TAWNGTAI NUN

Pathian rawngbawlna kawngah chuan a pawimawh ber leh Kristianten kan neih ngei ngei tur chu tawngtai reng nun hi a ni.


Thawhtan zan kan inkhawm kim thlap thlap a,KTP leh Kohhran thiltihna hrang hrangah a kul ataiin kan tang ve a,Rawngbawl tura chhandam kan inti a ni.
 Mahse,keimahni avanga Pathian a lawmna thar changa Piangthar ta sawitur kan van leh si thin a.Engvang nge ni ang? Pathian hlauhna leh tihna tak tak hi kan neilo a ni mailo maw?

Tawngtai hun bik deuh hi Mitinin kan nei tlangpui a,Mahse,a hun leh hmun ruatah chauh tawngtai thin rawngbawltu chu a nunglo a ni.Thlarau bo/mi hla kan tihte hnuk hnai tur pawhin Tawngtai nun neitu tak tak kan nih a pawimawh hle a ni.

Mahse, chumi avanga A lang apauva kawngsir a zurui mu mai maite emaw khawimaw lai a rui thlep mai maite hi an banah kaiin emaw an lu chungah kut nghatin emaw tawngtai fo tur tihna lam a nilo a,chu chuan rah tha a chhuah kherlo maithei! Tih fo chi/tihnawn tlak pawh a nilo maithei bawk? Chubakah Tawngtai fo pawh anduh kherlo thei? Biak In a inkhawm tur emaw KTP activity hrang hrangah pawh kan zinga telve turin kan sawm chhuak thei pawh a ni e.Mahse,kan zingah chuan telve reng tlak anti em? tih hi a pawimawh zawk maithei a ni.Kan nunah hmuh tur anneih siloh a,Dan ang leka thil ti thin anga min hmuh lehsi chuan kan zinga tel zuive reng an chak chuanglo ang! Keimahni kan inti mualpho lek a ni anga chubakah kan nawr hla leh zual thei ve bawk a ni.

Tawngtai tam reng reng nunah chuan Krista zia alang chhuak thin a, Pathian rawngbawltu chu a tawngtai reng anga, tawngtai nun neitu tak a ni tur a ni. Belhchian tlak nun tak tak hi kan nei em? Miin tunge anih min tih thin?

A tha thawh zawng leh a thlem lungawi zawng a chhepchher chi hrang hrang hmang a thlarau bo leh mi hlate hnuh hnaih tuma thawh chiam te pawh hi atha vek e! Mahse,chumi piah lamah an rawn thlir ber tur chu kan chhepchher dahte annilo keimahni nun chhungril zawk kha a ni,tehna hrang hrangin min tehru reng a ni tih kan hriat a pawimawh hle a ni.Tawngtai nun neilotu nun chu belhchian tlak tak tak a ni ngailo a ni.Chuvangin,Krista nun tawmpuitu tak ni tur chuan bang lova kan tawngtai reng a ngai a ni.

Mi hlate puala tawngtai zanah kan tawngtai ziah alawm tih ringawt hi atawk lova,a huhova tawngtai chauh hi atawk heklo,a hun ngaiah chuan kan tawngtai ve ziah alawm,athaa,chhunzawm zel tlak pawh a ni.Mahse,kan nunah takna tak tak hmuh tur a awm siloh a,dan ang chauh a ngaia kan tawngtai thin anih ngat chuan arah hmuh tur a awm ngailo ang!Pathian rawngbawltu chuan nun belhchian tlak/nun tak anei tur a ni.Dawngdah taka Pathian rawngbawltu chu a rawngbawl saka chuan Meidil a paih turin a zuah biklo ang.
Kan Tawngtai tamloh chuan kan khawro ngawih ngawih a ni tih kan inhriat ang bawk hian midang pawhin kan ro zia minlo hre ve tho thin a.

 Chuti chung chuan thlarau bo te Krista ke bulah kan hruai thlen theih kan inring reng em ni? Mitdelin mitdel vek a hruai chuan khuarkhurumah antla mai thin a,chhanchhuah an harsa viau tawh thin a ni.

Thlarau bo tam tak Krista hnen hruai thleng tur chuan nun tak, Krista nun tawmpuitu kan nih angai a,chumi tur chuan thinlung taka kan tawngtai reng hi a pawimawh hle a ni.

 Tawngtaina hi Pathian kan hnaih theihna a ni a,Luang thli chhem nghing ang mai mai nilo nun tak kan neih theih nan Pathian i hnaih deuh deuh ang u.

Amen!

....................................................