Ramhuai Sachuam Satial mak danglam!!

*SIH HUAI NEI*

- Mawia LeneX

😱😱😱 Kum 1919 ah khan Mizoram ah 'Hripui' alêng chiam mai a. He hrî hi influenza anga sawi nimahse a hlauhawm hle a,he Hrichhia in a man tawh phawt chu chawplehchilhin an awm hmunah an tlu tawp a,an thi der mai zel niin ansawi a,a rapthlak hle a ni. Indopui I-naa Mizo tlangval France ram kalte rawn kai haw ni a sawi a ni.

He Hrîpui hian Serchhip khua pawh nasa takin a nuai ve a, mi tam takin nunna an chan a, Chhungkuaa mang ta thakte pawh an awm niin ansawi a,thlân pawh an inlâi sênglo hial a,khur khatah mi 2/3 te anzalh mai a ni.Thlân vûngte chu râlkhat atanga thlîr pawhin a sên vul thei hial a,chu lam mual veng chu 'Senvêng' tih alo nita a ni.

Kum 1933 ah Serchhip khua chhungkaw tam zâwk chu an khaw tlak lam a awm, lofing kal lek tur a awm an Khawhluihlui 'Kawlri' hmun lamah anlét leh hlawm a,Serchhip khua chu mi tlêmte chauhin an luah ta a. Kawlri hi Mary Winchester an lak letna hmun kha a ni nghe nghe a ni. 

Kum 1935 ah phei chuan pêm bâng tlemte pawh chu Kâwlri lamah chuan an insuan zota vek mai a.He mi kum hian 'Mizo Zirlai Pawl' hi din a ni a,a hnu lawk 1938 kumah Zâwlbûk tihtawp a nive leh bawk !! 

Kum 1935 hian Mizoram pumah 'Thlarau thianghlim harhna' a thleng a,Serchhip khua pawh nasa takin harhna chuan a tuam ve a, Bialtu Pastor hmasa ber Pastor Chhâwna hunlai a ni.

He 'Sih huai nei' chanchin hi kum 1936 a thilthleng a ni a,ka piin apa thiltawn min hrilh a ni.

Ka pi pa hi Dêngnûara ani a,he thilmak tak a tawn lai hian ka pi hi tleirawl tan dawn ek ek, tui umli khirh rual vel a ni a. Dêngnûara chuan Dârtuahthanga leh Dârdêngite fanu Dârneihthangi chu nupuiah neiin fa 2, Lawmthangi leh Thandanga annei hman chauh tihin a boral ta mai a ni. He a thiltawn mak danglam tak avanga boral niin mi thenkhat chuan ansawi thin a. Mahse,ka pi erawh chuan a pa thih chhan chu thildang vang niin a sawi thung a ni.

Serchhip IOC Motor kawngpui sir a 'Hmâwng kung' lian leh upa tawh tak hi ka pi pi 'Dârdêngi' Hmâwng tih a ni a, He Hmawng kung hi a lar phian mai a, Serchhip khawchhuak dik takah chuan hrelo fa antam hauhlo ang tih tur hi a ni. 

*SIH HUAI NEI*

_(Ramhuai sa chuam Satial mak dangdai tak hmuh a ni.)_

*_(True Incident, 1919)_*

_"He thilthleng hi a hlauhawm leh hrang zawng a ziah hranpa ka tum lemlova, thilthleng tak tak a nih avang hian anihna tak leh a fiah zawk nan a hunlai a thilthleng leh hmun te ka sawi kual nual mai a, a ngaihthlak/chhiar dan minlo thiam sak mai dawn nia." Author_

☠️ Hmanlai kan pi leh pu te kha mi hrat khawkheng leh taima rum rut mai niin rim takin hna an thawk thin a, Hmakhawsang atang tawh a, tu pa mahin anla vah dar ngailoh Ramngaw chhah pui puite chu tukdarhin buh an ching thin a ni. Thlawhhma zau tak tak neiin kumkhat hawpkhawp thar ngei an tum thin a, Intodelh kha an thupui ber pakhat a ni. 

Chutiang a ram zau tak takte thiat a, Thing leh mau an kih thluk rem rumte chu 'Chap' anti a, Chap te chu thal nisa vawl vawl mai ah duhthusam a ro in an pho leh a, Chapchar hun an nghak leh phawt thin, hetih hun lai hian Mizote kut ropui tak 'Chapchar Kut' pawh an hmang thin a, Chapte a ro tha hle tawh a anngaih hnua ah an hal fai a, buh an chîng ta chauh thin a ni. 

