HMANGAIHNA AIAH ROSUM

Ani chu ka thinlung leh theihna zawng zawngin ka hmangaih a,amah ah chuan ka suangtuahna zawng zawngte chu a awm vek a ni,ka duhin ka thlahlel ngawih ngawih thin a.Hmeichhia azawnga duhawm ber niin ka ngai hial thin a,ka veiin ka àtchilh a ni deuh ber mai a!

Kum hnih chhung chu buaina leh harsatna em em awm lovin kan inngaizawng a.Mahse,Hmangaihna thawnthu a chanvo pawimawh tak luahtu 'Doral lian' chu kan karah chuan alo hrang ve tan a.Chu mithar pa chuan ka duatlai chu neih ngei tumin a hêl ve reng a,mahse,ka duati chu ka rin tawk thin em avangin engahmah ka ngai lova.Ka lak atang chuan ka duatlai Malsawmzuali chu min laksak theih ka ringlo reng reng a ni.

Hun leh ni te aliam zel a,ka hmelma pa chuan kian san reng reng atumlo a,chumai nilovin Sawmtei nen an inkar thu ngaihnawmlo leh mak tak tak hriattur chu a awmta fo mai a.Amah ka hmangaihna avang chuan ka mit chu rei tak tih delin alo awm reng a..

Ka hmangaih em em,ka ta tura ka lo ngaih ngheh bur tawh Malsawmzuali chu ka rin ang alo nilo tih ka hrechiang tawh a,chu pa nen chuan minlo kawp ru reng alo ni a.Mak ka tikher mai a,kum hnih chhung zet kan inzuia ka hrechiang viau emaw kalo ti a.. Hmeichhiate hi hriatchian tak tak theih annih pawh ka rinloh rum rum phah a ni.

Ani nena kan hun hman dun liam tawhte chu mitthla ah anlo lang zut zut mai a.Thla êng no nghulh hnuaia inthlahlel em em a inkuaha hmangaih biahthu kan infah mial mial laite,duat taka a hmui a ka fawh vawng vawng laite chu nimin ami ang maiin anla chiang si a;Mahse,a der vek anlo nisi a,khang zawng zawngte kha engmahlo a liam mai atan chuan ka phallo asin..

Malsawmi chuan min phatsan mahsela ka thiamlo phallo a,chu pa thiamloh vek chu niin ka hria a,ka thin a rim em em mai bawk a.Kan cho phak rualloh milian fapa a nih vang mai a,ka duati chuan duhve a nihte chu ka ring rum rum a."Aw..hausak ve ka van chak tak ém.." tiin ka rum vawng vawng mai a..

Hmangaihna chuan min chiah zawrin min bual â hneh hle a ni ang,a thinlung min pe hlek silova 'ka hmangaih che' min tihte chu thlamuang takin kalo ringve em em si a.Ka hmangaih luatna chuan ka mit pawh alo tidel rei hle a,a mitmeng uire reng chunga minlo melhte kha kalo hrethiam der silova.. Thil thleng chu mumang mai nise ka ti ngawih ngawih a ni.

Min hmangaih ve ngai miahlo anga ka suangtuah chang phei chuan ka tim ru er er a,ka bing chûk chûk thin a ni.'Min hmangaih ve ngailo chu nise a thianghlimna kha min hlan tawplo ang.He pa hian a sum leh pai hmangin a bum a ni' tite in ka inhnêm leh ringawt thin a.Chupa chu an hausak vang mai maia Malsawmi chuan duh a nih chu tlang rin dan tak pawh a ni a.

Amaha ka rinna te chu hlauh vek tawh mah ila,then tak chu harsa ka ti hle a,ani pawh chuan min then duh chuang lova;Mahse pakhat kawp pawh a bansan duh bik chuang silova.Chutiang ringawt chu atha dawnlo a ka hriat avangin ka thenta nge nge a!

Ka thinlung hliam chu na hle mahse ka inchhu ngeng lui ve tlat a,'Phuloh nghah chu khua tlaina mai mai,hmeichhiate zawng an tam em mai!' tiin ka inhnêm chawpa,ka rilru thawidam nana tha bera ka rin ngaihzawng dang chu ka neita thuai a.

Bialnu dang chu nei mahila ani ka lo hmangaih zia tilang chiangtu mai mai anni a,midang rin ngam ka harsat phah hle a,thinlung zawng zawng pek chu ka thei tawhlo a ni ber mai a.Ani khan hlauhthawnna ser nung chu min hnutchhiah tlat tawh a ni.

Ani khan sum leh paite chu thlahlel tak ang in lang lemlo mahse angaina hle thin tih chu ka hria a ni.Mahse,ka dem miahlo,sum leh pai chuan tih theihloh a nei zeuh zeuh chauhsi a ni.Ani chauh pawh nilovin hausak tumin tupawh hi kan hman hlel tlang vek zawk a ni.Nimahsela,midangte dàwnlo lêk a,pam ham tak maia hausakna a ûm duh chu ka ring phalo reng reng a ni.


Kum khat pawh an inzui hmanlo tihah chuan Malsawmite chu an inneita a,an inneihna pawh a duhthusam ang ngeiin a ropuiin lawmpuitu pawh an ngah nangiang mai a ni.

