhiar nan a hmang a. Nikhat chu Pathian thu chhiara hun a hman laiin Rom 3 : 23-25 thu “Mi zawng zawngin thil an tisual tawh vek a, Pathian ropuina an chang zo ta lo a ni.....” tih thu hian a thinlung a hneh ta em em a. Chhanchhuahna a mamawhzia hriain Krista a pan a, a sualte chu Beram no thisena silfai a ni tih a lo hre ta a ni.

William Cooper-a hian kum 33 mi a nih in Pathian chhandamna a chang ve chauh a ni. Tichuan Cooper-a chu Pastor John Newton-an a inah a awm tir a, lehkha te a ziak thin a. Cowper-a hi dangawk tawng mawh tak a ni a, a thil ziak erawh chu tawngkam mawi tak tak a ni thung si. Newton-a inah a awm laiin he hla pawh hi a phuah a ni.

1. Imanuela thi zaman,
Thisen lui a luang chhuak;
Chu thisen lui mi sualte tan,
Sual tlen faina a ni

2. Mi sual thi tur an khenbeh khan,
Chhandamna lui a hmu;
Amah angin sual mah ila,
Min la ngaidam duh e.

3. Kalvari tlang mawi takah chuan,
Chhandam lui a luang chhuak;
Chu lui fima ka inbual chuan,
Ka sual a tleng fai ang.

4. Thil dang aiin i hla mawi ber,
He khawvel thlan hmunah;
Nangmah fakin ka zai ang,
Nangain min chhandam a.

5. Thisen lui chu ka lo hmuhin,
Khawngaihnain a khat;
Chatuan pawhin a kang lo vang,
Misual faina lui chu.


@ KRISTA ZUITUTE