Hmeithai leh thawk mawh chhungkuate tihloh thlawhhma nei chin zawng zawng chu Chappui rawh turin mahni seh seh mualah an liam sung sung a, A nawlpui ram bawh chu awm mahsela,hemi kum hi chuan Dengnuarate chhung chuan Chul rih leh antum avangin, nikum an chul hrul lawk chu an vat leh a. Khaw mi tam zawkte'n an bawhloh mual lamah a bingin annei thung a, anni Unau hnih pawh an Lo hal ve tur chuan liam antum ve mek bawk a, Dengnuara nupui Darneihthangi chuan,"Thlai chi thlak leh eng ilo fahrante tih pahin ka lo kal ve ange." atih tlat si avangin an hruai ve bawk a,Lo pui halna ah hi chuan hmeichhia hi an hruai tel ngai meuhlo a ni. Tichuan, an pathum chuan an Lovah lam, mi sa leng dawr te liam lohna lamah chuan an inchhir liam ve ta a. 

Dengnuara chuan hmahruai a, kawizal lian tawk tak ak in Chengrâng sei riang ruang a pu voh bawk a,a nupui chuan Paikàwng phurin a hnungah a zui a,Pawithanga chuan kal paha vaibel pet khu vung vung chungin hnu a dal thung.

 Chutia,titi phungleng te sawi a an rik bal bal reng hnu chuan an Lo tur chu an thleng ta hlawl mai a, vaibel bengkhat vel an thut thlan daih hnuah chuan an mei lam sial tawh sate chian leh thuak thuakin an hmabak zimte chu an han thian fai leh rih a,an zo thuai a. Dengnuara chuan, "Taipui, kan dep kai zui mai dawn emawni le? khua hi nghak tlailo mai ila athat zawk ka va ring em! Ni a chawhnu deuh chuan huihchhuk thli hi a tam duh riau mai lehnghal a." a han ti a, a nau Pawithanga chuan, "Ni e, a pawi tam pui hauhlo ang, kan mei lam sialte hi a rintlak thawkhat viau chuan ka hria. Mahsela, fimkhur tluk a awmlo ve, khua in zah angai anga kan chhuah emlo turah ngai ila,chhem kai vat chu a tha zawk awm e." tiin alo chhang ve mai bawk a. Tichuan, an meichherte chu chhem kaiin muangchang zui lo chuan mual hnih ngawta inchap duai mai chu a mawng atang chuan an han dep tan ta a, alaiah inthenin a sir tawn tawn lam pan chuan an dep kai dun zung zung a. 

Khuain a zir bawk nen Chap tang tha et awt leh chhah tak mai a ni bawk a, karloah Meipui chu a inhlap ri hlup hlup mai a, meialhte chu boruakah chuan an invawrh sen chho zuai zuai mai, chu chuan rang taka thli ko nghalin Meipui chu atawk lekin a rawn chhem alh zual hum hum mai a, dawihzepa tan chuan zam rum rumna tur khawp a nasa a ni ve reng a ni. 

An Unau chuan vau sir tawn tawn ah chuan awm dunin mei chhuak tur awm angte chu an mitmei reng a, Denga phei chuan Sa tlan chhe kah turte an awm tak thutah tiin a Silai chu a ak reng bawk a. Mual per zau takte a nih thin avangin chap tlu hnawk nuai kar atanga hnim rawn chawrno duah hluahte chu Sakhi ten an duh thin em avang chuan phawk tlan tur hi an awm ve thin chawk reng a ni. 

Engemaw chen chutia an chap rawh alh hum hum mai leh puak khu tuk tuk mai an nghah vang vang hnu chuan Ni pawh chu a chawhnu her tan mek a, an chap rawh pawh a kang rèm tawh, vutdur sa pawh a dai thawih thawih ngam tawh ang tih tur hi a ni tawh a, hmun thenkhat lai a thing la kang zo velo te erawh chu anla mut khu vung vung hlawm a, Ni sa lutuk bawksi nen chuan boruak chu alumin a thawpik thlak mup mup hle mai a..!!

