INLARNA KA HMU

    Kum khat chhunga thla en ber zan October 2015 fullmoon zan chu khawsik pai reng chungin ka hmang liam ve a,atuk zan pawh chu chutiang ang tho chuan ka hmang ral leh a....!

Thlaarkai den zan chuan Ka khawsik avangin zanlai dar 12:13 ah chuan ka thangharh a,namen lovin vawt ka ti mai a,ka khur deuh hlak hlak a,ka bula mu reng ka nupui chuan min buaipui nghal sawk sawk a,damdawite min eitir hnuah chuan zawi zawiin ka ziaawm leh deuh ta a.Damdawiin min chhawk deuh hnuah chuan alum ka ti leh ta em em mai a,
ka thlan chuan min bual zawih zawih mai a!Bathroom ah insil turin ka lut ta thuai a.Ventilation atanga thla tla lam engno em em mai rawn inkap lut ruih chuan ka rilru ala teh tlat a niang chu, van lam chu ka thlir ta vawng vawng a!

Thla eng mawi em em ka thlir reng lai chuan vanlaizawlah chuan thla ang mai a engno mawi em em mai hi alo lang a,chu thil chu eng viau mahsela ka mit lawng chuan ka thlir thei reng thova, chu eng chuan van zawng zawng chu a fan chhuak vek a,lei a thil awm reng rengte chu alang fiah ta hle a.Tin, lei lam atang chuan thawm ri maksak leh rapawm tak takte, mihring rum ri leh tap thawmte ka hria a,lei chu a sawi dur dur mai a!

Vanlaizawlah bawk chuan van kawng khar chu a inhawng a,Pathian ropuina eng zam vel chu a mawi em em a,a ropuina chuan hmuntin chu a tieng vek a,thil ri rapthlak tak takte chu an ngawi ta thuap a!Lei chu a reh ta vung vung a.Van kawngkhar inhawng mek chu ka thlir reng a.Mahse, ka beisei angin Pathian hmel reng reng ka hmulo a,Van kawngkhar atang chuan vantirhkoh pathum hi anlo tawlh chhuak(ni berin ka hria) a.An zinga pakhat chu ring takin a au a,lei chunga awm zawng zawngte chuan a awri chu an hrethei a ni.

"Ngaiteh, tun hi hun lawmawm chu a ni a; Ngaiteh tun hi chhandamna ni chu a ni. " IIKor 6:2 tiin.

Chuveleh, mipui sang tam takte chuan Pathian an au ri ta mum mum a,sang tam takte chuan Vantirhkoh thusawi chu hrelo ang hmakin an awm ve thung a!

Van kawngkhar chu an khar leh ta a,chuveleh thim lal tirhoh Pathian hlau a tawmim ho chu an bihrukna hmun atang chuan hmanhmawh baklengin anlo thlawk chhuak ta sup sup a,Pathian au a Pathian zawngtu tupawh mai chu an thiam ang angin hneh ngei tumin an bei ta chiam chiam hlawm a.....!

Bathroom kawngkhar ri dawt dawt chuan minti harh hlawl niin ka hria, mangang tak maiin kannu chuan minlo ko vak vak alo ni a.

Tichuan, harsatna dang tawk lemlo chuan kan mu ve leh ta a,mut hmunah chuan ka thil hmuh leh hriat chu kannu pawh la hrilh duh lovin keimah chuan ka ngaihtuah zui ta vang vang a.

'Aw, kan damchhung ni reiloh nen, chhum reilote lo langa ral leh ang lek kanni anti a,chu ai pawh chuan a reilo zawk a ni si a! Engvangin nge Pathian duhdanin ka awm mailoh thin le!!? Piang nawn leh ngat ila chuan ka hun pum hi Pathian tan ka hlan tur. ...' Ti a ka suanghtuahna kal mek chu vantirhkoh thusawi chuan minti harh zawk a.Tunhma nun a pawimawhlo; Pian nawn leh kher pawh angai chuanglo. ..

"Ngaiteh, tun hi hun lawmawm chu a ni a;
Ngaiteh, tun hi chhandamna ni chu a ni. "

AMEN!