Tichuan,an inneih ni atang chuan kum khat vel zet chu ka hmulo zuita vang vang a.Nikhat chu hmun pakhat ka kalna ah ka hmu nawlh mai a,alo chêrin a dawldâng em em mai a,hmel hlim leh nung sarh mai a put thin kha a nei tawh lova,a pawr em em a,han en ringawt pawh chuan a chauh hmel hle mai a.A chhan zawh chu chàk hle mahila ka tihtur niin ka hre tawh silo a.Ka khawngaih rilru hle a,ka mitthla ah a cham zuita reng a ni.

Kan inhmuh atangin thla khat aliam chauh tihah chuan chanchin duhawmlo tak mai ka dawng a.Engemaw ti a hmun hrana ka thangbo lai a ni a,Chawhnu lam dar 2:12 a ni a,ka thianpa in rawn phone in Malsawmi thih thu min rawn hrilh a,chanchin a hriattheih ang ang chu min hrilh vek a,athih dan chuan min dêng na kher mai a!

Malsawmi pasal chu hmeichhe awm nêm zawkte kut thlak hmang tak mai alo ni a.Zu a ruih chang apiangin Sawmi chu a khawih thin a ni.Sawmi chuan fa a hrin sak lawk theihloh avangin engemaw ti lai atang khan a nupui chu a tiduhdah hle a,kut pawh na tak takin a thlakta fo mai a ni.A nihna takah chuan fa pawh pai har tak ala nilo a ni.

Hemi tumah pawh hian a pasal zu rui chuan Sawmi chu a sawisa chiam mai a,Hospital hial pan pui angaia,anatna chu tuar zolovin a boralta alo ni a.

A pawi ka ti hle a,Sawmi chu ka lainat em em a,ka nunram chu a chauzo vek a ni.Kan hnate kan la laklawh deuh bawk nen hawn ve kher pawh ka tum lem lova.Dar 4:37pm ah chuan Malsawmi nau Sangzuali(Sangtei) chuan min rawn call ve leh ta a.

Sangtei chuan a û in angaìh thin zia vawi tam tak abulah asawi thin thute,a hnukchah dawn thleng pawha ka hming ala lam tawk tawk a ni tih thute sawiin,'ka u rilru dam nan tal pawh a hmel hi lo hmu leh hram hram ang che aw, khawngaih takin...' ti a tap hlawp hlawp chunga min ngenna chuan min hnehta viau mai a.Tichuan, haw tur chuan ka insiam ta sawk sawk a,Sawmi ruang chu lumen pui tur mah nise ka hmanhmawh em em thova.

Tichuan,kan khua chu thimhlim thet thetah ka thlengta a.Ka thiante ho chuan minlo nghak thap tawh a.Zán dàr 10:00 rik hma hretah chuan Sawmite In lamah chuan kan chhuak phei ve ta a.

Engtin emaw hian ka awm deuh tlat mai a,ka hnukte chu a ulh hialin ka hria a ni.Ka thinlung tak chuan Sawmi boral ta mai chu ka tuar em em mai a,a thi tih ka hriat rualte khan ka lung a leng lawk veng veng kha a nisi a.KA thinlungah chuan Ka hmangaihna thenkhat alo la chambang reng a ni ang..

Sawmi ruang ka hmuh chuan ka phu deuh zawk a,Sawmi chuan ka kawr leisak ngei mai kha alo ha a.A hnu a anauin min hrilh leh danin Damdawi In a anluh dawnin ka û chuan dam chhuah a inring lova,ka kawr leisak chu haktir ngei ngei turin alo ti a ni a.Ka hmuh hnuhnun ber ai khan a hmel chu hlim hmel zawkin ka hria a,thlamuang taka muhil ang maiin a hmel chu hmuh a nuam a.

A birthday lawmpui nana ka Sana pek kha alo bun reng bawk a.Amak ka ti tawlh tawlha,Sawmi chuan minlo hmangaih ve tak tak a nih ka ring thar lehta zawk a ni.

Chutianga kan hun liam tawh hnute suangtuaha Sawmi ruang ka thlir reng lai chuan ka mittui chu a rawn parawl ta kiang mai a,ka thianpa chuan hrethiam takin chhuah harh rih chu a rawtta thuai a.Chutih lai tak chuan Rawlthar rual ho chuan thingpui anrawn chawi lut ta thliai thliai a,chu chu remchangah la in pawn boruak dawng turin kan chhuahsan ta rih a.

Sum leh pai kan thlakhlelh lutuk avangin awm leh mawi kan thliar lova,kan dai pelh pheng phung a,sulhnu pawr tak tak kan hnutchhiah a,lungngaihna leh manganna ka tawrh phah a,thenkhatte phei chuan nunna hialte kan chàn phah thin a ni.Sum leh pai hi hlimna a ni ber lova,Nupui pasal zawn kawngah phei chuan sum leh pai aiin Pathian a chhuak Hmangaihna dik tak hi kan dah pawimawh hmasak thiam a tul hle a,Fimkhur taka kan tihturte kan ngaihtuah nawn fo thin hi atha hle a ni.