ESKIMO-TEN VUR-SAVAWM AN THAH DAN

- Andy K Zarzoliana
Khawvel hmar tawp vur rama cheng hnam chikhat 'Eskimo' an tihte hi an chanchin tlemin han chhui hmasa ila a tha awm e. Eskimo-ho hi Khawvel hmartawp lam, Vur ramah an khawsa ber a. Eastern Siberia (Russia), Alaska (United States), Canada, leh Greenland-ah te an cheng deuh ber a ni. Eskimo hnam hi, hlawm lian deuhvin chi hniha țhen hran ani leh a;chungte chu, 'Inuit' an tih mai thin, Canada, Northern Alas leh Greenland-a chengte bik an ni a.


Pakhat leh chu,'Yupik' tia koh niin, Alaska leh eastern Siberia-ah an cheng deuh ber țhin.
"Eskimo" tih hi America-a sawi dan a ni a. Canada-ah erawh Eskimo tih chu tawngkam bawlhhlawh leh huatthlala tak a ni a, a aiah "Inuits" an ti a, an tawng azirin hming an phuahsak mai thin a ni. Sapel leh Sangha man chu an eizawnna pui ber a ni a, sapel dan kawnghmang pawh an sapela te azirin an hre ril thei hle a ni.
Eskimo-ho chuan sakhuana an la urhsun thin hle a, Sapel, damlo tihdam, thuruk haichhuah, sik leh sa thunun, hma lam hun hrilhlawk, mite malsawmna pek, mitthite biak leh thlarau tha leh felho biakpawh te thlengin an sakhuana chuan a phuarkhawm vek niin an ring a, an puithuna thil tak a ni.

Eskimo-ho hian sangha lian ber chi, Nghapui (Whale) pawh an pel thin a. An pel thin hun a ral apiangin, "Spring Whaling Ceremony" an hmang thin a ni. A chhan chu, a lehpeka Whale an pel leh hunah, an hlawhtlin theih nan Whale thlarau hnena lawmthu sawi leh dilna hun a ni ber awm e.

Khawvel hmartawpah hian kum chanve chhung tehmeuh khua a thim thin a, ni tla tur ang ruaiin khua a eng ve chang chang a. Vur-thli a tleh reng bawk a, 'frozen desert' te pawh a lo pianchhuah phah hial a, chung hmuna khasa thin Eskimo ho tan chuan boruak inlumlehdan chu a khirhkhan thin hle reng a ni.

Eskimo-ho hi pemkual reng țhin an nih avangin a awlsam zawng hlirin in an sa a. Nipuiah, Thing hmangin Puan In an zar a, a khuh nan Savun an hmang mai thin a, a bikin, Caribou vun leh Seal vunte an hmang deuh ber thin. Thlasik a lo thlenin vur tlang hmangin snow-house an sa a, an tla darh leh mai thin a. An hun tam zawk hi sapel nan an hmang thin ti ila a sual tam awm lo ve.

Eskimos-ho hi Sapel thiam em em an ni a, kum tluana an ei tur Sa pel ngat ngat chu an hnapui ber a ni. Sea mammals te hi Thlasik laiin an pel nasa thin hle a. Lui lam sa an pel thinho zingah chuan, seals, walruses, beluga whales, narwhals te an ni nawk hlawm a. Seal chu a sa bakah a vun an la bawk a, Walrus erawh a ngho an la thin a, a sa erawh Ui chaw a ni thung. Khawmual lam sa an pel thin chu, caribou, musk oxen, arctic fox, polar bear, arctic hare, arctic birds te a ni tlangpui thin. Nipuiah hian Sangha man leh caribou pel chu an tih ber thin a ni a. seal leh walrus te pawh luidungah an pel thin; mahse, an Sa ngaihsan ber chu Caribou a ni. Favang hun a lo thawt chuan, caribou-te chu a rualin Chhim lama pem turin an tla thin a, hei hi Pasalthate tana hun remchang ber a ni awm e. Thlasikah ve thung chuan, Sangha man ve tak thin mah se, boruak vawt lutuk avangin, harsatna a tamin a nasa hle a, thlasik laia an ei ber chu Seals a ni thin.

