PASALTHATE VANG A NI

Pafa niawm tak pahnih chu In pakhat tualzawlah chuan an infiam a,an hlim em em mai a.Pakhat chu patling satha tak leh zahawm tak hmelpu a ni a,a fanu niawm tak chu kum 4/5 mi lek tur a ni a,chupa kiangah chuan hlim em em in a nui her her reng a,chupa pawh chuan alawm thiam hle niin alang bawk a.

Chumite chu James Winchester-te pafa anni a.Pafa inngai tak anni a,annu'n(Mary nu)a boral san hnuah phei chuan an inngaina zual hle a ni.
James hi Britain(U.K) rama Scotland hmar lama khaw pakhat 'Elgin' antih hmun a pianga seilian a ni a.Kum 1858 khan East India Company hnuaiah Plantation Overseer hnathwk turin India ramah alo lût a.Silcharah thuin Cachar districtah chuan mi tam tak ruaiin Thingpui huan asiam teuha,a huante chu Sakawrin a fang thin a.



Mary nu nen pawh hian ahnathawhna lama inchhar hi anni nghe nghe a.Mary nu Mirai hi Metei ani a,buaina tam tak karah harsa takin Syhlet pastor hnenah an innei thei hram a ni.Mary pawh hi kum 1866 August thla khan Silchar veng pakhat Taranpur hmunah apiang a ni.

James chuan thian tha tak tak anei a,an bul vela thingpui huan enkawltu thenkhatte nen pawh chuan an inlen pawh fo thin a.Chung zingah chuan thian kawm bik James chuan anei a,a hming chu George Seller a ni a,Alexandrapur thingpui huan enkawltu a ni a,Mary ang rual lek fanu aneive bawk a,Mary nen pawh an inkawm ngeih hle a ni.

James te pafa ang thovin nu anneilo ve bawk a,mahse,awmpui hmeichhia annei thung a.Kawng tam takah in anna anneih vang pakhat pawh a ni ange,James leh George seller chu an inkawm ngeih hle a,an inlên pawh deuh reng thin a ni.

23rd.January 1871 a ni a,boruak a thiangin a nuam em em mai a,chumi ni chawhnu lamah chuan Mary'n adil reng avangin athianpa Seller te tlawh tur chuan Sakawr lian tak chunga chuangin Jamesa-te pafa chuan Alexandrapur thingpui huan lam chu anpan ta a.

Thingpui huanah chuan hnathawk engemaw zat anlo awm sap sap hlawm a,George sellera te pafa chuan an kawt tualah anlo hmuak a,hlim takin Mary te thian dun pawh chu an inkuah nghal chûk chûk a,an duhawm dun reuh hle a.Tichuan,inchhung lamah chuan an inzui lut ta diah diah a.

Georgea thian pakhat alo leng ve bawk a,muang changin inkawmna pindanah chuan an pathum chuan an inkawm a,an hnathawh dante leh politics te sawiin an phul hlut a,an inkawm tui hlawm hle a.Pawn lamah chuan Mary te thiandun pawh chu an hlim hle a ni ang,anri teng tung a.

Ni chu a dul ruih tawh a,In pawn lamah chuan chiau ri teng tung an hreta phut mai a,silai ring zet zetin a puak dur dur mai bawk a.Chuveleh Jamesa te thiandun pawh chu an fanu te ngaihtuahin an tho chhuak nghal a.Mahse,tlanchhuah nghal mai chi a nilo,kawngkhar leh in bangte chu silai mu in arawn deng sawk sawk tawh mai a.
George-ate thian ho chuan an silai neih ang ang hmang chuan an kap let ve a,thingpui huan vengtu sipai tlemte te pawh chuan an kap let ve tak tak a.

James chuan tukverh atang chuan a han bih dek dek a,afanu chu a zawng nghal ruai ruai a.Pawn lamah chuan Indian pasaltha ang taka inthuam,pa te tak tete,nelawmlo tak tak mai a hmu a,an sam an zial ngoh ngoh hlawm a.Silai sei pui pui an keng therfur a,thenkhat chuan fei leh chem sei pui pui an vilik zoh zoh mai bawk a.Hrênpereng chauh ankaih a,engemaw hi an ak then nulh nulh a,thenkhat chuan Phawte ankeng hlawm a.Indo mi anni tih anhriat hle a.

A thiante chu a ko a,chung mi mak tak tak ho chu anla hmu ngailova,an hlau hle a,chutihlai chuan anmahni vengtu sipai pakhat chuan Maryte thiandun chu pawmin harsa ti taka anlam rawn pan mek chu a hmu fuh ta a,silai mu karah chuan tanpui tur chuan atlan chhuakta nghal a.

Mi kawlhsen tak tak ho chuan anrawn hnaih chilh tawh hle a,mipa puitling chin chu an that hmiah hmiah zel a.An khek ri ruai ruai reng a,silai an hmet puak dur dur reng mai bawk a,an vai chuan mi 20/30 bwr vel tur an ni a.

James chuan an bul ava thlen chuan Mary chu a pawm lawk a,hmun hnih ah inthenin sipai pa chuan Sellera fanu chu a pawm thung a,Sellera inlam pan chuan hmanhmawh takin antlan dun ta a.

James te pafa tlanchhe lai mek chu hnam mawl zinga pakhat chuan silaiin atin vang vang a,silai a puak dur a,Sellera silai zawk alo ni a,chupa chu alet nghal tawp a.Silai apuak leh nghal thuai a Seller pawh chu a awp rawp a,chutih rual deuh thaw chuan athianpa pawh chu a chiau thawt a atlu zuive nghal a.

Silai apuak dur dur reng a,James chuan a fanu chu pawmin atlanpui zel a,Mary chu hlauin atap vak vak a.Silai puak leh dur chuan James chu adeng vir nawk a,thei leh thei lovin apai chawn chawn a Mary chu atlûkpui ta a.

Chung hnam kawlhsen-ho chu Bengkhuaia pasaltha rammute anni a,hnung lam atanga James kaptu pawh kha Pasaltha Chêmchawma ani a,April 1917 khan Serchhipah athi.

Ni tlak rualin an duhtawkin Bengkhuaia pasalthate chuan Sellerate chu ansuam ta a,mitam tak anthat a,Mary Winchester bakah sal 12 manin hlawhtling inti takin Bengkhuaia khua Serchhip chu muang lovin anpan leh ta thuai thuai a.

Zofaten Kristianna kanlo hmelhriat tanna chhan pakhat chu "PASALTHA-TE VANGIN A NI".kan ti ve thei awm e.
(PhoeniX)