ISUA KRISTA PIANNA HMUN

CHURCH OF NATIVITY

'Isua Krista chu Davida khua Bethlem bawngin ah a lo piang..' tiin kan sawi thin a.Mahse,bawngin a ni ngei tih fiahna a awm lo.Bible-in bâwng inah tiin a sawi lova.Mahse,ran chaw pekna thlenga muttir a nih thu kan hmu a.Kha ran chaw pekna thleng kha eng ran chaw pekna nge kan hre thei lo.Sabengtung chaw pekna a ni mai thei!

Tin,AD 150 lai vel khan Justin Martyra chuan Isua chu puka piang angin a lo sawi a.A dik ngei pawh a rinawm hle a,Hmanlai Bethlehem in tam tak chu Púk behchhana sak a ni hlawm a,tunthleng pawhin anla ching chho zel a ni.Chutiang puk an behchhan chu ran dah nan an hmang thin a ni.Chuvangin Isua Krista pawh hi Pûka piang a nih a rinawm viau a ni.

Isua pianna hmunah hian Biak in lian pui mai Church of Nativity an tih chu a to lurh mai a.He biak in hi kohhran pawl pathum Roman Catholic,Greek Orthodox leh Armenian ten an inchan sem a ni.Isua pianna chung maicham chu Armenian kohhran ta a ni a,Mahse Isua pianna hmun pûk chhung erawh chu Greek Orthodox kohhran ta a ni thung. Heng pawl hrang pathumte hi hmun in chuhin nasa tak takin an buai fo thin a ni.

Chutiang a nih avang chuan Krismas hman hun pawh a rual thei lova,Roman Catholic hovin Dec 25 ah an hmang a.Greek Orthodox in Dec 29 ah hmangin,Jan 6 ah Armenian hovin an hmang thung a,Dec 25 hi a ropui ber thin!

Isua an muttirna ran chaw pekna thleng hi Rome khuaa Santa Maria Maggiore biak inah tunthlengin anla kawl tha niin ansawi.

Isua pianna hmuna biak in Church of Nativity pawh hian a hnuaiah puk 11 a nei a.Chung zinga pakhat chu Isua pianna an tih ber chu a ni a.Biak in maicham hnuaia puk awm chu Isua pianna hmun an tih chu a ni.Church of Nativity hi AD 339 a hawn a ni a,Constantine-a'n biak in lian tak tak a sak zinga tihchhiat loh awm chhun a ni.

Muslim ral len lai khan Kristian biak in reng reng chu suasama tihchhiat vek a ni a,chutiang karah chuan Church of Nativity chu a him mial thung a ni.A him chhan ber ni a ansawi chu,he biak in chhung bang hmun khat laiah hian khawchhak mifingte lem khan an ziak a.Chung mifingte lem an ziak chu Persia ho inchei dan anga ziak a ni a.Chu chu Muslim hovin an hmuh chuan an tih chhiat loh phah ta a ni.He milem ziak hi tunthleng pawhin biak in bangah hian hmuh theihin ala awm a ni.

Engpawhnise,a pianna hmun a pawimawh ber lova,A pianni a pawimawh ber hek lo;Min chhandamtu Lo pian kan lawmna Ni zawk a ni a.Thinlung alamah kan hawn em? tih hi a pawimawh zawk a ni.
(PhoeniX)