PASALTHATE RAMMUTNA

Alexandrapur atang chuan zan hnih riak zet Bengkhuaia Pasalthate chu an kal leh tawh a,an chau thawkhat tawh hle a.Mahse,an hlawhtlinna chuan an chauh pawh a theihnghilh tir vek a ni.Sap naupang hmeltha tak mai leh sal sawm leh pahnih lai mai an man a,lu vun engemaw zât an hawn bawk a,an hlim tlang hle a ni.

A zan thumna tur tlai lam a ni a.Ni chu kawlah aliam dawn suar suar a,pasaltha Chêmchawma chuan tlangvalho hnenah chuan,"Fimkhur takin thing fawm ula,meikhu lo thei ang bera mei chhem tur a ni ngai e,ral ram a ni a,hnung lama mitnei anga awm tur a ni ngai.Tarpilu tharlam dap khwl ula,thosi leh hmite hlauhah atha ngai e.Tin,zanriah kha ren deuhin thlak ang che u,eng chen nge kan thang dawn a hriat siloh a." ati a,chutah tlangval ho chu an phusa ta sang sang a.

Kârloah an zân mei tuah tur chu an fawm ngah thuai a,an silai leh ralthuam neih ang angte chu an chei tha hlawm a,chulai ram ngaw ah chuan Sapui lo chu venthawn tehchiam anneilo niin alang a.

Ni aliam a,ngaw chhung chu a thim nghal ruih mai a,zanriah eikham hmasate chuan mei an nun tanve mek bawk a.Mei chhêm bula anthut kai kim meuh chuan khua chu a thim chiang tawhin dumdê antam hle a,hmun tinah chuan an de noh noh mai a.Taksa chau tak tak tawh anni a titi nan pawh hun rei tak hman an duh lo a ni.Chutah,pasaltha Liantâwna chuan, "Zán atlai dawn e,ralvêng lo turte chuan mut zâi rêl tawh ang u khai,..Tupawh kan hah tlang tawh hle nàa,ralvên laiin tumah mut thlûk loh hram hram tur a ni ngai e,Fimkhur ula,mit leh beng lên ngun hle ang che u,kan tih dan pangngaiin khi arsi khian vanlaizawl a thlen hunah ralvêng inthlâk leh tur a ni ang a,tuman thawm neihloh tur a ni ngai e." a han ti a.

Mut chak ngawih ngawih tawh pawh anni ang,Liantâwna thusawi chu rei rial lovin râlvênglo turte chu an mu zota diak a.

Bengkhuaia pasaltha rammu ho chu pawl thum laiah an inthen a,pawl khat chu mi paruk zel an ni a.Tichuan,Kapkima pa,pasaltha huaisâr zet mai Liantâwna leh a naute pathum chuan inring reng chung siin an mei chhêm chu an thut hual a,pahnihte erawh chuan an sal mante chu anvêng a,an piah lawk a,mei êng chhun phâk leh phâkloh chinah chuan a ni a,sap naupang erawh chu amah mantu Pasaltha Châwma kiangah a awm thung a.

Vânah chuan arsi a pe tuarh a,khua chu athiang tha hle a,sapui thawm hriat tur a awm lova,vabâk thirchher ri chhur chhur leh zân sava hrâm inchhâwn kûk kûkte,rannung hrâm chuah chuahte leh a khát tawka thli thaw leh vûk vûk te'n thinghnah an chhem rîk sung sung thin bak thawm dang hriattur avâng hle a.

Kal kawng mumallo tak hnuai a mual tam tak pal liam tawh anni a,chumai bakah ralbei haw lam leh an ralthuam neihsa mai bakah an rállâk thilte nen chuan an châuh pui tawh hlawm hle a ni.Tlangval pahnihte chu an muthlu dun lawp lawp thin a,Liantâwna chuan hmu reng mahse an riahna chu ralmuang hle in a hria a,a hrethiam hle a ni,ani chu chhîn khat pawh la chhing eih lovin fimkhur em emin ala hawi vel ruai a.