Chutia mei a rèm chian a, a pen bo san ngam takah chuan Dengnuara pawhin Mau thei lian tawk tak pahnih a siamsa chu a la a, an eirelna vel tur tui thal turin an vau luite kawr lam pan chuan aliam zui  nghal a, a nau Pawithanga erawh chuan bainam tur eng ilo fahran dap khawm tumin an nikum Chul lamah chian a lut bo zui ve bawk a, Dari erawh chuan a thlai chi ken te chu chawfak kham a thlak nghal mai theih tur a siam fel mawlh mawlh a, a buaiin a inchap hnawk ve nasa hle thung a. 

Ni chu sàrin a kual kung mai a, chumi ni ber kher chu a sa zual bik emaw tih mai tur hi a ni a, Thli thaw ve te lah chu a lum hian a lum hulh hulh hi a ni ber a, boruak chu a uap churh a, meikhu nasa takte avang chuan khaw hawina pawh a kaw meuhlo a ni. 

Denga pawhin luite ruam chu a dai lut ve mek a, khawlum em em karah chuan a boruak pawh a hahdam thlakin a zangkhai viau ngei ang;Mahse, luidung chu meikhu in ala bawh deuh chuk reng thova.

Kawr kam chiaha Belphuar kung sang tak ler a,khawhar hmel em em a Tuklo hram kurh kurhte,ngirtling leh rengchal kiu ral ral maite leh a kang chat tep ang tih hriat tak a tui luang ri ker kerte chu thawm hriattur awm chhun anni deuh mai a.Thal va ek charah meuh pawh he lui hi a kang ngai lova, luang tur hi a awm reng a ni. 

Tui um dawhna remchang deuh zawngin Denga chuan lui hnar lam a pan a, thui pawh a chhoh hma chuan lung mam deuh pil pel, lungtat tiat awm lek chu a han rap let palh zauh a, chutah mak tak maiin chu lung phek takte hnuai atang chuan sa danglam em em mai, patling kuttum tiat tur vel pahnih hi an rawn dawk chhuak zawk mai a, a beisei loh lutuk thil anih avang chuan Denga pawh a phu zuk mai, mak ti takin a thlir ta ngawt mai a ni. 

Chu sa danglam tak pahnih chu an intiat hle a, avâng zawngin a dum leh a vàr in an taksa chu a tial chhuak biai a, an hmai a bialin Uite-pangang te pawh an ang lek lek a ni. Duat taka enkawl lai ang maiin an thau chum biang a, an mawiin an duhawm hle mai a. 

In ngaihtuah harh deuh thut niawm takin Denga chuan a mau bur ken pahnih chu dah lawkin man tum chuan a um ta a. Mahse, chutiang a man maitheih anlo ni awzawng lova, chungSa pahnihte chu Denga man phakloh deuh si ah chuan U chang ang maiin an sawt ta therh therh mai a, man theih ngei inbeisei in a um ta zel a.

Luikawr kawi hnih zet an in um ta a, beisei awm taka an awm zel avang chuan Denga pawh chuan phur tak chuan ala umzui ve zel a, nakinah chuan chung sa pahnihte chu lui kam ko sang vaklo laiah chuan an per kai ta a, Denga pawh ala kai thei ve zel a, thui pawh an inum leh hma chuan Sial pachal bawhna tiat zet tur Sih alo tling kung mai a, chutah chuan sa pahnihte chu an zuang lut a,an bo ta vang vang mai a,angaihna hrelo leh mak ti takin chu sih chu a thlir ta reng ri ngawt mai a ni.

Chu Sih bul velah chuan sa hniak pawh alo chiar ve dip dep mai, mak deuh maiin chu Sih chu enkawl lai ni a hriatna a nei tlat a, abul velte chu a fai vuk a, sa hnu pawh an lang chiang viau mai, chumai bakah Ngaw hnuai a awm nisiin lenghawr tla hmuh tur a awm miahlo mai a, chhâmèk tlemin a bawh ve chek tih mailoh chu a tling kung mai a ni.

