LALHRIATPUII

Lalhriatpuii pa chu thinrim takin a inhrosa dur dur mai a,a chhan pawh Hriatpuii te inruk vang a ni a,an awmna chin pawh anla hrelo a. Nu leh pa tan chuan thinrim thlak tur tak a ni a. An fanu rutu lah chu an veng tlangval ah pawh an itloh ber mai Lalmuansanga,an veng hmeithai pakhat fapa a ni a.Mahse tlangval fel tak a ni a.


Hetia an inruk chhan pawh hi engtikahmah Hriati pa te chu an hmin ngai dawnlo tih an hriat ve vek vang a ni.

Hriatpuii nutapa sual zet mai pawh chu a thinrim hle mai a,Msa te chu hmuh a sawisak hrep mai chu a chak zek zek tawh a,dik tak chuan Msa hi ahma atang rengin a hua in,a hmusit sa em em a ni.

Hriatpuii chhungte ho hi mi chapo tak mai anni a,mirethei leh harsa zawkte hmuhsit an ching hle a,Hriatpuii pawh hian theihtawp chhuahin an chhungkaw mizia chu thlak tumin bei mahse engmah ala ang thei tak tak silo a ni.

Hriatpuiite pahnih chu Aizawl lamah Msa puteate In lamah an awm a.An awmna hmun chu tumah an hrilh duh lova,Hriatpuii chhungte pawh chuan vawi tam tak an phone tawh a.Mahse,an fanu chu engmah ansawi pui thei tak taklo a ni.Hriatpuii chuan,"Inneih inremtih hma loh chu ka lo haw tawh dawnlo" tiin a chhungte chu ngenngawl takin a chhang bur mai a,an awmna pawh a hrilh duh chuanglo a ni.

Hriatpuii chhungte chuan zawn hmuh ngei tumin an zawng nasa mai a.Hriatpuii chhungte hi mi thiltithei tak mai anni a,Hriati pa hi pa challang leh hmelhriat tha ngah zet mai a ni bawk a.Kar hnih dawn an zawn ruk hnuah chuan an fanu awmna chu an hre fuh ta hlauh mai a.Mahse,chuti maiin an fanu chu a hruai hawn theih a ringlo a;ngunthluk zawk a tihdan tur dang dapin Hriatpuii pa chuan a enthla ta rih a.

Enthla tur chuan mi pahnih atir a,chumite chuan a chhun a zanin anvil chawt ta mai a.Mahse Hriatpuii te pahnih chuan enthlak reng anni tih anla hre lo a ni.
Inrinni zingah chuan Hriatpuii chuan phone call adawng a,phone a hmang zo chu a hlim hle mai a,anuta-pa nen an inbia a,'apa chuan inneih a remtih tawh thu leh chumi ni la laa haw nghal turin a duh a ni',tih alo hrilh a,Chu thu chuan Hriatpuii chu ati hlim hle a ni.

Hriatpuii chuan Msa chu a hrilh nghal a an hlim dun hle a,Hriatpuii chuan alo beisei leh alo rin lawk rilruk reng a ni tih thute chu a sawi a,a hlim hle a ni tih chu a hmelah pawh chuan a hriat ngawih a ni,a nu leh pa,a unaute leh thiante thil tur vel lei a bazar hmasak phawt a chawhnu lama chhuah an tumta a.
Tlai lam dar 3:37 a ni a,Hriatpuiite pahnih chuan Msa bike a in phurin an khaw lam an pan a,Aizawl chu an hnung chhawn ve mek a ni.Kawng lakah chuan an inneih hun turte suangtuahin an hlim dun hle a.Hriatpuii chuan a rang thei abg bera inneih nghal a duh thute chu khawvela a hmangaih ber Lalmuansanga(MSA) chu a hrilh mial mial a,a nui leh her her thin a.

Tlai nitla tur mawi em em maite chuan an lawmnate chu lawmpui ve in anhria a,Side glass atang chuan an innuih sen sen reng a,an in lawm nui dun har har reng a,a siamtu Pathian tan pawh thlir ninawm tur chi annilo a ni.Hriatpuii chuan a hmangaih ber a nei thei tur chu a thinlung chhungril takin a hlim veng veng a ni.

Ni chu kawl a a her liam zet chuan khua chu athim chak hle a,Hriatpuii-te pahnih chu khaw inkar ram hnuaiah an tlan lut tan a,Msa pawh chuan alight chu a chhi tan ve chiah bawk a.
Light engah rei pawh an tlan hmanlo tihin an hnung lamah chuan car chak taka lo tlan ri an hre ta a,chu car chuan karloah a rawn su thawi ta thuak mai a,Hriatpuii chu a te thawt a,kawng sirah chuan ankawi lut rawp a,an tlu ta rup mai a.Chuveleh car atang chuan mi panga anlo tlan chhuak a.Hriatpuii chuan a u leh a thiante ho anni tih a hre nghal a,a hlauhthawnna chu a zual sauh zawk a ni.Hriatpuii chu carah an pawt lut nghal a,Msa chu ansawisa ta chiam mai a,a thi tawhah ngaiin kawng sirah chuan an nawr liam ta a.

Tichuan an Car chuan hmanhmawh takin In lam panin antlan lehta nghal a.Hriatpuii chu an zingah chuan hlauthawng leh mumal pawh nei lovin a chuang ve hle hle a,a u chu a melh hrek hrek a,a insut deuh hlap hlap reng a,tumah chuan engtinmah anti zui lova an be bawk heklo a,an vai mai chuan an ngawi reng hlawm a.Hriatpuii chuan motor an tawh hmasak berah driver chu tihbuai a midang tanpuina dil a au chhuah vak mai atum rilru ta ran a!

