LIANSANGLURA LEH ZOCHHINGPUII

    Kum 1965 favang awllen lai tak a ni a,boruak a thengthaw nuamin a zangkhai hle a.Mizoramin hunkhirh tak a hmachhawn dawn tih reng reng hrelovin mi tamtak chu thlamuang takin anlêng mek a ni.

Hetih hunlai hian Serchhip khua pawh Mizoram-a khawlian pawl tak a ni a.Roreltu fel tak takte awpna hnuaiah khaw inlungrual tak niin an khawsa a.Mihring pawh tam tak an awm tawh a,hmun dang atangin anpêm luh belh mek bawk a,Serchhip chu khaw hnih ang deuh hialin inzawm reng tho siin Kawnpui hmun leh Khawhlui tlang lamahte an awm a ni.


Zân khawthiang em em mai kar a,thla êng no nghulh mai thlir vawng vawng chung chuan tlangval pakhat chuan boruak chu a hìp leh kâk kâk thin a,athaw leh ham ham bawk a.Thla êng hnuai a ahmel langthei chinah pawh chuan ahlim hle tih a hriat theih a ni.A awmdan danglam tak chu amak hle a.Mahse,'Kum tam tak mahni ram hmulo leh boruak hip tawhlo a ni a,nimin lawka Mizoram rawn chuang chhuak ve chauh a ni a,duh thawh em emin zoram boruak a hip mêk a ni' tih hre tan chuan mak tilovin a hriatthiam awm hle a ni.

"Sangte"

tiin inchhung lam atang chuan hmeichhe aw hian arawn ko a.Tlangval chuan athiltih mêk chu achawl deuh dat a,chutah,

"Enge ka nu?"

tiin a chhangta thuai a.

"I thiannu alo leng a nia"

"Tu ka thiannu maw?"

"Lo lût vatla,i hre mai dawn alawm."

A nu chuan atih tak siah chuan inchhung lamah chuan alût ta zawk a.

A nu bula thu nula lian leh hmeltha tak mai chu rawn ding chhuakin,amah chibai tum chuan akut arawn phar dà a,a hmuh takah chuan Sangtea chu a phu deuh zawk a.Chu nu chu ahailo khawp mai,atleirawl chhuah tirha angaihzawng Zochhingpuii ngei kha a ni tih a hre nghal a;Mahse,atum aiin ahmu hmelthain lian ati hle a,a ngaizawng nghal veng veng mai niin a inhria a,a hamhaih lek lek a ni.

"I dam maw Sangte,minla hre ve êm ang chu tiraw?"tih pahin Nula chu a nui sen sen a.

"Hre lutuk mai..dam ve hram hram e,inlo dam zawk em? Ka hai hman tep che alawm ilo hmelthain ilo lian tawh bawksi a.."

"Nang alawm hmeltha,i ngaihawm thin khawp mai"tiin nula chuan nuih her her pahin Sangtea chu achhang a.

Sangtea chuan,"Min ngaih tak tak pawh ka ringlo..pasalte i nei.." atih lai mek chuan nula chuan, "Nei daih tawh e,fa pawh.." ati hman chauh a.Sangtea chuan mak tih hmel takin,"Pasal inei tawh maw?" tiin ahan zawt nawn leh ngat a.

"Mak iva tih hmel ve,tak takin la neilo,tumah pawhin min duh velo a nih hi..!"tiin nula chuan nui chung chuan Sangtea chu alo chhang lêt thuai a.

Chhingpuii'n chutia atih hnu chuan Sangtea chu arilru a nuamve leh deuh a.Tichuan,an pahnih chuan anhun kal tawhte chhuikirin an hlim hle a,midang lo lut ve zel avang chuan rei pawh an inkawm zui theita lova.

Chhingpuii hi nula hmeltha tak mai leh hleitling tak mai a ni a,ahming tak chu Zochhingpuii a ni a,Ralte hnam a ni.A felin nungchang mawi tak anei bawk a,tlangvalte ngaihzawn rawn a ni a,ankhuaah pawh chuan hmeltha leh hawihhawm bera sawi ani hial thin a ni.

Sangtea nen hian antleirawl chhuah tirhin an inngaizawng reng thin a,zirna avanga Sangtea'n Saprama a awmsan takah chuan ngaihzawng mumal pawh neilovin a awm zuita a,hêltu leh rîmtu chu anei reng a,milian leh hausa,thil tithei tak takte pawh anni hlawm a,chung zinga mi Ramthanga,RTA antih,an khaw pahausa tak fapa chuan a inti tatu deuh bik a,a tleirawl tirh phat atang tawha lo ngaizawng ve ngar ngartu kha a ni a.Chhingpuii'n Sangtea aduh zawk tlatsi avangin khatia Sangtea awmbo ta pawh kha alawm rilru hle a ni.