An râlvên hun vawngtu arsi chuan vanlaizawl a thleng tep tawh a.Chutih lai tak chuan an piah lawk ngaw hnuaiah chuan thing tang tliak ri deuh rap hi Liantawna chuan a hria a,a thianpa pasaltha Zahleia pawh chuan alo hre ve bawk a,chulam hawi chuan an mit leh beng chu an lên ta khiau mai a.A khat tawk chuan a ri leh deuh rep zel a.A rik zel danah chuan Salho an dahkhawmna lam chu a pan niin a hriat a,Sal vengtu tlangval pakhat lang thei zawk lah chu a muthlu bawrh bawrh mai bawk si a.

Nakin lawkah chuan le,tlangval muthlu bawrh bawrh zawn tak mai si,thim chin leh chin lo ah chuan Keipui hrawl em em mai a rawn langta ruau mai a.Uluk taka lo thlir rengtu pasalthate pahnih chuan an hmuh hmaih hauhlo a,karloah silai pûak riin a zui ta nghal a.

Silai puak ri durah chuan an harh chiang hlawm hle a,Liantawna bula thu muthlu lawp lawp tlangval Dârkhuma phei chu meiah chuan a inrawhlo chauh a ni a,a phili hle mai a.An meichher siamsa chu meiah chuan a thawlh nghal mawlh mawlh a,a chhit kai veleh chuan atlán nghal thuai a,a tihdan chuan midangte pawh chuan meichher chhiin Liantawna silai kahna lamah chuan an tlan phei nghal zel a.Liantawna chuan, "Tuman lo va hnaih rih s'u,Ka hliam hlek chauh niin ka hria,Sapui a ni a,fimkhur taka beih a tha ngai e." tiin a chah zui lawm lawm a.Mahse,pasaltha huaisen tak nih tum em em anni vek si a,tumah chu dan hleih theih annilo a.

Keipui chu a thawm hriat zui tur a awm miahlo mai a,a hmasa ber a kal Darkhûma chuan a mei sahthlak ngei tumin fimkhur em em in aveh phei a.Ngaw chu a thelh tha bawk a,meichher chu êng fiahlo hle mahse kawrte sir lawka Sakei lian zet mai let reng chu ahriat theih hle a.Dârkhuma chuan, "Saw le,kha kei a lu aw.." tih pahin chempui nen chuan a bawh pheita mai a.

Sakei chu alo la thilo tawp mai a,a ke veilam chu a hliam hlek chauh alo ni a,Dârkhuma chu a ngho tlum hmawk chuan a darah alo hap chat mai a,a pet kawh zui vu vu a,kawrté chu a zuan kai puita daih mai a!!!

2

Keipui hliam chu kawrte kân a ûm ngam reng reng an awm lova,a hma lawk a an thianpa in alo bwhsual tawh vang pawh a ni ang an tîm tlat mai a,an thianpa mangang au vawn vawn pawh chuan a au kal zo meuhlo a ni.Pasaltha Liantawna alo thleng a,"Mahni thiante pawh inchhan ngam na nge?Khawnge keimah vanhnuaithanga Liantawna ka ni ngai e,Dârkhûm,lo zam reng reng suh,ka lo kal e." tiin an vaia hriattur chuan a au lung lung a.Milu lak chem vilik vut vut chung chuan Sakei chu a umzui ta a.

Fimkhur em emin thim thamah chuan aveh phei tham tham a,an piah lawk hmun thelh fai laiah chuan Darkhuma seh kawh vu chung chuan Keipui hliam chu alo ding thim múk mai a.

Pasaltha huaisen tak Liantawna chu thawm nei hauh lovin sakei lamah chuan a tawlh hnai zel a,hlam emaw leka ahnaihchilh hnu chuan azuan ta thut mai a,chumi rual chiah chuan atha tawp tak meuhin Sakei nghawngah chuan a sat bur mai a,sakei chu a hûk tuarh a,Dárkhuma chu athlauh nghal a,chuveleh Darkhuma chu thei leh thei lovin a insaseng ta tuang tuang a.

Liantawna chu asir lamah chuan alet thla nghal a,a insiam rem hman chauh tihah chuan sakei chuan a rawn bawh zuive nghal a,keipui hliam chu lo bum zeuh pahin a hrawk hrui alo chhah sakta hmawk mai a,a ir hnuai atanga thisen far zur zurin sakei lian em em mai chu a awpta rup mai a,che zui eihlovin a let ta reng a.Chuveleh athiante ho chu lawmin anlo au dar dar a.