Denga chuan Sih sir kual vel a chhâmêk te chu thingtang a thai kiang thuak thuakin a han bih vel ngial naa Khawimu benthlak ang maiin hmuh tur leh an thawm riva reng reng hriat zui tur an awm lova, makti rilru tak leh nuam ti vaklo chuan kirsan mai a han tum a. Chutihlai tak chuan mipa Aw ni ngei tur, ngaihno beilo zet mai leh thum bel bul; mahse,fiah tak si hian a rawn be ta thut mai a, rang takin a han hawikual nghal thuai a;Mahse, Mihring emaw thil han phe zeuh emaw hmuh a nei lova, a thu rawn sawi atang chuan rawn betu chu mihring a nilo tih a hre leh nghal thuai bawk a.

Dengnuara chu a hawi kual vel ruai a, Mahse,thehmeh ansawi ang maiin a reh zui leh vawng vawng mai si a, chu aw chu sih khur chhung atanga lo chhuak niin a hreta a. Aw chuan,"Leilung pian tirh a ta helai hmunah hian kan cheng tawh a, tuman min la hmu ngailo, nang chauh hi min pal chhuaktu awm chhun i ni." a rawn ti a. 

Denga chuan a hlauthawng rilru hle mai a, Hmuh thianglo tawp hmu ngeiah inngaiin a awm a nuamlo nghal riau mai a, "Min that dawn nge min nun zok dawn ni ang!? " ati ru nauh nauh mai a; Mak tak maiin a ngaihtuahnate chu hre vek thei niawm takin Aw bawk chuan, "I vanneih hlauh chuan i dam ang a, i vanduai chuan i thi ngei ang!" tiin a suangtuahna chu a rawn chhang leh ta mai a, Chutah zet chuan Denga pawhin Sih huai ngei ani tih hria in muang chang zui lovin a tuithawl dahna lam chu a pan thlak san ta thuai a. 

Hmanhmawh rilru tak in a tuiumte chu a dawh khat zung zung a, an innghahna lam chu a pan chho zui ta nghal a ni, A ngaihtuahna ah chuan thil dang reng a leng tawhlo, chu thil mawlh chuan a rilru a luah khat tlat tawh a, a awm a tinuamlo hle tawh a ni. 

An innghahna a han thlen chuan Pawithanga leh Dari te pahnih chuan anlo nghak reng tawh a,"A engtia patling pui si naupang chhia ang mai a hmanhmawhna chang reng reng i hriatloh mai, khawi han la rawh" lo tih hlak hlak pah chuan Dari chuan a pasal tuium ken pakhat zawk chu a lak thlak sak a. 

Dengnuara chuan mumal taka chhang ta lemlo chuan a riat nawi kual ta vel mai mai a, thut pawh thu muanglo chuan, "Khawnge bai chhuan chhung chu, tlaklam per hi kan thlir mai mai teh ang" tiin kal nghal mai a han tum a, Dari chuan, "Kha, hei hi a rem chang lai laiah khan han thiat teh" tiin lenghmaser leh pardi chi tel chu a pe a, Denga chuan ngawi reng a la in, a kawizâl ah chuan khungin kângvâr lam chu a pan zui ta a. 

"Helam per hi chu a dâm deuh kha a ni a, a kang tha ve ngut ang emaw ?" ti rilru neuh neuhin tlâk lam mual chu a han thlir thuak a, Chutah, a beisei loh em em in aw bawk khan a ngaihtuahnna chu a rawn chhang leh ta thut mai a, "Kang se kang suh se i chhawr chuang lovang! " a rawn ti leh ta a, 'Aw chu a piah lawk thing mût khu luih luih kar atang chuan niin a hria a, chu thu a hriat leh zet phei chuan Denga chuan thi tur riakah inchanin a lungngai leh zual hle a, a hlauthawng a, a hmulthi te chu an ding er er tawh mai a, amah pawh chu chiai zo vekin kangvarah chuan a pingpei vel mai mai ringawt tawh a. 

Engemaw chen chutia a vah rawlai mai mai lai chuan a nupui Dari  chuan chawfak turin a rawn au ta àl àl a, Tichuan, an eirelna lam pan chuan a kal chho nghal ta vut a, a nupui chuan lo be luam mahsela a rul tawk lek lek bak chuan a chhanglo, an biakloh lah chuan a ngawi run run reng mai bawk si a, a nau pawh chuan mak ti deuhin a melh leh hrek hrek thin a. "Eng chu i hria nge ni! Tàia pa chu, i nun a daihlim riau a ka hriat, i nuamlo deuh emni? " tiin Dari chuan an pa awm dan danglam ta riau chu ngaihtha zànlo chuan a zawt ta nge nge a. A pasal chuan pangngai takin chhang mahsela thil diklo awm tlat a hriain a pasal chuan engemaw thup tum a nei tih a hrethiam thova. Mahse, nu â lo tak a nih avangin chutia patlingin a sawi duh tlatloh chu zawh chhuah tal a tum duh bik lem lo. 