Sangtea lo haw lehta chu RTA chuan hnawk ati leh hle tawh mai a,Chhingpuii lahin Sangtea aduh zawk tlatsi avangin tihngaihna tak pawh a hrelova.Mahse,chuti maia Chhingpuii chu chân mai atum biklo a ni.A theihna zawng zawng hmangin neih ngei tumin abei ngar ngar a,pawisak pawh a neitlem sâwt tawh hle a.Chhingpuii chuan RTA chu ahrechiang hle a,pasala neihtlak tak takah angailo a ni.RTA chu a pa thawhchhuah hmanga inla lian ve mai anisi a,a chapo em em a,thawh peih leh thiam tak tak a nei lemlo a ni.Chhingpuii rilru dik tak hi hria sela chuan ani vangin abuai kher tawhlo maithei a ni.

Chutiang boruak kara anlên mek lai chuan kum chu avei a.February ni 28,1966 ah chuan Mizoram chu Independence puangin rambuai a ni zuita a.Serchhip ah chuan March ni 10 ah vai sipai anlo lûtta rup mai a.Tupawh mai chu nunphung pangngaiin anun theih tawh lohva,chutiang karah pawh chuan Sangtea leh Chhingpuii chuan inthlah mai lovin rinawm takin buaina chu an hmachhawn ve mek a ni.Tichuan,a kum leh 1967 ah chuan khaw khâwm rûnpui athlenga,Serchhip Kâwnpui hmunah chuan khaw hrang hrangte chu dahkhawmin Asst.Commisioner Mukherjeea'n a awp a.Sorkar chawmna hnuaiah harsalo takin ancheng ho a ni.

... Pathianni a ni a.Sangtea chu a inchei mek a,duhtawka a inchei chuan analh hle a,nula tan chuan sit mai mai chi a nilova,ataksa inphut mawi tak leh adarpharh hlai tha tak maite,ataksa sek phiar fat maiin a kamis atâwn mar tang mai te chu hmeichhe mit latu tak pawh a ni a!

A kekawr,mawi taka thui zuih leh Mangai savun pheikhawk chhip zum van maite chu a inhmeh hle mai a,hetia Chhingpuii pawhin Sangtea aduh tlat pawh hi amawh love,Liansânglûra hi Tlangval hmeltha leh tlangval changkang tak a nive bawk a ni.Kum 9 chhung a patea bulah America ah lehkha zirin a awm a,a pa in aboral san tak avangin A nu leh a farnute awmpui turin Mizoramah alo chhuak leh chauh a ni.

Tlangval lian leh ngo vuah mai a ni a,a sam zuah chuan tlemin ati lang bumro lek lek a,han en mai pawha thahrui ngah hmel tak hi a ni a.Nulate tan chuan ngaihzawn awm tak tur hi a nive reng a.

Sangtea inchei mawlh mawlh lai chuan vai sipai anlo lut khup khup mai a, Sangtea nu leh afarnu chuan mak tih leh hlauh hmel takin anlo thlir a.

Sangtea nu chuan,"Mama,hei sipai anlo kal a nia." ati chul a,Sangtea chu room atanga lo chhuakin saptawngin thil awmzia chu ahan zawt zung zung a.Chuti taka saptawng thiam nal chu sipai ho pawh chuan anzah ve deuh niin alang a.Chutah,Sangtea chuan anu te lam hawiin," Ka nu,thil hriatsual palh a awm a ni,underground i ni a,a hruaitute zinga mi pawimawh tak ini." minti anih hi,lo thlaphãng suh u,ka va zui lawk anga,ka lo kir leh thuai dawn nia." a ti a.Tichuan,sipai ho chu azui chhuakve ta a.

Sangtea chu tute emaw mi thil tithei deuh ten anlo hêk a ni a,anhêkna chu alian tham hle a,a chhuak leh mai theita hauhlo mai a,thla tam tak Serchhip sipai hmunah anhrêng zuita a,rei tawk tak atân hnuah chuan tihhlum hial tura tih a ni zuita a ni.

Tichuan,an man atanga thla 8 na,Pathianni-ah bawk chuan Sangtea chu ram tana martar turin ramhnuai lamah hruai a ni ta a.Sipai panga in anveng a,Sangtea chu akut an hnungkhirh sak tlat a,alaiah an kaltir a,hruiin an kai bawk a,an tihhlumna hmun tur anthlen chuan Sangtea chu a mit antuam saka,an thingthit tir a,Sangtea erawh chu a ngawi reng a,hlau awm pawhin a awmlo a ni.

Sipai ho chu an hmanhmawh lo hle a,nghah annei zawk nge an muang chang hle mai a,aruk tak chuan Sangtea chuan antihtur chu ti vat vat se aduh zawk a ni.