Mahse,a beisei angin motor an tawkta hauhlo mai a,a reh vung vung a,a beidawng tawh hle a ni,a u te ho lah chu tumah biak theih reng reng an awm bawk silo a,thehhmeh ang hlauh anni an reh thuap mai a!!

Hmuifang kham an tlan lai chuan anmahni tawk zawngin motor pakhat alo tlan ta hlauh mai a,Hriatpuii chu a lawm rilru hle a,a ruk chuan a inring ru ta ran a.
Sumo alo ni a,an hma lawk feet 50/60 vel lekin motor an hnaih tawh tihah chuan Hriatpuii chuan,"Min pui r'u" ti a au vak pahin,a showl bah chuan driver nghawngah chuan a hreng ta thut mai a,motor light in a chhun lai tak a ni bawk si a,driver chu a buai hman hle mai a,Hriatpuii chu an man bet nghal thuai a.Mahse an tlai mah mah tawh a ni,an chuanna car chu kham ko ah chuan a tawlh liam mek tawh a ni.

Zan thim tak hnuaiah chuan motor chu kham hnuai lamah chuan a insawh ri thla ta rum rum mai a,thinghmun karah chuan motor light chu a eng phe zuai zuai bawk a,thawm areh fel meuh chuan sumo a chuang ho chu kham ko ah chuan an ding tlar far hman tawh a.
Msa chu vanneihthlak takin hnim pikah atang hlauh mai a,thei leh thei lovin kawngpuiah chuan a vak chhuak hram hram a,nikhaw hrelovin a awm zui ta nghal a.

A harhchhuah leh meuh chuan damdawiin khum nuam takah nuamti miah silovin alo mu bur mai a,a ban leh ke te chu an tuam bur mai a,a khabe te chu an cher luk mai bawk a,Msa chu a chesawn thei miahlo a,a taksa khawilai mai pawh chu na hle vekin a hria a;Mahse,chungte aimah chuan Hriatpuii chanchin hriat a chakna chuan a hneh zawk a,na pawh a hre chang manglo a ni.

Thla hnih dawn lai damdawiin ah a awm a,chutih chhung chuan Hriatpuii chanchin reng reng hriat a nei lova,a chhungte a zawh ho reng reng lah chuan Hriati chanchin an hriat loh thu hlir an hrilh mai si a,a beidawng em em a,angaih te chu a thalo rum rum tawh a ni.Amah Hriati lah chu vawi tam tak call a tum tawh a Hriatpuii phone chu a in-switch off tlat mai si a,engdang mah pawh angaihtuah theilo,a rilru leh thinlung zawng zawngah LALHRIATPUII chauh a awm a ni.

Inrinni tuk chiah a ni a,Lungleng khawhar em em in Msa chu a khumah chuan a thu nguai lup mai a,a hmangaih ngawih ngawih chanchin hre theilo a a awm chu hrehawm ati hle a ni.A natna chu ziaawm hle tawh mahse a thinlung na erawh ala ziaawm velo a ni.Chanchinbu hlui hmel tawh tak kenga amah pan a lokal mek a thianpa Alexa chu ngawi rengin alo thlir a,a melh ngai chi a melh reng thung a!

A bul alo thlen chuan Alexa chuan a chanchinbu ken chu Msa chu a han pe a,ngawi rengin alo la ve mai a,a en vung vung hnu chuan,"I Vanglaini lo ken ve hi a hlui a nih hi!" a han ti leh rih a.A thianpa chuan,"Nia,..helai hi han enteh.." tiin a chhiar tur lai chu Msa ahan kawhhmuh a,engmah sawi zui lovin angawi leh ta daih a.Msa chuan ngawi reng chuan chulai thu chu a chhiar tan ta a..!

"Ni 11.Oct.2012(inrinni) zan dar 10:00 velah khan Pu Rodingluaia Serkawnpui khua Car Mz 06/478X chu Hmuifang khamah a accident.
Carah hian mi paruk an chuang a,anvai hian a hmunah an thi nghal vek a.Mitthite hi Serkawnpui khua vek niin,Car neitu Pu Rodingluaia fate pahnih Lalsiamkima(29) leh Lalhriatpuii(26) chu an telve a ni.Midang te chu...."

Msa chuan chhiarzawm zello chuan a thianpa chu mak ti takin a en a,Alexa chuan inthiamloh hmel takin,"Thianpa,min hrethiam dawn nia,doctor-ten hrilh che kha an phal rihlo a ni" ati a,a thianpa mit atanga mittui lo luangchhuak ngiai ngiai chu Alexa chuan en hrehawm ati hle a khaw dang a hawisan ta thuai a,Muang changin thil awmzia chu a hriat dana chiang chuan a thianpa mittui parawl kianga lo thlir rengtu chu a hrilh tan ta a,a thianpa mit atanga mittui far zung zung chu a hmu reng a,Alexa chuan a thianpa chu a khawngaih em em a,thinlung takin a tawrhpui ngawih ngawih a ni.Mahse,Msa natna leh hrehawmna chu tawrhpui a dam mai chi a ni silo.

Lalmuansanga chuan lungleng leh khawhar takin,mal ngawih ngawih a inhriatna nen Khawvel hunbi-te hi a chhiar chho ve tan dawn ta a ni.

A TAWP TA
............