Chaw chu an bar sawk sawk a, Denga chaw lem pawh chu a sak hle a ni tih an hre reng mai, chutiang tak a tibuaitu chu hriat chak dun viau mahsela tu ve ve pawh chuan thu zawh belh leh enah pawh an en tawhlo a ni. Tichuan, Chaw fak khamah tih tur ang angte antih zawh chuan rilru nuamlo tlang tak chuan khaw lam panin an inchhir haw leh ta hnak hnak a. 

Kawtchhuah an chuan chhuah meuh  chuan Ni pawh suk chen awrh chauh a ni tawh a,an fate Lawmthangi leh Thandanga-te unau chuan anlo hmuak a, Chawl khawmuanglo leh Rilru tawt up up chuan an fate pahnih nen an In lam chu an pan tlang nghal a, In an thlen hnu pawh chuan a pasal chu ala danglam leh chuanglo a,a chin pawh sawi ala tum chuanglo a ni tih hriain Dari chuan chîk deuh zawkin chutia a pasal mize dang ta lutuk chu hrethiam thei lovin a han zawt nawn leh ta nge nge a. 

"Taia pa, luikawrah khan eng thil chiah nge maw i zu tawn le, Dawi chhe ei ang maiin i hmel lah a daihlim hle bawk si a, i chin lah chu engmah i sawi tha duh der bawk silo, mang iti ang alawm... " a han ti a, Chutah meuh chuan Dengnuara pawhin zep reng a tul tawhlo tih hria a, Thi ngei turah a indah tlat tawh avang chuan a chhungte chu a hrilh hreh tak zet a,Mahse,a inthup zo ngang silo; Tichuan, a thil tawn Mak dangdai tak chanchin chu hmaih nei hauh lovin a chhungte chu a hrilh faita leng a. 

A nupui  leh a nau chu an inmelh leh ralh thin a, an pa thil sawi chuan a thawngin Dari phei chuan a hlauin a zam ta em em mai a, an awm chu a nuam thei tawh ngang lo, anni pawh chuan Denga chu hmuh thianglo hmutu ah ngaiin pialral a kai palh ang tih an hlauthawng hle a, an zàm ru em em a ni. An fate pahnih lah naupang mai anla nisi a,engmah an hrethiam ve silo,hlim em em in an nu leh pa te feh haw chu anlo lawm a,hmeichhe hnuk no a kai chhuak a, Dari chuan a mittui chu a fate hmuhloh ah chuan a hru leh zauh zauh thin a, Pawithanga erawh chuan a hrethiam ve hle a, ani pawh a zâm ru ve em em tho a ni. An thiamawm khawp mai, a tawngtu nih chuan a chhe ber kha an dawnlo thei silova, rilru nuam taka awm chu a har duh ngawt ang le!! 

Tichuan, Kawlah ni a liam a,an hlauhthawn ruk ang ngeiin Denga chu zanriah bar hma deuh atang chuan a khua a sik tan ta a, chutah zet phei chuan an mangan a zual hle mai, an zanriah kil pawh run dal lek lek barin puitling ho chu an tho thuai hlawm a, an chin hre tawh thenawm hnai thenkhatte pawh an rawn chuang lut hlawm tak tak a. Dengnuara thil tawn chu mak antiin an ngaih a thalo hlawm hle a, A vau a sih chuan huai nei ngeiin chu huai chu Denga chuan ati lungawilo a nih an ring vek hlawm a, an hlauthawn ruk pui hle a ni. 

A tuk khua alo var leh thleng pawh chuan Denga chu a khawsik chuan ala kian san thei chuanglo a, a pu pawhin a thla te a hual sak hial nghe nghe a;Mahse, awmzia a awm mang tlatlo! Bawlpute pawh kovin inthawina te pawh nei bawk mahsela Dengnuara chuan damni hmel reng reng a hmuthei chuang silo, an beidawng tawh hle mai...! 