Nakinah chuan Sangtea chuan a aw hriat than tak mai aw ri ahreta a.Chhingpuii ngaizawng ve em em tu,an inkar tihchhiat tum ngar ngar thintu Ramthanga ngei kha a ni.Mak pawh ati hranlo,Mizoram a awm hnu reiloteah amah haw tur awm a hriat awm chhun kha a ni tlat a ni.Chutah,Ramthanga chuan intithei awm takin,"I cho hi tunge ka nih i hrelo a ni.Serchhip khua mai pawh nilova pa hausa Zaithangvunga fapa Ramthanga ka nih hi,tikhan thlamuang takin thi ang che,i hmangaih em em Zochhingpuii chu keiman ka lo nei mai a ni ang chu!" ati a,a nui zui ham ham a.

Chutah Ramthanga bawk chuan,"I thih hma in ka hmelte hi hmuve leh reng reng ta che." tiin Sangtea chu apan phei a.Chutih lai tak chuan Silai arawn puak thawr thawr mai a.Sipai pahnih chu an let nghal tawp a,che zui tur pawh an awmlo! Pathum dang chuan silai an chuh zuive nghal a.Sangtea pawh chu asirah chuan alet phei nghal tawp tawp a,chutih lai tak chuan Ramngaw kar atang chuan,"Sangte" ti a au lauh lauh ahre ta a.A mit tuam tlat anih vang chuan engmah a hmu thei silova,aw lo chhuahna lam chu a rin pan tawp mai a.

Silai chu a puak thawr thawr a,sipai pakhat chu an kap fuh leh tawh a ni ang,a chiau vawl vawl mai a.Chutih mek lai chuan Sangtea pawh chu thei leh theilovin atlanchhe mek a,chu chu hmuin Ramthanga chuan man tumin a umzui ve nghal thuai a,thui pawh a um hma chuan hnung lam atang silai arawn puak leh thuai thuai a,Ramthanga chu a vir nawk a,a lu leh awm zawn atang chuan thisen abaw nghal puat puat a,kâ pawh chhawn lovin a thi nghal a.Chumi rual deuh thaw chuan arawn kaptupa,vai hmuihmul buk zet mai pawh chu avirve nghal nawk a,Japan-hlo hrui pik karah chuan atlu sawp ta nulh mai a.Sipai pakhat la dam awm chhun chu atlanchhe zuita bawk a.

Silai ri areh hnu lawkah chuan an bihrukna atanga lo chhuakin Zotawna leh Lianhlira chu an rawn then deuh tha a,an pahnih chuan Sten Gun an lek dun vat vat a.Sangtea anphuarna chu phelhin silai leh ralthuam awm ang angte chu an khawm zung zung a.Sangtea pawh chuan hmanhmawh angai a ni tih hria in athiante chu engmah a zawt duh rih bik lova.Sipai pakhat ipte atang chuan pen leh lehkha ala a,engemaw a ziak nuap nuap a,sipai pa kawr awm ah chuan a chilh bet a.Tichuan,muang changloin Ramhnuai lamah an insaseng ta thuai a.

An inkah atanga hun reilote hnuah chuan sipaite chu an hotu lu ber hovin inkahna hmunah chuan an awm khawm luih luih a,an hotupa chuan Sangtea lehkha hnutchhiah chu a chhiar nuap nuap a,chutah thinrim em em in lehkha chu a hlawm nawk nawk a,a paih ta daih a.

Tang tlanchhuak leh a chhanchhuaktute chu man leh ngei tur a ni,tiin a umzui turin sipai ho khat chu uifing hruaiin sipai hotupa chuan atir liam ta nghal a.

Sangteate thianho chuan an hnu chu thup tum viau mahsela sipai ho uifing hruai chuan an rim a hrethei zel a,tichuan,sipai te chuan an um ta ngat ngat a,an vai chuan sipai sawm leh pahnih lai anni a.Sangtea te chu hmanhmawh taka tlanchhia anni bawk a,anlo kal thui hman hle tawh mai a.Kawng mumallo tak hnuai a inum anni bawk a,sipaite pawh chu an chau tawh hle a,an ui hruai pawh chu nisa bawk nen a lei athlak a,a thaw hlawi hlawi tawh mai a.

Sangtea leh athiante pahnih chu luipui an kan hma chuan chawlh pawh an chawl ngam mai lova,an rawn umzui ngei ang tih an ring a,chuvangin an thiante awmna an Camp lam pawh la pan mai duh lovin ram palailengah an tlanchhe kual vel mai mai rih a ni.