Inuit hnam hian sangha an ei nasa a, Sangha man pawh an nunah a bet tel tlat thin. An chaw pui ber a ni e, te pawh kan ti thei hial awm e. Whitefish leh trout an man nasa hle bawk. Thlasikah chuan luipui chung (surface) hi vurah changin a khang vek thin a. Chu chu, tiawngin Sangha manna awng a ni ta thin a ni. Inuit (Eskimo)-ho hmanrua chu tun hma chuan, Lung atanga siam leh Ramsa ruh, Ngho, ki te a ni tlangpui a. Ui hi sapelnaah leh an lirthei Sledge hnuktuah a tangkai hle a, sapelna hmunah pawh ui an chhawr tangkai hle thin.

Eskimo-ho sapel dan kalhmang tam tak zingah vur-savawm (polar bear) an pel dan leh an thahdan hi a dangdai riau mai a, tlemin i han chhuizau deuh teh ang.
Hmar tawp lama khawsa thin, vur-savawn kan tihte hi, Alaska, Canada, Russia, Greenland, leh Norway-ah te an awm thin a. Khawvel boruak lum chho zelin an chena hmun a tihkhawloh vang leh mi kut tuara an thih thin avangin tunah chuan khawvela ransa chi mang hlauhawmte zingah a tel ta hial mai. Kum 2008-a zirchianna a alan danin, vur-savawmte hi khawvelah 20,000 - 25,000 vel chauh an dam tawh niin an chhut a ni.
Vur-savawm te hian ‘seal’ (sahram lian chi ka ti mai) an tih tuia cheng țhin sa leh sangha te hi an ei deuh ber thin a.

Chung Vur-savawmte chu Eskimo-ho hian a sa ei atan an that nasa thin hle a ni. A sa an ei mai bakah an vun chu an țhui puma intuam lumna tha takah an hmang mai thin. Tin, an thau chu an eirawng bawlna atan a țangkai hle a. An ruh leh hâ te chu hriamhrei atan an hman țhin avangin paihtur an nei lo a ni ber mai.

Eskimo-hovin vur-savawm an tihhlum dawn chuan, a hmasain tuia cheng seal chu an man hmasa a. Chu chu an tihlum a, a thisen chu hmun khatah an chhungkhawm a. Chu thisen ah chuan tahtawn chem hriam tha ver vawr an phum leh a. Chumi thisen awmna hmun atang chuan rei lo tea savawmin a hmuh vat theihna turin a chheh velah thisen an theh kual țhet țhet a. Tichuan, khua avawh em avangin rei lo teah thisen chu a lo khang ta mai thin a.
Chu thisen rim chu, hmun hla tak atanga thisen rim hre thei vur-savawm chuan, a rawn chhui hmu vat a. An thisen dahkhawmna kiang vela thisen farte chu a rawn liak zel a, a tawpah chuan thisen dahkhawm chu a liak ta a. Vurin a lo hmeh khang tawh thisen anih avangin a vawt hle a, chu chu savawm chuan a liak mawlh mawlh a, savawm lei chu a hikin a chawmawlh hle a;mahse, savawm chuan vawilehkhatah nâ a hre mai thei lo a ni.

Savawm chuan thisen chu a liah rei hnuah phei chuan thisen chu a lo tuiril deuh deuh a, ani lah chuan a liak duhthawh tulh tulh mai si a. Nakinah chuan thisena an phum ruk chem tê chu a liak ta tawk tawk mai a, a lei chu chu chem hriam tak chuan a ât thi pheng phung a;mahse, savawm chuan ama thisen ngei a liak tawh ani tih a hre thei tlat lo a ni. Chu tak chu ama nunna atana pawi ber mai chu a ni.

Savawm chuan a liah nat poh leh a thisen a chhuak hnem ani tih a hriat ve miau loh avangin atawpah chuan a duhthawh luata leiah a inliak chau der mai a, chulai hmunah chuan thichhawngin a tlu der mai thin a ni. Mawl mang takin 'chawbel bulah țamchhawlin a tlu chhe der mai' kan tithei ang.

Chutia thisen hloh tam luat vanga savawm a tluk hnu chuan, ral atanga lo enthla rantu Eskimo-ho chuan awlsam takin savawm chu an tihlum tawh mai thin a ni.