Dengnuara damlo chu a tawngvai nasa thei hle mai a, a tawngvai chu fiah fakin hriat theih nilo mahse an vau Sih nen a inkungkaih thil ni ngei a rin tur hi a sawi chhuak fo mai a, chu Sih ah chuan Denga thlà chu a tang ngei anih an ring a, a thlâ chu koh ngei chu an tum ta a ni. 

Engemaw chen chutia khum bet chawt a a nat hnuah chuan tuk khat chu tlem a rawn leikang deuhin a chhungte chu tukthuante pawh a rawn kil pui peih hial a, Zanriah te pawh eiin a dam ve tawh dawnah an ngai a, an lawm hle a ni. Chutia chawte a bar peih takah chuan tiin a pi chuan ar alo âwm sak a, chutiangte chu a ei bawk a ni. 

A tha chho ve zel turah an ngaih laiin that lam aiin hniam lam a pan leh ta tlat mai a, chutah zet chuan a thlâ chu koh thuai angaiin an hre ta a. Tichuan, ama pa ngei Dengleha chu a thla ko tur chuan amah chauhin a thawk chhuak ta a ni. 

Thla ko tur hian pa huaisen leh ramvachal, duaidimlo tak nih a ngai a, Hlauhna rilru pai chung chuan hlawhtlinna a chan theihloh va; Chuvang chuan hlauh neilo leh huaisen tak, sam sar nei tan lo chuan tih ve mai mai chi ah an ngailo a; Chuvang chuan hetiang tithei tur hi chu in za nufa khua ah pawh an vang pharh zel a ni. 

Tichuan, Dengleha chuan sih chu a thleng a, mak em emin chulai ruam chu a reh hian a reh tlawk tlawk mai a, lui luang ri ker ker bak hriattur a awmlo, sih tui lah chu che map lovin a tling kung mai bawksi a. 

Chutah a fapa thla ko haw ngei tur chuan bul a han tan ta a, a thiam ang tawk a Sih huai tih lungawi tumin a han bei tan ta a. Mahse, engmah thlenglo ang mai chuan ala reh vung vung mai si a, Dengleha pawh a beidawng tan viau tawh a. Chutah le! Tui chu a ri deuh burh hian a hre ta a, mahse, tui chu a che chuang eih silo, mak pawh atih hman hma a ni ber ang chu,... A bul vel a hnimte chu tâwntu an awm tih hriat takin a che ta suau suau mai a. 

Hmuh theih siloh engemaw chu a tal vel a ni tih hriat takin a bul vel a hnim leh hnahthel tlate chu awmze nei tak mai hian an thle rual leh dual dual thin a. Thawklehkhatah chu thil chu a vir hian a vir kual ta puat puat mai a, chaktak taka thlawkin amahte chu an thlawh hual ta fur fur mai a, Chutih chhung zawngte chuan Dengleha chuan zaidawh thei ang ber zelin a be mawlh mawlh reng a, engemaw ti hnuah chuan hawn pui zai chu a rel ta a. Mak tak maiin chu thil chu a kal ve mai bawk a. 

Ramtuk khat dawn an kal tawh a, harsatna awmlo chuan anla inchhawm haw ve zel a ni. Engemaw chen an han kal leh a, Khua pawh leipui chen emaw lek a ni tawh ang tihah chuan Thla chu a kal ve duh ta tlatlo mai a,theihtawp a a bei ngial chung pawhin Dengleha chuan a fapa chu In a thlen pui thei ta nganglo a ni.

Hetia thla an koh hian zaidam takin an be reng thin a, In an luh hma chuan hnung lam an hawi thianglo a, midang an biak a thiang heklo, kawnglak ah mi pawh hmuin lo be mahsela an chhang thianglo a ni, In an thlen pawhin an luh hmasak tir ngei ngei thin a ni. 

Chutiang thil a thlen hnu, nitam pawh ala liamlo tihah chuan Dengnuara chu rawn na zual thutin a nupui fanaute lo nghak turin Pialral kawngka chu a hawng ve ta a ni. A boral hian kum 29 mi chauh niin, anupui leh a fate pahnih a kalsan a ni. A thlan hi Serchhip khawhluiah hmuh theihin ala awm reng a ni. 

....... (Mawia, Rinfela pa,Serchhip)..... 

...