Mat lui an kan hnu rei vaklo ah chuan an chawl ve ta nge nge a,atir atang khan Sangtea chuan a ralthuam man zing a Revolver pakhat chu chuh nghal a.A chhan pawh pistol kah chu a thiam zawk a ring a ni.America a awm lai khan pistol inkahsiakin an in el fo thin a ni,apatea thianpa hi army retired tawh a ni a,silai inkahsiak chu a nuam tih zawng tak a nih bawk avangin vawi tam tak an inkahsiak fo thin a,chuvang chuan pistol kah chu athiam em em tlat a ni.

Rei pawh an chawlh hma chuan rilru thar anneita a,an inthurual tlang em em a.An ngaihdan chuan ram tana bei anni a,engtikni ah emaw chuan ram tan anla thi tho tho dawn a,huaisen taka beih let mai hi antih tur a ni mai lawmni' tih chu athuthlukna chu a ni a,sipaiho beih let dan tur chu an rel zui nghal a.

A beisei loh ang taka thil athlen tak thut thut si ah chuan Sangtea pawhin Chhingpuii ngaihtuahna hun tak tak ala nei hmanlo a.Mahse,a thinlung chhung rilah chuan a riak reng a ni.Engtianga rawn chhanchhuak mai nge annih tih takngial pawh chu a thiante ala zawt hmanlo a ni.

Sipai lo beih let dan tura an ruahman chu,Mat lui an kânna zawn tak chhak leh thlang fing 30 emaw vel atangin Zotawna leh Lianhlira-te chuan Mat lui chu an kai let leh anga,hnung lam atangin alo kap anga,ani Sangtea chuan tanhmun tha tak siamin lui ankaina zawn,sipai lo lanna hmun tur atang chuan alo chhaih buai anga,chutih lai chuan an hnung lam atangin athiante pahnih chuan anrawn hawl kual dawn a ni.

Ral khat hlalo takah chuan ui bauh ri that that an hre ta a,anmahni umtute annih ngei pawh an ring nghal a,muang chan a hun tawhlo tih hria in an tihtur theuh chu titurin an inbuatsaihta nghal zung zung a.
Sangteate pathum chuan inring ranin vai sipai ho chu anlo nghak ran hman tawh a,an silai kawm chu an chul an chul tawh mai a,mahse,sipai ho chu nghah rei an ngailo kher mai a!

Sipai thuam famkima inthuamin sipai pathuam chu Ui kaiin anlo lang rual thawt a.Mat kamah chuan dingin Sangtea te kaina zawn chu an thlek an thlek ringawt a,chutih chhung chuan an thiante sipai dangho pawh chu anlo thlen belh ve mek bawk a,tumah chuan lui chu kan tum awm pawhin an awm lova,lui kamah chuan an innghakkhawm ta thup a.An che vel chu Sangteate ho chuan an thlir reng a,chet thuai thuai chakin an za zek zek tawh mai a.

Sipai lo thlen belh chu an awm tak lawk loh avangin an kimta ah Sangtea chuan angai a,a chhiar theih chinah sipai ho chu anvaiin sawm leh pahnih anni a.
A bihrukna thingtu luang phen atang chuan Sangtea chuan uluk takin sipai pakhat chu a tin vang vang a,silai chu a hmet puakta dur mai a,sipai pa chu a let nghal tawp a.

Sipai dang ho chuan rangtakin tanhmun anla nghal sap sap a,silai rikna lam chu anrin kah ve pawp pawp ringawt a,tiau pho ah chuan phên tur mumal an nei silova an bawk phek thlur hlawm a.

Sangtea chu thingtu luang phenah chuan a tawlh sawn zung zung a,hmun hran hran atang chuan a kap thuai thuai reng a.Chutih lai tak chuan Sipai ho hnung lam atang chuan Sten Gun a rawn puak ta tek tek mai a,sipai ho chu alet nghal tawp tawp mai a,karloah chuan silai hmet puak thei a dam pawht an awm tawhlo a ni ang,tumah chuan anrawn kap let lova Tiau pho ah chuan an thal phung hlawm a.

Zotawna leh Lianhlira chuan fimkhur takin anveh phei tham tham a.Mahse,tumah anmahni bei thei tura dam an hmu lova,an inthlah dul deuh a,Sangtea chu an ko ta lauh lauh a.

Sipai ho ralthuam zawng zawng chu anla a,an Ui hruai pawh chu an kap hlum sak ve bawk a ni.An ralthuam lakte chu a hla thei ang ber kal puiin an thukru a,an thiante fin turin an Camp lam an panta nghal a.

M.N.A ah reilote atan hnuah a patea tanpuina in an puhna lak ata zalenin a chhuak a,Mizoram buai chhung a tawmbo turin a patea chu an chhungkuain America ah an zuithla ta daih a,an zingah chuan a hmangaih em em Zochhingpuii pawh chu a telve a ni.

••• A TAWP TA •••