An beisei em em loh thil antawn tak avangin tumah reng rengin mut leh zai pawh an rel tawh lova,an sakei buaipui chuan an tlaivar zo ta vek a.Leilung alan meuh chuan an inpeih hman der tawh mai a,tlangval thenkhatte chu anla ham bai bai a,an sal man la nau deuhte chu anla mu thlu lawp lawp mai bawk a.Tichuan,vartianah chuan an khua Serchhip tlâng pan chuan an kal tan lehta a.Sakei seh Dârkhuma chu sakei khan vanneihthlak takin a thing hmanlo hlauh mai a,ala dam ve hram hram a ni,an sal man chak hmel deuh pahnihin hlangin an zawn nul nul mai a,khua anthlen hnuah puithiamin sakei ha thawiin athawi a,adam chhuak leh thei hram a ni.

An nikhat kal pawh a thui thei tawhlo hle a;Mahse,hlawhtling taka mahni khaw pan anni tawh a,tumah an intur hmanhmawh duh lova.Tin,hliampui tuar an awm bawk avangin an kal chak theilo a.Ngawpui chhung a kal anni a,khua chu athim hma bik thin hle mai a.Khaw thim tak tak hmain riah buk ansual peih vek a,tichuan khua chu an nghak tlaivar leh ta a.

Zing vartian-ah chuan ralvêng a ding ho chu an chiar hluai a,sanghal rual nguk noh noh thawm hriattur a awm bawk a.Pasaltha ho chuan an ralthuam an chuh sup sup a.Mahse, Pasaltha Chawma alo au lauh lauh a," Tumahin lo beih rihloh tur a ni,a 'pikhawi' kah kan tum tur a ni ang." tiin thupe aw deuh lek lek chuan a hanti a.An vel a sanghal amak amak tam tla ta sup sup mai chu it hmel takin an thlir dauh dauh hlawm a.

Nakinah chuan Ngaw pik kar atang chuan sanghal pikhawi lian em em mai chu alo ngûk phei ve ta hrut hrut a,pasaltha hrat khawkheng ho chuan thawm dim em emin anlo chang ta thap mai a.

Sanghal pikhawi chu alian em em mai a,a bul vela sanghal dang tla sup sup te chu an kapkarah an lut tlang zung zung thei a ni.Ngho sei leh hriam tak a nei a,fimkhur takin a hawi hruk hruk a,a khat tawkin a hnar a phit deuh dut dut mai bawk a.

Pasaltha Chawma chuan a silai a han thlah ta a.Mahse,a puakta hauhlo mai a,Chawma chuan,"Kapkima pa nang che teh,ka silai a nuar tlat mai" ati ru ser ser a.Liantawna chuan a kap zuita nghal a,ani pawh chu a silai a ri kheuh thei chauhva,akau tha a,a kahnawn pawh chuan a puak thei reng reng lo mai a ni.Tichuan,pasaltha ho chuan an silai chu an hmet per tliar tliar a,mahse,tu silai mah a puak thei reng renglo mai a,mak anti hle a ni.

Sanghal pikhawi chu a fimkhur em em mai a,silai cheng per ri khep khep a hriat chuan a beng a tun hru hru a,alo kalna lamah chuan avir let vut a,a tlan phei ta nul nul a.Chuveleh,sanghal dang chu an han kap chhin a,an silai chu a puak leh ta dur dur mai a,Nghalrual za chuang lai tur zinga alian lian chu an kapta a.A pikhawi kapkara kal hawl hawl theite kha anni si a,sum sarih bawr vel thiau anni a,a pikhawi len dan tur chu an suangtuah ru neuh neuh a.

Sanghal pikhawi hian nghal rual za leh zahnih inkar an hruai thin a,an fimkhurin an fing em em mai a,vengtu lasi nei niin ansawi thin a,silai pawhin a kah theihloh a,silai a puak thei ngailo niin ansawi bawk thin a ni.Mahse,a Pikhawi hi hmuh mai mai tur leh tawnfuh tur an awm manglo a ni.Pasaltha Chawma pawh khan mi sawite chu a hrelo pawh a nilova,fiah hrim hrim kha a chak vang a ni zawk ngei ang...!

(PhoeniX)

**** A TAWP TA ****